Ak mlechell er a 1927 er a kekerei el beluu el kmeed er a Chicago, Illinois, U.S.A. Aki mle teim el ngelekel a demak me a delak el Jetha, Don, ngak, Karl, e ngmo Joy. Aki riruul a rengmam el mo mesiou er a Jehovah loba rengmam el rokir. A Jetha a mlora ongeru el klas er a Gilead er a 1943. Don, Karl, me a Joy a mlo mesiou el ngar er a Bethel er a Brooklyn, New York er a 1944, 1947, me a 1951. A ungil kerebai er tir me a rechad er a blik a uldbechak el mo soak el meruul a lmuut el betok el ngar omesiungek el mora Jehovah.

A demak me a delak a kmal mle chad er omenguiu el Biblia e mle betik a rengrir er a Dios e ulsisecheklemam a rengelekir el dirrek el mo betik a rengmam er ngii. Me nguaisei engdi a uriul er a lebo el soldau a demak er a Europe er a Kot el Mekemad e ngmlo diak a respect er ngii er a ikelesia. A delak el kmal uleba omereng el saul lengii liluut el me remei el dirk chad, a dilu er ngii el kmo: “Karl, me deluut el mo ngar er a ikelesia el ua ngar er a mong.” Me a demak a dilu el kmo: “Ak ngoikau el mong engdi ngkmal diak bo ksiseb.” Me nguleker er ngii el kmo: “E ngerang?” Me ngdilu el kmo: “Temel a mekemad e a remengeteklel osisiu el klechelid el mlara kakerous el side er a mondai ulemekngeltengat er a resoldau me a klekedellir! A Dios ngmle chedal aika el teblo el side?”

Delak er a lengar er a ikelesia e te mlei er a blimam a reteru el Sioning er a Jehovah. Te mle offer er a demak a teblo el book el lokedongall el Light, el ngii a mesaod er a babier er a Ocholt. A demak a mle soal me ngngilai. A delak er a leues ngii el babier e ngulemuchel el menguiu. E a ta er a klebesei e ngmilsa llechukl er a newspaper el invite er a resemeriar el mo mesuub er a Biblia lousbech aika el teblo el book lokedongall el Light. Me ngmochang. Me a lebong e a kora kmal klou el redil a nguu a chesimer. Me a delak a ulechotii a ta er aika el book e dilu el kmo, “Ko mesuub er tia er tiang?” Me ngika el redil a dula el kmo, “Chochoi e rungalek, be mtuu.” Ongingil sandei e a delak a ngilikemam el rokui el ngalek el mong e a uriul e ngmlo bek el sandei el ki bong.

A ta el taem er a ki mkldibel e ngike el mle conduct a ullengit er ngak me kchiuii a Psalm 144:15 (NW), el ngii a melekoi el kmo tirke el mengull  er a Jehovah a dmeu a rengrir. Tia el bades me a 1 Timothy 1:11 (NW), el melekoi el kmo a Jehovah a “dmeu a rengul el Dios” me a Efesus 5:​1, el melisiich er kid el ‘mo uai [a Dios]’ a kora kmal mlo soak. Ak mlo mtebengii el kmo ngkirel dmeu a renguk el mesiou er a Ulemeob er ngak e oureng a sulel er a techall el sebechek el mesiou er ngii. Ak mla melasem el meruul aika el teblo el tekoi er a klengar er ngak el rokir.

Sel kot el kmeed er kemam el ongdibel a mlara Chicago e mle 20 el mael a cherridel. Me nguaisei engdi aki mle ngar er a miting me ngmlukeroul a klemedengei er ngak er a Biblia. Ak melatk er a ta el taem el ngike el mle conduct ulekerir a Jetha el mo onger. Ak ullerrenges er ngii e mlo melatk: ‘Ngak a medengelii tilechang. Ngmle sebechek loldars longer.’ Me a kulemuchel el prepare e di ngak el meruul a comment er ngak. Ngaruchei er ngii ak mlukeroul er a klereng, el ua rebebil er ngak. Me a kmiltecholb er a 1941.

Ngkmal diak kubes er a convention er a 1942 el mla er ngii er a Cleveland, Ohio. A telungalek er kemam a kiliei a tento er a basio el mle kmeed er sel ngar ngii a convention lobengterir a lmuut el bebil er a telungalek. Me a lmuut kung a rudam me a rudos el kiliei a betok er a 50 el city er a Merikel a ullerrenges er a prokuram loeak a dengua. Ngdirk mla er ngii a Ongeru el Mekemad me ngii a di mirrael el mo klou a odechelakl el mora Resioning er a Jehovah. Ak milsterir a group er a rudam el mle park a mlirir el ikrii a kiamp. Ngmla er ngii a chad er a chelsel ngii el mlai el milengkar el ta el kesus. A lsekum e ngkora soal mo er ngii a uldikel e a rudam a mo on a light er a mlirir el melidech a mederir e omet er a horn er a mlai. Me seikid a ngsebechir a rebebil el di mereched el me olengeseu er tir. Ak mlo melatk, ‘A rechedal a Jehovah a kmal ungil el prepare el kirel a rokui el tekoi!’ Me ngmle sebechek el klou a renguk el mechiuaiu me ngii a dimlak a ta el mekngit el duubech.

