1. Ngera dilubech er a telungalek er a Josef e le rudam er ngii el mlo mechechei er ngii?

A JAKOB a mle betik a rengul er a rokui el ngelekel el sechal, engdi ngkmal mle ileakl a bltkil a rengul el mora 17 a rekil el ngelekel el Josef. Me ngmlo uangera uldesuir a rudam er ngii? Te mlo mechechei er ngii, me tia el chelechei el reng a rirelleterir el mo ouketui er a Josef. A Josef a dimlak a ngera el letemellii el uchul me bo louketui er ngii. Me nguaisei, engdi te ulterur a Josef el mo sibai e dirrek el ulumulak er a demerir el kmo a tebelik el charm a milekodir a betik er a rengul el ngelekel el sechal. Tia el chelechei er a rengrir a mlo uchul a telemellel a budech er a telungalek er tir, e dirrek el kmal tilemellii a rengul a demerir.​—Gen. 37:3, 4, 27-34.

2. A doltirakl er a Galatia 5:19-21, e ngera uchul me a chelechei a kmal kdekudel el blekeradel?

² Ngar a Bades, e a chelechei * a blsachel el ta er a omekodall el “urerel a klechad” el sebechel mo uchul e a chad a diak bo lsiseb er a Rengedel a Dios. (Monguiu er a Galatia 5:19-21.) A chelechei a blechoel luchul a mekngit el omeruul el ua kltui me a klautok me a ngasecherreng.

3. Ngera kede mo mesaod er tia el suobel?

³ A blekerdelir a rudam er a Josef a ochotii el kmo a chelechei a sebechel tomall a deleuill e dirrek el rullii a telungalek el mo diak a budech er ngii. Me alta e ngdiak bo doruul a tekoi el ua rudam er a Josef, engdi kede rokui el diak demecherrungel e dirrek tia el rengud a cheblad. (Jer. 17:9) Tiaikid a uchul me a lebebil er a taem e kede mo mechechei er a rebebil. Me bo dosaod a bebil kerebai el ngar a Biblia el ngosukid er sel uchul me a chelechei a sebechel duubech er a rengud. Kede dirrek el mo mesaod a bebil rolel e ngsebeched el oltngakl a chelechei e mo meleketek a budech.

4. Ngera uchul me a rechad er a Filistia a mle mechechei er a Isak?

⁴ A lsekum a chad a merau. A Isak a mle merau el chad, me a rechad er a Filistia a mle mechechei er ngii. (Gen. 26:12-14) Me te dilakl aike el chido el luluusbech a Isak el omngim a chermel. (Gen. 26:15, 16, 27) A rebebil er a rechad er chelechang a ua blekerdelir a rechad er a Filistia el dirrek el mo mechechei er tirke el kuk betok a kerruul er tir. Ngdiak di lengibes aike el ngar ngii er a rebebil, e ngdirrek el chetirir a lebo er ngii er a rebebil aika el klalo.

5. Ngera uchul me a remengeteklel a klechelid a mle mechechei er a Jesus?

⁵ A lsekum a rebetok a sorir a chad. A remengeteklel a klechelid er a Judea a mle mechechei er a Jesus, e le ngmle betok a rechad el sorir ngii. (Mt. 7:28, 29) A Jesus a ulemtechei er a Dios, e dirrek el ullisechakl er a klemerang. Me nguaisei, engdi tirka el mengeteklel a klechelid a ulemerk a blulak el tekoi el melemall a chisel. (Mk. 15:10; Jn. 11:47, 48; 12:12, 13, 19) Ngera el lomengelechel a desuubii er tia el cheldecheduch? Ngkmal kired loltngakl er a uldasu el mo mechechei er a rudam me a rudos el rebetok el chad er a ongdibel a betik a rengrir er tir e le ngungil blekerdelir a uchul. Ngbai kired el melasem el mo oukerebai aika el ungil blekerdelir.​—1 Ko. 11:1; 3 Jn. 11.

