1-2. (a) Ngmekera klumech el ngar er a Isaia 41:10, NW e mla er ngii a lerellii er a odos el ngklel a Yoshiko? (b) Te rua techa sebechir el ngmai a klungiolir er tia el klumech?

A BLAK a rengul el odos el ngklel a Yoshiko a mlo medengei el kmo ngkmal smecher e le a toktang er ngii a dilu el kmo ngdi medechel a sesei el buil er a klengar er ngii. Me ngmilekerang? Ngmillatk er a kot el soal el bades er a Biblia el Isaia 41:10, NW. (Monguiu.) * E dilu er a toktang er ngii el kmo ngdimlak el medakt e le Jehovah a ulerreked er a chimal. * Me a klumech el mlara chelsel tia el bades a ngilsuir ngika el odos er kid el mo mui el ultuil a klaumerang er ngii er a Jehovah. Tia el osisiu el bades a dirrek el sebechel el ngosukid el mo melemolem el chelellakl a rengud sel dechelebangel a ringel. Me a bo el sebeched el mo medengelii a rolel e ngmeketmokl tia el tekoi, e a kot e bo desa uchul me a Dios a milsa Isaia tia el klumech.

² A kot el uchul, e a Jehovah a dilu er a Isaia me nglmuches aika el tekoi el kirir a Rechijudea el mlengai el mo blebaol er a Babilon. Nguaisei, engdi a Jehovah a dimlak di leketmokl aika el tekoi el mo klungiolir tirke el mlo blebaol el Chijudea, e ngbai mo klungiolir a rokui el chedal er sel taem el me lmuut er chelechang. (Isa. 40:8; Rom 15:4) Kede kiei er a taem er a “blsechel a ringel,” me kede kmal ousbech er a omelisiich el debetik er ngii er a babier er a Isaia.​—2 Ti. 3:1, BT.

3. (a) Ngera el telbiil a debetik er ngii er a Isaia 41:10, NW, el ngii a bades er kid er chelecha el rak er a 2019? (b) Ngera uchul me kede ousbech aika el telbiil?

³ Ngar tia el suobel, e kede mo mesaod a edei el telbilel a Jehovah  el melisiich a klaumerang er kid el ngar er a Isaia 41:10, NW el kmo: (1) A Jehovah a mo obengked, (2) ngii a Dios er kid, me a (3) ngii a mo ngosukid. Kede ousbech aika el telbiil e le kid a di ua Yoshiko el mo chelebangel a ringel er a klengar er kid. Kede dirrek el mo chelebangel a orrimel el mekngit el blekeradel er tia el beluulechad a uchul. Me a rebebil er kid me te dirrek el outekangel a odechelakl er a mesisiich el kabelment. Me bo dosaod a derta er aika el edei el telbiil. *

4. (a) Ngera kot el telbiil el bo dosaod er ngii? (Dirrek el momes er a footnote.) (b) Ngoeak a ngera el rolel e a Jehovah a olecholt a uldesuel el kired? (c) Ngmekera tekingel a Jehovah e ngar ngii a lerellii er kau?

⁴ A kot el telbilel a Jehovah el mengelaod er kid a kmo: “Lak omedakt e ak kubengkem.” * Ngolecholt er tiang el okiu sel leblak a rengul er kid e loubltikerreng el mei er kid. Ka momtab er a rolel a lolecholt er a dmolech e medemedemek el uldesuel el kired. Ngmelekoi el kmo: “Ke mekreos er ngak, ele kmeskau a chetengakl, e betik a renguk er kau.” (Isa. 43:4) Ngdiak a klisiich er a uldekial a eanged me a chutem el sebechel rullii a Jehovah el mo diak loubltikerreng el mo er tirke el mesiou er ngii me a blakerreng er ngii a diak lemesmesim. (Isa. 54:10) A bltkil a rengul me a klausechelei er ngii a meskid a blekeu. Ngmo omekerreu er kid el ua lulemekerreu er a sechelil er a Abram (Abraham). A Jehovah a dilu er ngii el kmo: “Abram, lak medakt; ele ngak omekreakl el mesebechakl er kau.”​—Gen. 15:1.

5-6. (a) Kede mekera medengei el kmo a Jehovah a kmal soal olengeseu er kid er a mondai er kid? (b) Ngera sebeched el suubii er a kerebil a Yoshiko?

