1. Ngera “budech er a Dios,” e ngera el klungiaol a dengai er ngii? (Filipi 4:6, 7)

 NGAR ngii a bedengel a budech el diak lodengelii a rechad er tia el beluulechad. Tiang a “budech er a Dios,” el chelellakl el reng el denguu sel lebo er ngii a deleuill er kid me a Demad el ngar er a eanged. Sel doba budech er a Dios e kede omelechesiu er kid el selebechakl. (Monguiu er a Filipi 4:6, 7.) Ngar ngii a kmes el deleuill er kid me tirke el betik a rengrir er ngii. E ngar ngii a kmes el deleuill er kid me a “Dios ra budech.” (1 Th. 5:23, BT) Sel bo dodengelii, e doumerang e dolengesenges er a Demad, e a budech er a Dios a mengellakl er a rengud sel bo dechebangel a meringel el blekeradel.

2. Ngera uchul me ngsebechel lulterekokl a rengud el kmo ngsebeched el nguu a budech er a Dios?

² Ngmera el sebeched el metik er a budech er a Dios er a temel a ringel el ua outbreak er a rakt, telemellel a beluu, uldikel, me a lechub e ngodechelakl? Aika el oberaod el tekoi a sebechel rullid el kmal mo medakt. Me nguaisei engdi a Jesus a milengelechel er a rultirakl er ngii el kmo: “Lak louedikel a rengmiu, e lak kom medakt.” (Jn. 14:27) E mera el dmeu a rengud e le rudam me a rudos a kmal oltirakl aika el tekingel. Ngoeak a ngelsuil a Jehovah, e ngsebechir el budech e outekangel er a temel a kmal meringel el blekeradel.

3. Ngmekera epidemic me a lechub e ng pandemic e sebechel mo uchul e ngmo diak a budech er kid?

³ Sel lebo er ngii a epidemic me a lechub e ng pandemic e ngmodech a bek el merekelel a klengar er kid. Molatk a bla lerellii a COVID-19 el mora rebetok. A ta el omesuub a kmo, betok er a  tedobech er a rechad el ble report er tir a kmo ngmle meringel er tir el mechiuaiu er a temel tia el pandemic. Temel tia el pandemic e ngmlo klou a ildois er a rechad el di suebek a rengrir, depressed, abuse a rrom me a drugs, domestic violence, me a melasem el mela klengar er tir. A lsekum e ngar ngii a outbreak er a rakt er a beluu el omkiei er ngii, e ngmekera sebechem el mo diak di lesebek a rengum e nguu a budech er a Dios?

4. Ngera uchul me ngmeskid a budech sel bo dodengelii a ulochel a Jesus el kirel a uriul sils?

⁴ Jesus ulemlaoch el kmo a temel a uriul sils, e ngmo er ngii a meringel el rakt el mo oberk er “ker me ker.” (Lk. 21:11) Ngmekera klemedengei er kid el kirel tiang e meskid a budech? Ngdiak lemechas a rengud er a outbreak er a rakt. Kede mtebengii el kmo aika di uaike el ledilu Jesus el kmo ngmo duubech. Me ngngar ngii a ungil luchul e ngungil a doltirakl a ledilu Jesus el mora rekiei er a taem er a ulebongel: “Kele bo louedikel a rengmiu.”​—Mt. 24:6.

5. (a) El ua lolekoi a Filipi 4:8, 9, ngera ungil doluluuch el kirel sel bo dechelebangel er a outbreak er a rakt? (b) Ngmekera e a obo morrenges a audio recording er a Biblia e sebechel ngosukau?

⁵ A outbreak er a rakt a sebechel rullid el kmal mo suebek a rengud e dirrek el panic. Tiakid a dilubech el mora odos el Desi. b Sera lemad a angko, cousin, me a toktang er ngii er a COVID-19, e ngkmal mlo medakt el kmo ngmo el nguu e oiuelii el mora delal el chudelang. Ngdirrek a pandemic a rirellii el kmal mo suebek a rengul el kmo, ngmo el oridii a urerel. Ngmle bekikl el kmo a loridii e ngmekera mo mechar a kelir e pay er a rent. Aika el tekoi a ulemekeek er a uldesuel me ngdimlak el sebechel mechiuaiu. Engdi Desi liluut el metik er a budech. Ngmilekerang? Ngmilluluuch lolengit er a Jehovah me lengesuir el mo chelellakl a rengul me a uldesuel e mo omdasu el positive. (Monguiu er a Filipi 4:8, 9.) Ngulerrenges er a Jehovah el “mengedecheduch” er ngii loeak a audio recording er a Biblia. Ngkmo, “A medemedemek el oto er a ngerir a remenguiu a milengellakl er ngak e ulemeklatk er ngak el kmo Jehovah kmal omekerreu er ngak.”​—Psa. 94:19.

