Ke mla chemuiu A Ongkerongel er chelecha el rak? A leuaisei, e mesa el kmo ngsebechem el onger aika el ker:

A Psalm 103:8 el melekoi el kmo a Jehovah a “chubechub” e “mui er a diak le mengodech el bltikerreng,” ngmekera lolterekokl er a rengud?

Kede medengei el kmo a Jehovah a chubechub a uchul e ngkongei lousubes a cheleuid el omerelled. A Psalm 103:8 oterekeklii a rengud el kmo ngdirrek el kmal soal lolengeseu er kid. Ngkmal kired el mo oukerebai er ngii.​—w21.01 er a 21 el llel.

Ngera uchul me a Jehovah a kiltmeklii a blechebechel a derreder?

Ngmirruul el uaisei e le ngbetik a rengul er a telungalek er ngii. A blechebechel a derreder a uchul me a telungalek er a Jehovah a sebechel meruul a tekoi el ngar er a ungilbesul e ulengeasek el rolel. A derta el chedal a telungalek el oltirakl er a blechebechel a derreder a medengei el kmo ngtecha oterekokl a tekoi el mengilt me a techa ngike el omekrael a otutel.​—w21.02 er a 3 el llel.

Ngera uchul me a Rekristiano a kirir el mo kerekikl sel lousbech aike el app el dousbech el kau message?

A lsekum a chad a melilt el mo ousbech aika el app e ngkirel mo kerekikl el melilt er a rungil sechelei. Ngmeringel er kid a meruul el uaisei a lsekum kede teloi er a klou el group er a rechad el kau message. (1 Ti. 5:13) Ngdirrek el ngar ngii a telemellel a domerk a teloched el chais me a dousbech er a contact er a rechad er a ongdibel el kirel a omengereker.​—w21.03 er a 31 el llel.

Ngera bebil er a uchul me a Dios a milecherei Jesus me ngmo chuarm e mad?

A ta er ngii a Jesus a mle kirel mo kltekotel er a kerrekar me bo lsebechel ngubeteterir a Rechijudea er a delebeakl el mlo er tir. (Gal. 3:10, 13) Ongerung, a Jehovah a milengetmokl er a Jesus el kirel a ngerechelel el Ngarbab el Prist. Me a ongedei, a Jesus el lilemelemii a blakerreng er ngii el mora kodall ochotii el kmo a rechad alta te mo chelebangel a meringel el omelsemai engdi ngsebechir el lomelemii a blakerreng er tir. (Job 1:9-11)​—w21.04 er a 16-17 el llel.

Ngera sebechem el meruul er ngii a lsekum e ngmeringel er kau a metik er a rechad er a blai?

Ngsebeched el metik er a rechad a lsekum e kede mo oldingel er tir er aike el taem el lengar er a blai. Ngdirrek el sebeched el ngodechii a basio el domerk a klumech er ngii. E sebeched el melasem a kakerous el rolel e ngsebeched el merkii a klumech, el ua letter writing.​—w21.05 er a 15-16 el llel.

Ngera mle belkul a tekingel a apostol Paulus er a ledu el kmo: “Ngak a ulekiu a Llach e mlad el kirel a Llach”? (Gal. 2:19)

A Llach er a Moses a mileketeklii el kmo a rechad a diak el mecherrungel ngdirrek el ulemekrael er tir el mora Kristus. (Gal. 3:19, 24) Tia rirellii a Paulus el mo oumerang er a Kristus. Me a Paulus er a lekengei er a Jesus e ng “mlad el kirel a Llach” el belkul a kmo a Llach a mlo diak a klisichel er ngii.​—w21.06 er a 31 el llel.

Ngmekera Jehovah e ungil kerebai el kirel a doutekangel?

A Jehovah a mla outekangel a otuub el mora ngklel, ultok er a llemeltel mengedereder, ultekengir a rebebil er a rengelekel, blulekngel a Satan, ringel lechelebangel er ngii a remesiungel, cherroid lolechesuar er ngii er a resechelil el mla mad, ulecheracheb er a delongelir a rechad, me a telemellel a blebelel.​—w21.07 er a 9-12 el llel.

Ngera el kerebai el kirel a kllourreng a lekiltmeklii a Josef?

A Josef uluutekangel a chelebirukel el omerellir a rubekel. A omerellir a mlo uchul e ngmlotelechakl er a tekoi el dimlak lerellii e mlekelebus er a beluu er a Ekipten el betok el rak.​—w21.08 er a 11-12 el llel.

Ngera el okesiu er a omelmesim a losaod er ngii a Hagai 2:6-9, 20-22, NW?

Aike el renged er tia el beluulechad a diak el sorir a klumech er a Renged engdi a rebetok el chad a kmal sorir e mla mei er a klemerang. Ngdi kmedung e aika el renged er tia el beluulechad a mo nguu sel ulebongel el omelmesim e nguemed el mo cherechar.​—w21.09 er a 15-19 el llel.

Ngera uchul me ngdiak el kired el mo mesaul el omerk er a klumech?

A Jehovah mesa blakerreng er kid e kmal dmeu a rengul. A lsekum e kede melemolem lomerk e diak bo demesaul e kede mo nguu a diak a ulebengelel el klengar.​—w21.10 er a 25-26 el llel.

Ngmekera 19 el bliongel er a Levitikus e ngosukid el mo oltaut er tia el ulekrael: “Bo mchedaol el diak a telemelliu er a ikel rokui el moruul”? (1 Pe. 1:15)

Tia el bades a locha mlengai er a Levitikus 19:2. Tia el 19 el bliongel ouchais a betok el rolel e ngsebeched el loltaut er a 1 Petrus 1:15 er a chelsel a klengar er kid er a bek el sils.​—w21.12 er a 3-4 el llel.