1-2. (a) Ngera me ngsebeched el melatk el kmo a Jesus a kiltmeklii a beot el rolel a dongedaol er a kodellel? (b) Ngera el blekerdelel a Jesus a bo dosaod?

NGSEBECHEM el smodii el kmo ngera mo duubech er a bek el rak er sel temel a Chedaol Belsoil er a kodellel a Kristus? Ngulterekokl el oumesingd er kid a medengei aike el meketmokl er tia el Chedaol Belsoil er a Rubak. E ngera uchul? E le tia el belsoil a kmal di beot a omengetmeklel. Me nguaisei, engdi ngkmal klou a ultutelel el tekoi. Me kede locha mo melatk el kmo, ‘Ngera me ngkmal di beot a omengetmeklel tia el belsoil?’

² Sel taem er a omesiungel a Jesus er tia el chutem, e a rechad a mle ungil medengei el kmo ngullisechakl er a klemerang el ngar a kot el beot e bleketakl el rolel. (Mt. 7:28, 29) Me ngdi osisiu, ngkiltmeklii a kot el beot engdi ngkmal mle klou a ultutelel el rolel a dongedaol * er a kodellel. Me chelechang e bo dekerekikl lomdasu er a belkul tia el Chedaol Belsoil me a bebil er a tekoi el lurruul me a ledilu Jesus. Kede mo ungil medengei el kmo ngullecholt er a klengariourreng me a blekeu me a bltikerreng, e dirrek el mo suubii a rolel e ngsebeched el lmuut el mo ungil loukerebai er ngii.

3. A bades er a Mateus 26:26-28, ngmekera losaod er a betengel a Chedaol Belsoil el lurruul er ngii a Jesus, e aike el eru el klekedall el luluusbech ngulemekesiu er a ngerang?

³ A Jesus a kiltmeklii a Chedaol Belsoil el kirel a kodellel el obengterir a 11 el blak a rengrir el apostol er ngii. Ngdi uluusbech aike el mla er ngii el klekedall er a uriul er a Baskua e rullii tia el omengedaol el ngar a beot el rolel. (Monguiu er a Mateus 26:26-28.) Nguluusbech a dimlak a omkukel blauang me a bilong el mla er ngii. A  Jesus a dilu er a rechapostol er ngii el kmo aika el eru el klekedall a omekesiu er a cherrungel el bedengel me a rsechel, el ngii a kmedu el mo tonget el kirir. Me tirka el apostol a locha dimlak lemechas a rengrir er a betengel tia el beches el rolel a belsoil. E ngera uchul?

4. Ngmekera ulekrael el Jesus a milsa Martha er a uchei, e ngosukid el mo medengelii a uchul me a Jesus a mirruul er a Chedaol Belsoil el ngar a beot el rolel?

⁴ Ka molatk er a tekoi el dilubech er a sesei el buil er a uchei, el ngar sel ongedei er a rak er a omesiungel a Jesus, e ngmlo oldingel er a resechelil el Lasarus, me a Martha, me a Maria er a blirir. Ngkmal mle ungilbesul a Jesus el dengchokl, e ulemuchel el olisechakl. A Martha a mla er isei, engdi ngkmal mle mechesang el mengetmokl a betok el kall el melatk er ngika el ileakl el okiak er tir. Me a Jesus er a lesa tia el omerellel, e ngmle ungil a tekingel el sumecheklii a Martha, me ngmlo sebechel el mtebengii el kmo a klou el blengur a diak el blechoel el klou a ultutelel. (Lk. 10:40-42) E a uriul, er sel taem el di mle sesei el sikang er a uchei er a bo letengetengii a klengar er ngii, e ngultutii tia el ulekrael er ngii. Ngkiltmeklii a beot el rolel a Chedaol Belsoil. Me tia el omeruul, ngouchais er kid a ngerang el kirel a Jesus?

5. Ngera ngochotii er kid el kirel a Jesus tia el beot el belsoil, e ngera klaisisiu er ngii er a bades el ngar er a Filipi 2:5-8?

