1-2. Ngera uchul, e milekerang a Jehovah e mekengii a techall me ngsebeched el mo chedal a telungalek er ngii?

A JEHOVAH a mla omekedong er kid el mo chedal a telungalek er ngii el tir a mengull er ngii. Me tiang a kmal ileakl el okedong! E a rechedal tia el telungalek er kid a rechad el tir a mla tonget a klengar er tir el mora Dios, e dirrek el oumerang er a olubet el tengetengel a Ngelekel el Sechal. Me ngdmeu a rengud el telungalek. Kede dirrek el dmeu a rengud er a klengar er kid er chelechang el ngar ngii a belkul, e dirrek el oba omelatk el kirel a klengar el mo cherechar, alta e ngar a eanged me a lechub e ng Baradis el ngar tia el chutem.

² A Jehovah a kiltmeklii a tekoi el mo uchul me ngsebeched el mo chedal a telungalek er ngii e le ngkmal betik a rengul er kid. Ngmle sebechel rullii tiang er a leketmeklii a mekreos el tenget. (Jn. 3:16) Kede “mlochar ra meringel char.” (1 Ko. 6:20, BT) Me ngokiu a olubet el tenget, e a Jehovah a kiltmeklii a rolel e ngmo sebeched el mo kmeed er ngii. Me kede oba ileakl el techall el mo sebeched el lomekedong er ngika el Kot el Ngarbab, el Chedam. Me ngua dulsaod er sel mlo merek el suobel, a Jehovah a kot el ungil el Demad.

3. Ngera el ker a kired el melatk? (Dirrek el momes er a baks el “ A Jehovah, Ngungil Medengelkak?”)

³ Me ngdi ua tekingel a ta er a milluches er a Biblia el uleker el kmo: “Ngera sebechek el msa RUBAK el kirel a ikel rokui el klungiolel el mer ngak?” (Psa. 116:12) A nger a kmo, ngkmal diak lsebeched el mtechei a sulel a Demad el ngar a eanged. Me nguaisei, engdi a bltkil a rengul a rullid el mo betik a rengud er ngii. A apostol Johanes a milluches el kmo: “Kede oubltikerreng ele Dios a mle kot el oubltikerreng el mer kid.” (1 Jn. 4:19) Me ngokiu a ngera el rolel e kede ochotii el mora Demad el ngar a eanged el kmo ngbetik a rengud er ngii?

4. A doltirakl er a Jakobus 4:8, e ngera uchul me ngkirel mo blak a rengud lolekeed er kid er a Jehovah?

⁴ A Jehovah a soal a bo desechelil e dirrek el dongedecheduch er ngii. (Monguiu er a Jakobus 4:8.) Ngmengelechel er kid el mo “blechoel el meluluuch,” e ngii a di blechoel lorrenges er kid. (Rom 12:12) Ngdi blechoel kltmokl lorrenges er kid e dirrek el kmal diak a ta el bo lemesaul a rengul lorrenges er kid. E kid a dirrek el lorrenges er ngii lokiu sel donguiu er a Tekingel el Biblia, me aike el babier el motobed el ngii a ngosukid el mo ungil medengei a tekingel. Kede dirrek el lorrenges er ngii lokiu sel dekerekikl lorrenges sel dengar a miting er kid a Rekristiano. Ngdi ua ungil rolel a cheldecheduch er a delongelir a rengalek me a rechad er a blirir, a ungil cheldecheduch er a delongeled kid me a Jehovah a ngosukid me kede melemolem el kmeed er Ngii.

5. Ngmekera nglunguched e odeuir a rengul a Jehovah?

⁵ Molatk a tekoi el soam el meluluuch louchais er a Jehovah. Ngsoal sel mouchais er ngii aike el rokui el ngar a rengum lokiu a nglunguuch. (Psa. 62:8) Ngungil a dolatk el kmo: ‘Ngak ak di omelekl a nglunguchek, me a lechub e ngtekoi el mera el ngar a renguk?’ Ngulterekokl el kmal betik a rengum er a Jehovah, e dirrek el soam el melemolem lolekes er a deleuill er kau lobengkel. Tiaikid a uchul me ngkmal kirem el di blechoel mengedecheduch er ngii. Mouchais er ngii aike el berrotel er a rengum, me a deuil a rengum me a ringelem. Bo lulterekokl a rengum el kmo ngkmal sebechem lolengit a ngeso er ngii.

