1-2. A rebetok el chedal a Jehovah, te chelebangel a ngera el blekeradel? E aika ngera ngrullii el mo er tir?

KA MOLATK aika el edei el blekeradel: A ngeasek el odam el toktang a subedii el kmo ngsmecher er a oberaod el secher. A blak a rengul el bekord el 50 me a derengel a rekil el odam, el mla mo diak a urerel e melasem losiik er a urerel e diak lebetik er ngii. A blak a rengul el chudelang el odos el dikea lsebechel remuul a betok er a omesiungel el mora Jehovah.

² A lsekum ke chelebangel a osisiu el blekeradel el uaika el dulsaod, e ke locha mo omdasu el kmo ngdikea ultutelem. A chouaika el blekeradel a sebechel rullau me ngmo diak ledeu a rengum, e mo mekngit a uldesuem el kirem, e dirrek el sebechel mo uchul a mondai er a delongelem kau me a rebebil.

3. Ngua ngera uldesuel a Satan me tirke el oukerebai er ngii el bedul a klengar er a rechad?

³ Tia el beluulechad a di melisiich a uldesuel a Satan el kirel a klengar. Ngii el Satan a dirk melemolem lomes er a rechad el ua lak a ultutelir. Ngkmal mle mekngit a tekingel er sera ledu er a Eva el kmo ngmo mimokl a lsekum ngmo diak lolengesenges er a Dios, alta e ngmle medengei el kmo tiang a mo uchul a kodellel. A Satan a dirrek el dirk omtebechel aika el tekoi er a siobai, me a balatiks me a klechelid er tia el beluulechad. Me ngdiak lemechas a rengud sel domes er a rebetok el chad er a siobai, me a balatiks me a remengeteklel a klechelid el diak lolecholt a omengull el kirel a klengar me a uldesuir a rechad.

4. Ngera kede mo mesaod er tia el suobel?

⁴ Engdi Jehovah a kuk ngodech a blekerdelel, e le ngsoal a bo lungil a uldesued el kired, e dirrek el olengeseu er kid er sel taem el bo decharm er a meringel el blekeradel el sebechel rullid el mo omdasu el kmo ngdiak a ultuteled. (Psa. 136:23; Rom 12:3) Tia el suobel a mo mesaod a rolel e a Jehovah a ngosukid er a chelsel a chouaika el blekeradel: (1) Sel bo desecher, (2) sel bo dechelebangel a ngelsengesel a udoud me a (3) cheluodel el rullid  el mo omdasu el kmo ngdikea ngera el sebeched el remuul er a omesiunged el mora Jehovah. Me a kot e bo dosaod er sel uchul me ngsebechel el mo ulterekokl a rengud el kmo kede mekreos er a osengel a Jehovah.

5. Ngera ochotii el kmo a rechad a lmuut el mekreos er a osengel a Jehovah?

⁵ Alta e kede rruul er a chutem, engdi kede lmuut el mekreos er a di tesaso el chutem. (Gen. 2:7) Me bo dosaod a bebil luchul me kede medengei el kmo kede mekreos er a osengel a Jehovah. Ngmilebid el sebeched loukerebai a blekerdelel. (Gen. 1:27) Me sera lebebid el uaisei, e ngrirellid el kuk ngarbab er a rokui el meues el blebelel, e milskid a ngerecheled el mo mengetmokl er tia el chutem e mengedereder a charm.​—Psa. 8:4-8.

6. Ngera lmuut el ta er a uchul me kede medengei el kmo a Jehovah a omes er a rediak lemecherrungel el chad el mekreos?

⁶ A uriul er a lerebet er a klengit a Adam, e a Jehovah a millemolem el omes er a rechad el mekreos. Ngulemes er tir el kmal mekreos a uchul me ngkilengei er a Ngelekel el Jesus el mo tongetengii a klengar er ngii el ngbetel a kngtid. (1 Jn. 4:9, 10) Me a bo loltaut er a klungiolel tia el olubet, e ngii el Jehovah a mo olekiis er tirke el rokui el mlad el kngtil a Adam a uchul, el tirke el “ungil ma re mekngit.” (Rel. 24:15) Me a Tekingel a ochotii el kmo kede mekreos er a rengul, el diak lultuil er a sechered, me a chelebuled, me a rekid.​—Rel. 10:34, 35.

7. Ngera lmuut el bebil luchul me a remesiungel a Jehovah a oumerang el kmo Ngii a omes er tir el mekreos?

⁷ Ngar ngii a lmuut el bebil luchul me kede oumerang el kmo a Jehovah a omes er kid el mekreos. Ngmla mekedongid el mo er ngii, e dirrek el ungil medengelii a uldesued er a dekot el mo medengelii a ungil chais. (Jn. 6:44) Me sera domuchel lolekeed er kid er a Jehovah, e ngmlo olekeed er ngii er kid. (Jak. 4:8) A Jehovah a dirrek el milengoit a temel me a klisichel el olisechakl er kid, el ochotii el kmo kede mekreos er a osengel. Ngungil medengei el kmo kede uangera el chad er chelechang, e dirrek el medengei el kmo ngsebeched el mo uangera el chad er a uriul. Ngdirrek el mellach er kid e le ngbetik a rengul er kid. (Osi. 3:11, 12) Ngmera el mesisiich el ochotel a kmo a Jehovah a kmal omes er kid el mekreos!

8. Ngoeak a ngera el rolel e a tekoi el medung er a Psalm 18:27-29 a ngar ngii a lerellii er a uldesued el kirel a omelsemai el bo dechelebangel?