6. Ngoeak a ngera el rolel e a Diotrefes a mlo mechechei?

⁶ A lsekum e ngmo er ngii a ngerechelel a chad er a chelsel ongdibel. Ngar sel taem er a rekot el Kristiano e a Diotrefes a mlo mechechei er tirke el mlo er ngii a ngerechelir er a chelsel a ongdibel. Ngmle soal “el oumerreder er ngii” er a delongelir a rechedal a ongdibel, me ngulemerk a mekngit el tekoi el melemall a chisel a apostol Johanes me a relmuut el bebil er a rudam el ngar ngii a ngerechelir. (3 Jn. 9, 10) Alta e ngdiak bo doruul a tekoi el ua lurruul a Diotrefes, engdi ngsebeched lomuchel el mo mechechei er a kldemed el Kristiano el moterekokl er ngii a ngerachel el kid a millatk el mo nguu, e ileakl a lsekum kede omdasu el kmo kede rredemelel a meruul er ngii el lureor.

7. Ngera telemellel a chelechei el reng?

⁷ A chelechei a di ua omekodall el chudel. Sel ta el lemukeroul a chelechei er a chelsel a rengud, e ngmerengela er kid el mengoit er ngii. A mekngit el blekeradel el ua bechelechelingaol reng me a kldidairreng me a chad el di melatk er a di ngii a mekurulii a chelechei. Me ngdi ua omekodall el chudel el sebechel mekoad a ungil blekeradel el ua bltikerreng, klechubechub, me a blekokuii. Me sel bo dutebengii el kmo ngmocha er ngii a chelechei er a rengud, e ngungil a demereched el otngeklii. Me ngmekera e mo sebeched lotngeklii a chelechei?

8. Ngera el blekeradel a sebechel ngosukid lotngeklii a chelechei?

⁸ Ngsebeched lotngeklii a chelechei lokiu sel domekeroul er a klengariourreng me a tabesul luldasu. Me sel lengar er ngii er a rengud aika el ungil blekeradel, e ngmo diak a techellel el mukeroul a chelechei er a rengud. A klengariourreng a ngosukid me ngdiak di el kid el chemat er kid. A ngariou a rengul chad a diak lomdasu el kmo ngkuk ungil er a rokui el chad. (Gal. 6:3, 4) A chad el tabesul a uldesuel a dmeu a rengul er aike el ngar ngii er ngii, e diak lomekesiu er ngii el mora rebebil. (1 Ti. 6:7, 8) Me a chad el ngariou a rengul e tabesul a uldesuel a dmeu a rengul sel lesa ta er a chad el nguu a klengeltengat.

9. A doltirakl er a Galatia 5:16 me a Filipi 2:3, 4, e ngmekera lengesukid a chedaol reng er a Dios?

⁹ Kede ousbech er a chedaol reng er a Dios el ngosukid me ngdiak bo demechechei er a rebebil, e dirrek el ngosukid lomekeroul er a klengariourreng me a tabesul luldasu. (Monguiu er a Galatia 5:16; Filipi 2:3, 4.) A chedaol  reng er a Jehovah a sebechel ngosukid el mo ungil merriter a uldesued me a moktek er kid. Ngokiu a ngelsuil a Dios, e ngsebeched el mtechei a mekngit luldasu lolab a ungil luldasu. (Psa. 26:2; 51:10) Me bo dosaod a kerebil a Moses me a Paulus, el tir a mlo mesisiich er a chelechei el reng.

10. Ngera el blekeradel a milsemai er a Moses? (Momes er a siasing er a medal tia el babier.)

¹⁰ A Moses a mla er ngii a klou el klisichel el mengedereder er a rechedal a Dios, engdi ngdimlak longreos er tia el dereder me lak lenguu a rebebil. El ua tiang, a ta el taem e a Jehovah a ngiluu a telkib er sel reng er ngii el mlora Moses el mesterir tirke el bebil er a remechuodel el mle dechor er bita er a tento el mla er ngii a miting. Telkib el taem er a uriul, e a Moses a rirenges el kmo a reteru er a remechuodel el dimlak lengar sel tento a dirrek el ngiluu a chedaol reng me te mocha meruul a tekoi el ua reprofet. Me ngmilekerang er sel taem el Josua a dilu er ngii me bo lorrob er tirka el mechuodel? A Moses a dimlak bo lemechechei er tirka el terung er a tekoi el bla lerellii a Jehovah el mo er tir. Ngbai ulechotii a klengariourreng e uleldeu er a rengul lobengterir el kirel tia el ileakl el techellir. (Ule. 11:24-29) Me ngera klubeled el denguu er a blekerdelel a Moses?

