NGMLA er ngii a reteru el mekekerei el redil el mirrael er a basio er a siobai er a Baguio City er a beluu er a Huriping. Te milsa cart er aike el babilenged engdi te di mirrael el engelakl. A Helen el odos el dilechor er bita er tia el cart a milseterir e kmal mlo klikmechur. Me alta te di millemolem el merael engdi te di millatk er a klikm er a Helen.

Uriul e te mlara bus el mo remei e mesa klou el jw.org el sign el ngar er a ta er a Blil a Ongdibel. Te mlo dobedebekii el kmo aika osisiu el tekoi el mla er sel cart el lilsang er a uchei. Me te miltengel er a bus el mo er tia el Blil a Ongdibel el mo omes a schedule er a miting el ngar er a gate.

Tirka el teru el redil a mlora ta er aika el miting. Me ngtecha lilsang er a lesiseb er a Blil a Ongdibel? Ng Helen! Te di mle mereched el dongchii el kmo ngika ngke el redil el kmal mle ungil a klikm er ngii. A Helen a melekoi el kmo, “Ak kora mlo bekikl er a lorael el bedul ngak. Ak mlo omdasu el kmo nglocha ngar ngii a bla ktemellii.” Me tirka el redil a silodii el mo er ngii er a tekoi el dilubech.

Te kmal mle sorir a miting. Ngdirrek el kmal mle dmeu a rengrir el teloi er a rudam me a rudos. Sera leseterir a rechad el mengetmokl er a uriul er a miting, e te ullengit el mo olengeseu er tir. A ta er tirka el redil a mla mora ngodech el beluu, engdi ngike el kuk tang a ulemuchel el ngar er a miting e ulemuchel el mesuub er a Biblia, el di mle klikm a uchul!