Kau ke mle kerekikl el menguiu aike el Ongkerongel er chelecha el rak? Ka mesa el kmo ngsebechem longer aika el ker:

Ngera el klungiaol a bo dengai sel dongoit a taem el mengedecheduch, orrenges, e melatk er a Jehovah?

Kede mo ungil melilt a tekoi, lmuut el mo ungil el sensei, mo mesisiich a klaumerang er kid, e medechel a bltkil a rengud el mora Jehovah.​—w22.01, 30-31 el llel.

Ngmekera ngosukid sel bo doumerang er a Jehovah me tirke el lousbech er tir lomekrael?

Chelechang e ngtaem el dosuub el mo oumerang er a rolel a Dios a loruul a tekoi e lak doumededenger a ulekrael me a omelilt er a remechuodel. Sel taut a kloul ringel e kede mo kltmokl lolengesenges el mo lmuut me a lsekum e kede ngmai a ulekrael el kora ngodech me a lechub e kede omdasu el kmo ngdiak lungil.​—w22.02, 4-6 el llel.

Ngera mle belkul a tekingel a anghel er a lolekoi er a Sekaria el kirel a “ungamk el ngar er a chimal a [Kabernor] Serubabel”? (Sek. 4:8-10, NW)

Tia el ues a ulelterekokl a rengrir a rechedal a Dios el kmo alta osengir a rechad e a templo er chelechang a diak lungil el ua sel kot me nguaisei engdi ngrruul el ngar er a rolel el soal a Jehovah.​—w22.03, 16-17 el llel.

Ngmekera ‘chomelekinged . . . bo le kerebai’? (1 Ti. 4:12, BT)

Kede mo mengedecheduch loba delemedemek me a omengull sel domerk er a klumech, mengitakl loba rengud el rokir, blechoel longer er a miting, e melekoi a klemerang e mengedecheduch el ngar er a rolel e kede melisiich er a rebebil, e mengeroid er kid er a rokui el bedengel a otuub.​—w22.04, 6-9 el llel.

Ngera uchul me aike el kleua el charm (renged) el losaod a 7 el bliongel er a Daniel a modak el di mo chimong el ua losaod a Ocholt 13:1, 2?

Ngika el charm a diak lomtechei er a di chimo el renged, el ua Rom. Ngbai omtechei a rokui el kabelment el mla mengedereder me a mengedereder er chelecha el taem.​—w22.05, 9 el llel.

Ngera klou a ultutelel rolel e ke dochotii el kmo kede oumerang er a llemeltel a Jehovah?

A lsekum a chad a tilemellii a rengud me a lechub e ngrullii a klengit el mei er kid, e kede melasem el chemoit a ngesechel a rengud el bedul ngii, e mecherei er chimal a Jehovah. Ngii a mo omult a rokui el rellel a klengit.​—w22.06, 10-11 el llel.

Ngera kirel a odam el melatk sel lolengit er ngii el mo meluluuch er a miting?

A nglunguuch a diak dousbech er ngii el mellach er a ongdibel me a lechub e kede meruul a announcement. E tokubets el diak el kirel odam el ‘kemanget a nglunguchel’ el melai er a chesmerel a miting. (Mt. 6:7)​—w22.07, 24-25 el llel.

Ngoeak a ngera el rolel e “ar merruul a mekngit” a nguu a ‘okiis el mo nguu a kerrekeriil’? (Jn. 5:29, BT)

Ngdiak bo lemedebeakl el kirel a tekoi el lurruul er a uchei er a lemad. Te mo evaluate a omerellir me a blekerdelir er a uriul er a okiis.​—w22.09, 18 el llel.

Ngera el omengelechel a ledillii a J. F. Rutherford er a convention er a September 1922?

Ngar er a convention er a Cedar Point, Ohio, U.S.A., e ngdilu el kmo: “A King a mengedereder! Kemiu a ngerecheliu el ouchais er a rechad er tiang. Me a leuaisei em advertise, advertise, advertise, er a King me a Rengedel!”​—w22.10, 3-5 el llel.

Ngera edei el rolel e a Dios olengeseu er kid loutekangel a losaod a Isaia 30 el bliongel?

Tia el bliongel a olecholt el kmo ng (1) kerekikl lorrenges e onger a nglunguched, (2) omeskid a ulekrael, e (3) omekngeltengat er kid er chelechang me a ngar medad.​—w22.11, 9 el llel.

Ngera uchul me ngsebeched el melekoi el kmo a Psalm 37:10, 11, 29 a mla er ngii otutel er a irechar me a dirrek el ngar medad?

Tekingel a David a mesaod el kirel a blekeradel er a beluu er a Israel, el ua temel a omengederederel a King Salomon. A Jesus a milsaod el kirel a baradis el mo er ngii er a ngar medad e ulemelekl er a 11 el kekerei el bades. (Mt. 5:5; Lk. 23:43)​—w22.12, 8-10, 14 el llel.