6. Ngera kired el meruul me bo lsebeched el melemolem el kmeed er a Demad el ngar a eanged?

⁶ A lsoad el melemolem el kmeed er a Demad el ngar a eanged, e ngkired el blechoel el mereng a sulel. Kede kongei a tekoi el ledilung a ta er a milluches er a psalm el kmo: “RUBAK el Dios er ngak, ke mla remuul a betok el tekoi el kiram. Ngdiak a ua ikau! Ke mla remuul a betok el ungil uldasu el kiram. A bo kulasem el ouchais el rokui, e ng kuk betok er a ikel sebechek el mchais.” (Psa. 40:5) Kede meruul a lmuut el betok el diak el di sel doba omereng el saul, e kede ochotii a omereng el saul er kid el mora Jehovah lokiu a tekinged me a omerelled. Tiang a rullid me kede ileakl er a rebetok el chad er chelecha el taem. Kid a kiei er a beluulechad el rechad er ngii a diak loba omereng el saul el kirel a tekoi el loruul a Dios el mo er tir. E a ta er a olechotel el kmo kede kiei er a taem er a “uriul sils” a blekerdelir a rechad el diak lolecholt a omereng el saul. (2 Ti. 3:1, 2, BT) Ngkmal diak lsoad el mo ua uldesuir!

7. A Jehovah, ngsoal a dokerang, e ngera uchul?

⁷ A ruungalek a kmal diak lsorir a rengelekir a lekautoketok, e ngbai sorir a bo leta rengrir. Me ngdi osisiu, a Jehovah a soal a rokui el ngelekel a bo leta rengrir. E a mera er ngii, a bltikerreng er a delongeled a ochotii el kmo kid a mera el Kristiano. (Jn. 13:35) Kede dirrek el kongei a tekingel a ta er a milluches er a psalm el kmo: “Ng meral ungil, e deurreng sel le dak el kiei a rudam el ta rengrir!” (Psa. 133:1) Me sel lebetik a rengud er a rudam me a rudos er kid e kede ochotii el kmo ngbetik a rengud er a Jehovah. (1 Jn. 4:20) Ngkmal ileakl el techall a dobang el chedal a telungalek er a rudam me a rudos el tir a ‘bekokuii e chubechub ra delongelir’!​—Efe. 4:32.

8. A doltirakl er a 1 Johanes 5:3, e ngera kot el klou a ultutelel luchul me ngkired lolengesenges er a Jehovah?

⁸ A Jehovah a mengerechir er a rengalek el mo olengesenges er a redemerir me a rederrir, e dirrek el mengerechir er kid el mo olengesenges er ngii. (Efe. 6:1) Ngii a rredemelel a nguu a blekongesenges er kid e le ngii a Ulemeob, e Uchul a klengar er kid, e dirrek el kot el mellomes a rengul el Chedam. Me nguaisei, engdi a kot el klou a ultutelel luchul me kede olengesenges er a Jehovah, a kid el betik a rengud er ngii. (Monguiu er a 1 Johanes 5:3.) Me alta e ngbetok a uchul me ngkired lolengesenges er a Jehovah, engdi  ngdiak lorrimel er kid el mo meruul uaisei. A Jehovah a milskid a sengk el ilmekled el melilt a tekoi, me ngdmeu a rengul a lsekum kede melilt el mo olengesenges er ngii e le ngbetik a rengud er ngii.

9-10. Ngera uchul me ngklou a ultutelel el dekiei loltirakl a llechul a Dios?

⁹ A ruungalek a sorir a lulekerreu a rengelekir. Tiaikid a uchul me te oterekokl a llach el mo omekerreu er a rengelekir. Me a lsekum a rengelekir a olengesenges ngii el llach, e te ochotii el kmo te oumerang er a redemerir me a rederrir e dirrek el oba omengull el bedultir. Me nglmuut el klou a ultutelel sel dodengei e dolengesenges a llechul a Demad e dekiei loltirakl ngii el llach. Me sel doruul uaisei, e kede ochotii el mora Jehovah el kmo ngbetik a rengud e dirrek el mengull er ngii, e dirrek el mo uchul a klungioled. (Isa. 48:17, 18) Engdi tirke el loltngakl er a Jehovah me a llechul a di tir lochau a tellemall el mo er tir.​—Gal. 6:7, 8.

¹⁰ Me sel dekiei el klengar er kid a oldeu er a rengul a Jehovah, e ngomekerreu er kid er a tekoi el sebechel melemall er a bedenged me a rengud me a dirrek el deleuill er kid lobengkel. A Jehovah a medengei a kot lungil er kid. A Aurora, el kiei er a Merikel a kmo, “Ak medengei el kmo a dolengesenges er a Jehovah e ngmo uchul a kot lungil rolel a klengar.” E tiang a kmal klemerang. Ngera el klungiaol a obla mngai e le kau lolengesenges a ulekrael er a Jehovah?

