A Jesus a siluub a ungil blekeradel el ngii a uriul e ngmo ngosuir el mo ungil kledem er a ureor el kirir tirke el bo lobengterir el ngar tia el chutem. Ngmekera dengai a klungioled er a kerebil a Jesus? Sel bo dorriter er a kerebai el lebilecherei e kede mo metik a edei el omellach el sebechel ngosukid el mo ungil kledem er a ureor. Aika el omellach a mo ngosukid el omekeroul er a kltarreng e mo ungil loureor el obengterir a rebebil.

A ungil kledem a ngariou a rengul e omes er a rekldemel er a ureor el meklou a ultutelir e kmal diak lolasem el di ngii lolecholt er ngii. A Jesus a silubii tia el tekoi er a Demal. Alta ngdi ta el Jehovah okedongall el Ulemeob, engdi ngmle soal a rechad a bo lodengei a meklou a ultutelel el ureor el leriruul a Ngelekel e kldemel er a ureor. Ngsebeched el mesa tiang er a tekingel el kmo: “Bo doruul er a chad; kede mo rullii el ua ikid el ua teleteled.” (Gen. 1:26) A Jesus locha kmal milechesuar er a klengariourreng er a Jehovah er a ledu aika el tekoi.​—Psa. 18:35, NW.

A Jesus er a lengar tia el chutem e ngdirrek el lullecholt er tia el klengariourreng. A rechad er a lechat er ngii e ngngilai a rokui el klebkall el msa Jehovah. (Mk. 10:17, 18; Jn. 7:15, 16) Ngmle blak a rengul meruul er a budech er a delongelel ngii me a redisaiplo er ngii. Ngdirrek el dimlak lomes er tir el mesiou e te bai sechelil. (Jn. 15:15) Ngika merriso a ocherir el olsisechakl er tir er a klengariourreng. (Jn. 13:5, 12-14) Kid me ngdirrek el kired el mo ua Jesus e mo omes er a rekldemed el meklou a ultutelir e diak di dolemolem aike el soad, e bai  kired el mo melatk er tir. Sel ‘bo . . . de kakull’ e lak dolatk er a kmo ngtecha mo nguu a chetengakl, e ngkmal betok a sebechel meketmokl.​—Rom 12:10.

A ngariou a rengul chad a dirrek el mtebengii el kmo a “le betok a ngesou er a uldasu e a uldasu a mo ungilbesul.” (Osi. 15:22) A lebetok a experience me a duch er kid me kid a kired el mtebengii el kmo ngdiak a chad el medengei a rokui el tekoi. Mo lmuut er a Jesus me ngmle medengei el kmo ngngar ngii a tekoi el dimlak lodengei. (Mt. 24:36) Ngika dirrek el mle soal mo medengei aike el lodengei me a dirrek el uldesuir a redisaiplo er ngii, el tir a dimlak el mecherrungel. (Mt. 16:13-16) Sei a uchul me te kmal mle sorir el obengkel! Ngdi osisiu, sel lebo lengariou a rengud e bo dutebengii el kmo ngdiak dodengei a rokui el tekoi e debechititerir a rebebil me lolengeseu e louchais a uldesuir, e kede mo melisiich er a budech me a tekoi a mo “ungilbesul.”

Tokubets el remechuodel a kirir el oukerebai er a Jesus el ngar tia el rolel sel ledak loureor. Ngkirir el diak lobes el kmo a chedaol reng a omekrael er a rokui el mechuodel me ngsebechel mekrolii a ngii di el techa er tir. A lsekum e ngngar er aike el miting er tir e te rulleterir a rokui el mechuodel el mo melechesiu el kmo ngsebechir el olecholt a uldesuir, e ngsebechir el dmak el remuul a omelilt el mo uchul a klungiolel a ongdibel el rokir.

A ungil kledem a tabesul osengel sel loureor lobengterir a rebebil. Ngkongei er a tekoi me a lechub e nguldasu me ngmeketmokl a lsekum e ngdiak a kngtil. A Jesus a mle betok el taem el lomes er a Demal lolecholt er tia el blekeradel. El ua tiang, ngulderechii el me olsobel er a rechad er a kodall alta te rredemelel a mo mad.​—Jn. 3:16.

A Jesus a ullecholt er a tabesul uldasu sel lekirel me a lechub a lsekum e ngdimlak a kngtil a loruul el uaisei. Molatk el kmo ngika mlei el me olengeseu er a rechad er a Israel me nguaisei engdi ngdirrek el ngilsuir a redil er a Kanaan. (Mt. 15:22-28) Ngdirrek el mle tabesul osengel el bedul a redisaiplo er ngii. Ngmle kltmokl el lousubes er a sechelil er a Petrus er a lotngeklii er mederir a rechad. A uriul e ngulterekokl a meklou ultutelel ngerachel er a Petrus. (Lk. 22:32; Jn. 21:17; Rel. 2:14; 8:14-17; 10:44, 45) A kerebil a Jesus ochotii el kmo ngkired el ‘ochotii el mora rokui el chad a tabesul el uldasu’ loeak sel lak di dolemolem er a uldesued e kede bai kongei a uldesuir a rebebil a lak a kngtil.​—Fil. 4:5, NW.