Betok el rak er uriul e ak mlo melatk er tia el convention e mlo mtebengii el kmo a delak a dimlak el medakt me a lechub e lebekikl. Ngmle mui loumerang er a Jehovah me a cheldebechelel. Ngkmal diak kubes er a ungil kerebai er ngii.

Kedeb el taem er uchei er tia el convention e a delak a mlo regular pioneer. Me ngika kmal mle kerekikl lorrenges aike el cheldecheduch el mesaod er a mui el taem el omesiou. Ngar er a omerollam el mo remei e ngdilu el kmo, “Ngkmal soak el melemolem el pioneer engdi ngdiak el sebechek el meruul er tiang e mengetmokl er a blid.” Me ngullengit el kmo ngsebecham el ngosuir. Aki kilengei me ngmilskemam a chimong me a lechub e ngteblo el room el ki mongetmokl er a uchei er a breakfast. Uriul er a ki morael el mora skuul e ng make sure el kmo a blai ungil kltmokl e mo merek e mo tuobed el mo omerk. Ngika kmal mle mechesang engdi ngdimlak a tang el bo longemikr er a rengelekel. Sel ki be mrei el me ousueleb me a dirrek el after skuul e ngngar ngii el mengiil er kemam. A bebil er a taem e aki oldingel lobengkel er a after skuul, e tia ngilsukemam el mo medengelii a belkul a de pioneer.

A kulemuchel el pioneer er a le 16 a rekik. Alta demak a dirkak el bo le Sioning er tiakid e taem  engdi ngkmal mle soal mo medengei el kmo ngua ngera omesiungek. A ta er a klebesei e ak dilu er ngii el kmo alta ak kmal melasem engdi ngdirkak kbetik er a chad el sebechek el mesuub er a Biblia lobengkel. Ak mle stob, e oker er ngii el kmo, “Omomdasu e ke mo kongei el mesuub er a Biblia el lobengkek?” Ngmillebedebek el telkib e kmo, “Ngdiak a ungil luchul me ak kotouar.” Ngkmal mlo ungil a renguk, ngike el kot el chad el kulsuub lobengkel a demak. Ngmera el ileakl er a renguk el techall!

Aki milsuub er a book el dai er ngii a “The Truth Shall Make You Free.” A cherengel a taem e ak mlo mtebengii el kmo a demak a ullengeseu er ngak el mo olengeriakl er a rolel a kusuub er a Biblia e kulisechakl er ngii el mora rebebil. El ua tiang, a uriul er aki mchiuii a parakurab e ngdilu el kmo: “Ak medengei aike el lolekoi a book. Engdi ke mekera medengei el kmo aike el lolekoi tia el book a melemalt?” Ngdimlak kltmokl el kirel tiang me ak dilu er ngii el kmo: “Ngdiak el sebechek el longer er kau er chelechang engdi a next el omesubed e ak mo oba nger er ngii.” Me ak miltik a bades el melisiich er a point el ki mulsaod er ngii er a omesubam. Uriul er tiang e ak liluut el mo ungil prepare el kirel a omesubam e milsuub el meruul a research. Tia ngilsukak me a dirrek el demak el mukeroul er a tekoi e a klereng. Ngultaut aike el lulsuub e miltecholb er a 1952.

Sera lebo el 17 a rekik e ak tilobed er a blimam. A Jetha a mlo missionari e a Don a mlo Bethelite. Te kmal mle sorir a assignment er tir e tia kmal millisiich er ngak. Me ak mle apply el mora Bethel me a skuul er a Gilead e milecherei er chimal a Jehovah. Me ngngera dilubech? Te mle invite er ngak el mora Bethel er a 1946.

Aika el mereko el rak e ngmle betok a kakerous el assignment er ngak er a Bethel me ngmle sebechek el suub a betok el beches el tekoi. Ngar er aika el 75 el rak er ngak el ngar er a Bethel e ak silubii el mo meduch el meruul a books e meruul a accounting. Ak dirrek el silubii el mo meduch el import e export a klalo. Ngaruchei er ngii e ngkmal soak a prokuram er omesubel a Biblia er a Bethel loeak morning worship me a lmuut el bebil er a cheldecheduch el loltobed.

