Ke mla chemuiu A Ongkerongel er chelecha el rak? A leuaisei, e mesa el kmo ngsebechem el onger aika el beldukl el ker:

Ngkirel mo uangera blekerdeled el mora rengellitel?

Kede oba omereng el saul el kirel a klaumerang er tir engdi ngdiak desal kmal mo imis el chemat er tir. Kede kerekikl me ngdiak ‘dolad er a rechad.’ (Jud. 16) Ngdiak lsoad loker er sel rolel e te mlo ngellitel.​—w20.01 er a 29 el llel.

Ngera kirel loterekeklii a rengum el kmo a Jehovah a ungil medengelkau?

A Biblia olecholt el kmo ngmle medengelkau er a uchei er a omechell. E onger a nglunguchem. Ngmedengei aike el ngar a rengum, e dirrek el medengei el kmo ngera komdasu, me a omerellem a ngar ngii a lerellii er ngii. (1 Kr. 28:9; Osi. 27:11) A Jehovah a ngike el ulemekrael er kau el mo er ngii.​—w20.02 er a 12 el llel.

Ngoingera e ngungil dongedecheduch me a ungil di deluk?

Ngdmeu a rengud el mengedecheduch el kirel a Jehovah. Ngungil dongedecheduch a lsekum kede mo medengei el kmo a chad a meruul er a tekoi el sebechel mo uchul e ngruebet er a klengit. A remechuodel a mengedecheduch el ngosuir a chad er aike el lousbech. E ungil el di deluk sel soad el mo medengei me a lechub e kede ouchais a tekoi el kirel a rolel a omesiunged el ngar er a beluu el merrob er a urered. Ngdiak douchais a berrotel el tekoi.​—w20.03 er a 20-21 el llel.

Ngmekera delebechel el chebud el ngar er a 2 el bliongel er a Joel e kakerous ngii me aike el ngar er a 9 el bliongel er a Ocholt?

A Joel 2:20-29 a melekoi el kmo a Dios a mo chorideterir a delebechel el chebud e tibir el lmuut el mo mesterir aike el lurriid. A uriul er isei, e a Dios a mo oitelii a reng er ngii. Aika el tekoi a tilaut er sel taem el Babilon a tilemellii a Israel me a uriul er ngii. A Ocholt 9:1-11 a mesaod er a rengellitel el ua delebechel el chebud el louchais er a kerrekerilel a Dios el kirel tia el mekngit el beluulechad e tiang a rulleterir a rechad el mo ouedikel a rengrir.​—w20.04 er a 3-6 el llel.

Ngtecha king er a diluches er chelecha el taem?

Russia me aike el lolengeseu er ngii el beluu. Te merrob a urerir a rechedal a Dios el berkel a klumech e olecholt el kmo te ouketui er a Resioning. A king er a diluches a melasem el melai er a klisichel a king er a dimes.​—w20.05 er a 13 el llel.

Aike el kltiu el blekeradel el llechukl er a Galatia 5:22, 23, BT, ngdi ikaikid a “rodech er a Reng”?

Ngdiak. A chedaol reng a ngosukid el omekeroul a lmuut el bebil er a blekeradel el ua llemalt. (Efe. 5:8, 9)​—w20.06 er a 17 el llel.

Ngera ta er a telemellel a de post a tekoi el kired er a Internet?

A tekoi el de post a sebechel rulleterir a rechad el mo omdasu el kmo ngdi soad el mesaod er kid, el diak doba ngariourreng.​—w20.07 er a 6-7 el llel.

Ngera sebechir a Rekristiano el suub er a remeduch el chad er a omenged?

Te mora basio me a taem el lengar ngii a ngikel. Te meduch el ousbech a melemalt el klekedall. Te oba blekeu loureor e le eanged a diak lulterekokl. Kid me ngdirrek el sebeched el meruul uaisei sel doruul er a ureor er a berkel a klumech.​—w20.09 er a 5 el llel.

Ngera bebil er a rolel e ngsebeched el ngosuterir tirke el mesuub a Biblia el menglou er a bltkil a rengrir el mora Dios?

Ngsebeched el melisiich er tir el mo menguiu er a Biblia er a bek el sils e mo melebedebek aike el lulenguiu. E sebeched losisecheklterir el mo meluluuch.​—w20.11 er a 4 el llel.

Te rua techa uldimukl er tia el tekoi el kmo: “Rokuil chad a mukngar el ngara Kristus”? ​—1 Ko. 15:22, BT.

A apostol Paulus a dimlak lolekoi el kmo a rokui el chad a mo mekiis. Ngbai millekoi el kirir a rengellitel el Kristiano, el tirke el “mlechedaol el ngara Kristus Jesus.” (1 Ko. 1:2, BT; 15:18, BT)​—w20.12 er a 5-6 el llel.

Ngera te mo meruul er ngii a rengellitel er a uriul er a bla ‘lobult el kmal di mereched, el ua tal busechmad, sel le mekimd a ulebongel el ngerel a trombetang’?​—1 Ko. 15:51-53.

Te mo oltirakl er a Kristus el mengedereder loba skors el deel. (Och. 2:26, 27)​—w20.12 er a 12-13 el llel.