⁵ Kede medengei el kmo a Jehovah a kmal soal olengeseu er kid er a mondai er kid e le ngtibir el mora rechedal el kmo: “Sel bo molebechakl er a dmolech el ralm, e ak mo obengkem; a ikel chelebulem a diak bo lelebau. Sel bo msiseb er a ngau, e ng diak bo medul; a ikel meringel el ongarm el mei a diak bo le temellau.” (Isa. 43:2) Ngera belkul aika el tekoi?

⁶ A Jehovah a diak el tibir el kmo ngmo  choroid aike el omelsemai el rullii a klengar el mo meringel, engdi ngdiak bo lebechei aika el “dmolech el ralm” er a mondai me lelebid me a lechub “a ngau” er a ringel me bo luchul a diak a ulebengelel el telemelled. Ngoterekokl a rengud el kmo ngmo obengked, e ngosukid el ‘melebechakl’ el imiu aika el omelsemai. Ngmo mekera Jehovah? Ngmo ngosukid el mo chelellakl a rengud me ngdiak demedakt me bo el sebeched el lomelemii a blakerreng er kid el mo er ngii, el mo lmuut er a bo dechelebangel er a kodall. (Isa. 41:13) A Yoshiko, el dulsaod er ngii er a uchei a milsa el kmo tia el tekoi a klemerang. A ngelekel el redil a kmo: “Ngmera el mle mechas a rengmam e le delemam a kmal mle chelellakl a rengul. Ngmle sebecham el mesa el kmo a Jehovah a milsa budech er a rengul. Me ngdi milengedecheduch er a re nurs me a resmecher el kirel a Jehovah me a telbilel el mo lmuut er sel sils er a lemad.” Me ngera sebeched el suubii er a kerebil a Yoshiko? Sel dotuil a klaumerang er kid er a telbilel a Jehovah el kmo “Ak mo obengkem,” e ngdirrek el sebeched el mo bekeu e mesisiich sel doutekangel a ringel.

7-8. (a) Ngera sel ongeru el telbiil el bo dosaod er ngii, e ngera belkul? (b) Ngera uchul me a Jehovah dilu er a Rechijudea el mle blebaol el kmo: ‘Lak el sebek a rengmiu’? (c) Ngera el tekoi el ngar er a Isaia 46:3, 4 a ulterekokl el ngilsuterir a rechedal a Dios el mo chelellakl a rengrir?

⁷ Momtab er sel ongeru el telbiil el lilechesii a Isaia el kmo: “Lak el sebek a rengum, e le ngak a Dios er kau.” Ngera belkul tia el tekoi el kirel a sebekreng? Ngar tia el bades e sel di mla tekoi el kirel a ‘sebekreng’ a mesaod el kirel a “deblechoel el omes er uriul e le kede medakt el kmo ngar ngii a kmung ngerang me a lechub e ngkmung techang el me melemall er kid” me a lechub e “kede di mechechisngekl e le kede bekikl el kmo ngar ngii a mekngit el tekoi el mo duubech.”

⁸ Ngera uchul me a Jehovah dilu er a Rechijudea el mlo blebaol er a Babilon me lak el ‘sebek a rengrir’? E le ngmle medengei el kmo a rechad er sel beluu a mo medakt. Ngera uchul me te mo medakt? Ngar er a mo bedul a ulebengelel a 70 el rak el leblebaol a Rechijudea, e a Babilon a mo modechelakl er a mesisiich el klsoldau er a Media me a Persia. A Jehovah a mo ousbech er tia el klsoldau el mo oltobed er a rechedal er a klsibai er a Babilon. (Isa. 41:2-4) Me a rechad er a Babilon me aike el bebil er a renged el kiliei er sel taem er a bo lodengei el kmo a recherrouir a di kmedu el mei, e te millasem el kasisiich er a delongelir sel lechadecheduch el kmo: “Bo mesisiich.” Te dirrek el mirruul a bleob el chelid, el omdasu el kmo aika mo omekerreu er tir. (Isa. 41:5-7) Nguaisei, engdi a Jehovah a ngilsuterir a Rechijudea el mle blebaol el mo chelellakl a rengrir er a ledu el kmo: “Kau e Israel [el diak el tirke el tonari er kau a] mesiungek . . . Lak el sebek a rengum, e le ngak a Dios er kau.” (Isa. 41:8-10, NW) Momtab el kmo a Jehovah a dilu el kmo: “Ngak a Dios er kau.” Nguluusbech aika el tekoi el melisiich a rengrir a reblak a rengrir el mengull er ngii el kmo ngdirkak lobes er tir, e dirk Dios er tir, e tir a dirk chedal. Ngdilu er tir el kmo: “Ak mo meskemiu a ngesou e olsobel er kemiu.” Aika el tekoi er a ongelaod a ulterekokl el kmal millisiich er tir.​—Monguiu er a Isaia 46:3, 4.