A bo doba tabesul el uldasu e ngmo odbechid el mo meruul er a ungil kirir a rebebil me bo el sebeched el dmak loureor el ngar er a budech. A Jesus a kmal mle ungil el oureor el obengterir a rebebil  me a recherrouel el mle mechechei er ngii a ultelechakl er ngii el kmo, ng “ousechelei er a re chad er omelai el tax ma re kuk bebil er a re mekngit el chad” el tir a kilengei lorrenges er ngii. (Mt. 11:19) Kid, ngsebeched el mo uai a Jesus e mo ungil loureor el obengterir a rechad el tir a ngodech er kid? A odam el Louis el ngii a mla oureor el obengterir a rebetok el kakerous el chad er a le circuit overseer me a dirrek er a losiou er a Bethel a kmo: “Ngsebeched el omekesiu er a oureor lobengterir a rechad el diak el mecherrungel el mora okedecherul a kboub el rruul er a bad. A rellel a kboub el rruul er a bad a ousbech er kid el mo meringel loureor e le bad a kakerous a meklungel me a teletelel. Ngkired el adjust me bo lsebechel lungil el obechobech. Ngak a melasem el adjust er ngak me bo lsebechek el ungil loureor el obengterir a rebebil me bo lsebechel meketmokl a ureor.” Ngika el odam mera el oba ungil el uldasu!

Ngera el techall a sebeched lousbech lolecholt er a tabesul el uldasu er a ongdibel? Ngsebeched lolecholt er tia el blekeradel sel doldingel lobengterir a rechad er a ongdibel. Kede locha mo oldingel lobengkel a chad el betok a ngerechelel er a telungalek er ngii er kid me a lechub ngkakerous a meklunged. Kid, ngsebeched lochotii a tabesul el uldasu loeak sel dengedechii a rreted me a lechub a rolel a odingel el mo oltirakl er tir me bo lsebeched el ngosuterir el mo dmeu a rengrir el oldingel?

A ungil kledem a “kldmokl el merous.” (1 Ti. 6:18) A Jesus er a loureor lobengkel a Demal e nglocha mlo mtebengii el kmo ngdimlak a ngerang el lomart. A Jesus a “mlar ngii er ser a llia melidiul er a le ngar ngii” a Jehovah, e ngilai a klubelel er ngii. (Osi. 8:27) A Jesus a kmal mle dmeu a rengul louchais er a redisaiplo er ngii “a bek el tekoi el [lerirenges]” er a Demal. (Jn. 15:15) Ngsebeched loukerebai er a Jehovah loeak sel douchais er a rekldemed er a ureor a klemedengei er kid me aike el tekoi el bla desuub. A ungil kledem er a ureor a diak lolasem el mengedereder er a rebebil loeak sel lak louchais er tir aike el kirir el mo medengei me a lechub aike el tekoi el mo ngosuterir. Ngbai kmal dmeu a rengul louchais er a rechad aike el ungil tekoi el bla lesuub.

Ngdirrek el sebeched el merous el mora rekldemed loeak sel dolisiich er tir. A chad sel leues a meringel el urered e lechat er kid el kirel, e ngdiak lesal rullid el mo ungil a rengud? A Jesus a milengoit a taem el obengterir a rekldemel e ouchais er tir aike el ungil el lebiles er tir. (Momekesiu er a Mateus 25:19-23; Lukas 10:17-20) Ngdirrek el dilu er tir el kmo te “mo meruul a kuk meklou” er aike el lurruul. (Jn. 14:12) Sel kesus er a uchei er a lemad, e ngchilat er tir e dilu el kmo: “Kemiu tirikel dimleblechoel lobengkek era ikel ongarm el mer ngak.” (Lk. 22:28, BT) Aika el tekingel a locha kmal rirutech a rengrir e millisiich er tir el mo meruul a ureor! Me kid a lsekum e kede mengoit a taem el chemat er a rekldemed er a ureor e te ulterekokl el lmuut el mo dmeu a rengrir e mo blak a rengrir el oureor.

A odam el Kayode a melekoi el kmo: “A bo dungil kledem er a ureor e ngdiak el belkul a kmo kede ungil er a bek el doruul e ngbai a ungil kledem a rulleterir a rokui el chad el mo dmeu a rengrir e rullii a ureor el mo kebekakl el kirir tirke el oureor el obengkel.” Kau, nguaisei a blekerdelem? Nglocha sebechem el oker er a rebebil er a rudam me a rudos er kau el kmo ke uangera el kledem er a ureor. A lsekum e ngungil a rengrir el oureor el obengkem el ua redisaiplo er a Jesus el mle dmeu a rengrir el obengkel, e ngsebechel mo ulterekokl a rengum el melekoi el ua apostol Paulus el kmo: “Kemam a oureor el obengkemiu el kirel a deuil a rengmiu.”​—2 Ko. 1:24.