1. Ngera bebil ker el kirel a mesobil el odos el loker sel lolatk er a odam el ngii a soal mo bechil?

A ROKUI el Kristiano a ngar cheungel a chederedellel a Jesus Kristus, el ngii a cherrungel el rolel a dereder. Me nguaisei engdi a Kristiano el redil sel bo lebechiil, e ngmocha chederedall er a diak lecherrungel el chad. E tia diak lebeot el tekoi. Me sel lolatk er a odam el ngii a soal mo bechil, e ngungil a loker aika el ker: ‘Ngera ochotii el kmo ngika el odam a mo ungil bdelul a telungalek? A omesiungel el mora Jehovah ngkot el klou a ultutelel el tekoi er a klengar er ngii? A lsekum e ngdiak, e ngngera rullak el mo omdasu el kmo ngika sebechel ngosukemam el mo mesisiich er a tekoi er a klereng er a uriul er aki bo bechiil?’ Nguaisei a odos a dirrek el kirel di ngii el loker el kmo: ‘Ngera el blekeradel a kulab el sebechel mo uchul a klungiolel a chebechiil? Ngak ngklou a renguk e bekururau? Ngar ngii a mesisiich el deleuill er ngak me a Jehovah?’ (Oli. 4:9, 12) A klungel a deurreng er a bechiil el redil er a chebechiielel a di mo ultuil er a omelilt el loruul er a uchei er a bo lebechiil.

2. Ngera kede mo mesaod er tia el suobel?

² A rebetok el miliol el odos el Kristiano a mla kutmeklii a kmal ungil kerebai e le te kongei el chederedall er a rebecherir. Me kede kmal chemat er tir! Ngdmeu a rengud el mesiou er a Jehovah el obengterir tirka el blak a rengrir el redil! Ngar tia el suobel, e kede mo mesaod a nger er aika el edei el ker: (1) Ngera bebil er a omelsemai el bo lechebangel a rebechiil el redil? (2) Ngera uchul me a bechiil el redil a kongei el chederedall er a bechil? (3) A Rekristiano el bechiil el sechal me a redil ngngera sebechir el suub er a kerebai er a Jesus, Abigail, me a Maria el bechil a Josef e delal a Jesus, el tir a milengull a dereder?

3. Ngera uchul me ngmo er ngii a ringelel a chebechiil?

³ A chebechiil a cherrungel el sengk el mlara Dios, me nguaisei engdi a rechad a diak lemecherrungel. (1 Jn. 1:8) Sei a uchul me  a Tekingel a Dios a omeklatk er a rubekel el kmo sel bo lebechiil e te mo metik a “rengelel a klechad.” (1 Ko. 7:28) Ka momtab a bebil omelsemai el locha bo lechebangel a bechiil el redil. 

4. Nglocha ngera uchul me a a bechiil el redil a mo omdasu el kmo a bo lechederedall er a bechil e ngmengkekerei er a klungel a ultutelel?

⁴ A lebebil er a taem e a okurulel a bechiil el redil a uchul me ngmo omdasu el kmo, a bo lechederedall er a bechil e ngmengkekerei er a klungel a ultutelel. A Marisol el kiei er a Merikel a melekoi el kmo, “Ngar er a basio el kmlukeroul er ngii e te millekoi el kmo a redil me a resechal a kirir el di mo osisiu er a rokui el tekoi. Ak medengei el kmo a Jehovah a mla kutmeklii a blechebechel a dereder e mla mesterir a redil a ngariou el deruchall engdi te mocholt a omengull. Me nguaisei, engdi a lebebil e ngmo meringel er ngak a oba tabesul uldasu el kirel a dereder.”

