1. Ngera el tekoi a locha mo omekrael er a uldesuel a sechal el kirel a derreder?

NGERA uldesuem el kirel a tekoi el “derreder”? A rebebil sechal a mechei siukang me a lechub e ngokurulir me ngomekrael a omerellir el mora rebecherir me a rengelekir. Momtab a tekingel a odos el Yanita el kiei er a Europe. Ngmelekoi el kmo, “Ngar er a basio el kiei er ngii e ngmesisiich a uldasu el kmo a redil a ngariou er a resechal e kirir sibai.” E a odam el Luke el kiei er a Merikel a kmo, “A rebebil chedam a olisechakl er a rengelekir el sechal el kmo a uldesuir a redil a diak el klou a ultutelel, me ngdiak a belkul a domtab er tir.” Me nguaisei, aika el uldasu a diak loltirakl er a rolel e a Jehovah soal a resechal a lousbech er a derreder el mla moterekokl er tir. (Momekesiu er a Markus 7:13.) Me ngmekera sechal e suubii el mo ungil bdelul a telungalek?

2. Ngera kirel a bdelul a telungalek el mo medengei, e ngera uchul?

² A sechal a bo lungil bdelul a telungalek, e a kot e ngkirel mo medengei a tekoi longerechir er ngii a Jehovah. Ngdirrek el kirel mo medengelii a uchul me a Jehovah a kiltmeklii a blechebechel a derreder me a rolel e ngsebechel loltirakl er a kerebai el bla leketmeklii a Jehovah me a Jesus. Ngera uchul me ngklou a ultutelel el bo lodengei ika el tekoi? E le Jehovah mla mesterir a rebdelul a telungalek a bebil klisiich, e mengerechir er tir el mo ungil lousbech.​—Lk. 12:48b.

3. Ngera kede suubii er a 1 Korinth 11:3 el kirel a derreder?

³ Monguiu er a 1 Korinth 11:3. Tia el bades a mesaod er a rolel a Jehovah a mla mechebechii a telungalek er ngii er a eanged me a chutem. A Jehovah a bdelud el rokui me ngii olab a rokui el klisiich. Ngoeak tia el blechebechel a derreder el bla leketmeklii e ngmla mesterir a rebebil a klisiich, me nguaisei engdi ngmengerechir er a rolel a lousbech er a klisiich el bla lengai. (Rom 14:10; Efe. 3:14, 15) Ngmla msa Jesus a klisichel er a ongdibel, engdi ngmengeriil er a Jesus er a omerellel el mei er kid. (1 Ko. 15:27)  Ngdirrek el mla msa bechiil el sechal a klisichel er a bechil me a rengelekel, me nguaisei engdi a Jehovah me a Jesus a mengeriil er ngii el kirel a omerellel el mora telungalek er ngii.​—1 Pe. 3:7.

4. Ngera el klisiich a lolab a Jehovah me a Jesus?

⁴ A Jehovah a Bdelul a telungalek er ngii me ngngar ngii a llemeltel meruul a llach el kirir a rengelekel e ngar ngii a klisichel loltaut. (Isa. 33:22, NW) A Jesus el bdelul ongdibel er a Rekristiano me ngdirrek el ngar ngii a llemeltel me a klisichel el meruul e oltaut a llach.​—Gal. 6:2; Kol. 1:18-20.

5. Ngera klisiich el lobang a bdelul a telungalek er a Rekristiano, e ngera telkelel?

⁵ A bdelul a telungalek er a Rekristiano a ngar ngii a klisichel el melilt a tekoi el kirel a telungalek er ngii, el loltirakl er a kerebai el bla leketmeklii a Jehovah me a Jesus. (Rom 7:2; Efe. 6:4) Me nguaisei, engdi a klisichel a telkael. El ua tiang, a llechul a kirel el mengai a uchetemel er a omellach el ngar er a Biblia. (Osi. 3:5, 6) Ngdirrek el diak a klisichel a bdelul a telungalek er a chad el diak el ngar er a telungalek er ngii. (Rom 14:4) E a rengelekel sel bo lemeklou e letobed er a blai e te dirk melemolem el mengull er ngii, engdi te mla mo diak el ngar cheungel a chederedellel.​—Mt. 19:5, BT.

