1-2. A doltirakl er a Mateus 5:11, e ngkirel uangera osenged el kirel a ringel?

A JESUS a tilbir el mora rultirakl er ngii el kmo te mera el mo dmeu a rengrir, engdi ngdirrek el milengelechel er tir el kmo tirke el betik a rengrir er ngii a mo chobangel a ringel. (Mt. 10:22, 23; Lk. 6:20-23) Me ngdmeu a rengud el disaiplo er a Kristus. Engdi ngmo uangera uldesued a lsekum a telungalek er kid a mo omtok er kid, kabelment a mo oldechelakl er kid, me a lechub a rechad er a urered me tirke el dedak el skuul a orrimel er kid el mo meruul a mekngit? Nguaisei, chouaika el tekoi a sebechel rullid el mo suebek a rengud.

² A rechad a diak lomes er a odechelakl el kmo nguchul a deurreng. Me nguaisei, engdi a Tekingel a Dios a melekoi el kmo ngkired el omes er ngii el uaisei. El ua tiang, a disaiplo el Jakobus a milluches el kmo lak debechei a ringel me el ielebid e ngbai kired el mo omes er ngii el uchul a deurreng. (Jak. 1:2, 12) A Jesus a dirrek el dilu el kmo ngkirel mo dmeu a rengud alta kede modechelakl. (Monguiu er a Mateus 5:11.) Kede mekera melemolem el dmeu a rengud alta kede chelebangel a ringel? Ngsebeched el ngmai a klubeled er a babilengel a Jakobus el mora rekot el Kristiano. Me a kot e me bo dosaod a omelsemai el blo lechelebangel tirka el Kristiano.

3. Ngera dilubech er a kedeb el taem er uriul er a bo el disaiplo er a Jesus a Jakobus?

³ Kedeb el taem er uriul er a bo el disaiplo a ochellel a Jesus er a Jakobus, e ngulemuchel a ultok el mora Rekristiano el ngar er a Jerusalem. (Rel. 1:14; 5:17, 18) E sel taem er a lokodir a disaiplo el  Stefanus, e a rebetok el Kristiano a chiliis e “melterakl el rokui el mora renged ra Judea ma Samaria” e mlo mekelekelii a Siprus me a Antiok. (Rel. 7:58–8:1, BT; 11:19) Te mlo chobangel a betok el ringel. Me nguaisei, engdi te mle blak a rengrir el omerk er a ungil chais er aike el basio el leblo er ngii, me ngmlo er ngii a betok el ongdibel er a chelsel a Renged er a Rom. (1 Pe. 1:1) Ngdi a lmuut el kmal meringel el taem a dirk mirrael el mei.

4. Ngera lmuut el bebil er a ringel el mle kirir loutekangel a rekot el Kristiano?

⁴ A rekot el Kristiano a mle kirir el outekangel a kakerous el bedengel a ringel. Ngar er a bekord el 50 C.E. e a Kaiser el Klaudius a ultebedii a tekingel el kmo, a rokui el Chijudea a kirir el tuobed er a Rom. Me a Rechijudea el mlo Kristiano a mle kirir el chemoit a delengcheklir e melukl el mora kuk ta er a beluu. (Rel. 18:1-3) E sera bekord el 61 C.E. e a apostol Paulus a milluches el kmo, a rekldemel el Kristiano a lulemekrur er tir er medal a seked, mlekelebus, e mlengai a kloklir. (Heb. 10:32-34) Te dirrek el mle ua rebek el chad el mlo chelebangel a chelebuul me a secher.​—Rom 15:26; Fil. 2:25-27.

5. Ngera el ker a bo donger?

⁵ A Jakobus a kmal mle ungil medengei a ringel el lechilebangel a rudam me a rudos er ngii er a llechesii a babilengel er a uchei er a 62 C.E. Me a Jehovah ulemekrael er ngii el mo meluches el mo er tir el omesterir a ulekrael el mo ngosuterir el melemolem el dmeu a rengrir alta te chelebangel a ringel. Me bo dorriter er a babilengel a Jakobus e donger aika el ker: A Jakobus ngmilluches el kirel a ngera el deurreng? Ngera sebechel mo uchul me a Kristiano oridii tia el deurreng? E mekera sebechel a llomeserreng, klaumerang, me a blekeu el ngosukid el melemolem el dmeu a rengud alta kede mo chelebangel a ringel?