5. Ngera el uldasu el kirel a redil el diak lemengai a uchetemel er a bades, a lolab a rebebil el sechal?

⁵ Me nguaisei engdi a redil a locha bechil a chad el ngii omdasu el kmo a resechal a lmuut el meklou a ultutelir er a redil. A odos el Ivon el kiei er a South America a melekoi el kmo, “Ngar er a basio er kemam e a resechal a kot el omengur e te mochu redil. A remekekerei el ngalek el redil a kirir el meruul a kall e mengetmokl e a rengalek el sechal a losiou er tir a rederrir me a ruchederir. Te dmu er a resechal el kmo te ‘king er a blai.’” A odos el Yingling el kiei er a Asia a melekoi el kmo: “Ngar omelekingam e ngngar ngii a belkul a tekoi el kmo, a redil a diak a belkul a lengar ngii a llemesir me a lechub e ngduch er tir. A ngerechelir a di meruul a ureor er a blai me tir a diak el sebechir louchais er a rebecherir a uldesuir.” Me a bechiil el sechal el mukrael er aika el uldasu el ngii a diak lolechotel a bltikerreng e dirrek el diak lemengai a uchetemel er a bades, a rullii a klengar er a bechil el kmal mo meringel, diak loukerebai er a Jesus, e diak lodeuir a rengul a Jehovah.​—Efe. 5:28, 29; 1 Pe. 3:7.

6. Ngera kirir a rebechiil el redil el meruul el melisiich er a deleuill er tir me a Jehovah?

⁶ Me ngdi ua dulsaod er sel mlo merek el suobel, a Jehovah a mengerechir er a Kristiano el bechiil el sechal el mo msa telungalek er ngii aike el lousbech er a tekoi er a klereng, uldesuir me a rengrir, me a klechad. (1 Ti. 5:8) Me nguaisei engdi alta bechiil el odos a kmal mechesang, engdi ngkirel mengoit a taem er a bek el sils el menguiu e melebedebek er a Tekingel a Dios e meluluuch el mera el ngar er a rengul el mora Jehovah. Tia sebechel mo meringel. A rebechiil el redil a kmal mechesang me te locha mo omdasu el kmo ngdiak a temir me a klisichel a bedengir el meruul aika el tekoi, engdi ngklou a ultutelel a leketmokl a temir el kirel. E ngera uchul? E le Jehovah a soal a derta er kid a leteketekii e lolemolem el mesisiich a deleuill er ngii lobengkel.​—Rel. 17:27.

7. Ngera mo rullii a bechiil el redil el mo beot er ngii a meruul er a ngerechelel?

⁷ Kede medengei el kmo nglocha mo kirel a bechiil el redil el meringel loureor el chederedall er a bechil, el ngii a diak el lecherrungel. Me nguaisei, engdi ngmo metik el kmo ngbeot er ngii a meruul er a ngerachel el Jehovah a mla msang a lsekum e ngmo medengei e kongei a uchul me a Bades a kmo ngkirel chederedall er a bechil.

8. A doltirakl er a Efesus 5:22-24, e ngera uchul me a Kristiano el bechiil el redil a kongei el chederedall er a bechil?

⁸ A Kristiano el bechiil el redil a kongei el chederedall er a bechil e le Jehovah olengit er ngii. (Monguiu er a Efesus 5:22-24.) Ngoumerang er a Demal el ngar er a eanged e le ngmedengei el kmo aike el loruul a di oeak a bltikerreng me aike el lolengit er ngii el mo  meruul a di mo uchul a klungiolel.​—Dut. 6:24; 1 Jn. 5:3.

9. Ngera duubech a lsekum a Kristiano el bechiil el redil a mengull er a klisichel a dereder el loba bechil?

⁹ A beluulechad a melisiich er a redil el mo oltngakl a llechul a Jehovah e mo omes er a blechebechel a dereder el kmo ngmengkekerei er a klungel a ultutelir. Nguaisei, tirke loldubech aika el uldasu a diak lodengelii a betik a rengul Dios. A Jehovah a kmal diak el sebechel lolengit er a remekreos el ngelekel el redil el mo meruul er a tekoi el mo mengkekerei er a klungel a ultutelir. A odos el meringel loureor el meruul er a ngerechelel el bla lebsa Jehovah a melisiich er a budech er a chelsel a delengcheklel. (Psa. 119:165) Ngmo klungiolel e dirrek el mo klungiolel a bechil me a rengelekel.

