A demak me a delak a kmal mle mesisiich el chad er a Katolik. Engdi sera lesubii er a Biblia el kmo a ngklel a Dios a Jehovah, e te mlo blak rengrir el Sioning er a Jehovah. A demak a mlo diak lolasech a bleob el lokesiul a Jesus. Ngbai uluusbech er a kldaiksang er ngii el rullii a kot el chellibel er a blimam el mo sel kot el Blil a Ongdibel er a San Juan del Monte el ngar er a Manila el capital er a Huriping.

Sera kmechell er a 1952 e a delak me a demak a mlo olisechakl er ngak el kirel a Jehovah el ua lurruul er ngii el mora reteua el obekuk me a retedei el ochedak. Sera kurael el me klou e a demak a millisiich er ngak el mo menguiu er a chimo el bliongel er a Biblia er a bek el sils, e milsuub a kakerous el babilenged el lobengkek. Mla er ngii aike el taem el rechad er a blik a mle invite er a rudam el oldingel ongdibel me a rudam lomtechei er a branch office el me kiei er a blimam. A experience el ble el share lobengkemam a mle uchul a klou el deurreng me a omelisiich el mora telungalek er kemam, e uldbechemam el mo rullii a omesiou el mora Jehovah el mo kot el klou a ultutelel el tekoi er a klengar er kemam.

Ak siluub a kmal betok er a kerebil a rechad er a blik el tir a kmal luleba blakerreng el mora Jehovah. Uriul er a bo lesecher e lemad a delak, e ngak me a demak ulemuchel el pioneer el terung er a 1971. Engdi a 1973 er a bo el 20 a rekik e ngmlad a demak. Sera kurrideterir a rechad er a blik e ngkmal mlo bechachau a renguk e mlo feel el kmo ngdi ngak el tang kung. Engdi “ultebechel el diak lolmesim” el omelatk el ngar er a Biblia ngilsukak el mo oba ungil uldasu e diak meeleb er a klengiterreng, e melemolem el kmeed er a Jehovah. (Heb. 6:​19, BT) Kedeb el taem er uriul er a lemad a demak e ak mlo special pioneer er a Coron el cheroid el beluu el ngar er a Palawan.

Sera kbora Coron e ngmle 21 a rekik. Ngak a buik er a city me ngkmal mlo mechas a renguk er  a bo kudengei el kmo ngdimlak a kmal dengki me a ralm me a olidiuul. E alta ngmla er ngii a rekesai el odam engdi ngdimlak a pioneer partner er ngak me a lebebil er a taem e ngdi mle ngak el tang el oldingel. A kot el buil el kngar tiang ak kmal mlo miss er a telungalek er ngak me a resechelik. Sel klebesei e a kumes a btuch er a eanged e mo merael a iuechel a medak. Ngmlo soak el quit e mo remei.

Ngar er aikakid el taem e a kuuchais er a Jehovah aike el rokui el ngar er a renguk. Ak mo melatk a tekoi el kchiluiu er a Biblia me a babilenged el kmal melisiich. Ak blechoel el mo melatk er a Psalm 19:14 (NW). Ak mlo mtebengii el kmo a Jehovah a mo “Risois er ngak e Osebelek” a lsekum ak mo melebedebek aike el tekoi el lodeuir a rengul el ua urerel me a blekerdelel. A suobel er a Watchtower el dai er ngii a “You Are Never Alone” a a kmal ngilsukak. Ngmlo betok el taem el di kunguiu er ngii. Ngua dedu el kmo aikakid el taem e ngdi mle ngak me a Jehovah e tia milskak a mekreos el techall el mo meluluuch, mesuub, e melebedebek.

Ngdi mle telkib el taem er a kbora Coron e ak miltutk el mo ta er a remechuodel. Ak di mle chimong el mechuodel me ak mirruul er a Skuul el Kirel a Urerel a Dios, Miting el Kirel a Berkel a Klumech, Book Study er a Ongdibel, me a Omesubel a Ongkerongel. Ak dirrek el lultobed a cheldecheduch el mo er a buai er a bek el sandei. Ngklemerang a ta el tekoi, ngmlo diak a temek el mo feel el sabisi.