⁵ A rokui el tekingel me a omerellel a Jesus a ulechotii el kmo ngkmal mle ngariou a rengul. Me ngdiak lemechas a rengud er sel klou el olechotel a klengariourreng el lulechotii er sel ulebongel el kesus er ngii er tia el chutem. (Mt. 11:29) Ngmle medengei el kmo ngkmedu el mo kutmeklii a kot el ngarbab el tenget er a chelsel a reksi er a klechad, e dirrek a Jehovah a mo okisii el mo mekedengcheklii er a kot el ngarbab el deruchall el ngar a eanged. Me alta e ngmle medengelii tia el tekoi, engdi ngdimlak el soal lolechau osengir a rechad el bedulngii el meruul er a kmal ileakl e klou el belsoil el kirel a kodellel. Ngbai dilu er a redisaiplo er ngii el kmo ngta el taem er a bek el rak e ngkirir el meruul er a beot el belsoil el omeltkir el kirel ngii el Jesus. (Jn. 13:15; 1 Ko. 11:23-25) Tia el beot el belsoil a ochotii el kmo a Jesus a dimlak el kedidai a rengul el chad. Me ngungil a rengud e le kede medengei el kmo a klengariourreng a ta er a kot lungil blekerdelel ngika el King er kid el ngar a eanged.​—Monguiu er a Filipi 2:5-8.

6. Ngmekera e mo sebeched loukerebai er a klengariourreng er a Jesus sel bo dechelebangel a omelsemai?

⁶ Ngmekera e mo sebeched loukerebai er a klengariourreng er a Jesus? Ngokiu sel dengai a mo klungiolir a rebebil el mo ruchei er a klungioled. (Fil. 2:3, 4) Ka molatk er sel ulebongel el kesus er a Jesus er tia el chutem. A Jesus a mle medengei el kmo ngkmedu el mo  chormii a kot el meringel el kodall, engdi ngbai di millatk er a reblak a rengrir el apostol er ngii, el tir a kmedu el mo lmangel el kirel. Me nguluusbech er sel ulebongel el kesus er ngii el olisechakl e melisiich e mengelaod er tir. (Jn. 14:25-31) Me a Jesus a mera el ulechotii a klengariourreng e le ngmillatk a mo klungiolir a rechad el kuk ngaruchei er a klungiolel. Me ngkmal ungil kerebai a lulechotii!

7. Ngmilekera Jesus e ochotii a klou el blekeu er a telkib el taem er a uriul er a leketmeklii a Chedaol Belsoil er a Rubak?

⁷ Telkib el taem er a uriul er a leketmeklii a Chedaol Belsoil er a Rubak a Jesus, e ngulechotii a klou el blekeurreng. Ngmilekerang? A Jesus a kilengei el kutmeklii a tekoi el mle soal a Demal, alta e ngmle ungil medengei el kmo a bo loruul er ngii e ngbelkul a kmo ngmo mad er a meringel el kodall el mo uchul a otuub el mora Demal. (Mt. 26:65, 66; Lk. 22:41, 42) Engdi Jesus a lilemelemii a cherrungel el blakerreng er ngii me bo lemodanges a ngklel a Demal, e dirrek el millisiich er a llemeltel a Dios el mengedereder, e dirrek el milekengii a techall er a diak a ulebengelel el klengar el kirir a rechad el obult er a kngterir. E a osisiu el taem, e ngii el Jesus a dirrek el milengetmokl er a rultirakl er ngii el kirel a tekoi el tir a kmedu el mo chelebangel er ngii.

8. (a) Ngera ngdilu Jesus el mo er tirke el blak a rengrir el apostol er ngii? (b) Ngar a chelsel aike el rak er a uriul er a kodellel a Jesus, e a redisaiplo er ngii te milekera e ochotii a blekeurreng?