6. A doltirakl er a Lukas 6:22, 23, e ngera uchul me a Kristiano a sebechel dmeu a rengul sel lechebangel a ringel?

⁶ A rechad a locha mo omdasu el kmo ngdi sebechir el mo dmeu a rengrir a lsekum ngmesisiich a bedengir, betok a ududir, e ngar ngii a deurreng er a telungalek er tir. Me nguaisei engdi a deurreng el lulluches el kirel a Jakobus a rodech er a chedaol reng er a Dios e diak lultuil er a tekoi el duubech er a klengar er kid. (Gal. 5:22) A Kristiano a metik a deurreng me a lechub e ngmo dmeu a rengul sel lodengei el kmo ngodeuir a rengul a Jehovah e oltirakl er a kerebil a Jesus. (Monguiu er a Lukas 6:22, 23; Kol. 1:10, 11) Tia el deurreng el kmard er a rengul a Kristiano a di ua ngeuil a lambei el ulekerreu er a eolt me a chull. Ngdiak bo el mengemengemed a ngeuil sel lebo er ngii a secher me a lechub e bo lengesonges a udoud. E diak lemad a ngeuil er a otuub me a lechub e ngultok er a rechedal a telungalek me a lechub a rebebil. Ngdiak lemad a ngeuil, ngbai bek el taem el lolasem el omekoad er ngii a rechad e ngmengal mo mesisiich a ngeuil. A ringel el bo dechebangel el klaumerang er kid a uchul a oterekeklii el kmo kede mera el disaiplo er a Kristus. (Mt. 10:22; 24:9; Jn. 15:20) Tia uchul me a Jakobus a sebechel meluches el kmo: “Rudam er ngak, bo lungil a rengmiu sel cho bo mcharm a bek bedengel a ringel.”​—Jak. 1:2.

7-8. Ngmekera e mo uchul a klungioled sel doutekangel a ringel?

⁷ A Jakobus a dirrek el ouchais er a ta er a uchul me a Rekristiano a kongei el mo chelebangel a ringel. Ngdilu el kmo: “Sel di moumerang el outekangel a ikal ringel e ng merael el mo meduch a rengmiu.” (Jak. 1:3) A ringel a sebeched el omekesiu er ngii er a ngau el lousbech el melisiich a saider el rruul er a deel. Tia el saider sel lemedul e lekelekeltii e nglmuut el mo mesisiich. Me ngdi osisiu sel doutekangel a ringel e ngsmisichii a klaumerang er kid. Sei a uchul me a Jakobus a milluches el kmo: “Mcherrengelii a urerel a ducherreng, el kirel me bo mcherrungel el diak a tellemall . . . er kemiu.” (Jak. 1:4, BT) Me sel desa el kmo a klaumerang er kid a mo mesisiich sel doutekangel, e ngmo dmeu a rengud el chelebangel a ringel.

⁸ Ngar er a babilengel a Jakobus e ngouchais er kid a bebil omelsemai el mo uchul e ngsebeched el oridii a deurreng er kid. Aika ngerang, e kede mekera mo mesisiich er ngii?

9. Ngera uchul me kede ousbech er a llomeserreng?

⁹ Omelsemai: Ngdiak dodengei el kmo kede mekerang. Sel dechelebangel a ringel, e ngsoad el mora Jehovah el kirel a ngeso el mo meruul a omelilt el odeuir a rengul, el uchul a klungiolir a rudam me a rudos er kid, e ngosukid el melemolem el oba blakerreng. (Jer. 10:23) Me kede ousbech er a llomeserreng el mo medengei aike el kired el meruul e melekoi el mo er tirke el omtok  er kid. E le lsekum e ngdiak dodengei el kmo kede mo mekerang, e ngsebechel mo mechitechut a rengud e mereched el oridii a deurreng er kid.

10. A Jakobus 1:5 ngmelekoi el kmo ngkired el mekerang a lsoad el nguu a llomeserreng?

¹⁰ Rolel a obo mesisiich er ngii: Molengit a llomeserreng er a Jehovah. A lsekum e ngsoad el outekangel a ringel loba deurreng, e ngkired el kot e kede olengit er a Jehovah me lebeskid a llomeserreng el dousbech er ngii el mo ungil melilt. (Monguiu er a Jakobus 1:5.) Ngkired el mekerang a lsekum a Jehovah a diak lemereched el onger er a nglunguched? A Jakobus a dilu el kmo ngkired el melemolem el “lolengit” er a Dios. A Jehovah a diak bo el seselk a rengul a dolemolem el olengit er ngii el kirel a llomeserreng me a diak bo el kesib a rengul. A Demad el ngar er a eanged a diak a ‘longreos’ er ngii a dolengit a llomeserreng el mo outekangel a ringel el dechelebangel. (Psa. 25:12, 13) Ngmes a ringel el dechelebangel e kmal chubkid e dirrek el kmal soal lolengeseu er kid. Tia uchul a deurreng! Me nguaisei engdi ngmekera Jehovah e meskid a llomeserreng?

