1-2. (a) Ngua ngera uldesuel a Jehovah sel lomes er a rebetok el miliol el mo kldibel el kirel a Chedaol Belsoil er a Rubak? (Momes er a siasing er a medal tia el babier.) (b) Ngera kede mo mesaod er tia el suobel?

KA DI molatk er a uldesuel a Jehovah sel lomes er a rebetok el miliol el meliuekl er a beluulechad el mo kldibel el kirel a Chedaol Belsoil er a Rubak. Ngomes er tir el diak lebelkul a kmo ngomes er a ildisir a rechad, ngbai omes er a derta el chad el mlo er tia el ileakl el miting. El ua tiang, ngomes er tirke el blak a rengrir el mei er a bek el rak. El uldimukl er tirke el dertang el mei alta e te chelebangel a meringel el odechelakl. Me a rebebil el tir a diak leblechoel el mei er aike el bebil er a miting, engdi te omes er tia el mora Chedaol Belsoil el kmo ngtekoi el kmal kirir meruul er ngii. A Jehovah a dirrek el medengei el kmo tirke el ketengir el mei er a Chedaol Belsoil a locha semeriar el mo medengei a omesodel tia el miting a uchul me te mlei.

² Ke dungil medengei el kmo a Jehovah a kmal dmeu a rengul sel lomes er a rebetok el mei er a Chedaol Belsoil. (Lk. 22:19) Me nguaisei, engdi a Jehovah a diak lomes er a ildois er a rechad el mei el klou a ultutelel. Ngbai semeriar er sel uchul me te mlei, me a moktek er tir. Me ngar tia el suobel, e kede mo mesaod er tia el klou a ultutelel el ker el kmo: Ngera me ngdiak di debo er a Chedaol Belsoil er a bek el rak e kede dirrek el mo er aike el miting er a bek el sandei el Jehovah a mengetmokl el kirir tirke el betik a rengrir er ngii?

3-4. (a) Ngera me kede mora miting? (b) Ngolechotel a ngerang sel debo er aika el miting? (c) A doltirakl er a 1 Korinth 11:23-26, e ngera uchul me ngkired el mora Chedaol Belsoil?

³ Sel kot el klou a ultutelel el uchul me kede mora miting a ngii el tedebechel a omengull er kid. Kede dirrek el mong e le ngar aika el miting e a Jehovah a olisechakl er kid. A remekedidai a rengrir el  chad a omdasu el kmo ngdiak lousbech er a chad el olisechakl er tir. (3 Jn. 9) Engdi kid a kuk ngodech er tir, e le kede kongei el mosisechakl er a Jehovah me a dirrek el cheldebechel el ngii a ousbech er ngii.​—Isa. 30:20; Jn. 6:45.

⁴ Ngolechotel a klengariourreng er kid, e kede dirrek el kltmokl e kongei el mosisechakl sel debo er aika el miting er kid. Ngar sel kesus er a Chedaol Belsoil er a kodellel a Jesus, e kede mo er tia el ileakl el miting el diak lebelkul a kmo ngerachel el kired el meruul er ngii, ngdirrek kid el loba klengariourreng e olengesenges er a omengelechel er a Jesus el kmo: “Moruul er tiang el kirel a omeltkiu er ngak.” (Monguiu er a 1 Korinth 11:23-26.) Tia el miting a melisiich er a omeltked el kirel a ngar medad el klebesei e dirrek el omeklatk er kid er a klungel a bltkil a rengul a Jehovah el bedulkid. Me nguaisei, engdi a Jehovah a ungil medengei el kmo kede ousbech a omelisiich me a ongelaod el diak di el ta el taem e ngbai betok el taem er a chelsel a bek el rak. Me ngomeskid aika el miting er a bek el sandei e mengelechel er kid el mong. Me a klengariourreng a rullid el mo olengesenges. Me kede mengoit a betok el sikang er a bek el sandei el mengetmokl er kid e dirrek el mo er aika el miting.