11. Ngoeak a ngera el rolel e a remechuodel a sebechir loukerebai er a Moses?

¹¹ A lsekum ke ta er a remechuodel, e te mla olengit er kau el mo olisechakl er a chad el mo sebechel meruul a ngerachel er a chelsel a ongdibel el kau a kmal soam? El ua tiang, nglocha kmal soam el oungerachel er a Omesubel a Ongkerongel er a bek el sandei. Engdi a lsekum e ngariou a rengum el ua Moses, e ngdiak bo momdasu el kmo ngdikea ultutelem a lsekum ngmo kirem lolisechakl er a ta er a odam me a cherengel a taem e ngmo meduch el meruul er tia el ureor. Ngbai mo dmeu a rengum el ngosuir ngika lodam el mo meduch.

12. Ngoeak a ngera el rolel e a rebetok el Kristiano a olecholt er a klengariourreng me a tabesul luldasu?

¹² Ka molatk er a ta er a blekeradel el rebetok el mechudela el lodam a chelebangel er ngii. Ngmla mo betok el rak el losiou el tebechelel a chelechad er a remechuodel er a ongdibel. Engdi sera bo el 80 a rekrir, e te kilengei el oterekokl aika el ngerachel el mora rebebil. Me a rudam el mesiou el oldingel a ongdibel el mlo 70 a rekrir a uleba ngariourreng e mlo diak loruul aika el ngerachel e kuk mlo meruul a bebil rolel a omesiou. E ngar aika el mereko el rak, e a rebetok el mle chedal a telungalek er a Bethel a mlengodech a omesiungir el mo omerk er a klumech. Tirka el blak a rengrir el rudam me a rudos a dimlak bo el chetirir tirke el mlo meruul aike el ngerachel el tir a mirruul er a uchei.

13. Ngera uchul me ngmla er ngii a techellel a Paulus el mo mechechei er tirke el 12 el apostol?

¹³ A apostol Paulus a ta er a ungil kerebai el kirel a chad el milekurulii a tabesul luldasu me a klengariourreng. Ngdimlak lebecherei a chelechei me lemukeroul er a rengul. Ngmle blak a rengul meruul er a omesiungel, engdi nguleba klengariourreng er a ledu el kmo: “Ele mera er ngii e ngak a kot el ngar uriul er a re apostol, el diak lungil a kmokedong el apostol.” (1 Ko. 15:9, 10) Tirke el 12 el apostol a uleltirakl er a Jesus er a dirk losiou el ngar er tia el chutem, me ngar tia el taem e a Paulus a dirkak bo le Kristiano el mo lmuut er a uriul er a kodellel me a okisel a Jesus. Me alta e ngmlo er ngii a taem e ngmiltutk el mo “apostol er a re Chisentael,” engdi ngdimlak bo el ta er tirke el 12 el apostol. (Rom 11:13; Rel. 1:21-26) Ngdimlak bo lemechechei er tirke el 12 el chad me sel kmes el deleuill er tir me a Jesus, ngbai millemolem el dmeu a rengul er aike el mla er ngii er ngii.

14. Kede mo mekerang a lsekum ngtabesul a uldesued e ngariou a rengud?

¹⁴ A lsekum ngtabesul a uldesued e ngariou a rengud, e kede mo ua Paulus el olecholt a  omengull el mora dereder el Jehovah a mla mesterir a rebebil. (Rel. 21:20-26) Ngmla tutketerir a rudam el mo omekrael a ongdibel er a Rekristiano. Me alta e tirkang a diak lemecherrungel, engdi a Jehovah a omes er tir el “sengk el mor a rokui el chad.” (Efe. 4:8, 11) Me sel dolecholt a omengull el bedul tirka el mla metutk el chad, e doba klengariourreng loltirakl a ulekrael el lomeskid, e kede melemolem el kmeed er a Jehovah, e dirrek el dmeu a rengud er a budech er a delongeled kid me a rekldemed el Kristiano.

