1. Ngera uchul me ngmeringel a bo dodengelii a belkul a tekingel a chad sel ledu el kmo ngousubes er kid?

 “A KUUSUBES ER KAU.” Nglocha kmal mo ungil a rengud el remenges aika el tekoi tokubets a lsekum kede medengei el kmo kede dillii me a lechub e kede rirellii a tekoi el tilemellii a rengul a chad! Engdi ngngera mera el belkul tia el tekoi el kmo, “A kuusubes er kau”? A chad el omtilemellii a rengul ngmelekoi el kmo ngmla mesumech a deleuill er kemiu? Me a lechub e ngdi belkul a kmo ngmla mo diak el soal mesaod er ngii me a deleuill a diak el ua ngar er a mong? A rechad a kakerous a belkul a tekingir sel ledu el kmo te ousubes er kid.

 2. Ngmekera Bades a losaod er a klausubes er a Jehovah? (Dirrek el momes er a footnote.)

² A rolel a Jehovah lousubes er kid el diak demecherrungel el chad a kmal ngodech er a rolel a dekausubes. Ngdiak a chad el sebechel lousubes el uai a Jehovah. A ta er a milluches er a Psalm a millekoi el kirel a Jehovah el kmo: “Kau a mera el ousubes, me a uchul me aki meluu er kau.” a (Psa. 130:​4, NW) Chochoi a Jehovah sel lousubes e ng “mera el ousubes.” Ngii ngike el lochotii a mera el belkul a bo dousubes. Ngar er a bebil bades e a remilluches er a Biblia uluusbech er a tekoi el kirel a klausubes el mesaod er a Jehovah el diak lousbech er ngii el mesaod a klausubes er a rechad.

 3. Ngmekera klausubes er a Jehovah e ngodech er a klausubes er kid? (Isaia 55:​6, 7)

³ A Jehovah sel lousubes er a chad e a kngtil a mesuld.  Ngmla lmuut el mesumech a deleuill er tir. A Jehovah cherrungel lousubes e bekururau lousubes.—Monguiu er a Isaia 55:​6, 7.

 4. Ngmekera Jehovah e ngosukid el mo understand er a mera el belkul a klausubes er ngii?

⁴ Me a lsekum a klausubes er a Jehovah a ngodech er kid, e ngmekera sebeched a rediak demecherrungel el chad el mo understand er a mera el belkul a mera el klausubes? A Jehovah ousbech a klebokel el okesiu el ngosukid el mo mtebengii a rolel a lousubes er kid. Ngar tia el suobel e kede mo mesaod a bebil er ngii el okesiu. Aika mo ochotii a rolel e a Jehovah mengeroid a klengit e a osisiu el taem e ngsumechii a deleuill el miltemall el klengit a uchul. Sel de review aika el okesiu e ngmo ngosukid el lmuut el mo dmolech omereng el saul er kid el kirel a chubechub el Demad el kmal lochotii a klausubes er ngii er a betok el rolel.

JEHOVAH CHOROID A KLENGIT

 5. Ngera duubech sel lousubes a kngtid a Jehovah?

⁵ A Biblia blechoel el omekesiu er a klengit el mora klou el berraod. King David a milsaod a kngtil el kmo: “A kngtik a mla elebak; ng ua chelungel el kmal oberaod el dikea le mechol.” (Psa. 38:4) Me nguaisei, engdi Jehovah a ousubes a kngterir tirke el mo ouuchel a rengrir e obult. (Psa. 25:18; 32:5) A tekoi er a Hebru el moiuid el “ousubes” a belkul a kmo “kmider” me a lechub “chemol.” Kede locha imagine er a Jehovah el mesisiich el chad el kmider a berredel a kngtid e chemol locha er ongelngelel e ngmai el choroid.

 6. Ngua ngera cheridel a lengai a kngtid el choroid er kid a Jehovah?

⁶ Ngar ngii a lmuut el ta er a okesiu lochotii a rolel a lechol a kngtid a Jehovah el choroid. A Psalm 103:12 a kmo: “Ua cherridel a delongelel ongos ma ngebard, me ng ua isei a longeroid a kngtid er kid.” A ongos a kmal diak el sebechel rutechii a ngebard. Me tia belkul a kmo a Jehovah a ngmai a kngtid el kmal mo cheroid er kid el diak el sebechel metuk a cherridel. Tia kmal olterekokl er a rengud el kmo ngcherrungel lousubes er kid!