5. Ngera uchul me a rengariou a rengrir el chad el kirel a okedongel a Jehovah?

⁵ Bek el rak e a rebetok el ngariou a rengrir el chad a kongei er a okedongel a Jehovah me bo lemosisechakl er ngii. (Isa. 50:4) Ngdmeu a rengrir el mora Chedaol Belsoil, e dirrek el omuchel el ngar aike el kuk bebil er a miting. (Sek. 8:20-23) Me kid el ngar a klemerang el uldimukl er tirke el beches el dirk mle soiseb a oba deurreng el dmak el mukrael e dirrek el mosisechakl er a Jehovah, el ‘ngelseuid e Osebeled.’ (Psa. 40:17) Me ngera lmuut el klou a ultutelel el tekoi el sebeched loldeu a rengud er ngii, e lmuut el klou a belkul, el ua sel dekengei er a okedong el mo mosisechakl er a Jehovah me a Ngelekel el Jesus el ngike el kot el betik er a rengul?​—Mt. 17:5; 18:20; 28:20.

6. Ngmilekerang a klengariourreng e ngosuir a ta el chad el mo kongei el mei er a Chedaol Belsoil?

⁶ Bek el rak, e ngblak a rengud el mengemedaol er a rebetok el chad el mei er a Chedaol Belsoil er a kodellel a Jesus. Me a rebetok el ngariou a rengrir a mo ngmai a klungiolir sel lekengei er tia el okedong. Ka molatk er tiang, a sesei el rak er a uchei, e a ta el chad a ngiluu a invitation el mora Chedaol Belsoil, engdi ngdilu er a odam el ulemsang el kmo ngdiak lsebechel el mei. Me nguaisei, engdi sel kesus er a temel a Chedaol Belsoil, e ngika el odam a kmal kilebetiekl er a lesa ngii el chad el merael me tmuu er a Blil a Ongdibel. Ngika el chad a kmal mlo mechas a rengul er a loutkeu er ngii a rechad, me ngulemuchel el mora miting er a bek el sandei. Ngdi mle edei el taem el mlo diak el mei er a miting er a chelsel sel ongingil el rak. Me ngera ngilsuir el mo soal el mei er a bek el miting? Ngmle ngariou a rengul me ngmle sebechel ngodechii a uldesuel. A uriul e ngike el odam el milengemedaol er ngii a dilu el kmo, “Ngika kot el ngariou a rengul el chad.” Me ngulterekokl a Jehovah el ngilsuir ngii el chad me ngmlo mengull er Ngii, me chelechang e ngmla metecholb el odam er kid.​—2 Sa. 22:28; Jn. 6:44.

7. Ngmekera tekoi el desuub er a miting me a dechuiu er a Biblia e ngosukid el mo ngariou a rengud?

⁷ A tekoi el desuub er aike el miting er kid me a tekoi el dechuiu er a Biblia a sebechel ngosukid el mo ngariou a rengud. Ngar aike el sandei er a uchei er a Chedaol Belsoil, e aike el miting er kid a mo blechoel mesaod el kirel a kerebil a Jesus me a klengariourreng el lulechotii er sera letengetengii a klengar er ngii el olubet el tenget. E ngar aike el sils er a uchei er a Chedaol Belsoil, e kede muchelechel el mo menguiu aike el cheldecheduch er a Biblia el kirel a tekoi el dilubech el mo lmuut er a kodellel me a okisel a Jesus. Me a tekoi el desuub er aika el miting me aike el dechuiu el cheldecheduch er a Biblia a lmuut el dochelii a omereng el saul er kid el mora olubet el tenget el lekiltmeklii a Jesus el kired. Me ngkmal mo soad el oukerebai er tia el klengariourreng er ngii el mo  meruul a soal a Jehovah el mo lmuut er a taem el bo lemeringel er kid.​—Lk. 22:41, 42.

8. Ngmilekera Jesus e ochotii a blekeu?

⁸ Kid a dirrek el melasem el oukerebai er a Jesus el olecholt er a blekeurreng. Ka molatk er a blekeu el lulechotii er a chelsel aike el sils er a uchei er a kodellel. Ngmle ungil medengei el kmo a recherrouel a di kmedu el mo melenguul e mengelebed er ngii e dirrek el mo mekodir. (Mt. 20:17-19) Me nguaisei, engdi ngdi kilengei el mo mad. Me sera lemei sel temel, e ngdilu er a reblak a rengrir el apostol er ngii el ulebengkel el ngar a Gethsemane el kmo: “Bekiis e dorael. Ka mesang, ngkakid ngikel chad el olterau er ngak!” (Mt. 26:36, 46) Me sel taem el remekngit el chad a mlei el me omdechem er ngii, e ngulemakes el beduluchei e di mle ngii el ochotii, e dilu er a resoldau me lebechititerir a rechapostol er ngii me lorael. (Jn. 18:3-8) Tiang a mera el klou el olechotel a blekeurreng er a Jesus! Me chelecha el taem, e a rengellitel el Kristiano me tirke el kuk bebil el sib a melasem el mo oukerebai er a blekeurreng er a Jesus. Lokiu a ngera el rolel?