6. Ngmekera omesubem el di kau el tang me a miting e ngosukau?

⁶ A outbreak er a rakt a uchul me nglocha mo diak el sebeched el meruul a rokui el tekoi el ua ngar er a mong, engdi lak becherei me bo luchul e lak moruul er a omesubem el di kau el tang e lak mngar er a miting. A experience er a rudam me a rudos er kid loltobed er aika el babilenged me a video mo omeklatk er kau el kmo, te dirk melemolem loba blakerreng alta te chelebangel a osisiu el blekeradel el omngar ngii. (1 Pe. 5:9) A miting a mo ngosukau el mo melatk a tekoi er a Biblia el ngii a melisiich. Ngdirrek el meskau a techellem el mo melisiich er a  rebebil e ngmai omelisiich. (Rom 1:11, 12) E sel molatk er a rolel e a Jehovah olengeseu er a remesiungel sel lesecher, lemedakt, me a lechub e te sabisi, e a klaumerang er kau a mo mesisiich me kau a mo ulterekokl a rengum el kmo ngdirrek el mo olengeseu er kau.

7. Ngera sebechem el suub er a apostol Johanes?

⁷ Molasem el reach out el mora rudam me a rudos er kau. A outbreak er a rakt a locha mo uchul me ngkired el physical distancing el mo lmuut me a dobengterir a rudam me a rudos er kid. Ngar choua ikakid el taem e kede locha mo feel el ua apostol Johanes. Ngkmal mle soal mo omes er a sechelil er a Kaius. (3 Jn. 13-15) Engdi ngmle medengei el kmo ngmo telkib el taem el diak el sebechel mo mesang. Me ngmirruul er sel sebechel rullii. Ngmilluches el mora Kaius. A lsekum e ngdiak el sebechem loldingel er a rudam me a rudos er kau, e molasem el meruul el uaisei loeak a dengua, video call, me a lechub e ng message. Sel om keep in touch lobengterir a rudam me a rudos er kau e ke mo feel selebechakl e budech. Mongedecheduch er a remechuodel a lsekum e ke feel el kmal di suebek a rengum, e mkengei omelisiich er tir.​—Isa. 32:1, 2.

8. Ngmekera telemellel a beluu e sebechel mo uchul e ngmo diak a budech er kau?

⁸ A lsekum e ngmla ta el om experience a imui, desiu, me a lechub e ngseseb, e nglocha millemolem el suebek a rengum el kirel er a uriul, el kemanget el taem. A lsekum e ngar ngii a betik er a rengum el mlad me a lechub e ke urriid a kloklem me a blim, e nglocha kmal mlo mekngit a rengum, ngdiak modengei el kmo ke mo mekerang, me a lechub ngkmal mlo kesib a rengum. Tia diak lebelkul a kmo a uldesuem a di melatk a klalo me a lechub e ngdiak a klaumerang er kau. Kau a mlo chobengelii a kmal meringel el blekeradel, me a rebebil a omdasu el kmo ngmo uaisei a uldesuem. (Job 1:11) Me nguaisei engdi ngdirk sebechem el metik er a budech. Ngoeak a ngera el rolel?

9. Ngmilekera Jesus e mengetmokl er kid el kirel a tellemall el mo duubech?

⁹ Molatk er a ulochel a Jesus. Kid a diak deua rebebil er a rechad el omdasu el kmo ngkmal diak bo leduubech a tellemall el mo er tir. Kede expect el kmo ngmo betok a tellemall er chelecha el taem er kid, el bebil er ngii a locha ngar ngii a lebo lerellii el mei er kid. A Jesus a dilu er a rultirakl er ngii el kmo a uchei er a lemei a ulebongel e ngmo medbedubech a “kdekudel el desiu” me a lmuut el bebil er a tellemall. (Lk. 21:11) Ngdirrek lulemlaoch el kmo ngmo “oberk a mekngit,” el ua desang el kmal klou a delengerenger, omelemall er a rechad, me a re terrorist. (Mt. 24:12) Jesus a dimlak ledu el kmo aika di mo duubech el mo er tirke el mla mechoit er a Jehovah. A rebetok er a reblak a rengrir el mesiungel a mla experience a tellemall. (Isa. 57:1; 2 Ko. 11:25) Jehovah diak bo lomekerreu er kid er a tellemall loeak a mengasireng el rolel engdi ngmo meskid aike el dousbech el mo melemolem el chelellakl e budech.