11. Ngera dirrek el kired el meruul er ngii a lsoad el nguu a llomeserreng?

¹¹ A Jehovah a meskid a llomeserreng loeak a Tekingel. (Osi. 2:6) Me a lsoad el nguu tia el llomeserreng, e ngkired el mesuub er a Biblia me aike el babilenged el mengai a uchetemel er a Biblia. Me nguaisei engdi ngdiak di dolechel a klemedengei er kid. Ngkired el ousbech er tia el llomeserreng loeak sel doltaut a ulekrael er ngii. A Jakobus a dilu el kmo: “Lak di . . . morrenges a tekingel e le merekong; bai mngai lotaut er omeruul.” (Jak. 1:22) Me sel doltaut a tekingel a Dios, e kede mo chad er a budech, e medemedemek, e chubechub. (Jak. 3:17, BT) Aika el blekeradel a mo ngosukid el outekangel a ngii di el ringel e diak doridii a deurreng er kid.

12. Ngera uchul me ngklou a ultutelel a bo dungil medengelii a Biblia?

¹² A Tekingel a Dios a ua dirk el ngosukid el mes e meklemalt aike el kired el oureor er ngii.  (Jak. 1:23-25) El ua tiang, a uriul er a dosuub er a Biblia, e kede locha mo mtebengii el kmo ngkired el omtebechel er kid sel lengasech a rengud. Me ngoeak a ngelsuil a Jehovah e kede mesuub el mo oba delemedemek el ngar er a omerelled el mora rechad me a lechub e sel leduubech a tekoi el sebechel longesechii a rengud. Ngbeot er kid a chobangel a orimel sel demedemedemek. Kede ungil omdasu e mo ungil melilt a tekoi. (Jak. 3:13) Me ngkmal klou a ultutelel a bo dungil medengelii a Biblia!

13. Ngera uchul me ngungil dosuub a kerebai er a rechad el ngar er a Biblia?

¹³ A lebebil e kede suubii el mo cheroid er a tekoi er a uriul er a derellii a cheleuid. Nguaisei engdi tia meringel el rolel a dosuub a tekoi. Ngbai ungil a denguu a llomeserreng loeak sel dosuub aike el ungil me a cheleuid el omerellir a rechad. Sei a uchul me a Jakobus a melisiich er kid el mo omes a kerebai er a rechad el ngar er a Biblia el ua Abraham, Rahab, Job, me a Elias. (Jak. 2:21-26; 5:10, 11, 17, 18) Tirka el blak a rengrir el mesiungel a Jehovah a uluutekangel a ringel el mle sebechel mo uchul e te oridii a deurreng er tir. A kerebai er tir a ochotii el kmo, ngoeak a ngelsuil a Jehovah e ngdirrek el sebeched el meruul uaisei.

14-15. Ngera uchul me ngkired el sumechokl a tekoi el doumededenger?

¹⁴ Omelsemai: Ngdiak desumechokl a tekoi el doumededenger. A lebebil e nglocha mo meringel er kid el mo medengelii a tekoi el ngar er a Biblia. Me a lechub a Jehovah a diak longer er a nglunguched er sel rolel el dullatk er ngii. Tia sebechel rullid el mo oumededenger. A lsekum e ngdiak desumechokl a tekoi el doumededenger, e ngsebechel choitechetur a klaumerang er kid e tomellii a deleuill er kid me a Jehovah. (Jak. 1:7, 8) Ngdirrek el sebechel mo uchul e kede oridii a omeltked el kirel a ngar medad.

¹⁵ A apostol Paulus a ulemekesiu er a omeltked el kirel a ngar medad el uai a uak. (Heb. 6:19, BT) A okul a diall a cholleklii er a temel a ses el eolt e dirrek el uchul me ngdiak loberius el mo subechii er a bad. Me nguaisei engdi a uak a di sebeched el ousbech er ngii a lsekum a okul a mesisiich. Ngdi osisiu, a lak desumechokl a tekoi el doumededenger e ngchoitechetur a klaumerang er kid el di ua mla chemert el okul a uak. A chad el oumededenger sel lemeasem er a ultok, e ngsebechel mo diak loumerang el kmo a Jehovah a mo otaut a telbilel. E a lak a klaumerang, e ngdiak a omelatk. Ngdi ua lolekoi a Jakobus, a chad el oumededenger a “ua ia chedesaoch er a daob el medoko er a eolt el mol mei.” (Jak. 1:6) A chouaisei el chad a diak el sebechel mo dmeu a rengul!