9-10. Ngera me ngdiak el kired el mo medakt? Mosaod.

⁹ Chelecha el taem e nglmuut el kmal mla mo suebek a rengrir a rechad el iliuekl er kid e le blekeradel er tia el beluulechad a di merael el mo mekngit. Kid me kede dirrek el chuarm er aika el osisiu el mondai, engdi ngdiak el kired el mo medakt. A Jehovah a melekoi er kid el kmo: “Ngak a Dios er kau.” Ngera me tia el tekoi a kmal mesisiich el uchul me ngkirel di chelellakl a rengud?

¹⁰ Ka momtab er tia el okesiu. A reteru el chad el Jim me a Ben a ngar er a skoki el omteuitech  el ses el eolt a uchul. Me tia el skoki sel lebo er bab e leboriou, e a pilot a ouchais er a rokui el chad el kmo: “Mokes a seat belt er kemiu e le ngtelkib el mo meringel a omerael.” Me a Jim a kmal mla mo bekikl engdi a pilot a lmuut el melekoi el kmo: “Lak el sebek a rengmiu. Ngak el pilot el mengedecheduch.” Me seikid e a Jim a melmesim er a bdelul e kmo, “Ngera ngrullii tia el tekingel?” Engdi ngmtebengii el kmo a Ben a kmal diak el sebek a rengul me ngoker er ngii el kmo: “Ngera me ngkmal chelellakl a rengum?” Me a Ben a klikmechur e kmo: “E le ak mera el ungil medengelii ngika el pilot e le ngdemak!” E sola e dmu el kmo: “Ka me kuuchais er kau el kirel a demak, ak medengei el kmo sel bo mungil medengelii me aike el duch er ngii, e ngdirrek el mo chelellakl a rengum.”

11. Ngera klubeled el denguu er sel okesiu er tirke el teru el chad el mla er a skoki?

¹¹ Ngera klubeled er tia el okesiu? Kid a di ua Ben el chelellakl a rengud e le kede kmal ungil medengelii a Demad el ngar er a eanged el Jehovah. Kede medengei el kmo ngmo ungil omekrael er kid sel bo dechelebangel a kmal meringel el mondai er a chelsel aika el uriul el sils. (Isa. 35:4) Kede oumerang er a Jehovah, me ngsebeched el melemolem el chelellakl a rengud alta beluulechad el rokir a di mui er a dakt. (Isa. 30:15) Kede dirrek el ua Ben el ouchais er a retonari er kid el kirel aike el uchul e kede oumerang er a Dios. E seikid e ngmo ulterekokl a rengrir el kmo a Jehovah a mo ngosuterir er a chelsel a ngii di el omelsemai el bo lechelebangel.

12. (a) Ngera el ongedei el telbiil a bo dosaod er ngii? (b) A omesodel a ‘klisichel’ a Jehovah, ngomeklatk er kid er a ngerang?

¹² Ka momtab er sel ongedei el telbiil el lilechesii a Isaia el kmo: “Ak mo rullau el mo mesisiich, e ngosukau.” A Isaia a silodii a rolel a Jehovah a lolisiich er a rechedal er a ledu el kmo: “A Rubak el Dios a mei el me mengedereder el oba klisiich.” (Isa. 40:10) Me tia el tekoi  a omeklatk er kid el kmo a Jehovah a mesisiich el King. Nguluusbech er a klou el klisichel el olengeseu, e mesebechakl er a rechedal er a irechar, e melemolem el melisiich e omekerreu er tirke el oumerang er ngii er chelechang.​—Dut. 1:30, 31; Isa. 43:10.

13. (a) Ngoingera el taem e a Jehovah a kmal soal lomelemii a telbilel el mo melisiich er kid? (b) Ngera el telbiil a rullid el mo mesisiich e mo ulterekokl a rengud?

¹³ A Jehovah a melemolem el oltaut er a telbilel el ileakl sel loldechelakl er kid a recherroued er a ledu el kmo: “Ak mo rullau el mo mesisiich.” Ngar er a bebil er a beluu er chelechang, e a recherroued a melasem el merrob er a urered er a berkel a klumech me a lechub a cheldebecheled. Me nguaisei engdi ngdiak el sal suebek a rengud el kirel chouaika el tekoi, e le Jehovah mla meskid a telbiil el melisiich er kid e rullid el mo ulterekokl a rengud. Ngtibir el kmo: “Ngdi diak a klekedall er a mekemad el merruul el mo sebechel tomellau.” (Isa. 54:17) Tia omeklatk er kid er a edei el meklou a ultutelel el tekoi.

