1. A blauang ngmle uangerang a klungel a ultutelel el mora rechad er a taem er a Biblia?

 A BLAUANG a ta er a kot el klou a ultutelel el kall er a taem er a Biblia. (Gen. 14:18; Lk. 4:4) Ngkmal mle klou a ultutelel me a lebebil e a Biblia ousbech er a “blauang” el mesaod a rokui el kall. (Mt. 6:​11, NW) A Jesus uluusbech a blauang el ngar er aike el teblo el kot el merael a chisel el mengasireng el tekoi el leriruul. (Mt. 16:​9, 10) Kede metik er a ta er ngii er a 6 el bliongel er a Johanes. Kede mo merriter er ngii e omes aike el sebeched el suub e oltaut er ngii er chelecha el taem.

2. Ngera dilubech me te mlo ousbech a betok el kall?

² A rechapostol a kmal mle mechesang el lomerk er a klumech. Me a bocha lemerek e a Jesus a ngilititerir loeak a bos el mo imuul er a Daob er a Galilea el mo olengull. (Mk. 6:​7, 30-32; Lk. 9:10) Te mlora basio er a Bethsaida el diak a rechad er ngii. Engdi ngdi mle telkib e a rebetok el telael el chad a mlei el me omes er a Jesus. A Jesus a dimlak el ignore er tir. Ngbai milengoit a taem el olisechakl er tir el kirel a Renged e ulemekungil er a resmecher. Ngii el mocha kebesengei a uchul me a rechapostol a mlo melechedech el kmo tirka el chad te mo metik a kelir er ker. A rebebil er tir a locha di mle mekesai a kall el lolab me a ruumesingd er tir a kirir el mo soiseb er a beluu el omechar a kall. (Mt. 14:15; Jn. 6:​4, 5) Ngera ngmo meruul er ngii a Jesus?

MENGASIRENG EL TEKOI EL DILUBECH LUCHUL E NGMLO ER NGII A BLAUANG

3. A Jesus ngerang ngdilu er a rechapostol er ngii? (Dirrek el momes er a siasing.)

³ A Jesus a dilu er a rechapostol er ngii el kmo: “Ngdiak lousbech el merael; kemiu bo besterir a kelir.” (Mt. 14:​16, NW) Tia  meringel e le tirka mle 5,000 el sechal e a bo luldimukl er tir a redil me a rengalek e ngkirir el omekang er a re locha 15,000 el chad. (Mt. 14:21) Me a Andreas a dilu el kmo: “Ng ngar ngii a buik el ngar tiang el olab a kleim el blauang ma erul ngikel. Ngdi ikei a kmal ngesonges er tirkal rokui el chad.” (Jn. 6:9) A blauang el rruul er a barley a mle blechoel el kelir a remechebuul me a rebebil, e a ngikel a ulterekokl el mle cheltuul el ulsar. Me nguaisei engdi aika el lullab ngika el buik a kmal diak el sebechel mekelterir chouaisei a ildisir el chad!

4. Ngera sebeched el suub er a Johanes 6:​11-13? (Dirrek el momes a siasing.)

⁴ A Jesus a mle soal lomtechakl er tia el seked me ngdilu er tir me bo el dengchokl er a chudel e lobii el mo betok el bliongel. (Mk. 6:​39, 40; monguiu er a Johanes 6:​11-13.) Kede menguiu el kmo a Jesus a mirreng a sulel a Demal el kirel a blauang me a ngikel. A Jesus er a loruul el uaisei e ngulechotii el kmo ng Dios ingii a milsterir aika el kall, me ngulechotii omereng el saul er ngii el kirel. Tia kmal ungil uleklatk el mei er kid el mo oltirakl er a kerebil a Jesus loeak sel doluluuch er a uchei er a domengur, a di lekid el tang me a de iliuekl er a rechad. Me a Jesus a mlo merek el meluluuch e remous a kall me a rechad ulemengur el kmal mo ungil a rengrir. Ngdirrek el mlo er ngii a der me a Jesus a dimlak el soal a bo le klekool. Nguldak ngii el kall el locha bo lousbech er a uriul el taem. A Jesus a kutmeklii a ungil kerebai el kired el kmo, ngkired el mo ungil lousbech aike el ngar ngii er kid. A lsekum koungalek, e ngsebechem lousbech er tia el cheldecheduch losisecheklterir a rengelekem er a klungel a ultutelel omoluluuch er a uchei  er omomengur, omomtechakl er a rechad, e bo bekururau el merous aike el ngar ngii er kau el ua lurruul er ngii a Jesus.