Ak dirrek el ngilai a klubelek er a ochellek er a Karl el mlei er a Bethel er a 1947. Ngika kmal mle meduch el mesuub e olisechakl er a Biblia. A ta el taem e a kullengit er ngii me lengesukak er a cheldecheduch el ble le assign er ngii er ngak. Ak dilu er a Karl el kmo ak mla metik a betok el material engdi ngdiak kudengei el kmo ak mekera ousbech. Ngilsukak  loeak a loker el kmo, “Joel ngngera theme er kau?” Ak di mle mereched el get er a point. Ngdi mle kirek el lousbech aike el information el ulekuak er a theme er ngak e chemoit aike el diak. Ngkmal dirkak kubes er tia el tekoi el ksilubii er ngii.

A bo ledeu a rengud el ngar er a Bethel e ngkired el teloi er a berkel a klumech e seikid ngmo sebeched el ngmai a experience el kmal melisiich. A ta el experience el kmal kungil medengelii a dilubech er a dirk kekesus er a Bronx el ngar er a New York City. Ngak me a odam a mlo odngelii a redil el uchei e ngkilengei el nguu a The Watchtower me a Awake! Me aki mle introduce er kemam e dmu el kmo, “Chelecha el kebesengei e aki olengeseu er a rechad el suub a tekoi er a Biblia el ngii a uchul omelisiich.” Ngdilu el kmo, “A lsekum ko mesaod er a Biblia e me mtuu.” Aki milenguiu e mesaod a bebil er a bades el mesaod er a Rengedel a Dios me a beches el blekeradel. Ngika kmal mlo soal e le ngmle invite er a rebebil er a resechelil el me teloi er kemam er a ongingil el sandei. Ngii me a bechil a uriul e te mlo blak a rengrir el mesiungel a Jehovah.

A kulsiik er a mo bechik el bekord el 10 el rak e meet er ngii. Ngera ngilsukak el metik er a ungil bechiil el redil? Ak milluluuch el mora Jehovah e millatk el kmo, ‘Ngera soak el meruul er ngii er a uriul er a bo kbechiil?’

Ak mle meet er a odos el Mary Aniol er a convention er a 1953 el mla er ngii er a Yankee Stadium. Ngii me a Jetha a mlo er sel ongeru el klas er a Gilead me ngii a milsiou el missionari lobengkel ngii el ochedak. Ngkmal mle semeriar louchais er ngak a klengar er ngii el missionari er aike el beluu er a Caribbean me a rechad el lulsuub lobengterir er aika el mereko el rak. Sera ki mluut el mo ungil kaodengei e ak mlo mtebengii el kmo ngdi osisiu a turrekong er kemam er a klereng. Ngmlukeroul a deleuill er kemam me aki mlo bechiil er a April 1955. Ngbetok a rolel e a Mary ulechotii el kmo ngsengk el mlara Jehovah e ungil kerebai. Ngkmal mle dmeu a rengul er a ngii di el assignment el lengai. Ngmle meringel el loureor, kmal ulemekerreu er a rebebil, e mle blechoel el ngmai a tekoi er a Renged el mo kot. (Mt. 6:33) Aki dilak el mesiou el loldingel ongdibel el edei el rak, e a 1958 e te mle invite er kemam el terung el mora Bethel.

Ngbetok ak siluub er a Mary. El ua tiang, a uchelel a chebechiielam e aki millilt el dmak el menguiu er a Biblia, e a derta el taem e aki di menguiu a 15 el bades. Sel bo lemerek a tang el menguiu a bades e aki mesaod er ngii me a rolel e ngsebecham loltaut er a klengar er kemam. A Mary a mle blechoel louchais er ngak a tekoi el lesiluub er a Gilead me sera losiou el missionari. Aike el ksiluub er ngii a ngilsukak el mo olengeriakl er a rolel a kultobed a cheldecheduch e mo meduch el melisiich er a rudos.—Osi. 25:11.

A Mary a mlo smecher er a 2013. Ak mera el lomes el beduluchei el lmuut el mo mesang er a beches el blekeradel! Engdi chelechang el kungiil e ak mla rullii er a renguk el mo melemolem el melai a klubelek er a Jehovah e oumerang el ulsirs er ngii loba renguk el rokir. (Osi. 3:​5, 6) Ngmo dmeu a renguk e mechelaod a renguk sel kullatk aike el bo loruul a rechedal a Jehovah er a beches el blekeradel. Tia mo uldimukl er ngii a mesuub a beches el tekoi er a Ngarbab el Sensei er kid me a beches el tekoi el kirel! Chochoi ngmera el diak el sebechek el stob el mereng a sulel er aike el bla losisecheklak er ngii me aike el rokui lolechotel a krasia er ngii.