A Ker el Mla er a Remenguiu
A David ngkmal milenglou a tekingel er a ledu el ngar er a Psalm 61:8 el kmo, ngdi mo ‘blechoel’ el oldanges er a ngklel a Dios?
Ngdiak, ngmle sebechel melekoi el uaisei.
Molatk aike el leliluches er tia el bades me a lmuut el bebil er a bades: “Me di bo kblechoel el mengitakl odengesel a ngklem sel kultaut a telbilek er a bek el sils.” “Ak mereng a sulem e Rubak el Dios er ngak, el oba renguk el rokir, ak mo mengebkall er a ngklem el mo cherechar.” “Ak mo oldanges er kau el diak a ulebengelel el mo cherechar.”—Psa. 61:8; 86:12; 145:1, 2.
A David a dimlak longlou a tekingel e lomdasu el kmo ngkmal diak bo lemad. Ngmle medengei el kmo a Dios a dilu el kmo a klengit a uchul a kodall, e ngii el David a di mle ngii el melekoi el kmo ngngar er a klengit. (Gen. 3:3, 17-19; Psa. 51:4, 5) Ngmle medengei el kmo a rechad loba kengei er a Jehovah el ua Abraham, Isak, me a Jakob a mlad. E ngii a miltebengii el kmo ngmo mad. (Psa. 37:25; 39:4) Me a tekingel el ngar er a Psalm 61:8 a mesaod er a urungulel el mo oldanges er a Dios el di blechoel er a klemengetel a klengar er ngii.—2 Sa. 7:12.
A bebil er a tekoi lulluches a mesaod el kirel a klengar er ngii, el ua deues er aike el omesaod el llechukl er bebul a Psalm 18, 51, me a 52 (NW). Ngar er a Psalm 23 e ngmesaod er a Jehovah el mengkerengel a sib el omeskid a ulekrael, ulengull, me a osebechakl. E a David a mle uaisei el mengkerengel a sib. E mle soal mesiou er a Dios er a ‘klemengetel a klengar er ngii.’—Psa. 23:6.
Molatk el dirrek el kmo ng Jehovah ulemekrael er a David el mo meluches aike el rokui el liluches. A uldimukl er aike el lulluches, a ulaoch el kirel aike el mo duubech er a ngar medad. El ua tiang, ngar er a Psalm 110 e a David a milluches el kirel a taem el Rubak er ngii a mo ‘dengchokl er a kadekmel [a Dios]’ er a eanged e nguu a klou el klisiich. Klou el klisiich el mo mekerang? El mo mengedereder er a recherrouel a Dios e “mo mesisiich er a re king er a beluulchad el rokir.” A David a uldidellel a rsechel ngika el Mesias, el mo mengedereder el ngar er a eanged e “mo prist el mo cherechar.” (Psa. 110:1-6) Jesus a dilu el kmo tia el ulaoch el ngar er a Psalm 110 a melutk el kirel e mo tmaut er a ngar medad.—Mt. 22:41-45.
Chochoi a David a mlukreng el mo meluches el kirel a taem er ngii me a dirrek el kirel a ngar medad, sel bo lebekiis er a kodall e bo lsebechel loldanges er a Jehovah el mo cherechar. Tia ngosukid el mo mesa el kmo Psalm 37:10, 11, 29 a mesaod el kirel a blekeradel er a Israel er a irechar me a dirrek el mo blekeradel er a ngar medad el klebesei sel lotaut a rokui el telbilel a Dios.—Momes er a parakurab 8 er a suobel el “Ke Mo Obengkek el Ngar a Baradis” el ngar tia el Ongkerongel.
A Psalm 61:8 me a lmuut el bebil er a bades ochotii el kmo a David a mle soal loldanges er a Jehovah er a Israel er a irechar el mo lmuut er a kodellel. Ngdirrek lochotii el kmo ngngera ngmo meruul er ngii a David sel lluut lolutii a klengar er ngii a Jehovah.