9. (a) Ngera me kede locha mo ousbech er a blekeurreng e mora miting? (b) Ngmekera kerebai er kid e ngar ngii a lerellii el mora rudam er kid el kelebus el klaumerang er tir a uchul?

⁹ Nglocha mo kired el oba blekeu me bo lsebeched el outekangel a meringel el blekeradel a lsekum ngsoad el mo blechoel el ngar a miting. A rebebil el rudam me a rudos a mora miting alta e te chuarm el klengiterreng me a chelitechetul a rengrir me a lechub e ngsecherir a uchul. A rebebil a oba blekeurreng e mora miting alta e ngkmal mesisiich a ultok er a rechad er a blirir me a lechub e ngkabelment er a beluu. Ka di molatk er sel rolel e a kerebai er kid a ngar ngii a lerellii er a rudam er kid el ngar a kelebus el klaumerang er tir a uchul. (Heb. 13:3) Sel lerenges a chisel a blakerreng er kid el mesiou er a Jehovah er a taem er a omelsemai, e ngmelisiich er tir me te melemolem el oumerang e oba blekeu e dirrek el blak a rengrir. A apostol el Paulus a chirremii a osisiu el tekoi. Sera lengar a kelebus er a Rom, e ngkmal mlo dmeu a rengul er a lerenges el kmo a rudam er ngii a blak a rengrir el mesiou er a Dios. (Fil. 1:3-5, 12-14) Telkib el taem er a uchei me a lechub a uriul er a letobed er a kelebus, e a Paulus a lilechesii a babilengel el mora Rekristiano er a Hebru. Ngar tia el babilengel e ngmilengelechel er tirke el blak a rengrir el Kristiano me bo ‘lolemolem el kaubltikerreng e le ta rengrir’ e lak longoit a miting.​—Heb. 10:24, 25; 13:1.

10-11. (a) Ngkired el mengemedaol er a rua techang el mei er a Chedaol Belsoil? (b) Ngera sel uchul me kede meruul er ngii el losaod er ngii a Efesus 1:7?

¹⁰ Me kede ochotii a blekeurreng er kid sel dongemedaol er a rechedad, me a rechad er a urered, me a retonari er kid el mei er a Chedaol Belsoil. Ngera me kede mengemedaol er tirka el chad? Kede kmal oba klou el omereng el saul el kirel a tekoi el Jehovah me a Jesus a mla kutmokl el kired, me ngdiak el kired el meterob el mengemedaol er a rechad el mei er a Chedaol Belsoil. Ngsoad a bo lesubii a rolel e ngdirrek el sebechir el ngmai a klungiolir er a “krasia” er a Jehovah el lokiu a olubet el tenget.​—Monguiu er a Efesus 1:7; Och. 22:17.

¹¹ Me sel dochotii a blekeurreng er kid el mo  dmak el ngar a miting, e kede dirrek el ochotii a ta er a mekreos el blekeradel, el Dios me a Ngelekel a kmal ungil el olecholt er ngii el ngar a betok el rolel.

12. (a) Ngmekera miting er kid e lmuut el dochelii a bltkil a rengud el mora Jehovah me a Jesus? (b) Ngera ngmelisiich er kid a 2 Korinth 5:14, 15 el mo meruul er ngii el oltirakl er a kerebil a Jesus?

¹² A bltkil a rengud el mora Jehovah me a Jesus a oremelid el mora miting. E a tekoi el desuub er aike el miting a lmuut el dochelii a bltkil a rengud el mora Jehovah me a Ngelekel. Ngar a bek el miting e kede blechoel muklatk el kirel aike el tekoi el bla leruul el kired. (Rom 5:8) Me a Chedaol Belsoil a ileakl el omeklatk er kid el kirel sel dmolech el bltkil a rengrir el kired, el mo lmuut er tirke el dirkak bo lodengelii a klungel a ultutelel a olubet el tenget. Me kid el oba omereng el saul a melasem el oukerebai er a Jesus el okiu a rolel a klengar er kid er a bek el sils. (Monguiu er a 2 Korinth 5:14, 15.) Me a lmuut el tang, a rengud a rullid el mengal mo semeriar el oldanges er a Jehovah el ngii a uchul tia el olubet el tenget. Me a ta er a rolel e ngsebeched el oldanges er ngii a sel doba omereng el saul el onger er a temel a miting er kid.