⁸ A Jesus a dirrek lulechotii a blekeu e le ngdimlak lolatk el kirel a sebekreng er ngii e bai mle ultaut a osengel el kirel aike el luluusbech a reblak a rengrir el apostol er ngii. Me tia el beot el rolel a belsoil el lekiltmeklii er a uriul er a ledu er a Judas me lorael, a omeklatk er tirke el mo ngellitel el odam er ngii el kirel a klungiaol el mo er ngii el okiu a mloitel el rsechel a Jesus, e te dirrek el mo chedal sel beches el telbiil. (1 Ko. 10:16, 17) Me a bo lengesuterir el melemolem el blak a rengrir e bo lobengkel a Jesus el ngar a eanged, e ngii el Jesus  a uluuchais er tirka el uleltirakl er ngii er aike el tekoi el ngii me a Demal a milengerechir er tir. (Jn. 15:12-15) A Jesus a dirrek el uluuchais er a rechapostol er ngii er aike el omelsemai el bo lechelebangel. Me ngmillisiich er tir me bo loltirakl er a kerebil, e milengelechel er tir el kmo “Lak kom medakt.” (Jn. 16:1-4a, 33) Me a betok el rak er a uriul, e a redisaiplo er a Jesus a dirk millemolem loltirakl er a kerebil el mle blechoel el melatk er a rebebil e dirrek el ullecholt er a blekeurreng. Me alta e tia mle belkul a kmo te mo chuarm, engdi te millemolem el kaingeseu er a delongelir er a chelsel a betok el kakerous el ringel.​—Heb. 10:33, 34.

9. Ngmekera e mo sebeched el oukerebai er a Jesus el uleba blekeu?

⁹ Me ngdi osisiu er chelechang, kid a oltirakl er a kerebil a Jesus el olecholt er a blekeu. El ua tiang, kede ochotii a blekeurreng sel dolengeseu er a rudam er kid el modechelakl el kirel a klaumerang er tir. A lebebil er a taem e a rudam er kid a mekelebus el dimlak a ungil luchul. Me sel bo leuaisei, e kid a kmal kired el remuul aike el rokui el sebeched el kirir, el uldimukl er sel dongedecheduch el mesebechakl er tir. (Fil. 1:14; Heb. 13:19) A ta er a rolel e kede ochotii a blekeu, a okiu sel dolemolem el omerk el oba ‘blekeu.’ (Rel. 14:3) Me kid a di ua Jesus el telbiil er a rengud a mo omerk er a klumech el kirel a Rengedel a Dios, el mo lmuut er a taem el rechad a locha mo omtok me a lechub e te oldechelakl er kid. Engdi a lebebil er a taem e kede locha mo melechesukid el medakt. Me kede mo mekerang?

10. Ngkired el mekerang er a chelsel aike el sandei el mo lmuut er a temel a Chedaol Belsoil, e ngera uchul?

¹⁰ Ngsebeched el melisiich er tia el blekeurreng er kid lokiu sel domdasu el kirel a omelatk el olubet el tengetengel a Kristus a sebechel kutmokl el kired. (Jn. 3:16; Efe. 1:7) Me ngar aike el sandei el mo lmuut er a temel a Chedaol Belsoil, e kede oba ileakl el techall el mo omekeroul er a omereng el saul er kid el kirel tia el olubet. Me ngar sel taem, e dolemolem el menguiu er a omengiuel a Biblia el kirel a Chedaol Belsoil e doluluuch e bo dungil melebedebek aike el tekoi el dilubech er sel taem el mo lmuut er a kodellel a Jesus. E sel bo el temel, e kede mo kldibel el kirel a Chedaol Belsoil er a Rubak, me kede lmuut el mo ungil medengei a belkul aike el klekedall el lousbech er a Chedaol Belsoil me sel diak lemedebodeb el klungel a ultutelel a olubet el tenget el ika el klekedall a omtechei er ngii. Me sel bo dungil medengei aike el tekoi el Jesus me a Jehovah a mla remuul el kired, e dirrek el bo dodengelii a rolel e ngmo uchul a klungioled kid me a rebetik er a rengud, e ngmengal  mo mesisiich a omeltked, me kid a lmuut el mo soad el outekangel el oba blekeu el mo lmuut er a ulebongel.​—Heb. 12:3.

11-12. Ngera kede mla suub er chelechang?