14. Ngera me ngdiak el mechas a rengud el kmo a recherrouel a Dios a oldechelakl er kid?

¹⁴ A kot, kid el oltirakl er a Kristus a uchul me a rechad a mo ouketui er kid. (Mt. 10:22) A Jesus a ulemlaoch el kmo a redisaiplo er ngii a mo meringel el modechelakl er a chelsel aika el uriul el sils. (Mt. 24:9; Jn. 15:20) E a ongerung, a ulochel a Isaia a melekoi el kmo a recherroued a diak di bo louketui er kid, e te dirrek el mo ousbech a kakerous el klekedall el omtok er kid. Aika el klekedall a uldimukl er a cheleblad el kora ua leklemerang, me a blulak, me a meringel el odechelakl. (Mt. 5:11) Me a Jehovah a diak bo lorrob er a recherroued me lak lousbech aika el klekedall el omtok er kid. (Efe. 6:12; Och. 12:17) Engdi ngdiak el kired el mo medakt. E ngera uchul?

15-16. (a) Ngera sel ongedei el tekoi el diak el kired el obes er ngii, e mekera Isaia 25:4, 5 a lolisiich er ngii? (b) Ngmekera Isaia 41:11, 12 a losaod er a tekoi el mo duubech el mo er tirke el omtok er kid?

¹⁵ Ka momtab er sel ongedei el tekoi el diak el kired el obes er ngii. A Jehovah a melekoi el  kmo ngdiak a ngii di el “klekedall er a mekemad” el merruul el mo ‘sebechel tomellid.’ Ngdi ua cheuatel el omekerreu er kid er a mesisiich el oiu, a Jehovah a omekerreu er kid er a “re mekngit a tekingir el chad.” (Monguiu er a Isaia 25:4, 5.) A recherroued a kmal diak el sebechir el mo uchul a diak a ulebengelel el telemelled.​—Isa. 65:17.

¹⁶ A Jehovah a dirrek el melisiich er a klaumerang er kid er ngii el oeak sel bo lungil smaod aike el mo duubech el mo er “tirkel olengasech a rengrir” er kid. (Monguiu er a Isaia 41:11, 12.) Me alta recherroued a kmal blak a rengrir el omtok er kid me a lechub e ngkmal mo meringel a mekemad, engdi ngdi osisiu a ulebongel er aika el eru el blekeradel, e le rokui el cherrouir a rechedal a Dios a di “mo mad.”

17-18. (a) Ngmekera omengiuel a Biblia e rullid el lmuut el mo mesisiich el oumerang er a Dios? Mosaod. (b) Ngmekera dolebedebek el kirel a bades er chelecha el rak er a 2019 e ngosukid?

¹⁷ Ngsebeched el smisichii a klaumerang er kid er a Jehovah el oeak sel bo dungil medengelii. E a di ta el rolel e ngsebeched el mo ungil medengelii a Dios a okiu sel bo dekerekikl el menguiu er a Biblia e dolebedebek aike el donguiu. A Biblia a meskid a olechotel el sebeched el ultuil er ngii el mesaod er a rolel e a Jehovah a ulemekerreu er a rechedal er a irechar. Tia el olechotel a oterekeklii a rengud el kmo ngmo omekerreu er kid er chelechang.

¹⁸ Ka molatk er sel kmal ungil omesodel a tekoi el luluusbech er ngii a Isaia el omekesiu er a rolel e a Jehovah a omekerreu er kid. Ngmelekoi el kmo a Jehovah a mengkerengel a sib e a remesiungel a Dios a sib. A Isaia a mesaod el kirel a Jehovah el kmo: “Ng mo chemudel a ngelekel a sib el mo dmak e mo menguoku.” (Isa. 40:11) Me sel bo dolechesuar a mesisiich el chimal a Jehovah el omechull er kid, e kede mo melechesuar a ulekerreu e mo chelellakl a rengud. Me a bo el sebeched el melemolem el chelellakl a rengud alta kede chelebangel a mondai, e a blak a rengul e mellomes a rengul el mesiou a mla ngiltii a Isaia 41:10, NW el mo bades er kid er chelecha el rak er a 2019 el kmo, “Lak el sebek a rengum, e le ngak a Dios er kau.” Molebedebek aika el melisiich el tekoi e le ngmo smisichid sel bo dechelebangel a omelsemai er a ngar medad el klebesei.