Ngkmal mle bekerredechel a berkel a klumech er a Coron. A rebebil er a rechad el kulsuub el lobengterir a cherengel a taem e te miltecholb. Engdi ngdirrek el mla er ngii omelsemai. A lebebil ak merael el tedobech er a ta el sils el mora territory, e diak kudengei el kmo ak mo bad er ker sel kbong. Mekekerei el iungs a dirrek el mle uldimukl er a territory er a ongdibel. Me ngmle kirek el ngar er a chert loeak oiu el mong, alta ak mle metitur el mengikai! A Jehovah ulemekerreu er ngak e silsichak er ngii el rokui. Uriul e ak mlo mtebengii el kmo a Jehovah milengetmokl er ngak el kirel a lmuut el meringel lomelsemai er a next el assignment er ngak.

A 1978 e te mle assign er ngak el mora Papua New Guinea, el ngar er a diluches er a Australia. A Papua New Guinea a betok a rois er ngii el beluu el kmeed el ua klungel a Spain. Ngkmal mle mechas a renguk e le ngmle edei el miliol a rechad el kiei er ngii engdi te millekoi a bekord el 800 el omelekoi. Engdi a ungil er ngii a ruumesingd el chad a mle sebechir el melekoi a Melanesian Pidgin, el lokedongall el Tok Pisin.

A kot e te mle assign er ngak el mora ongdibel el ngar er a capital er a Port Moresby el melekoi a tekoi er a Merikel. Ngdi mle telkib e ak mlora ongdibel el melekoi a Tok Pisin e mlo melai a class er tia el omelekoi. A kuluusbech aike el ksiluub el lomerk er a klumech. Tia ngilsukak el mo mereched el suubii tia el omelekoi. Ngdi mle kedeb el taem e ngmlo sebechek el oltobed a cheldecheduch el tekoi er a Tok Pisin. Ngkmal mlo mechas a renguk e le ngdirkak el bo el ta el rak er a kbora Papua New Guinea e te assign er ngak el mo circuit overseer er aike el ongdibel el melekoi a Tok Pisin el ngar er a meklou el beluu er a Papua New Guinea.

Aika el ongdibel a kmal mle chacheroid me ngmle kirek el organize a betok el circuit assembly  e ngar er a betok el omerael. A uchelel e ak mle feel el kmo ngkmal di ngak el tang el ngar er a beches el beluu, el rechad er ngii a melekoi a ngodech lomelekoi e ngodech a siukang er tir. Ngdimlak el sebechek el merael loeak a beluu e le ngmle betok a rois e mekngit a rael. Me ngmle kmeed el bek el sandei el kngar er a skoki. A lebebil e ngdi mle ngak el tang el ngar er a kekerei el mechut el skoki. Aika el omerael a mle lmuut el suebek a renguk er ngii er a omerael el ngar er a chert!

Ngdimlak el betok a rechad el loudengua me ak milengedecheduch er a ongdibel loeak omeluches el babier. Ak blechoel el mora ongdibel er a uchei er a lenguu a babier me ngmlo kirek lokerker el kmo te ngar ker a Resioning. Bek el taem el kbetik er tir e te kmal ngoikak er a dmuil, el lomeklatk er ngak er a uchul me ak meruul aike el kuruul. A kulemelechesiu er a ngelsuil a Jehovah er a betok el rolel me a deleuill er ngak me ngii a kmal mlukeroul.

Ngar er a kot el miting er ngak er a ongdibel er a Bougainville el beluu el mlara bita er a daob, e a ta el obekel a ulemes er ngak e smile e merael el mei e dmu el kmo, “Ke medengelkemam?” A kulemerk el mo er tir er a kkot el mora Port Moresby. Ak miluchelii omesubel a Biblia lobengterir e mle turn el mora odam el ngii a millemolem er a omesubir. Chelecha e te mla metecholb! Tia ta er aike el betok el klengeltengat el kngilai er a kngar er a Papua New Guinea el edei el rak.