6. Ngera uchul me a Jehovah a kiltmeklii a blechebechel a derreder?

⁶ A Jehovah a kiltmeklii a blechebechel a derreder e le ngbetik a rengul er a telungalek er ngii. Tia sengk el mla er ngii. A blechebechel a derreder a uchul me a telungalek er a Jehovah a sebechel meruul a tekoi el ngar er a ungilbesul e ulengeasek el rolel. (1 Ko. 14:33, 40) A lemlak a blechebechel a derreder e a telungalek er a Jehovah a di kaiueong el diak a deurreng er ngii. El ua tiang, ngdiak a medengei el kmo ngtecha mo olterekokl a tekoi el mengilt me a techa mo omekrael otutel.

7. A doltirakl er a Efesus 5:25, 28, e ngmle moktek er a Jehovah el sechal a mengedereder er a bechil?

⁷ Me a lsekum a blechebechel a derreder el bla leketmeklii a Dios a kmal ungil tekoi, e ngera uchul me a rebetok el redil er chelecha el taem a omelechesiu er a rebecherir el di mengedereder er tir e mekngit omerellir el mo er tir? E le rebetok el sechal a mengemikr a llechul a Jehovah el kirel a telungalek e oltirakl a siukang er tir. Te dirrek el locha mekngit a omerellir el mora rebecherir e le ngmo ungil a rengrir a loruul el uaisei. El ua tiang, a sechal a di mengedereder er a bechil el klsechal er ngii a uchul me a lechub e ngsoal lolecholt el mora rebebil el kmo “ngmeral sechal.” Nglocha omdasu el kmo ngdiak el sebechel oremelii a bechil el mo betik a rengul er ngii, engdi ngsebechel rullii el mo medakt er ngii. Nglocha mo ousbech er tia el dakt el mengedereder er ngii. * Chouaitia el uldasu me a blekeradel a diak lebsa redil a klebkall me a omengull el lerredemel, e dirrek el diak loltirakl er a soal a Jehovah.​—Monguiu er a Efesus 5:25, 28.

8. Ngmekera sechal e suubii el mo ungil bdelul a telungalek?

⁸ A sechal a sebechel suubii el mo ungil bdelul a telungalek loeak sel loukerebai er a rolel e a Jehovah me a Jesus a ousbech a derreder el lolab. Molatk a eru el blekeradel el lolecholt a Jehovah me a Jesus, e molatk er a rolel e a bdelul a telungalek a sebechel lolecholt aika el blekeradel el ngar omerellel el mora bechil me a rengelekel.

9. Ngmekera Jehovah er a lolecholt er a klengariourreng?

⁹ Klengariourreng. A Jehovah a ngike el kot el mellomes a rengul engdi ngorrenges a  uldesuir a remesiungel. (Gen. 18:23, 24, 32) Ngmesterir a rechederedall er ngii a techall el omsang a ngeso er a uldasu. (1 Ki. 22:19-22) Ngcherrungel engdi ngdiak longerechir er kid el mo cherrungel. Ngbai olengeseu er kid el diak demecherrungel el chad el churrengelii a omesiunged el mo er ngii. (Psa. 113:5-7) A Biblia mesaod el kirel a Jehovah el kmo ngngike el ‘olengeseu.’ (Psa. 27:9; Heb. 13:6) A King David a dilu el kmo, ngmle sebechel rullii a klou el ureor el lemlukngerachel er ngii e le Jehovah el ngariou a rengul a ullengeseu er ngii.​—2 Sa. 22:36.