10. Ngera uchul me ngolechotel a klaumerang sel dongetmokl er kid er chelechang el kirel a tellemall? (Osisechakl 22:3)

¹⁰ Ngmo beot er kid a moba chelellakl el reng sel leduubech a emergency sel lsekum e ngdi uchei e kede plan el kirel. Engdi tia ngbelkul a kmo ngdiak a klaumerang er kid er a Jehovah? Ngkmal diak leuaisei. E ngbai sel di luchei e deketmeklid e ngbai ochotii el kmo kede oumerang el kmo ngmo omekerreu er kid. Ngmekera uaisei? A Tekingel a Dios a mengelechel er kid el mo mengetmokl er kid el kirel aike el tellemall el sebechel duubech. (Monguiu er a Osisechakl 22:3.) E oeak a suobel el ngar aike  el magazine er kid, miting, me a ulekrael el lomeskid, e a cheldebechelel a Dios a mengelechel er kid el mo mengetmokl er kid el kirel a tekoi er a emergency el sebechel duubech. c Kede oumerang er a Jehovah? A leuaisei e kede mo oltirakl er tia el tekingel er chelechang ruchei er a ledubech a tellemall.

11. Ngera ke suub er a Margaret?

¹¹ Molatk er a experience er a odos el Margaret. Te dilu er ngii me le evacuate er a blil le ngmla er ngii a seseb el mla er bita er ngii. Ngkmal mle betok a rechad el melasem el chemiis er a osisiu el taem me a traffic a mle klou el ka el sebechel a mlai louedikel. Ngdi mlo chedelekelek e okrokr a eolt er a chetul a ngau me a Margaret a dimlak el sebechel tuobed er a mlil el telkib el taem. Me nguaisei engdi ngika silobel le ngii el mle prepare el kirel. A til a mla er ngii a map er ngii me ngsebechel lomes e metik er a rael el sebechel lokiu ngii. Ngika dirrek el uchei e ngulemekall er aika el rael el mo medengelii me ngmle medengei el kmo ngar ker a sebechel loeak ngii sel leduubech a emergency. Ungil oketmeklel kirel a uchul me ngmle sebechel suobel er tia el blekeradel.

12. Ngera uchul me kede oltirakl a ulekrael lomeskid el mo omekerreu er kid?

¹² Remerreder el chad er a kabelment a locha mo olengit er kid el moltirakl er a curfew, evacuate, me a lechub mo meruul a kuk bebil er a tekoi el protect er kid. A rebebil er a rechad a diak lemereched el mo oltirakl a ulekrael er tir le ngdiak el sorir el mengoit a kloklir. Engdi a Rekristiano mekerang? A Biblia kmo: “Bo mungil el oltirakl er tirkel olab a dereder; moltirakl er tir el kirel a Rubak, a Emperor, el kot el ngarbab el merreder, ma re kabernor.” (1 Pe. 2:13, 14) A cheldebechelel a Dios a dirrek lomeskid a ulekrael el omekerreu er kid. Te blechoel lomeklatk er kid el mo omesterir a remechuodel sel kot el beches el contact er kid me lsebechir lomekedong er kid sel duubech a emergency. Kau ke mla mesterir? Kede dirrek el locha mo ngmai a ulekrael el mo di kiei er a blid, evacuate, me a lechub e dolai aike el klalo el bo dousbech me a lechub e ngrolel a bo dolengeseu er a rebebil. A lsekum e ngdiak dotirakl aikang e ngsebechel mo uchul a klengar er kid me a dirrek el klengar er a remechuodel. Lak dobes el kmo tirka el blak a rengrir el chad omecheliu er kid. (Heb. 13:17) Margaret a kmo, “Ak kmal loumerang el kmo ngak luleltirakl a  ulekrael er a remechuodel me a cheldebechel a uchul me ak silobel.”

13. Ngera uchul me a rebetok el rudam me a rudos el chiloit a delengcheklir a dmeu a rengrir e budech?

¹³ A rebetok er a rudam me a rudos el chiloit a delengcheklir le ngtelemellel a beluu, mekemad, me a lechub nguldikel a mla melodech a klengar er tir el mo oltirakl er a beches el blekeradel lulsiseb er ngii, e melasem el meruul a betok el ngar omesiungir el mora Jehovah. Te di ua tirke el kot el Kristiano el alta odechelakl a uchul me te melterakl, engdi te melemolem “lomerk a tikingil a Dios.” (Rel. 8:4, BT) Berkel a klumech a ngosuterir el mo melemolem el ulturk osengir er a Renged er a bai lolatk a meringel el blekeradel. Sei a uchul me te melemolem el dmeu a rengrir e budech.

14. Ngmekera odechelakl e sebechel mo uchul e ngmo diak a budech er kid?

¹⁴ Sel demodechelakl e ngsebeched loriid aike el tekoi el dousbech el mengellakl er a rengud. Ngkmal dmeu a rengud sel demimokl el mo dmak el kldibel e domerk er a klumech e doruul a rokui el tekoi el diak demedakt el kmo te mo el arrest er kid. Sel bo lak el sebeched el meruul aikang, e ngsebechel mo suebek a rengud e bekikl el kmo ngngera mo duubech. Ngdiak el mekngit a bo de feel el uaisei. Engdi ngkired el mo kerekikl. A Jesus a dilu el kmo odechelakl a sebechel mo uchul e a rultirakl er ngii a mesibas. (Jn. 16:1, 2, BT) Ngmekera sebeched el melemolem el budech sel dechebangel odechelakl?