A uchei er a kbora Papua New Guinea er a 1978 e ak mle meet er a odos er a Coron el Adel a ngklel. Ngika mle regular pioneer lomekeroul er a reteru el ngelekel el Samuel me a Shirley. A osisiu el taem e nguleba delal el chudelang. Me a May 1981 e a kliluut el mora Huriping el mo bechil a Adel. Uriul er a ki bo bechiil e aki dilak el regular pioneer e omekerreu er a telungalek er kemam.

Alta ngmla er ngii a telungalek er ngak, te liluut el tutkak er a 1983 el mo special pioneer e assign er kemam el mora Linapacan Island el ta er a tedebechel a Palawan. Me aki rokui el millukl el mo er tia el beluu el diak a Resioning er ngii. Bekord el ta el rak er uriul e ngmlo smecher a delal a Adel. Me nguaisei, aki millemolem el mechesang lomerk er a klumech e tia millisiich er kemam er a kngtil a rengmam. Aki milluchel a betok lungil study er a Linapacan me ngdi mle telkib e aki mlo ousbech er a Blil a Ongdibel. Me aki di mle kemam el mekedecherur. Edei el rak er uriul er aki bong e ngkmal mlo dmeu a rengmam el mesterir a re 110 el chad el mei er a Chedaol Belsoil, el betok er tir a ulengeriakl e metecholb.

A 1986 e te mle assign er ngak el mora iungs er a Culion el mla er ngii delebechel er a rechad el chebedes er ngii. Uriul er tiang e a Adel a dirrek el miltutk el mo special pioneer. A uchelel e aki mle medakt el omerk el mora rechad el chebedes. Engdi a rudam me a rudos ulelterekokl a rengmam el kmo te mla ngar er a ukeruul me ngdiak el bekoiuiuul. A rebebil er tir a mlara miting er a blil a odos. Me ngmlo diak ki medakt el lomerk el mo er tir e kmal mlo dmeu a rengmam el share er a omelatk er a Biblia el mora rechad el feel el kmo te cheitel er a Dios me a rechad. Ngmle dmeu a rengmam el mesterir a rechad el kmal smecher el metik er a deurreng er a omelatk el kmo, a ta er a klebesei  e ngmo cherrungel a klisichel a bedengir.—Lk. 5:​12, 13.

Te milekera rengelekam e adjust el mora klengar er a Culion? Ngak me a Adel a mle invite er a reteru el mekekerei el odos er a Coron el me obengkemam me a rengelekam lebo er ngii a ungil association er tir. A Samuel, Shirley, me tirka el teru el odos a dirrek el kmal mle dmeu a rengrir el lolengeseu er a rebebil el mo medengelii a klemerang. Te milsuub lobengterir a rengalek e ngak me a Adel a milsuub lobengterir a redemerir me a rederrir. A ta el taem e aki milsuub lobengterir a re 11 el telungalek. Ngdi mle telkib e aki mo mesuub lobengterir a rebetok el ulengeriakl me ngmlo sebecham el mechelii a beches el ongdibel!

A uchelel e ngdi mle ngak a mechuodel el kiei er tiang. Me a branch office ullengit er ngak el mo oltobed er a miting lobengterir a reteai el publisher el ngar er a Culion e meruul er a osisiu el tekoi el mora retetiu el publisher el ngar er a beluu er a Marily, el mle edei el sikang a cherridel loeak a chert. Uriul er a miting er a Marily e aki merael el telungalek el loeak a rois el betok el sikang el mo meruul omesubel a Biblia er a beluu er a Halsey.

Cherengel a taem e te betok el chad er a Marily me a Halsey a mlei er a klemerang me aki milekedechor a Blil a Ongdibel er ngii. Ngdi ua Linapacan, a rudam me a rudos me a resemeriar a di mle tir el provide a material e di mle tir el mekedecherur. A Blil a Ongdibel er a Marily a mle sebechel medengcheklterir a re 200 el chad e sebeched toreklii e rullii el mo klou, me ngmle sebeched el meruul a assembly er ngii.