10. Ngmilekera Jesus er a lolecholt er a klengariourreng?

¹⁰ Molatk er a kerebil a Jesus. Alta ng Rubak e Mastang er a redisaiplo er ngii engdi ngmerriso a ocherir. Ngera ta er a uchul me a Jehovah lilechesii tia el cheldecheduch er a Biblia? Ngmesterir a rokui el chad, el uldimukl er a rebdelul a telungalek a kerebai el bo loltirakl er ngii. A Jesus a di mle ngii el melekoi el kmo: “Ak mla rullii a kerbai el kiriu, me ng kiriu el mo meruul er sel bla krellii el ekor kemiu.” (Jn. 13:12-17) Me alta ngmla er ngii a klou el klisichel engdi ngdimlak lomdasu el kmo ngkirel siungel. Ngika bai milsiou er a rebebil.​—Mt. 20:28.

11. Ngera sebechel a bdelul a telungalek el suubii er a klengariourreng er a Jehovah me a Jesus?

¹¹ Klubeled. A bdelul a telungalek a olecholt er a klengariourreng el oeak a betok el rolel. El ua tiang, ngdiak longerechir er a bechil me a rengelekel el mo mecherrungel. Ngorrenges a uldesuir a rechedal a telungalek er ngii alta te diak lekengei er a uldesuel. A Marley el kiei er a Merikel a kmo: “Ngak me a bechik a lebebil ngdiak losisiu a uldesuam er a tekoi. Engdi ak medengei el kmo ngomes er ngak el klou a ultutelek e mengull er ngak, e le ngoker er a uldesuek e kerekikl el melatk er ngii er a uchei er a lolib a tekoi.” Me a lmuut kung a ngariou a rengul bechiil el sechal a kongei el meruul a ureor er a blai, alta rechad er a basio el lekiei er ngii a omes el kmo ngurerir a redil. E tia sebechel el mo meringel. E ngera uchul? A odos el Rachel a kmo, “Ngar sel basio el mlukeroul er ngii, e a lsekum a bechiil el sechal a olengeseu er a bechil el mellib a belatong me a lechub e ngmengetmokl er a blai, e a retonari er ngii me a rechedal a mo melekoi el kmo ngdiak ‘lemera el sechal.’ Te omdasu el kmo ngdiak el sebechel el choderderii a bechil.” A lsekum e nguaisei a blekeradel er a basio el omkiei er ngii, e lak mobes el kmo a Jesus a mirriso  ocherir a redisaiplo er ngii alta ngmle urerel a mesiou. Me a ungil bdelul a telungalek a diak el soal el meruul er ngii el mo ungil er a osengir a rechad, ngbai soal rullii a bechil me a rengelekel el mo ungil a rengrir. Ngera lmuut el ta er a blekeradel el lousbech er ngii a ungil bdelul a telungalek?

12. A bltikerreng ngrullii a Jehovah me a Jesus el mo mekerang?

¹² Bltikerreng. A rokui el tekoi el loruul a Jehovah a mengai a uchetemel er a bltikerreng. (1 Jn. 4:7, 8) Ngkerekikl el omeskid aike el dousbech er a tekoi er a klereng loeak a Tekingel Biblia me a cheldebechelel. Ngomeskid aike el dousbech er a tekoi er a uldesued me a rengud loeak sel lolterekokl el kmo ngbetik a rengul er kid. E kuk mekera ike el dousbech er a tekoi er a klechad? A Jehovah a “omeskid a rokui el tekoi el kired el oldeu a rengud er ngii.” (1 Ti. 6:17) Sel deruul a cheleuid e ngmesmechokl er kid e diak bo lak lebetik a rengul er kid. Ngbltkil a rengul el mei er kid a uchul me ngkiltmeklii a olubet. A Jesus a dirrek el kmal betik a rengul er kid me nguldersii a klengar er ngii el kired. (Jn. 3:16; 15:13) Ngdiak a sebechel choridii a bltikerreng er a Jehovah me a Jesus el mo er tirke el blak a rengrir el mo er tir.​—Jn. 13:1; Rom 8:35, 38, 39.

13. Ngera uchul me ngklou a ultutelel el kirel a bdelul a telungalek lolecholt a bltikerreng el mora telungalek er ngii? (Dirrek el momes er a baks el “ Ngmekera Dirk Mlo Bechiil el Sechal e Nguu Omengull er a Bechil?”)