¹¹ Me chelechang e kede mla suubii el kmo a Chedaol Belsoil er a Rubak a omeklatk er kid el diak di el kirel sel mekreos el olubet el tenget e ngdirrek el ike el ileakl el blekerdelel a Jesus el klengariourreng me a blekeu. Me kede mera el oba klou el omereng el saul e le Jesus el melemolem el olecholt aika el ungil blekeradel e ngar a eanged el mesiou el Ngarbab el Prist er kid, e olengit el kired me bo el sebeched el mo suobel! (Heb. 7:24, 25) Me a lsekum ngsoad el ochotii a klou el omereng el saul er kid el kirel, e ngkmal kired el blak a rengud el mengedaol er a kodellel a Jesus, el oltirakl aike el tekoi el lulengelechel er kid. (Lk. 22:19, 20) Kede meruul er tiang el oltirakl er a kalender er a temel a Nisan 14, el ngii a kot el klou a ultutelel el taem er a rak.

¹² Ngsebeched el suubii a betengel a omengetmeklel tia el Chedaol Belsoil er a Rubak el kirel a ta er a blekerdelel a Jesus el rirellii me ngmlad el kired. Sera lengar tia el chutem e a rechad a mle medengelii el okiu tiaikid el blekerdelel. Me tiang ngerang?

13. Ngmekera Johanes 15:9 me a 1 Johanes 4:8-10 e smodii a bltikerreng el lullechotii a Jehovah me a Jesus, e rua techang a mo ngmai a klungiolir er tia el bltkil a rengrir?

¹³ A Jesus a mle cherrungel el oukerebai er a bltkil a rengul a Jehovah el bedulkid, er a chelsel a bek el tekoi el lurruul. (Monguiu er a Johanes 15:9; 1 Johanes 4:8-10.) E a lmuut el ngarbab er ngii el rokui, a Jesus a kmal kilengei el mo tongetengii a klengar er ngii el kired. Alta e kede ngellitel me a lechub e kede “kuk bebil el sib,” me kid a rokui el ngmai a klungioled er a bltkil a rengul a Jehovah me a Ngelekel el bla lochotii er kid lokiu a olubet el tenget. (Jn. 10:16, NW; 1 Jn. 2:2) E ka mluut el melatk er a belkul aike el klekedall er a temel a Chedaol Belsoil; ngochotii a bltkil a rengul a Jesus me a uldesuel el bedul a redisaiplo er ngii. El mekerang?

14. Ngoeak a ngera el rolel e a Jesus a ulechotii a bltkil a rengul el mora redisaiplo er ngii?

¹⁴ A Jesus a ulechotii a bltkil a rengul el mora rengellitel el rudam er ngii er a leketmeklii a beot a rolel el belsoil el mle soal a bo longedaol er ngii. Me a cherengel a taem, e tirka el ngellitel el disaiplo er ngii a millemolem el meruul er a Chedaol Belsoil el ta el taem er a bek el rak, alta e te mlo chelebangel a kakerous el blekeradel, el uldimukl er a taem el blo lekelebus. (Och. 2:10) Me tirkang, ngmlo sebechir lolengesenges er a Jesus? Ngkmal mle sebechir!

15-16. Te milekera rebebil e mo sebechir el kutmeklii a Chedaol Belsoil er a Rubak alta e ngkmal mle meringel er tir?

¹⁵ Ngme lmuut er chelecha el taem, e a remera el Kristiano a osiik a bek el techellir e mo mengedaol er a kodellel a Jesus. Te oltirakl a rokui el omengetmeklel a Chedaol Belsoil er a Rubak el ngar a tkurrebab el sebechir, alta lebebil er a taem e ngkmal mo meringel er tir. Ka molatk a kerebai er a rebebil. Sel taem er a lekelebus er a blil a kelebus er a Sina, e a Brother Harold King a ulsiik a rolel e mo sebechel el mengedaol er a Chedaol Belsoil. Me ngmirruul er ngii el mle kerekikl me lak a chad el mesang, e dirrek el uluusbech aike el rokui el mla er ngii er ngii. Ngdirrek el di millasem el omtab el kmo ngoingerang a temel a Chedaol Belsoil e mlo mengetmokl er ngii. Me sera bo el temel a omengedaol, e ngdi mle ngii el tang el ngar a cell er ngii, e milengitakl e milluluuch e dirrek el ultebedii a cheldecheduch el uluusbech a Bades.