5. A rechad er a leues aike el mengasireng el tekoi el leriruul a Jesus er tiakid el sils e ngera mlo sorir el meruul er ngii, engdi ngera ngmirruul er ngii a Jesus?

⁵ Me a rechad a kmal mle sorir a rolel a lolisechakl a Jesus me a mengasireng el tekoi el lurruul lomekungil er a resmecher. Te mle medengei a tekingel a Moses el kmo a Dios a mo oderchii a ileakl el profet el mo er tir, a uchul me te locha mlo melatk el kmo, ‘A Jesus, ngkakid el profet?’ (Dut. 18:​15-18) A leuaisei e ngika kmal sebechel mo ungil merreder e sebechel mo mesterir a rokui el chad er a Israel a kelir. Tia uchul me a seked a mle sorir el “orreked er ngii e orrimel er ngii el mo king.” (Jn. 6:​14, 15) A lsekum a Jesus a mecherei tia el tekoi me ngduubech e ngmo olsiseb er ngii er a balatiks er a Rechijudea el mla er cheungel omengederederel a Rom. Engdi ngkmal diak bo loruul er tiang. Kede menguiu el kmo a Jesus a ‘ngilseklii e mlo ngmasech er a bukl.’ Me alta ngmlo chobangel a orimel er a rebebil, engdi ngkmal dimlak lekengei el mo olsiseb er ngii er a tekoi er a balatiks. Tia kmal klou a ultutelel el suobel el kired!

6. Ngmekera dochotii el kmo ngsoad loltirakl er a kerebil a Jesus? (Dirrek el momes er a siasing.)

⁶ Alta rechad a diak bo lolengit er kid el mo mekdubech a kall e omekungil er a resmecher loeak a mengasireng el rolel, e lolasem el meruul er kid el mo king, me nguaisei engdi te locha mo melisiich er kid el mo teloi a tekoi er a  balatiks el ua mo sengkio me a lechub e kede support er a chad el tir omdasu el kmo ngmo kutmokl a ungil tekoi. Engdi ngbleketakl a kerebai er a Jesus. Ngika kmal dimlak lekengei el mo ulsiseb er a tekoi er a balatiks, e dirrek el dilu el kmo: “A rengedek a diak le renged er tial beluulchad.” (Jn. 17:14; 18:36) A Rekristiano er chelecha el taem a kirir el mo oba uldesuel a Jesus e oukerebai er ngii. Kede support, omerk, e meluluuch el kirel ngii el Renged. (Mt. 6:10) Ka me deluut el lomes er tia el cheldecheduch e desa el kmo ngngera dirrek el ta er a tekoi el sebeched el suub er ngii.

“BELKUL A BLAUANG”

7. Ngera ngmirruul er ngii a Jesus me a rechapostol? (Johanes 6:​16-20)

⁷ Uriul er a lokelii a seked a Jesus e ngdilu er a rechapostol er ngii me te lmuut el mora Kapernaum el ngar er a bos e ngii a ngilseklii el mora bukl, me a seked a dimlak el sebechel rullii el mo king. (Monguiu er a Johanes 6:​16-20.) Me a rechapostol a dirk mlara kereker e ngii mo er ngii a mesisiich el eolt me a meklou el daob. E a Jesus a merael er bebul a daob el merema er tir. Ngdilu er a Petrus me dirrek el lorael er bebul a daob. (Mt. 14:​22-31) Sera lengasech er a bos a Jesus e ngmlo diak a eolt. Ngkmal mlo mechas a rengrir a redisaiplo me te dilu el kmo: “Kau a meral Ngelekel a Dios!” a (Mt. 14:33) Ngutebengall el kmo a redisaiplo a dillii tiang er a uriul er a lorrael er bebul a daob ngdiak el sel taem er a loeak a mengasireng el rolel e lukdubech a blauang. A Markus a mesaod el kirel tiang el kmo: ‘[A rechapostol] a dimlak lutebengii a belkul a blauang ngbai dirk mle cheldeng a rengrir.’ (Mk. 6:​50-52) Chochoi, te dimlak lutebengii a klungel a klisiich el Jehovah milsang a Jesus el mo meruul a mengasireng el tekoi. Kedeb el taem er uriul er tiang e a Jesus a liluut el mesaod er tia el mengasireng el rolel e ngmilekdubech a blauang e ouchais er kid er a lmuut el ta er a tekoi el desuubii er ngii.