 7. Ngmekera Biblia losaod er a loruul er ngii a Jehovah el mora kngtid? (Mika 7:​18, 19)

⁷ Me alta Jehovah ngmai a kngtid el choroid er kid, ngdirk orreked? Ngdiak. King Hesekia milluches el kirel a Jehovah el kmo: “Ke mla ngmai a rokui el kngtik el chemoit er ullem.” Me a lechub e ngua lolekoi a footnote, “ke mla ngmai a rokui el kngtik el choroid er medam.” (Isa. 38:​9, 17, NW; ftn.) Tia el okesiu ochotii el kmo a Jehovah ngmai a kngterir tirke el obult el chemoit me ngmo diak leues. Aika el tekingel a Hesekia a dirrek el sebechel moiuid el kmo: “Ke mla remuul a [kngtik] el mo ua lemlak a ta el kruul.” A Jehovah smisichii a belkul tiang lousbech er a lmuut el ta er a okesiu el ngar er a Mika 7:​18, 19. (Monguiu.) Ngar tia el bades e ngmesaod er a Jehovah el kmo ngchemoit a kngtid er a bertakl er a daob. A klalo el ruebet er a bertakl er a daob er a irechar a kmal diak el sebechir el metik er ngii me a lechub e te lmuut el mesang.

 8. Ngera kede mla suub?

⁸ Ngoeak aika el okesiu e kede mla suubii el kmo a Jehovah sel lousubes e ngmai a kngtid el choroid me ngmo diak de chellungel a berredel. Ngua lolekoi a David, “ngdmeu a rengrir tirke el mla musubes a chelebireklir, e mla medekedek a kngterir; ngdmeu a rengul ngike el chad el Jehovah a diak le besechii a kngtil.” (Rom 4:​7, 8, NW) Tiang a mera el klausubes!

JEHOVAH SMULD A KLENGIT

 9. Ngera el okesiu a lousbech er ngii a Jehovah el mesaod er a klungel a klausubes er ngii?

⁹ Ngoeak a olubet e a Jehovah sebechel smuld a rokui el kngterir tirke el obult. Molatk  er a rolel e a Biblia mesaod er a loruul er ngii a Jehovah. A Jehovah lomekesiu er ngii el kmo ngmatech e remisu a klengit. Tiang a kikidii a chad el ngar er a klengit. (Psa. 51:7; Isa. 4:4; Jer. 33:8) A Jehovah a di ngii el mesaod er a rsel tia el teletael: “A kngtim a lesal mo bekerkard, e ak mo ngotechau el mo beches el ua yuki. Ma lesal mo smiich el bekerkard, me kau a di mo becheleleu el ua bsechel a sib.” (Isa. 1:18) Ngkmal meringel a dengebetii a bekerkard el cheisech er a mamed. Me nguaisei engdi ngoeak tia el okesiu e a Jehovah olterekokl er a rengud el kmo a kngtid a sebechel mengatech el mo diak el mues.

10. Ngera lmuut el ta er a okesiu el mesaod er a klungel a klausubes er a Jehovah?

¹⁰ Ngua dulsaod er ngii er sel uleak uchei el suobel, a klengit a dirrek el lomekesiu el mora ‘blals.’ (Mt. 6:​12, BT; Lk. 11:​4, BT) Me a bek el taem el derellii a klengit el bedul a Jehovah e nglmuut el medechel a belsed. Ngkmal imis el klou a belsed er ngii! Me nguaisei engdi sel lousubes er kid a Jehovah e ngua lseldii a blals el debelsel. Ngdiak longerechir a blals er a klengit el bla lousubes er kid el kirel. Me ngdi ua chad el kmal mo omelechesiu er a klou el deurreng sel lemesuld a belsel, tia kmal ungil lokesiu el smodii a deurreng el denguu sel lousubes er kid a Jehovah!