¹³ Klubeled. A rokui el tekoi el loruul a bdelul a telungalek a kirel mengai a uchetemel er a bltikerreng. Ngera uchul me tia kmal klou a ultutelel? A apostol Johanes a dilu el kmo: “Ngikel diak le betik a rengul er chodam [me a lechub telungalek] er ngii el lomes er ngii er chelechang, a diak el sebechel mo betik a rengul ra Dios, el diak lesa ra medal.” (1 Jn. 4:11, 20, BT) Me a chad el betik a rengul er a telungalek er ngii e soal loukerebai er a Jehovah me a Jesus a mo msa telungalek er ngii aike el lousbech er a tekoi er a klereng, uldesuir me a rengrir, me a klechad. (1 Ti. 5:8) Ngolisechakl e mesmechokl er a rengelekel. Ngdirrek el melemolem el mesuub el melilt a tekoi el mengebkall er a Jehovah el mo uchul a klungiolel a telungalek er  ngii. Ka me bo dosaod a derta er aika el tekoi me a rolel a bdelul a telungalek a sebechel el loukerebai er a Jehovah me a Jesus.

14. Ngmekera bdelul a telungalek e omsa telungalek er ngii aike el lousbech er a tekoi er a klereng?

¹⁴ Omsa telungalek er ngii aike el lousbech er a tekoi er a klereng. A Jesus a di ua Demal el millatk aike el lousbech er a tekoi er a klereng tirke el mla er cheungel a chederedellel. (Mt. 5:3, 6; Mk. 6:34) Me ngdi osisiu, a kot el klou a ultutelel el ngerechelel a bdelul a telungalek a omsa telungalek er ngii aike el lousbech er a tekoi er a klereng. (Dut. 6:6-9) Ngmeruul er tiang loeak sel lekerekikl el kmo a rechedal telungalek er ngii a menguiu e mesuub er a Tekingel a Dios, mora miting, omerk er a ungil chais, e meleketek e melisiich er a deleuill er tir me a Jehovah.

15. Ngera ta er a rolel e a bdelul a telungalek a sebechel omsa telungalek er ngii aike lousbech er a tekoi er a uldesuir me a rengrir?

¹⁵ Omsa telungalek er ngii aike el lousbech er a tekoi er a uldesuir me a rengrir. A Jehovah a mla er mederir a rechad e ouchais er a bltkil a rengul el mora Jesus. (Mt. 3:17) A Jesus uluuchais er a rubengkel er a bltkil a rengul el mo er tir e dirrek el ulechotii loeak omerellel. Me a rubengkel me te dirrek luluuchais er ngii el kmo ngbetik a rengrir er ngii. (Jn. 15:9, 12, 13; 21:16) A bdelul a telungalek a sebechel lochotii a bltkil a rengul el mora bechil me a rengelekel loeak a tekoi el loruul, el ua sel losuub a Biblia el lobengterir. Ngdirrek el kirel louchais er tir el kmo ngbetik a rengul er tir e omes er tir el mekreos, e sel lungilbesul e ngchemat er tir er mederir a rechad.​—Osi. 31:28, 29.

16. Ngera dirrek el kirel a bdelul a telungalek el meruul er ngii, e mekera mo tabesul a tekoi el loruul?

¹⁶ Omsa telungalek er ngii aike el lousbech er a tekoi er a klechad. A Jehovah a ulemekerreu er a rechad er a Israel er aike el lousbech el mo lmuut er sel taem er a lomals er tir e le tir el dimlak lolengesenges. (Dut. 2:7; 29:5) Ngdirrek el omeskid aike el dousbech er chelecha el taem. (Mt. 6:31-33; 7:11) Ngdi osisiu, a Jesus a ulemeka er tirke el uleltirakl er ngii. (Mt. 14:17-20) Ngdirrek el ulemekungil er a rebetok el smecher. (Mt. 4:24) Me a bdelul a telungalek el soal lodeuir a rengul a Jehovah a kirel el omsa telungalek er ngii aike lousbech er a tekoi er a klechad. Me nguaisei, engdi ngkirel el mo tabesul a tekoi el loruul. Ngdiak el kirel kmal mo mechesang el oureor el mesiou er a telungalek er ngii, e bo lak el sebechel mesterir aike el lousbech er a tekoi er a klereng me a tekoi er a uldesuir me a rengrir.