8-9. Ngera uchul me a seked ulsiik er a Jesus? (Johanes 6:​26, 27)

⁸ Tia el seked el lulekelii a Jesus a ulechotii el kmo te di mle sorir el melai aike el lousbech. Te milekerang? A bo lekuk e te mlo mtebengii el kmo a Jesus me a rechapostol er ngii a mla merael. Me a seked a ngilasech er a bebil el bos el mlei el ngar er a Tiberias e mirrael el mora Kapernaum losiik er a Jesus. (Jn. 6:​22-24) Te mirruul er tiang le ngmle sorir lorrenges a lmuut el betok el kirel a Renged? Ngdiak. Te di millatk er tir lousbech a kall. Kede mekerang e medengei?

⁹ Momtab a dilubech er a lebetik er a Jesus er bita er a Kapernaum. A Jesus a dilu er tir el kmo te di mle osiik er ngii le ngsorir a kall. Ngdilu el kmo “kom milenga blauang el kmal mlo medinges” el ngii a “metemall el kall.” Ngmillisiich er tir el mo oureor el kirel a “kall el di ngar ngii el diak a ulebengelel.” (Monguiu er a Johanes 6:​26, 27.) A Jesus a dilu el kmo a Demal a mo mesterir tiakid el kall. Nglocha kmal mlo rrau a rengrir er a lerrenges el kmo ngngar ngii a kall el sebechel mesterir a diak ulebengelel el klengar! Ngera el kall a sebechel rullii tiang, e mekera sebechir el nguu a rurrenges er a Jesus?

10. Ngera el “urerel a Dios” a mle kirir tirka el chad el mo medengelii?

¹⁰ Tirka el Chijudea mle sorir el mo medengei el kmo ngngera kirir el meruul el mo nguu tia el kall. Te locha millatk a ‘ureor’ er a Llach er a Moses. Me nguaisei engdi a Jesus a dilu er tir el kmo: “A urerel a Dios a cho bo moumerang er ngikel lulderchii a Dios.” (Jn. 6:​28, 29, BT) A Jesus a mla mesaod el mo er tir er a uchei el  kmo a klaumerang er tir er ngike el lulderchii a Dios a lousbech er ngii el “mo ngar el diak a ulebengelel.” (Jn. 3:​16-18, 36) Nglmuut el mo mesaod er uriul a rolel e ngsebeched el nguu a diak a ulebengelel el klengar.—Jn. 17:3.

11. Te milekera Rechijudea e ochotii el kmo te kmal di mle sorir el melai a kall? (Psalm 78:​24, 25)

¹¹ Tirka el Chijudea dimlak el sorir tia el beches el osisecheklel a Jesus el kirel a beches el “urerel a Dios.” Te dilu er a Jesus el kmo: “Ng ngeral mengasireng el tekoi cho bo mruul maki mes e mo oumera er kau?” (Jn. 6:30) Te dilu el kmo a ruchelir er a taem er a Moses a ngilai a mana, el ngii a mle ua blauang el kelir er a bek el sils. (Neh. 9:15; monguiu er a Psalm 78:​24, 25.) Ngbleketakl el kmo te kmal di mle sorir a kall. Me a Jesus er a losaod el kirel a “meral blauang er a eanged,” el ngii a diak el ua mana le ngsebechel mesterir a diak a ulebengelel el klengar, e ngdimlak ta el loker er ngii er a belkul. (Jn. 6:32) Ngkmal di mle ulturk osengir er aike el lousbech er a bedengir me te dimlak el lomtab aike el lullisechakl er tir a Jesus me bo lsebechir el nguu a diak a ulebengelel el klengar. Ngera sebeched el suub er tiang?

SEL KIREL EL KOT EL KLOU A ULTUTELEL ER KID

12. Ngmilekera Jesus e ochotii el kmo ngera sel kot el klou a ultutelel?

¹² Tiakid a klou a ultutelel el tekoi el desuubii er a 6 el bliongel er a Johanes. Tekoi er a klereng a kirel sel kot el klou a ultutelel er kid. Molatk el kmo tiakid sel ledillii a Jesus el mora Satan er a longarm er ngii. (Mt. 4:​3, 4) E ngar sel Cheldecheduch el Ngar er a Rois e ngmillisiich er a klungel a ultutelel a bo lengar er ngii a ungil el deleuill er kid me a Dios. (Mt. 5:3) Me ngsebeched el di kid loker, ‘A rolel a klengar er ngak ngochotii el kmo nglmuut el klou a ultutelel er ngak a deleuill er ngak me a Jehovah me a lechub aike el kuusbech er a bedengek?’