11. Ngera belkul sel ledu Biblia el kmo a ‘kngtid a mesuld’? (Rellir 3:19)

¹¹ Monguiu er a Rellir 3:19. Ngar omelechesel tia el bades el tekoi er a Grik, e a tekoi el moiuid el “lousubes” a loliuid er ngii el “suldii el mo diak.” Me a Jehovah diak di lousubes a kngtid e ngsmuld el mo diak. Ngsebeched el lomekesiu er ngii er tiang. Kam imagine er a chad el kau a belsel el luchesii a line el cross out er a belsem. Me nguaisei engdi ngdirk sebechem el mesa el kmo ngmle tela belsem. Engdi omesuld a ngodech er tiang. A bo dodengelii a belkul tia el okesiu e ngkired el melatk el kmo a ink el luluusbech er a irechar el meluches a mle uldekial a carbon, gum, me a ralm. Me ngsebechel a chad el nguu a dekimes el mamed el suldii a tekoi el llechukl. Me a blals sel “lemesuld” e ngdikea lemoues. Ngmla mo diak el sebeched el mes a mle llechukl er a uchei. Me ngua lsebeched el melekoi el kmo ngdirkak a ta el deblals. Me ngkmal rutechii a rengud sel dodengei el kmo a Jehovah sel lousubes a kngtid, e ngua le dimlak a ta el deruul ngii el klengit!—Psa. 51:9.

12. Ngera belkul el kired a okesiu er a okrokr el eabed?

¹² A Jehovah ousbech er a lmuut el ta er a okesiu el mesaod er a rolel e ngcherrungel lousubes a kngtid. Ngmelekoi el kmo: “Ak mo smuld a telucheklem loba eabed me a kngtim loba okrokr el eabed.” (Isa 44:​22, NW) A Jehovah sel lousubes er kid e ngua lousbech er a okrokr el eabed el mart me kid me ngii a mo diak deues.

13. Sel lousubes er kid a Jehovah, e ngmo uangera feeling er kid?

¹³ Aika el okesiu ngera ngosisecheklid? A Jehovah sel lousubes a kngtid e ngdiak el kirel el melemolem loldechelakl er kid er a klemengetel a klengar er kid el rokir. Ngoeak a rsechel a Jesus Kristus e ngmla mekekad a kngtid. Omelechesel ngii el blals a mla mesuld el dikea el moues. Tiakid a belkul a mera el klausubes lomeskid a Jehovah sel douuchel a rengud e dobult er a kngtid.

JEHOVAH SUMECHII A DELEUILL ER KID ME NGII

14. Ngera uchul me ngsebeched el loumerang el kmo a Jehovah a cherrungel lousubes er kid? (Dirrek el momes a siasing.)

¹⁴ A mera el klausubes el lomeskid a Jehovah uchul me ngsebechel mo er ngii a deleuill er kid me ngii. Ngngosukid me ngdiak demeeleb er a ukltked el di oldechelakl er kid.  Ngdiak demedakt el kmo a Jehovah orreked a ngesechel a rengul er kid me a lechub e ngosiik a rolel e omals er kid. Tia kmal diak el sebechel duubech el tekoi. Ngera uchul me ngsebeched el loumerang a tekingel a Jehovah el kmo ngmo ousubes er kid? A Jehovah dilu er a Jeremia el kmo: “Ak mo ousubes a kngterir e dikea bo kulatk a chelebirukel el le riruul.” (Jer. 31:34) A apostol Paulus ulemelekl aika el tekoi er a ledu el kmo: “[Ng] diak kluut el mo melatk a kngterir.” (Heb. 8:12) Engdi tia ngngera kmal belkul?

