Ngdiak a olechotel er a Biblia me a reksi el kmo tia el tekoi a mleketmokl.

A omelechesel tia el bades er a betok el Biblia a mla rulleterir a rebebil el mo omdasu el kmo, a techolb el kirir a rulekoad el chad a lurruul er ngii er a taem er a Paulus. El ua tiang: “A lsekum ngdiak okiis e te mekera tirke el melai er a techolb el kirir a remla mad?”​—New International Version.

Me nguaisei, engdi ka momtab a tekingir a reteru el chellimosk er a Biblia. A Dr. Gregory Lockwood a melekoi el kmo tia el uldasu el kmo a techolb a mileketmokl el “kirir a rulekoad el chad” a “bedengel a techolb el diak debetik a omesodel er a Biblia me a lechub e ngreksi.” Me ngdi osisiu, a Professor Gordon D. Fee a milluches el kmo: “Ngdiak a ochotel chouaika el techolb er a Biblia me a dirrek el reksi. A N[ew] T[estament] a diak louchais el kirel tia el tekoi me a diak a ngii di el ikelesia me a klechelid er a Rekristiano er a irechar el mirruul er tiang er a uriul er a lemad a rechapostol.”

A Biblia a melekoi el kmo a rultirakl er a Jesus a kirir el ‘mor a bek el bedengir a re chad er ker me ker e meruul er tir el mo obengkel, e melecholb er tir . . . , e olisechakl er tir me bo loltirakl a ikel rokui’ el bla ledung. (Mt. 28:19, 20) Me a uchei er a lemetecholb a chad e ngkirel el mo mesuub e mo oumerang e mo olengesenges er a Jehovah me a Ngelekel. A ulekoad el chad el mla mora debull a diak el sebechel meruul er tiang me a diak el sebechel a Kristiano el ngar el mo meruul er ngii el kirel.​—Oli. 9:5, 10; Jn. 4:1; 1 Ko. 1:14-16.

Me ngera mle belkul a tekingel a Paulus?

A rebebil chad er a Korinth a dilu el kmo ngdiak a okiis er a kodall. (1 Ko. 15:12) Me ngulechotii el kmo tia el uldesuir a klsuul. Ngdilu el kmo ngdi “chemau a kodall er a bek el sils.” Me alta ngmlo chobangel a kengaol el tekoi, engdi ngmle ulterekokl a rengul el kmo a uriul er a kodall e ngmo mekiis el mora eanged, el di ua Jesus.​—1 Ko. 15:30-32, 42-44.

A rechad er a Korinth a mle kirir el mtebengii el kmo a dengellitel e ngbelkul a kmo kede mo chemau a omelsemai er a bek el sils e mad er a uchei er a bo debekiis. Me a bo le “metecholb el mo obengkel a Kristus” e te dirrek el mo “metecholb el mo obengkel er a kodellel.” (Rom 6:3) Tia belkul a kmo te uai a Jesus el mo chelebangel a omelsemai e mad me bo el sebechir el mekiis.

A betok er a eru el rak er a uriul er a lemetecholb a Jesus er a ralm, e ngdilu er a reteru el apostol er ngii el kmo: “Ma techolb el bo kmetecholb er ngii cho bo metecholb er ngii.” (Mk. 10:38, 39) A Jesus a dimlak losaod er a techelbel er a ralm. A mle belkul a tekingel a kmo a blakerreng el mora Dios a mo uchul a kodellel. Me a Paulus a milluches el kmo a rengellitel a mo “dmak el chuarm me bo el [sebechir el] dmak el mukebkall.” (Rom 8:16, 17, NW; 2 Ko. 4:17) Me ngkirir el mad me bo el sebechir el mekiis el mora eanged.

Me a tekingel a Paulus a mle sebechel el moiuid el kmo: “E le lak leuaisei, e te mo mekerang tirke el mo metecholb e le ngsorir el nguu a kodall? A lsekum a rulekoad a diak bo lebekiis, e ngera uchul me te mo melai er a chouaitia el techolb?”