11. Ngokiu a ngera el rolel e a nglunguuch a ngosukid?

¹¹ A nglunguuch a ngosukid el mo bekongesenges, el mo lmuut er a taem el bo lemeringel er kid. A lebebil er a taem e ngmo meringel er kid lolengesenges er a Jehovah, engdi ngkmal kired  el melasem el olengesenges. A ta er a milluches er a psalm a ullengit er a Dios el kmo: “Mrellii a renguk el mo bekongesenges.” (Psa. 51:12) A Denise, el regular pioneer a kmo, “Ak meluluuch lolengit a klisiich el mo meruul a llemalt, a lsekum ngmocha meringel er ngak lolengesenges a llechul a Jehovah.” Me kid me ngsebechel mo ulterekokl a rengud el kmo a Jehovah a di blechoel longer a chouaika el nglunguuch.​—Lk. 11:9-13.

12. A doltirakl er a Efesus 5:1, e ngkired el mekerang?

¹² Monguiu er a Efesus 5:1. Kid el ‘cheleoch el ngelekel’ a Jehovah a uchul me kede mora tkurrebab el sebeched loukerebai er ngii. Kede oukerebai er ngii lokiu sel doubltikerreng, e debekokuii, e dirrek el dousubes er a rebebil. Me sel lomes a ungil lomerelled tirke el diak lodengelii a Dios, e te mo semeriar el mo medengelii. (1 Pe. 2:12) A ruungalek el Kristiano a ngar ngii a ungil luchul me te oukerebai er a Jehovah el kirel a omerellir el mora rengelekir. E sel loruul uaisei, e a rengelekir a dirrek el mo semeriar lolekes er a deleuill er tir lobengkel ngika el betik a rengul el Demad.

13. Ngera kired el meruul me bo doba blekeu?

¹³ A kekerei el ngalek a kmal dmeu a rengul el kirel a demal e dirrek el soal mesaod el kirel. Me ngdi osisiu, kid a dmeu a rengud el kirel a Demad el ngar a eanged el Jehovah, e dirrek el soad louchais el kirel mora rechad. Ngar er a rengud e kede di ua uldesuel a King David el milluches el kmo: “Ak mo oldanges er [a Jehovah].” (Psa. 34:2) Engdi kede mo mekerang a lsekum  kede merur el mesaod el kirel a Jehovah? Kede mekera e mo oba blekeu? Kede mo oba blekeu sel dolatk el kmo ngsebeched el rullii a Jehovah el mo dmeu a rengul, me sel dolatk a klungiaol el bo lengai a rechad el mo mesuub el kirel. A Jehovah a mo meskid a blekenged. Ngullengeseu er a rudam er kid er a irechar el mo bekeu, me ngdirrek el sebechel ngosukid.​—1 Th. 2:2.

14. Ngera bebil luchul me ngklou a ultutelel el deteloi er a ureor el meruul er a remo disaiplo?

¹⁴ A Jehovah a diak longetukel er a rechad, e dirrek el dmeu a rengul sel lesekid loubltikerreng el mora rechad el diak lultuil er a kmo te chad er ker beluu. (Rel. 10:34, 35) A ta er a kot lungil rolel e kede oubltikerreng el mora rechad a okiu sel domerk er a ungil chais el mo er tir. (Mt. 28:19, 20) Ngera ngrullii tia lureor? Tirke el mo orrenges er kid a sebechel lmuut el mo ungil a klengar er tir e dirrek el mo oba omelatk el mo kiei el mo cherechar er a chelsel a Baradis.​—1 Ti. 4:16.

15-16. Ngera ike el uchul me ngdmeu a rengud?

¹⁵ A Jehovah a betik a rengul el Chedam, me ngsoal a rechedal a telungalek er ngii a ledeu a rengrir. (Isa. 65:14) Ngbetok a uchul me ngsebechel mo dmeu a rengud er chelechang, alta e kede chuarm a ringelel a klechad. El ua tiang, ngulterekokl a rengud el kmo a Demad el ngar a eanged a kmal betik a rengul er kid. Ngdirrek el melemalt a klemedengei er kid el kirel a Tekingel a Dios el Biblia. (Jer. 15:16) Kede dirrek el chedal tia el ileakl el telungalek el rechad er ngii a betik a rengrir er a Jehovah me a ngarbab el llechul, e dirrek el kaubltikerreng.​—Psa. 106:4, 5.

¹⁶ Ngdmeu a rengud e le kede oba omelatk el kirel a lmuut lungil klengar el mo er ngii er a ngar medad. Kede medengei el kmo ngdi kmedung e a Jehovah a mo okngemedeterir a rokui el mekngit, e dirrek el okiu a Rengedel e tia el chutem a lmuut el mo Baradis. Kede dirrek loba omelatk er a okiis el kirir tirke el betik er a rengud el mla mad. (Jn. 5:28, 29) Tiang a mera el mo taem er a klou el deurreng! E sel kot el klou a ultutelel el tekoi a kmo ngulterekokl a rengud el kmo ngdi kmedung e tirke el rokui el ngar a eanged me tia el chutem a mo dmak e msang a chetengakl me a omengull me a odanges ngika el betik a rengul el Demad el ngii a rredemelel aika el tekoi.