1-2. (a) Oingerang e nglocha kmal mo meringel er kid el lousubes er a chad? (b) Ngmilekera Denise e ochotii a klausubes?

 KAU, ngmeringel er kau ousubes er a rebebil? A rebetok er kid a uaisei, tokubets a lsekum a chad a dulii me a lechub e ngrullii a tekoi el kmal tomellii a rengud. Me nguaisei ngngar ngii a sebeched el meruul me ngmo diak el kesib a rengud me a lechub e ngmekngit a rengud e ousubes er a rebebil. El ua tiang, molatk er a odos el Denise a el lulechotii a kmal klou el klausubes. Sera 2017 e ngii me a telungalek er ngii a mlo odngelii a beches el World Headquarters er a Resioning er a Jehovah el kmal dirk mle open. Ngar omerollir el mo remei e a ta el chad a mlo diak lutebechelii a mlil e tuchelterir. Tia el accident a uchul me a Denise a mlo diak lodengelii a rengul. Sera lebekiis e ngmlo medengei el kmo a rengelekel a kmal mlo meringel el metemall me a bechil er a Brian a mlad. A Denise a melatk er tia el taem e kmo: “Ngkmal miltemall a renguk e urriid.” A uriul e ngmlo medengei el kmo ngika el chad a mle klechad er ngii e dimlak a ngerang el mengesang er ngii er a lomekall, me ngmilluluuch lolengit er a Jehovah me lebsang a budech.

² Ngika el chad el tilecheterir a ble le arrest er ngii e charge er ngii er a manslaughter. A lsekum e ngmutaut er a llach e ngsebechel mo kelebus. Me nguaisei engdi kort a silbedii a Denise el kmo a sentence er ngika el chad a kmal di mo ultuil er aike el bo ledung a Denise er tia el kort. A Denise a kmo: “Ak mle feel el kmo ngngar er ngii a chad el mla smodel a resmelel a telemellel a bedengek e oitelii a chimo el kalong el sar er bebul le ngak el mle kirek el lmuut el mesaod er sel kot el mekngit el taem el dilubech  er a klengar er ngak.” Sesei el sandei er uriul e a Denise a mle dengchokl er a kort el kltmokl el mo mengedecheduch er ngika el chad el luchul a klou el ringel el mlora telungalek er ngii. Ngera ngdilung? A Denise ullengit er a judge me lochotii a klechubechub er ngika el chad. b Sera bo lemerek el mengedecheduch e a judge a lilangel. Ngdilu el kmo: “Ngmla mo 25 el rak el ek judge e dirkak a ta el krengesii chouaitia el tekoi er a courtroom er ngak. Ngkmal dirkak a ta el krengesii a telungalek er a miltemall el lolengit me lemocholt a klechubechub el mo er ngike el millemall. Ngkmal diak kora remenges a tekoi er a bltikerreng me a klausubes.”

 3. Ngera uldbechii a Denise el mo ousubes?

³ Ngera ngilsuir a Denise el mo ousubes? Ngmillebedebek er a klausubes er a Jehovah. (Mik. 7:18) Sel bo de appreciate er a klausubes el bla lochotii er kid a Jehovah e ngodbechid el mo ousubes er a rebebil.

 4. Ngera soal a doruul er ngii a Jehovah? (Efesus 4:32)

⁴ A Jehovah soal a bo dekausubes, el ua ngii el lousubes er kid. (Monguiu er a Efesus 4:32.) Ng expect er kid el mo kltmokl el lousubes er tirke el tomellii a rengud. (Psa. 86:5; Lk. 17:4) Ngar tia el suobel e kede mo mesaod a edei el tekoi el ngosukid el mo ousubes.

LAK EM IGNORE A FEELINGS ER KAU

 5. A doltirakl er a Osisechakl 12:​18, e ngmo uangerang a feeling er kid a lsekum a chad a tomellii a rengud?

⁵ Nglocha kmal metemall a rengud er a tekingel me a lechub e ngomerellel a chad el mei er kid, tokubets a lsekum ngkmeed el sechelid me a lechub e ngchedal a telungalek er kid. (Psa. 55:​12-14) A lebebil e ngkmal mo kesib a rengud me a lechub e ngmetemall a rengud me ngua bla leruskid a chad. (Monguiu er a Osisechakl 12:18.) Kede locha melasem el lorreteret me a lechub e kede ignore a feelings er kid. Me nguaisei engdi sel doruul er tiang e ngua bla demerus er a oles e mecherei me ngmedechel. Ngdi osisiu ngdiak el sebeched el expect el kmo a telemellel a rengud a mo ungil a lsekum kede di ignore.