10. Ngera sebeched el suub er a tekingel a Carol?

¹⁰ A bechiil el redil el chederedall er a bechil el ngii a diak lecherrungel a ochotii el kmo, ngbetik a rengul e mengull er a Jehovah, el ngike el kiltmeklii a blechebechel a dereder. A Carol el kiei er a South America a melekoi el kmo, “Ak medengei el kmo a bechik a mo remuul a cheleuid. Ak dirrek el medengei el kmo a omerellek el bedul ngii sel leruul a cheleuid a ochotii a kerresel a deleuill er ngak me a Jehovah. Me ak melasem el melemolem el chederedall er ngii e le ngsoak el lodeuir a rengul a Demak el ngar er a eanged.”

11. Ngera ngosuir a odos el Aneese el mo ousubes, e ngera sebeched el suub er a tekingel?

¹¹ Ngsebechel el mo meringel er a bechiil el redil el mengull er a bechil e chederedall er ngii a lsekum e ngomdasu el kmo a bechil a diak lolatk er a uldesuel. Ka momtab a tekingel a odos el Aneese el kirel sel leduubech tia el tekoi. Ngmelekoi el kmo: “Ak melasem el diak kungemekl a ngesechel a renguk. Ak melatk el kmo kid el rokui a mo remuul a cheleuid. Ak mla tibir a renguk el mo blechoel lousubes el ua Jehovah. Sel kuusubes e nglmuut el mo budech a uldesuek.” (Psa. 86:5) A bechiil el redil el ngii ousubes a mo metik el kmo ngmo beot er ngii el chederedall er a bechil.

12. Ngera el kerebai a debetik er a Biblia?

¹² A rebebil a omdasu el kmo a rechad el kongei el chederedall a mechitechut a rengrir. Engdi tiang a kmal diak le klemera el tekoi. Kede metik er a Biblia a betok el kerebai er a rechad el milengull a dereder el tir a mle mesisiich a rengrir.  Mutab a sebeched el suub er a Jesus, Abigail, me a Maria.

13. Ngera uchul me a Jesus a chederedall er a Jehovah? Mosaod.

¹³ A Jesus a chederedall er a Jehovah engdi ngdiak lebelkul a kmo ngdiak lemellomes a rengul e diak a duch er ngii. A beot e bleketakl el rolel a lullisechakl a ochotii el kmo ngkmal mellomes a rengul. (Jn. 7:45, 46) A Jehovah a mle medengelii a dechal a Jesus me ngkilengei er ngii el mo obengkel el omeob a rokui el tekoi. (Osi. 8:30; Heb. 1:2-4) Sera lokisii e ngmilsang a “rokui el klisiich er omerreder er a eanged ma beluulchad.” (Mt. 28:18) Me alta Jesus a betok a lemeduch er ngii, engdi ngultuil er a Jehovah el kirel a ulekrael. E ngera uchul? E le ngbetik a rengul er a Demal.​—Jn. 14:31.

14. Ngera sebechir a rebechiil el sechal el suub er a (a) osengel a Jehovah el kirel a redil? (b) tekoi el llechukl er a Osisechakl 31?

¹⁴ Aike el sebechir a rebechiil el sechal el suub. A Jehovah a dimlak lerellii a bechiil el redil el mo chederedall er a bechil e le ngomes er tir el ngariou er a resechal. Ngulterekeklii tia el tekoi er a lolilt er a resechal me a redil el mo mengedereder lobengkel a Jesus. (Gal. 3:26-29) E mla ochotii el kmo ngoumerang er a Ngelekel e le ngmla msa klisiich. Ngdi osisiu, a mellomes a rengul el bechiil el sechal a omsa bechil a bebil el klisiich. A Tekingel a Dios a mesaod er a ungil bechiil el redil el kmo, ngmengedereder a ureor er a blai, ngomechar e omes a chutem, e dirrek el mengereker. (Monguiu er a Osisechakl 31:15, 16, 18.) Ngika diak lesibai el diak el sebechel lolecholt er a uldesuel. A bechil a bai oumerang er ngii e orrenges a uldesuel. (Monguiu er a Osisechakl 31:11, 26, 27.) Me a sechal sel lolecholt er a chouaitia el omengull el mora bechil, e a bechil a mo soal chederedall er ngii.