13. (a) Ngera uchul me ngdiak a kngtil a doldeu a rengud er a kall? (b) Ngera kired el mo kerekikl er ngii? (1 Korinth 10:​6, 7, 11)

¹³ Ngdiak el mekngit a doluluuch lolengit aike el dousbech er a bedenged e doldeu er a rengud er ngii. (Lk. 11:3) A Biblia a kmo ngungil a chad a “longang e lolim . . . el oldeu er a rengul er a meringel urerel” e le “ngmlara Dios el mei.” (Oli. 2:​24, NW; 8:15; Jak. 1:17) Me nguaisei engdi ngkired el mo kerekikl me a klalo er tia el beluulechad a diak bo lekot el klou a ultutelel er a klengar er kid. A apostol Paulus a millisiich er tiang er a loluches el mora Rekristiano. Ngmilsaod a tekoi el lurruul a rechad er a Israel er a ked luldimukl er ngii a tekoi el dilubech er a Rois Sinai. Ngmilengelechel er tir me “lak bo [le] ngibes a mekngit el ua itir [el rechad er a Israel].” (Monguiu er a 1 Korinth 10:​6, 7, 11.) A rechad er a Israel a milecherei a ngibes er a kall me ngmult el mo “mekngit” a kall el Jehovah uleak a mengasireng el rolel e ngmesterir. (Ule. 11:​4-6, 31-34) Me sera longull er a kolt el ngelekel a kerbou e te dirrek lulechotii el kmo nglmuut el klou a ultutelel er tir a kall, ilumel, me a tametereng. (Exo. 32:​4-6) A Paulus a milsaod er a kerebai er tir el olachidnger el kirir tirka el Kristiano el kiliei er sel taem er a ulebongel er a Jerusalem me a templo el dilubech er a 70 C.E. Chelechang e kede kiei er a ulebongel er tia el mekngit el blekeradel, me ngkmal klou a ultutelel a delia er a rengud aika el tekingel a Paulus.

14. Ngera sebeched el expect er ngii er a kall er a beches el blekeradel?

¹⁴ A Jesus er a ledu er kid el mo meluluuch el kirel a “[keled] el blauang el kirel chelecha el sils” e ngdirrek el dilu el kmo doluluuch me “bo le motaut a [soal a Dios] er a beluulchad el ua ingii er a eanged.” (Mt. 6:​9-11, NW) Omomdasu e ngmo uangerang a beluulechad er tiakid el taem? A Biblia ouchais el kmo a ungil kall a mo uldimukl er a soal a Dios. Ngua lolekoi a  Isaia 25:​6-8, ngmo betok a ungil kall er cheungel omengederederel a Rengedel a Jehovah el bo loldeu a rengrir a rechad er ngii. Me a Psalm 72:16 a dirrek el melekoi el kmo: “Bo le betok a redechel a wheat er a beluu; ma ikel bukl di bo le medekedek er a dellomel el kall.” Kau, ke omes el beduluchei el mo ousbech a bebil er aika el redechel a wheat el meruul er a kot el soam el blauang me a lechub e ke melasem a beches el recipe? Ngdirrek el sebechem el lomes el beduluchei el mo melalem a sersem er a bilong e oldeu er a rengum er ngii. (Isa. 65:​21, 22) A rokui el chad er a chutem a mo oldeu a rengrir er aikang.

15. Ngera te mo mesuub tirke el mekiis? (Johanes 6:35)

¹⁵ Monguiu er a Johanes 6:35. Ka mluut el melatk er tirke el milengang a blauang me a ngikel er a Jesus. Ke locha mo meet er a rebebil er tir er a okiis. Alta te dimlak lochotii a klaumerang er a irechar, nglocha ngar ngii a rebebil er tir el mo mekiis. (Jn. 5:​28, 29) Tirka kirir el mo suubii a belkul a tekingel a Jesus el kmo: “Ngak a blauang er a klengar. Ngikel mer ngak a kmal diak bo le sengerenger.” Ngkirir el mo toketekii a klaumerang er tir er a olubet el tengetengel a Jesus, el tilengetengii a klengar er ngii el kirir. Tiakid el taem e a remekiis me a rokui el ngalek el mechell er tiakid el taem a mo suubii a klemerang el kirel a Jehovah me a moktek er ngii. Ngmera el mo taem er a klou el deurreng sel bo deteloi er tia el prokuram er osisechakl! Nglmuut el klou el deurreng a denguu sel bo dolengeseu er a rebebil el mo er ngii a deleuill er tir me a Jehovah er aike el ungil el kall er a beches el blekeradel.

16. Ngera kede mo mesaod er a ongingil el suobel?

¹⁶ Kede mla smodii a telkib er a 6 el bliongel er a Johanes engdi a Jesus a ngar ngii a lmuut el betok el soal lolisechakl er kid el kirel a “diak a ulebengelel klengar.” A Rechijudea a mle kirir el rongesii tiang me kid el dirrek. Kede mo melemolem el mesaod er a 6 el biongel er a Johanes er a ongingil el suobel.