 6. Kede locha mo mekerang sel letemellii a rengud a chad?

⁶ Sel lerellii a tekoi el tomellii a rengud a chad e nglocha kmal mo kesib a rengud. A Biblia melekoi el kmo ngsebechel ngmasech a rengud. Me nguaisei engdi ngmengelechel er kid el kmo lak debecherei a ngesechel a rengud me le control er kid. (Psa. 4:4; Efe. 4:26) E ngerang? E le aike el tekoi el domelechesiu a omekrael a omerelled. E a klsiberreng a blechoel el mo uchul a mekngit. (Jak. 1:20) Lak mobes el kmo, a ngmasech a rengud a omerelled el bedul a tekoi el dilubech, engdi orreked a ngasecherreng a choice er kid.

 7. Ngera kede dirrek el mo omelechesiu sel letemellii a rengud a chad?

⁷ Sel lsal mekngit omeruul el mei er kid e nglocha mo rullid el mo feel a lmuut el bebil er a tekoi. El ua tiang, a odos el Ann a kmo: “Sera kngalek e a demak a chilitii a delak e mlo bechil a babysitter er ngak. Ak mle feel el kmo ngmla choitak. E sera lebo er ngii a rengelekir e ak mlo feel el kmo ngmla replace er ngak. Ak mlukeroul lomdasu el kmo ngdiak a chad el soal ngak.” A odos el Georgette a mesaod er a blo lomelechesiu er ngii er a bo lemekngit er ngii a bechil: “Aki mle friends er a kim ngalek el  me klou. Aki mle pioneer partners! Ngdi milecham a renguk.” E a odos el Naomi a kmo: “Ngkmal dimlak a ta el kumdasu el kmo a bechik a mo sebechel tomellii a renguk. Me sera louchais er ngak el kmo ngomart er ngii e omes er a siasing er a remeau e ak mlo feel el kmo ngmilulekngak e dimlak el loba blakerreng el mei er ngak.”

 8. (a) Ngera bebil er a uchul me ngkired lousubes er a rebebil? (b) Ngera el klungiaol a dengai sel dousubes? (Momes er a baks el “ Kede Mo Mekerang a Lsekum a Chad a Uchul a Klou el Ringel el Dilubech er a Klengar er Kid?”)

⁸ Ngkmal diak a klisiched er aike el lolekoi me a loruul a rebebil el mei er kid engdi ngngar ngii a klisiched er a omerelled el bedul tir. E sel kot lungil el sebeched el rullii a ousubes. E ngerang? E le ngbetik a rengud er a Jehovah, e ngii a soal a dousubes. A lsekum e ngmelemolem el kesib a rengud e diak dousubes e kede mo rullii a klebelung el tekoi e locha di mo kid el tomellii a bedenged. (Osi. 14:​17, 29, 30) Molatk er a kerebil a odos el Christine. Ngmelekoi el kmo: “Sel lekesib a renguk me a lechub e ngchetik a tekoi e ngdiak blechoel el smile. Ngdiak kungil melilt a ungil kall er a bedenged. Ngngesonges a cheliuek e meringel er ngak omtebechel aike el kumelechesiu, e tia ngar ngii a lerellii er omerellek el mora bechik me a deleuill er ngak me a rebebil.”

 9. Ngera uchul me ngungil a dechitii a ngasecherreng?

⁹ Mo lmuut me a lsekum a chad el tomellii a rengud a diak lolengit a klausubes er kid me ngsebeched el olengeasek a telemall el lerellii er kid. Ngoeak a ngera el rolel? A Georgette el dulsaod er ngii er a uchelel a kmo: “Ngmlo chuib a taem engdi ngmlo sebechek el choitii a ngesechel a renguk el bedul ngike el mle bechik. Sera krellii tia el tekoi e ak mlo omelechesiu er a budech.” Sel dechitii a ngasecherreng e ngdiak bo lemedecherecher a rengud. Kede dirrek el rullii a ungil kired. Ngmo diak di dolatk el kirel e sebeched el move on e oldeu er a rengud er a klengar er kid. (Osi. 11:17) Engdi ke mo mekerang a lsekum ke mla remuul aikang e dirk meringel er kau ousubes?