15. Ngera sebechir a rebechiil el redil el suub er a kerebil a Jesus?

¹⁵ Aike el sebechir a rebechiil el redil el suub. Alta Jesus a mla kutmokl a betok el tekoi, engdi ngdiak lomdasu el kmo a lechederedall er a Jehovah e ngmengkekerei er a klungel a ultutelel. (1 Ko. 15:28; Fil. 2:5, 6) Ngdi osisiu, a ungil bechiil el redil el loltirakl er a kerebil a Jesus a diak lomdasu el kmo ngmo diak a ultutelel a lechederedall er a bechil. Ngolengeseu e oltirakl er a bechil e le ngbetik a rengul er ngii, engdi a ngaruchei er ngii e ngmeruul el uaisei e le ngbetik a rengul er a Jehovah e mengull er ngii.

16. A doltirakl er a 1 Samuel 25:3, 23-28, e ngera el omelsemai a blo lechelebangel a Abigail? (Momes er a siasing er a medal tia el babier.)

¹⁶ A Abigail a mle bechil a chad el ngklel a Nabal. Ngika kmal mle kedidai a rengul, di millatk er a di ngii, e dimlak lodengei a saul. Me nguaisei engdi Abigail a dimlak losiik a rolel e letobed er a chebechiielel, alta ngmle sebechel el di lmuk e mecherei a David me a rechedal me te mekodir a bechil. Ngbai mirruul a tekoi el mo omekerreu er a bechil me a delengcheklir. Ka molatk er a klou el blekeu el lulechotii er a lebora David me a re 400 el soldau er ngii el bliull er a klekedall er a mekemad e lolasem el mesaod er tia el mondai. Ngkilengei el motelechakl el kirel a mekngit el omerellel a bechil. (Monguiu er a 1 Samuel 25:3, 23-28.) Me a David a miltebengii el kmo a Jehovah uluusbech er ngika el mesisiich a rengul el redil el mo msa ulekrael me lak lerellii a oberaod el tekoi.

17. Ngera sebechir a rebechiil el sechal el suub er a tekoi el dilubech el mora David me a Abigail?

¹⁷ Aike el sebechir a rebechiil el sechal el suub. A Abigail a mle mellomes a rengul redil. E a David a ullecholt er a llomeserreng er a lorrenges er ngii. Sei a uchul me ngdimlak lerellii a tekoi el mo uchul e ngmo chelsechusem a chimal er a rsechir a rechad. Ngdi osisiu, a bechiil el sechal a olecholt er a llomeserreng sel lekerekikl el melatk a uldesuel a bechil er a uchei er a loruul a meklou a ultutelel el omelilt. Alta uldesuel a  bechil a mo ngosuir me ngdiak lerellii a mekngit el omelilt.

18. Ngera sebechir a rebechiil el redil el suub er a kerebil a Abigail?

¹⁸ Aike el sebechir a rebechiil el redil el suub. A bechiil el redil el betik a rengul er a Jehovah e mengull er ngii a sebechel mo uchul a klungiolel a telungalek er ngii, el mo lmuut me a lsekum a bechil a diak losiou er a Jehovah me a lechub e ngdiak le kiei loltirakl a llechul. Ngdiak bo losiik a rolel e le tobed er a chebechiielel el diak lemengai er a bades. Ngbai melemolem el mengull e chederedall er a bechil me bo el sebechel rullii a bechil el mo soal mo mesuub el kirel a Jehovah. (1 Pe. 3:1, 2) Me nguaisei, a lsekum a ungil omerellel a diak lerellii el mo soal mesiou er a Jehovah, engdi ngrullii a Jehovah el mo dmeu a rengul sel lomes er ngii el melemolem el chederedall e oba blakerreng el mo er Ngii.

