A Jehovah milengerechir er a rechedal el mo chedaol. Ngmillekoi el olengeseu er tir el mo chedaol el kmo: “Lak momerk a otuub er a delongeliu. Ngdiak el kirem el mo dechor el omtok er a klengar er a chad. Ngak a Jehovah.”​—Lev. 19:2, 16, NW.

Tia el tekoi el “mo dechor el omtok” a ungil oidel loltirakl er sel tekoi er a Hebru, engdi ngngera belkul? A ta el reference er a rechad er a Chijudea el kirel a babier er a Levitikus a kmo: “Tia el tedebechel tia el bades a . . . meringel er kid a mesaod er ngii e le ngdiak dodengelii tia el belkul a tekoi el tekoi er a Hebru, el ngii a kmo ‘dechor er bebul, bita er ngii, me a lechub e ngkmeed er ngii.’”

A rebebil er a hakase a kmo tia el bades a omechelel sel uleak uchei el bades el melekoi el kmo: “Bo bliochel e melemalt sel momiich a tekoi el okiu a llach; lak molab el mor a re mechebuul, ma lechub e medakt er a re meteet.” (Lev. 19:15) A leuaisei e a 16 el kekerei el bades a sebechel belkul a kmo, ngdiak el kirel a chad el mo “dechor el omtok” er a tang er a rolel a kerrekeriil, klsiobai, me a lechub e ngtekoi er a telungalek. E kmal diak el kirel el mengebirukel a tekoi el meruul er a mo klungiolel. Nguaisei el kmal diak el kired el meruul aika el tekoi engdi ngngar ngii a bleketakl el rolel e kede mo medengelii a belkul a tekoi losaod er ngii a 16 el kekerei el bades.

Molatk er a uchelel tia el bades. A Dios a dmu er a rechedal el kmo ngkmal diak el kirir el omerk a otuub. Mutebengii el kmo alta telulechoid a sebechel muchel a mondai engdi a otuub a lmuut el klou er a telulechoid. (Osi. 10:19; Oli. 10:12-14; 1 Ti. 5:11-15; Jak. 3:6) A otuub a tekoi el medung el moktek er ngii a melemall er a chisel a ta er a chad. Ngike el oltuub a locha mo omulak el omtok er a chad, mo lmuut me a lsekum e tiang a sebechel mo uchul a telemellel a klengar er a chad. Molatk el kmo a ruleltuub er a Naboth a dilu blulak el kirel el luchul me ngulebetech er a bad el mad. (1 Ki. 21:8-13) Chochoi, a chad loltuub a sebechel mo dechor lomtok er a klengar er a ta er a chad, el ua losaod er ngii sel ongeru el blingelel a Levitikus 19:16.

Me a lmuut kung, a chad el oltuub a ochotii el kmo ngouketui er a chad. Ngar er a 1 Johanes 3:15 e kede menguiu el kmo: “Ngikel ouketui er a tar ngii a omekoad er a re chad, e kemiu a medengei el kmo ngikel omekoad a diak er ngii a diak a ulebengelel klengar.” Ngutebengall el kmo a Dios a melekoi er a uriul er a 16 el kekerei el bades el kmo, “Lak mongemekl er a kngtil a rengum el bedul a tar a chad.”​—Lev. 19:17.

Me aika el tekoi el ngar er a Levitikus 19:16, NW a meskid a mesisiich el ulekrael. Ngkmal kired el otngakl a mekngit el uldasu el kirir a rechad e kmal diak el kired el mo oltuub er tir. A beot el omesodel a kmo, a lsekum kede “mo dechor el omtok” er a chad me kede mechei a kngtil a rengud me ngrullid el mo oltuub er ngii, e tia ochotii el kmo kede ouketui er ngii. A Rekristiano a kmal kirir el chorideterir er a chouaisei el blekeradel.​—Mt. 12:36, 37.