MOUREOR ER A FEELINGS ER KAU

10. Ngera uchul me ngkired el mecherei a taem me ngomekungil er a rengud? (Dirrek el momes a siasing.)

¹⁰ Ngmekera sebechel mo diak el kesib a rengum me a lechub e ngmekngit a rengum? A ta  er a rolel obecherei a taem me lomekungil er a rengum. A chad el miltemall a lebo lemerek el ngar er a ukeruul e ngmo ousbech a taem el lmuut el mo mesisiich. Ngdi osisiu, kede locha ousbech a taem el lomekungil er a rengud er a uchei er a bo lsebechel el mera el ngar er a rengud lousubes er a chad.—Oli. 3:3; 1 Pe. 1:​22, BT.

11. Ngmekera nglunguuch e sebechel ngosukau el mo ousubes?

¹¹ Moluluuch lolengit er a Jehovah me lengesukau el lousubes. c A Ann el dulsaod er ngii er a uchelel a mesaod er a rolel e a nglunguuch a ngilsuir. Ngkmo: “A kullengit er a Jehovah me lousubes er kemam a derta el chedal a telungalek el kirel a dimlak lungil tekoi el ki mriruul. E a uriul e ak lilechesii a babilengek el mora demak me a beches el bechil e dilu er tir el kmo ak mla ousubes er tir.” A Ann a di bleketakl el melekoi el kmo tia dimlak el beot el tekoi. Engdi ngkmo: “Ngomeltkek el kmo ngak el melasem loukerebai er a klausubes er a Jehovah a mo odbechii a demak me a bechil el mo sorir el mesuub a lmuut el betok el kirel a Jehovah.”

12. Ngera uchul me ngungil doumerang er a Jehovah er a bai doumerang a feelings er kid? (Osisechakl 3:​5, 6)

¹² Moumerang er a Jehovah el diak el feelings er kau. (Monguiu er a Osisechakl 3:​5, 6.) A Jehovah medengelii sel kot lungil el kired. (Isa. 55:​8, 9) E kmal diak bo lolengit er kid el mo meruul er a tekoi el luchul a telemelled. Me sel lolisiich er kid el mo ousubes, e ngsebechel mo ulterekokl a rengud el kmo ngklungioled. (Psa. 40:4; Isa. 48:​17, 18) Me nguaisei engdi a lsekum kede ultuil a feelings er kid e nglocha mo diak el sebeched el lousubes. (Osi. 14:12; Jer. 17:9) A Naomi el dulsaod er ngii er a uchelel a kmo: “A uchelel e ak mle feel el kmo ngmelemalt a lak lsoak lousubes er a bechik el kirel osengel er a siasing er a remeau. Ak mle medakt el kmo ngmo el lmuut el tomellii a renguk me a lechub e ngobes er a klungel a telemall el bla lerellii. Ak dilu el kmo a Jehovah understand er a feelings er ngak. Engdi ak mlo mtebengii el kmo alta Jehovah understand a feelings er ngak ngdiak el belkul a kmo ngkongei. Ngmedengelii a tekoi el kumelechesiu er ngii e medengei el kmo  ngousbech a taem el mo omekungil er a renguk, engdi ngdirrek el soal a kuusubes.” d

BEKEROUL A POSITIVE EL FEELINGS

13. A doltirakl er a Rom 12:​18-21, e ngera kired el meruul er ngii?

¹³ Sel dousubes er a chad el kmal tilemellii a rengud e ngdiak di lsoad el mo diak dosaod er a tekoi el dilubech. A lsekum ng Kristiano el odam me a odos e ngturrekong er kid a rullii a budech. (Mt. 5:​23, 24) Kede ngiltii el mtechei a ngesechel a rengud loba klechubechub e mtechei a kngtil a rengud el loba klausubes. (Monguiu er a Rom 12:​18-21; 1 Pe. 3:9) Ngera sebechel ngosukid el meruul er tiang?