¹⁶ Tiakid a lmuut el ta er a kerebai. A rebebil el odos el mle kelebus er a concentration camp er a taem er a Ongeru el Mekemedil a Beluulechad a mlo ocherur a kodall me bo lsebechir el mengedaol er a Chedaol Belsoil er a Rubak. Me nguaisei, engdi alta ngdi kesai a klekedall el luluusbech, engdi ngmlo sebechir el ungil kutmeklii a Chedaol Belsoil el dimlak a chad el mesterir. Te ouchais el kmo: “Aki mlo dechor el iliuekl e kaiuekeed, e ngar a delongelam  e ngar ngii a kekerei el tebel el selumech a becheleleu el mamed e kldoel er ngii a klekedall er a Chedaol Belsoil. Ngmla er ngii a kandalang el kmard, e le dichel a dengki a sebechel mo uchul e a rechad a mo medengei el kmo aki mekerang. . . . Aki ulemelekl a telbilam el mora Demad el mo ousbech a rokui el klisicham el mo mesebechakl er a chedaol el Ngklel.” Tia mera el klou el olechotel a klaumerang el lullecholt er ngii! Me kede mesang a klou el olechotel a bltkil a rengul a Jesus el uchul me ngsebeched el mengedaol er a Chedaol Belsoil el mo lmuut er a taem el bo lemeringel er kid el kutmeklii!

17. Ngungil a di lekid el melatk a ngera el ker?

¹⁷ Me chelecha el lolekeda temel a Chedaol Belsoil, e ngungil a dolatk aika el ker el kmo: ‘Ngmekera e mo sebechek el oukerebai er a Jesus el lmuut el mo blak a renguk lolecholt er a bltikerreng? Ngak, ak blechoel melatk aike el lousbech a rebebil el ngaruchei er aike el kuusbech? Ngak, ak mengerechir er a rudam me a rudos el mo meruul a lmuut el betok, me a lechub a kuba klemedengei el kmo ngdirrek el ngar ngii a telkelel a sebechir el remuul?’ Mada bo deblechoel loukerebai er a Jesus e dirrek el ‘bo dekelatk a chelebuul.’​—1 Pe. 3:8.

18-19. (a) Ngulterekokl a rengud el kirel a ngera el tekoi? (b) Ke mla tibir er a rengum el mo mekerang?

¹⁸ A tekoi el dongetmokl me bo lsebeched el mengedaol er a Chedaol Belsoil el kirel a kodellel a Kristus a kmal di kmedu e ngmo diak doruul. Sel “luut” a Jesus el mei er a temel a kloul ringel, e ngmo mengudel er tirke el dirk medechel el “ngellitel el chedal” e melai er tir el mora eanged. E seikid el taem e ngmo diak dongedaol er a Chedaol Belsoil.​—1 Ko. 11:26; Mt. 24:31.

¹⁹ Me sel taem el lekea dongedaol er a Chedaol Belsoil, e ngsebechel mo ulterekokl a rengud el kmo a rechedal a Jehovah a mo dmeu a rengrir el melatk er tia el beot el rolel a belsoil el ngii a omekesiu er a kot el ngaruchei el olechotel a klengariourreng, me a blekeu me a dirrek el bltikerreng el lulechotii a chad. Seikid el taem, e tirke el mlei er tia el ileakl el belsoil a ulterekokl el mo semeriar el mesaod er ngii el mo uchul a klungiolir tirke el mo kiei er sel taem. Engdi a lsekum ngsoad el mo ngmai a klungioled er tia el belsoil er chelechang, e ngkmal kired el tibir er a rengud el mo oukerebai er a Jesus el kirel a klengariourreng, me a blekeu, me a bltkil a rengul. A bo doruul el uaisei, e ngsebechel mo ulterekokl a rengud el kmo kede mo ngmai a omeksuled er a Jehovah.​—2 Pe. 1:10, 11.