17. Ngera el kerebai a lekiltmeklii a Jehovah me a Jesus er a rolel a lolisechakl e losmechokl er kid?

¹⁷ Ngolisechakl er a telungalek er ngii. A Jehovah olisechakl e mesmechokl er kid el mo uchul a klungioled. (Heb. 12:7-9) A Jesus a di ua Demal el olisechakl er tirke el ngar cheungel a chederedellel el oba bltikerreng. (Jn. 15:14, 15) Ngmesisiich a tekingel engdi ngmedemedemek. (Mt. 20:24-28) Ngmedengei el kmo ngdiak demecherrungel  me kede mo remuul a cheleuid.​—Mt. 26:41.

18. A ungil bdelul a telungalek ngera ngmedengelii?

¹⁸ A bdelul a telungalek el oukerebai er a Jehovah me a Jesus a medengei el kmo a bechil me a rengelekel a diak lemecherrungel. Ngdiak bo le “meterekakl” er tir. (Kol. 3:19) Ngbai oltaut er a omellach el ngar er a Galatia 6:1 e melasem el omeklemalt er tir el ‘oba delemedemek,’ e le ngmedengei el kmo ngii me ngdirrek el diak lecherrungel. Ngdi ua Jesus el medengei el kmo, a kot el ungil rolel a lolisechakl er tir a oeak a kerebai er ngii.​—1 Pe. 2:21.

19-20. Ngmekera bdelul a telungalek e oukerebai er a Jehovah me a Jesus sel lolilt a tekoi?

¹⁹ Ngdiak lolilt a tekoi el di mo uchul a klungiolel. A Jehovah a melilt a tekoi el mo uchul a klungiolir a rebebil. El ua tiang, ngmilebii a klengar el diak bo luchul a klungiolel e ngbai mle soal a bo doldeu a rengud er a klengar. Ngdimlak a sebechel oremelii el mo odersii a Ngelekel el melubet a kngtid. Ngdi mle ngii el kongei el meruul er tia el tenget el mo uchul a klungioled. A Jesus a dirrek el millilt a tekoi el mo uchul a klungiolir a rebebil. (Rom 15:3) El ua tiang, alta nguluusbech a ulengull engdi ngngileltii el mo olisechakl er a rechad.​—Mk. 6:31-34.

²⁰ A ungil bdelul a telungalek a medengei el kmo a ta er a kot el meringel el tekoi el kirel meruul er ngii, a mo ungil melilt a tekoi el kirel a telungalek er ngii. Ngdirrek el omes er tia el ngerachel el kmal klou a ultutelel. Ngdiak le ngii di lolilt a tekoi me a lechub e di lolilt a tekoi el loltirakl er a uldesuel a rengul. Ngbai mecherei a Jehovah me ngolisechakl er ngii. * (Osi. 2:6, 7) Ngoeak tiakid el rolel e ngmo melilt a tekoi el mo uchul a klungiolir a rebebil el diak di luchul a klungiolel.​—Fil. 2:4.

21. Ngera kede mo mesaod er a ongingil el suobel?

²¹ A Jehovah mla msa bdelul a telungalek a meringel el ngerachel, e mengerechir er a rolel a loltaut er ngii. Me nguaisei, engdi a lsekum a bechiil el sechal a melasem el loltirakl er a kerebai el bla leketmeklii a Jehovah me a Jesus, e ngmo ungil bdelul a telungalek. E a lsekum a bechiil el redil a otutii a ngerechelel e ngmo uchul a deurreng er a chebechiielir. Ngkirel uangerang a osengel a bechiil el redil el kirel a blechebechel a dereder, e ngera el omelsemai a bo lechelebangel? A ongingil el suobel a mo onger aika el ker.