14. Ngera ungil dolasem el meruul er ngii, e ngerang?

¹⁴ Ngkired el melasem el mo omes er a chad el tilemellii a rengud el ua lomes er ngii a Jehovah. A Jehovah melilt el lomes a klungiolir a rechad. (2 Kr. 16:9; Psa. 130:3) Kid a mo metik aike el soad el lomes er ngii er a chad, a lungil  me a lemekngit. Me sel domes aike el ungil er tir e ngmo beot er kid ousubes er tir. El ua tiang, a odam el Jarrod a kmo: “Ngmo beot er ngak ousubes er a odam sel kumekesiu er a cheleuid el lerirellii er aike el betok el tekoi el soak el kirel ngii el chad.”

15. Ngera uchul me nglocha ungil omouchais er a chad el kmo ke mla ousubes er ngii?

¹⁵ A lmuut el ta er a klou a ultutelel el tekoi el soad el melatk a meruul er ngii a ouchais er a chad el kmo kede mla ousubes er ngii. E ngerang? Molatk a lolekoi a Naomi el dulsaod er ngii er a uchelel: “A bechik uleker er ngak el kmo, ‘Ke mla ousubes er ngak?’ Sera kbekengii a ngerek el mo melekoi el kmo ‘A kuusubes er kau,’ e ngdimlak el sebechel el tuobed a tekoi er a ngerek. Ak mlo mtebengii el kmo ngkmal dirkak kuusubes er ngii er a chelsel a renguk. Cherengel a taem e ngmlo sebechek el dmu er ngii el kmo, ‘A kuusubes er kau.’ Sera kuusubes er a bechik e ngmlo delelualu a ralm er a chelsul a medal. Ngkmal mlo mechas a renguk er a kebekakl el blo lomelechesiu er ngii me a budech el blo kulechesuar. Uriul er tiang e ak liluut el toketekii a klaumerang er ngak er ngii me a ki liluut el mo best friends.”

16. Ngera ke mla suubii el kirel a klausubes?

¹⁶ A Jehovah a soal a dousubes. (Kol. 3:13) Me nguaisei engdi nglocha meringel er kid ousubes er a rebebil. Ngsebeched el mo ousubes er tir a lsekum e ngdiak de ignore a feelings er kid e meringel loureor er a feelings er kid. Seikid e ngmo sebeched el mekeroul a beches e positive el feelings.—Momes er a baks el “ Edei el Tekoi el Sebeched el Meruul Me Dousubes er a Rebebil.”

MOTURK OSENGEM ER A KLUNGIOLEL A DOUSUBES

17. Ngera klungiolel a bo dousubes?

¹⁷ Ngbetok a uchul me ngkired el lousubes. Molatk a di bebil er ngii. A kot, e kede oukerebai e odeuir a rengul a chubechubechad el Demad el Jehovah. (Lk. 6:36) Ongerung, kede ochotii el kmo kede oba omereng el saul el Jehovah mla ousubes er kid. (Mt. 6:12) E a ongedei, ngungil er a health er kid, me a deleuill er kid me a rebebil a melemolem el mesisiich.

18-19. Ngera locha mo duubech sel dousubes?

¹⁸ Sel dousubes er a rebebil e kede locha mo ngmai a klengeltengat el dimlak de expect. El ua tiang, molatk a dilubech el mora Denise el dulsaod er ngii er a uchelel. Ngika dimlak lodengei er seikid el taem el kmo ngika el chad luchul a accident el dilubech el mo er tir a millib el mo melai er a klengar er ngii er a uriul er a kerrekeriil. Me nguaisei engdi a klausubes er a Denise a kmal rirtechii a rengul me ngulemuchel el mesuub a Biblia lobengterir a Resioning er a Jehovah.

¹⁹ Kede locha mo el feel el kmo a dousubes er a chad a ta er a kot el meringel el tekoi el kired el mo meruul er ngii, me nguaisei engdi nglocha mo ta er a kot el lungil el tekoi el sebechel duubech el mei er kid. (Mt. 5:7) Mada debora kot el tkurrebab el klisiched el rokui el loukerebai er a klausubes er a Jehovah.