A 1993 er a lemeklunga rengelekam e ngak me a Adel ulemuchel loldingel ongdibel er a Huriping. E a 2000 e ak mlora Ministerial Training School el melai a training el mo olisechakl er ngii el skuul. Ak mle feel el kmo ngdiak qualified el lolisechakl engdi Adel a mle blechoel el melisiich er ngak. Ngulemeklatk er ngak el kmo a Jehovah mo meskak a klisiich el kuusbech er ngii el mo kutmeklii tia el beches el assignment. (Fil. 4:​13, NW) A Adel a mle medengei el kmo, tiang a klemera el tekoi le ngmle sebechel kutmeklii a assignment er ngii alta ngmla er ngii a secherel.

A 2006 er a kulisechakl a skuul e a Adel a mlo smecher er a Parkinson’s disease. Ngkmal mle  mechas a rengmam! Sera kdu er a Adel el kmo bo demerek er a assignment er kid me bo lsebechel lomekerreu er ngii, e ngdilu el kmo: “A kullengit me msikii a toktang el sebechel ngosukak, e ak medengei el kmo a Jehovah mo ngosukid el melemolem er a assignment er kid.” Me a Adel a mle elolem el rak lolemolem el meruul er a omesiungel el mora Jehovah e dimlak el complain. Sera bo lak el sebechel el merael e nguluusbech er a wheelchair el lomerk. Sera bo lak el sebechel kmal mengedecheduch e ngulenger er a miting lousbech er a di one me a lechub e ng two el words. A Adel a mle blechoel el ngmai a message louchais er ngii el kmo te kmla appreciate er a klebokel el kerebai er ngii loutekangel, el mo lmuut er a lemad er a 2013. Ngmle betok er a 30 el rak el kubengkel a blak rengul e betik er a renguk el bechik, e chelechang el bla bo lesecher e ngmla lmuut el meelebak a klengiterreng me a sabisi.

A Adel a mle soal a kulemolem er a assignment er ngak, me tiakid a kurruul er ngii. Ak millemolem el mechesang e tia ngilsukak el mo diak sal sabisi. A 2014 el mora 2017 e te mle assign er ngak el mo oldingel a ongdibel el melekoi a Tagalog er aike el beluu el milerrob er a urered. Uriul er isei e ak mlo oldingel a ongdibel er a Tagalog el ngar er a Taiwan, Merikel, me a Canada. E a 2019 ak ullisechakl er a Skuul el Kirir a Rumerk er a Rengedel a Dios (SKE) el tekoi er a Merikel er a India me a Thailand. Ak miltik er a klou el deurreng er aika el assignment. Ak metik el kmo ngkot el mo dmeu a renguk sel kmechesang er a omesiou el mora Jehovah.

Derta er aika el assignment e ak mlo close er a rudam me a rudos el blo kudengelterir me ngkmal mo meringel er ngak a choititerir. Ngar choua ikakid el taem e ak mla suubii el mo mui loumera el ulsirs er a Jehovah. Ak blechoel el mo melechesuar er a ngelsuil e tia ngosukak el loba renguk el rokir el kongei a ngii di el omelodech el bo kchebangel. Chelecha taem e ak special pioneer er a Huriping. Ak mla mo smau er a beches el ongdibel er ngak el ngii a mla mo telungalek er ngak el lomekerreu e olengeseu er ngak. Ak kmal proud el lomes er a Samuel me a Shirley el loukerebai er a blakerreng er a derrir.—3 Jn. 4.

Chochoi ak mla chobangel a betok el ringel er a chelsel a klengar er ngak, el luldimukl er ngii omes er a betik er a renguk el bechik el mo chuarm e mad er a kmal mekngit el rakt. Ngdirrek el mle kirek el adapt er a chelsel a betok el beches el blekeradel. Engdi ak mla mesa el kmo a Jehovah “diak le cheroid er a derta er kid.” (Rel. 17:27) A chimal a Jehovah a “diak lekedeb” el kirir a remesiungel; ngmo olengeseu e melisiich er tir mo lmuut er aike el beluu el kmal cheroid er a rechad. (Isa. 59:​1, NW) A Jehovah, el Risois er ngak, ngkakid er a lobengkek er a klengar er ngak el rokir me ak kmal loba omereng el saul el kirel. Ngdimlak a ta el lebo di lengak.