13. Ngmekera dochotii a delechel a bltkil a rengud el mora Jehovah me a Ngelekel?

¹³ Ngsebeched lochotii a delechel a bltkil a rengud el mora Jehovah me a Ngelekel lokiu sel dekengei el chemoit a ngii di el tekoi el kirir. Kede blechoel el kutmokl a kakerous el tekoi el mo uchul e ngsebeched el mora miting. A betok el ongdibel a rullii a ta er a miting er a ulebengelel a ta er a sils er a temel a ureor, el ngii a taem el oumesingd er kid a mesaul a bedenged. E sel kuk ta er a miting a ngar a temel a weekend el ngii a taem el rechad a olengull. Me a omomdasu, e a Jehovah ngmedengei el kmo kede mo er aika el miting er kid alta e ngmesaul a bedenged? Ngkmal ungil medengei! E a mera er ngii, a cherengel a lorael el mo meringel a tekoi el dechelebangel er ngii, e a Jehovah a mengal mo oba klou el omereng el saul el kirel a bltkil a rengud el dochotii el bedulngii.​—Mk. 12:41-44.

14. Ngmilekera Jesus e ochotii a kot lungil kerebai el kirel a dolecholt er a bltikerreng el bedul a rebebil?

¹⁴ A Jesus a ulechotii a rolel e ngsebeched el ochotii a bltikerreng el oeak sel dolatk er a rebebil. Ngdimlak di lekilengei el mo mad el kirir a redisaiplo er ngii, e ngdirrek el kiliei er a bek el sils el millatk a klungiolir el kuk ngaruchei er a soal. El ua tiang, ngmlo omes er a rultirakl er ngii alta ngmle mesaul a bedengel e dirrek el meringel a  uldesuel. (Lk. 22:39-46) Ngdirrek el mle blechoel kerekikl aike el sebechel mesterir a rechad, el dimlak lolatk el kmo ngera sebechek el ngmai er tir. (Mt. 20:28) Me a lsekum a bltkil a rengud el mora Jehovah me a rudam er kid a mo mesisiich, e kede mora tkurrebab el sebeched el dmedesid me bo lsebeched el mora Chedaol Belsoil er a Rubak, me a dirrek aike el rokui el miting er kid.

15. Kede ileakl el semeriar lolengeseu er a rua techang?

¹⁵ Kid a chedal a di ta el mera el klodam er a Rekristiano, e kede dirrek el dmeu a rengud el mengoit a temed el mengemedaol er a rebeches el chad el me teloi er kid. Me nguaisei, engdi kede lmuut el semeriar lolengeseu er “tirkel bebil er kid el oumerang” el tir a mla mo diak loldingel me a lechub e ngdikea lengar a miting. (Gal. 6:10) Kede ochotii a bltkil a rengud el mo er tir sel dolisiich er tir el mei er a miting er kid, el ileakl a Chedaol Belsoil. Me kede di ua Jehovah me a Jesus, el kmal dmeu a rengud sel desa ta er tirka el chad el lmuut el mei er a Jehovah, el ngii a betik a rengul el Demad e Klekerenged.​—Mt. 18:14.

16. (a) Ngmekera dekasisiich er a delongeled, e ngera ngrullii el kired aika el miting er kid? (b) Ngera me tiaikid el taem a ungil taem el bo dolatk a tekingel a Jesus el ngar er a Johanes 3:16?

¹⁶ Ngar er aika el merael mei el sandei, e dolasem el mengemedaol er a rebetok el mei er a Chedaol Belsoil er sel Ongeim el Ureor, el April 19, 2019. (Momes er a baks el “ Kau, Ke Mo Mengemedaol er Tir?”) Me ngar a chelsel tia el merael mei el rak, e ngsoad el mora tkurrebab el sebeched el kasisiich er a delongeled el okiu sel debo er a bek el miting el Jehovah mla kutmokl el kired. E le chelecha el di lolekeed a ulebongel er tia el mekngit el blekeradel, e ngkmal kired el ngar a miting er kid me lengesukid el mo melemolem el olecholt er a klengariourreng, me a blekeu, me a dirrek el bltikerreng. (1 Th. 5:8-11) Me dedak el ochotii a bltkil a rengud el mora Jehovah me a Ngelekel el kirel a dmolech el bltkil a rengrir el bedulkid!​—Monguiu er a Johanes 3:16.