16. Ngera kired el meruul a lsekum kede mo oumededenger?

¹⁶ Rolel a obo mesisiich er ngii: Msumechokl a tekoi el moumededenger, e msisichii a klaumerang er kau. Lak bo el teloadel a rengum. Ngar er a taem er a profet Elias, e a rechedal a Jehovah a mlo teloadel a rengrir. Ngdilu er tir el kmo: “Ng mo ua ngera klteketel el molib a uldesuiu? A lsekum a RUBAK a Dios, e mongull el meluluuch er ngii; ngdi lsekum ng Baal a Dios, e mongull el meluluuch er ngii!” (1 Ki. 18:21) Chelecha el taem e ngkired el meruul er a osisiu el tekoi. Ngkired el meruul a research el lolterekokl er a rengud el kmo a Jehovah a Dios, a Biblia a Tekingel, e a Resioning er a Jehovah a chedal. (1 Th. 5:21) Tia mo sumechokl a tekoi el doumededenger, e smisichii a klaumerang er kid. E a lsekum kede ousbech a ngeso, e ngsebeched el olengit a ngeso er a remechuodel. Ngkired el mereched el sumechokl a lsoad el melemolem el oba deurreng el mesiou er a Jehovah!

17. Ngera mo duubech a lsekum kede oridii a blekenged?

¹⁷ Omelsemai: Ngmo mechitechut a rengud. A Tekingel a Dios a kmo: “A lsekum ngmo mechitechut a rengum sel bo el chetituokel a tekoi, e ngmo diak a klisichem.” (Osi. 24:10, NW) A tekoi er a Hebru el moiuid el kmo “ngmo mechitechut a rengum,” a sebechel belkul a kmo “ngmo diak a  blekengem.” Me a lsekum e ke oridii a blekengem, e ke mereched el oridii a deurreng er kau.

18. Ngera belkul a doutekangel?

¹⁸ Rolel a obo mesisiich er ngii: Multuil er a Jehovah el kirel a blekeu el mousbech er ngii el outekangel. Kede ousbech er a blekeu a lsekum kede mo outekangel a ringel. (Jak. 5:11, NW) A tekoi el ‘outekangel’ el luluusbech er ngii a Jakobus a mekltkid er a chad el ngii a melemolem el dechor el diak lemesim. Me kede locha mo melatk er a soldau el ngii a bekeu el dechor er medal a cheraro, e diak lemesim a loldechelakl er ngii.

19. Ngera sebeched el suubii er a kerebil a apostol Paulus?

¹⁹ A apostol Paulus a kmal ungil kerebai er a chad el uleba blekeu e uluutekangel. Me nguaisei ngmla er ngii a taem el blo lemechitechut a rengul, engdi ngmle sebechel loutekangel e le ngmle ultuil er a klisichel a Jehovah. (2 Ko. 12:8-10; Fil. 4:13, NW) Ngsebeched el metik er a chouaisei el klisiich me a blekeu a lsekum ngmo ngariou a rengud el kongei el kmo, kede ousbech er a ngelsuil a Jehovah.​—Jak. 4:10.

20-21. Ngera sebechel mo ulterekokl a rengud er ngii?

²⁰ Ngsebechel mo ulterekokl a rengud el kmo a ringel el dechelebangel a diak el blals el mlara Jehovah. A Jakobus a kmo: “A lsekum a chad a measem er a ua isei el ongarm, e ng diak le kirel el kmo, ‘Tial ongarm a mlar a Dios el mei.’ Ele Dios a diak el sebechel el mecharm er a mekngit, ma diak longarm er a ngii di le chad.” (Jak. 1:13) Sel bo lulterekokl a rengud er tia el tekoi, e kede lmuut el mo kmeed er a betik a rengul Demad el ngar er a eanged.​—Jak. 4:8.

²¹ A Jehovah a “diak le mengodech.” (Jak. 1:17) Ngullengeseu er a rekot el Kristiano er a lechelebangel a ringel e dirrek el mo olengeseu er kid er chelecha el taem. Molengit er a Jehovah me lengesukau el nguu a llomeserreng, klaumerang, me a blekeu. Ngmo onger er a nglunguchem. Seikid e ngmo ulterekokl a rengum el kmo ngmo ngosukau el melemolem loba deurreng sel mchelebangel a ringel!