15. Ngera uchul me ngdiak el kired el medakt odechelakl? (Johanes 15:20; 16:33)

¹⁵ Tekingel a Dios ouchais er kid el kmo: “Tirikel rokui el ngara Kristus Jesus el sorir el meluu ra Dios ra chelsel a klengar er tir a modechelakl.” (2 Ti. 3:12, BT) A Andrei er a bo lomtok a urered er a belual e ngkmal mle meringel er ngii oumerang el kmo, te rokui el mo modechelakl. Ngmillatk: ‘Te kmal betok a Resioning er tiang. Te mekera mo mengelebus er kemam el rokui?’ Engdi tia dimlak el bsa budech e ngbai rirellii me ngdi suebek a rengul. A rudam a milecherei tia el tekoi er chimal a Jehovah e dimlak lomdasu el kmo ngkmal diak bo lekelebus. Te mle medengei el kmo ngngar ngii a techellir el mo mekelebus, engdi ngdimlak el sebek a rengrir el ua Andrei. Me a Andrei a ngileltii el moba uldesuir e mo mui loumerang er a Jehovah. Ngmlo melechesuar er a budech,  e chelecha ngdmeu a rengul alta ngdirk betok a meringel el blekeradel. Ngdirrek el klemerang el tekoi el kired. Alta Jesus a dilu er kid el mo expect odechelakl engdi ngulelterekokl a rengud el kmo ngkmal sebeched el melemolem loba blakerreng.​—Monguiu er a Johanes 15:20; 16:33.

16. Ngera el ulekrael a kired lolengesenges sel dechelebangel odechelakl?

¹⁶ Sel bo lomtok a urered me a lechub e te mesisiich lolekebai er ngii e kede locha mo ngmai a ulekrael er a branch me a remechuodel. Aika loruul lomekerreu er kid me lsebeched el melemolem el melai okelel a reng, e lengesukid el omerk er a klumech el mo er sel kot el sebeched. Molengesenges a ulekrael el mngai mo lmuut me a lemeringel er kau a mtebengii a uchul me te meruul el uaisei. (Jak. 3:17) E dirrek lak mouchais a okedeldaol el tekoi el kirir a rudam me a rudos me a lechub e ngkirel a tekoi er a ongdibel el mora rechad el diak a right er tir a mo medengei.​—Oli. 3:7.

17. Ngdi ua rechapostol, ngera kede mla rullii er a rengud el mo meruul er ngii?

¹⁷ A ta er a kmal uchul me a Satan oldechelakl er a rechedal a Dios a tir a “urerir el sioning el kirel a Jesus.” (Och. 12:17, NW) Lak becherei a Satan me a beluulechad er ngii me lebekdektau. Sel domerk e dolisechakl alta kede chelebangel a odechelakl e ngmeskid a deurreng. Sera taem er a rekot el Kristiano e a remerreder el Chijudea dilu er a rechapostol me lebo el stob lomerk. Tirka el blak a rengrir el chad a ngileltii lolengesenges er a Dios. Te millemolem lomerk, e tia el ureor a mlo uchul a klou el deuil a rengrir. (Rel. 5:27-29, 41, 42) Nguaisei el sel lorrob er a urered e ngkired el mo kerekikl sel domerk. (Mt. 10:16) Engdi a lsekum kede mo meruul er sel kot el sebeched e kede mo budech le kede medengei el kmo kede odeuir a rengul a Jehovah e meruul er a ureor lolsobel a klengar.

18. Ngsebeched el nguu a mera el budech er ker?

¹⁸ Bo lulterekokl a rengum el kmo, mo lmuut er a chelsel a kmal meringel el blekeradel me ngdirk sebechem el melechesuar a budech. Ngar aikakid el taem e ngdiak el kired lobes el kmo a budech el dousbech er ngii a budech er a Dios, el ngii a di sebeched el nguu er a Jehovah. Multuil er ngii sel leduubech a outbreak er a rakt, telemellel a beluu, me a lechub e ngodechelakl. Molemolem el bereked er a cheldebechelel. Momes el bedul a ungil klengar er a ngar medad el mengiil er kau. Sel moruul uaisei e a ‘Dios ra budech a mo [obengkem].’ (Fil. 4:9, BT) Ngar er a ongingil suobel e kede mo mesaod er a rolel e ngsebeched lolengeseu er a rudam me a rudos er kid el chelebangel a ringel el mo nguu a budech er a Dios.