15. Ngera kired el meruul?

¹⁵ Ngdiak lsebechel mo er ngii a budech a lsekum e ngar ngii a klachechei er a delongeled. Ngkmal kired el oltngakl a chelechei me ngdiak lesiseb er a rengud, e dirrek el kerekikl me lak bo duchul e bo lemechechei er kid a rebebil. Ngkmal kired el meruul aika el meklou a ultutelel tekoi a lsekum ngsoad lolengesenges a llechul a Jehovah el mo “meruul a ikel mo uchul a budech ma olisichel a delongeled.” (Rom 14:19) Me ngera sebeched el meruul el ngosuterir a rebebil el mo oltngakl er a chelechei, e mekerang e mo sebeched el meleketek a budech?

16. Ngoeak a ngera el rolel e kede ngosuterir a rebebil me ngdiak bo lemechechei?

¹⁶ A blekerdeled me a omerelled a sebechel klou a lerellii er a rebebil. Tia el beluulechad a di soal meruul er kid el mo melisiich a “ilad er a keruul.” (1 Jn. 2:16, BT) E ngii el blekeradel a di melisiich a chelechei. Me lak doruul a tekoi el mo uchul a chelechei er a rengrir a rebebil lokiu sel dekerekikl el diak di dosaod a klokled me a lechub a klalo el dolatk lomechar. A lmuut el ta  er a rolel e ngdiak dolisiich a chelechei a sel bo letabesul a uldesued el kirel a techall er a omesiou el dolab. A lsekum kede blechoel di mesaod a techall el dolab e ngmo uchul e ngmukeroul a chelechei er a rengrir a rebebil. Engdi a lsekum kede olecholt a klemeriarreng el mora rebebil e chemat er tir er a urerir, e kede ngosuterir el mo ungil a rengrir e dirrek el smisichii a kltarreng me a budech er a chelsel a ongdibel.

17. Ngera mle sebechir a rubekul a Josef el rullii, e ngera uchul?

¹⁷ Kid a dirrek el sebeched el loltngakl a chelechei! Ka molatk a blekerdelir a rudam er a Josef. Betok el rak er a uriul er aike el mekngit lomerellir el mora Josef, e te liluut el mo kasoues er a beluu er a Ekipten. A Josef a millasem er a rudam er ngii er a uchei er a louchais er tir el kmo ngii ngtechang. Ngkiltmeklii a blengur er tir e milsa ochellel er a Benjamin a lmuut el betok el kall el kuk mle betok er a kelir tirke el bebil. (Gen. 43:33, 34) Engdi tirka el bebil a dimlak bo lemechechei er a Benjamin. Te bai ulechotii a ulekerreu el mo er ngika el ochellir me a dirrek el demerir el Jakob. (Gen. 44:30-34) Me tia el blekerdelir a rubekul a Josef el mla mo diak lemechechei a mlo uchul e ngliluut el mo er ngii a budech er a telungalek er tir. (Gen. 45:4, 15) Me ngdi osisiu, a lsekum kede kerekikl me ngdiak lebo er ngii a chelechei el reng er kid, e kede ngosuir a telungalek er kid me a dirrek el ongdibel me ngmo er ngii a budech er a chelsel.

18. A doltirakl er a Jakobus 3:17, 18, e ngera mo duubech a lsekum kede meleketek a budech?

¹⁸ A Jehovah a soal a doltngakl a chelechei e doleketek a budech. Me ngkmal kirel mo blak a rengud el meruul aika el eru el tekoi. Ngua dulsaod er tia el suobel, ngar ngii a techelled el mo mechechei. (Jak. 4:5) Kede dirrek el kiei er a chelsel a beluulechad el di melisiich a chelechei. Engdi a lsekum kede mekurulii a klengariourreng, e mo tabesul a uldesued, e mo olecholt omereng el saul, e ngmo diak a techellel a chelechei el mukeroul er a rengud. Ngbai mo sebeched el meleketek a budech el mo uchul e kede omekeroul a ungil blekeradel.​—Monguiu er a Jakobus 3:17, 18.