15. Jehovah el dikea lolatk a kngtid, ngngera belkul?

¹⁵ A tekoi el ‘melatk’ lousbech er ngii a Biblia diak di lolutk el kirel a chad el melatk er a tekoi el dilubech er a ngar er a mong. Ngsebechel melutk el kirel a chad el ngar ngii a tekoi el loruul er ngii. Ngike el dengerenger el chad el mle deleel er bita er a Jesus ullengit er ngii el kmo: “Jesus, ke lotkak sel bo msiseb ra rengedem.” (Lk. 23:​42, 43, BT) Ngika ullengit er a Jesus me bo lerellii a tekoi el kirel. Me a Jesus ulenger er ngii el kmo ngmo okisii. Me a Jehovah sel lolekoi el kmo ngdikea lolatk a kngtid e ngbelkul a kmo ngmla ousubes er kid me ngdiak bo loruul a ngii di el ngerang er a ngar medad el lekong ngomals er kid er a kngtid.

16. Ngmekera Biblia losaod er a ilmokl el denguu er a mera el klausubes?

¹⁶ A Biblia dirrek el lousbech er a ta er a okesiu el ngosukid el mo understand er a ilmokl el denguu er a mera el klausubes. Kid el diak demecherrungel a uchul me kede “sibil a klengit.” Engdi Jehovah sel lousubes er kid e kede mo uai a sibai el mla ‘mengubet er a klengit.’ (Rom 6:​17, 18; Och. 1:5) Chochoi a klausubes er a Jehovah meskid sel deurreng el lenguu a sibai el mla mo mimokl.

17. Ngmekera klausubes e omekungil er kid? (Isaia 53:5)

¹⁷ Monguiu er a Isaia 53:5. Sel ulebongel el okesiu el bo dosaod er ngii omekesiu er kid el mora rechad el oba omekodall el rakt. Ngoeak a olubet el tenget el lebilskid lokiu a Ngelekel,  e a Jehovah mla omekungil er kid. (1 Pe. 2:​24, BT) Sel derellii a klengit e ngtomellii a deleuill er kid me a Jehovah engdi ngoeak a olubet e ngsebechel lousubes er kid e sebechel lmuut el mo er ngii a kmes el deleuill er kid lobengkel. Ngdi uai a chad el smecher er a oberaod el rakt el kmal mo ungil a rengul sel bo lungil er a secherel, kid me ngdirrek el kmal mo dmeu a rengud sel bo lungil a deleuill er kid me a Jehovah e deluut el mo oba kengei er ngii.

BELKUL EL KIRED A KLAUSUBES ER A JEHOVAH

18. Ngera kede mla suub er aika el kakerous el okesiu lousbech a Biblia el mesaod er a klausubes er a Jehovah? (Momes er a baks el “Rolel e a Jehovah Ousubes.”)

¹⁸ Ngera kede mla suub er aika el okesiu er a Biblia el mesaod er a klausubes er a Jehovah? Sel lousubes er kid e nguai a lemlak a ta el debora klengit, me kid a kmal sebechel mo ulterekokl a rengud el kmo ngdiak bo lomals er kid er a ngar medad. Tiaikid a uchul me ngsebechel mo er ngii a ungil deleuill er kid me a Demad el ngar er a eanged. Osisiu el taem e ngdiak dobes el kmo a mera el klausubes a sengk. Ngomeskid ngii el sengk le ngbetik a rengul er kid e bekururau. Ngdiak el llemelted a rechad el dongerechir er ngii er a Jehovah.—Rom 3:24.

19. (a) Ngera kired el loba omereng el saul el kirel? (Rom 4:8) (b) Ngera kede mo mesaod er a ongingil el suobel?

¹⁹ Monguiu er a Rom 4:8. Me kede kmal oba omereng el saul e le Jehovah a Dios er a “mera el [klausubes]”! (Psa. 130:​4, NW) Me nguaisei engdi a lsekum e ngsoad a lousubes er kid a Jehovah e ngngar ngii a klou a ultutelel el tekoi el kired el meruul er ngii. A Jesus a dilu el kmo: “Lsekum ngdiak mousubes a telucheklir ar chad, e a Demmiu me ngdirrek el diak lousubes a teluchekliu.” (Mt. 6:​14, 15, BT) Me a leuaisei e ngkmal klou a ultutelel a doukerebai er a klausubes er a Jehovah. A ongingil el suobel a mo mesaod er a rolel e ngsebeched el meruul er tiang.