19. Ngoingera el taem e a bechiil el redil a mo diak loltirakl a tekingel a bechil?

¹⁹ Me nguaisei, engdi a Kristiano el bechiil el redil a diak bo loltirakl a tekingel a bechil a lsekum e ngmo melemall a llach me a lechub e ngomellach er a Biblia. El ua tiang, omko a odos el bechil a diak el Sioning a mo dmu er ngii el lomulak, merechorech, me a lechub e ngmo meruul a tekoi el mekngit er a osengel a Jehovah. Kid el rokui el Kristiano el uldimukl er a rebechiil el odos, a kired el kot e kede oba blakerreng el mora Jehovah. Me a lsekum a bechil a odos olengit er ngii el mo melemall omellach er a Biblia, e ngkirel kotouar engdi ngoba delemedemek el smodii el mo er ngii er a uchul me ngdiak bo loruul er tia el tekoi.​—Rel. 5:29.

20. Kede mekera medengei el kmo a Maria a mla er ngii a kmes el deleuill er ngii me a Jehovah?

²⁰ A Maria a mla er ngii a kmes el deleuill er ngii me a Jehovah. Ngkmal mle ungil medengei a Bades. Ngar er a cheldechedechal ngii me a Elisabeth el delal a Johanes el Chad er a Techolb, e ngmle betok er a 20 el taem el losaod aike el Bades el tekoi er a Hebru. (Lk. 1:46-55) E molatk er tiang: Alta Maria a mle telbiil el mo bechil a Josef, me nguaisei engdi a anghel er a Jehovah dimlak lekot e bo lduum er a Josef. Ngmlo duum er a Maria el kot el mouchais er ngii el kmo ngmo mechellii a Ngelekel a Dios. (Lk. 1:26-33) A Jehovah a kmal mle ungil medengelii a Maria e mle ulterekokl a rengul el  kmo ngmo betik a rengul er a Ngelekel e mo omekerreu er ngii. Ngika millemolem el ngar ngii a ungil deleuill er ngii me a Jehovah el mora uriul er a lemad e lemokiis a Jesus el mora eanged.​—Rel. 1:14.

21. Ngera sebechir a rebechiil el sechal el suub er aike el lolekoi a Biblia el kirel a Maria?

²¹ Aike el sebechir a rebechiil el sechal el suub. A mellomes a rengul el bechiil el sechal a dmeu a rengul er a bechil el ungil medengei a Bades. Ngdiak bo lomdasu el kmo a bechil a soal melai er a deruchellel. Ngmtebengii el kmo a odos el ungil a klemedengei er ngii er a Biblia me a omellach er a Biblia a sebechel ngosuir a telungalek er ngii. Nguaisei alta bechiil el redil a ngarbab a skulel er a bechil, engdi a omengull el telungalek me a ngii di el tekoi er a omesiungir el telungalek a ngerechelel a bechiil el sechal.​—Efe. 6:4.

22. Ngera sebechir a rebechiil el redil el suub er a Maria?

²² Aike el sebechir a rebechiil el redil el suub. A bechiil el redil a kirel chederedall er a bechil engdi ngdirk ngerechelel melisiich er a klaumerang er ngii. (Gal. 6:5) Me ngkirel kutmeklii a taem el loruul er a omesubel er a Biblia el di ngii el tang e melebedebek. Tia mo ngosuir me ngmelemolem el mesisiich a bltkil a rengul el mora Jehovah e mengull er ngii e mo dmeu a rengul el chederedall er a bechil.

23. Te mekera rebechiil el redil el chederedall er a rebecherir e ngmai a klungiolir, e dirrek el mo uchul a klungiolel a telungalek er tir me a ongdibel?

²³ A rebechiil el redil el melemolem el chederedall er a rebecherir e le ngbetik a rengrir er a Jehovah, a mo klou a deurreng er tir e ungil a rengrir er a klengar er tir er tirke el oltngakl er a blechebechel a dereder el bla leketmeklii a Jehovah. Te kutmeklii a ungil kerebai el kirir a remekekerei el sechal me a redil. Te dirrek el olengeseu lomekeroul er a bltikerreng me a budech er a telungalek me a ongdibel. (Tit. 2:3-5) Chelecha el taem e te betok er a reblak a rengrir el mesiungel a Jehovah a redil. (Psa. 68:11) Kid el rokui el sechal me a redil a ngar ngii a klou a ultutelel el ngerecheled er a chelsel a ongdibel. A ongingil suobel a mo mesaod er a rolel e a derta er kid a sebechel rullii a ngerechelel.