⁸ Alta e a rebebil a ulemes er a King David el ua lak a ultutelel el chad, engdi ngii a mle medengei el kmo a Jehovah a betik a rengul e olengeseu er ngii. Tiaikid el klemedengei er a David a ngilsuir me ngmle sebechel loutekangel a meringel el blekeradel el di mle ungil a uldesuel. (2 Sa. 16:5-7) Me sel bo lecharm a uldesued, e a Jehovah a sebechel ngosukid el mo ungil a osenged el kirel a tekoi e dirrek el sebechel ngosukid el mo outekangel a ngii di el omelsemai. (Monguiu er a Psalm 18:27-29.) Me a lsekum a Jehovah a olengeseu er kid, e ngdiak a ngii di el ngerang el sebechel torebengid me lak ledeu a rengud el mesiou er ngii. (Rom 8:31) Me chelechang e bo dosaod a edei el blekeradel el bo dechelebangel e ngkirel diak dobes el kmo a Jehovah a betik a rengul e omes er kid el mekreos.

9. Ngera ngrullii er a uldesued a sechered?

⁹ A sechered a sebechel rullid el mo mechitechut a rengud e omdasu el kmo ngdikea ultuteled. Kede locha mo merur er a rechad sel bo lodengei a chelitechetud me a lechub e ngmocha kired el ultuil er a rebebil el kirel a ngeso. Ngmo lmuut me a lak a medengei chisel a sechered, me kid a di mo merur e le ngdikea lsebeched el remuul a betok el tekoi. Ngar a chelsel a chouaika el blekeradel e a Jehovah a melisiich er kid. Lokiu a ngera el rolel?

10. A doltirakl er a Osisechakl 12:25, e ngera el tekoi a sebechel ngosukid er sel taem el bo desecher?

 ¹⁰ Me sel bo desecher, e “a ungil tekoi” a sebechel smisichid. (Monguiu er a Osisechakl 12:25.) Ngoeak a Tekingel el Biblia, e a Jehovah a mla kutmokl a ungil tekoi el omeklatk er kid el kmo kede mekreos er a osengel el mo lmuut er a taem el bo desecher. (Psa. 31:19; 41:3) Me a lsekum kede menguiu e melemolem el menguiu a mlukreng el tekingel, e ngii el Jehovah a mo ngosukid loutekangel a ngii di el mekngit luldesued el kirel a sechered.

11. Ngoeak a ngera el rolel e a ta el odam a ngiluu a ngelsuil a Jehovah?

¹¹ Ka molatk er a tekoi el dilubech el mora Jorge. Ngdi mle kekerei el chad e mo smecher er a oberaod el rakt, el rirellii el mo omdasu el kmo ngdikea ultutelel. Ngmelekoi el kmo: “Ngkmal dimlak kltmokl el kirel tia el secher me sel rur el blo kcheremii el tia el secher a uchul. Me a cherengel a taem el lorael el mo mechitechut a bedengek, e ak mlo omdasu er a rolel e ngmengodech a klengar er ngak. Ngkmal mlo mechitechut a renguk me ak ullengit a ngeso er a Jehovah.” Me ngmilekera Jehovah er a lolengeseu er ngii? A Jorge a dmu el kmo: “Ngmle meringel er ngak el melatk a tekoi el kemanget el taem a uchul me te millisiich er ngak el mo menguiu a mekedeb el bades er a Psalm el mesaod el kirel a ulekerreuil a Jehovah el mora remesiungel. Me ak milenguiu aika el bades er a bek el sils, me ngmlo sebechek el metik a ongelaod me a omelisiich. Me a cherengel a taem, e a rechad a mlo mtebengii el kmo ngungil a renguk. Te dirrek el melekoi el kmo a ungil uldesuek a dirrek el melisiich er tir. Seikid e ak mlo mtebengii el kmo a Jehovah a mla onger a nglunguchek! Ngmla ngosukak el mo ngodechii a uldesuek el kirek. Me ak mlo omuchel el melatk aike el Tekingel el kirel a osengel me a uldesuel el bedul ngak alta e ak smecher.”

12. Ngera sebechem meruul me bo mnguu a ngelsuil a Jehovah a lsekum ke smecher?

 ¹² Me a lsekum ke chuarm el secher a uchul, e bo lulterekokl a rengum el kmo a Jehovah a ungil medengei a ringelem. Molengit er ngii me lengesukau el mo ungil a uldesuem el kirel a tekoi el mcharm er ngii. E mousbech er a Biblia el melisiich er kau lousbech a tekoi el bla leketmokl a Jehovah el kirem. Momtab a bades el ochotii a delechel a uldesuel a Jehovah el bedul a remesiungel. Sel moruul uaisei, e ke mo mesang el kmo a Jehovah a kmal ungil omerellel el bedul tirke el rokui el blak a rengrir el mesiou er ngii.​—Psa. 84:11.

13. Ngmo uangera uldesuel a bdelul a telungalek a lsekum ngmo diak a urerel?

¹³ A bek el bdelul a telungalek a soal smiik aike lousbech a telungalek er ngii. Engdi ngmo uangera uldasu a lsekum a odam a mo diak a urerel, el diak el telemellel a uchul. Me ngmelasem losiik er a tang engdi ngmeringel er ngii el metik er ngii. Ngar a chelsel chouaika el blekeradel e nglocha mo omdasu el kmo ngdikea ultutelel. Me ngmekera e mo ulterekokl a rengul er a telbilel a Jehovah?

14. Ngera uchul me a Jehovah a di blechoel loltaut a telbilel?

¹⁴ A Jehovah a di blechoel loltaut a telbilel. (Jos. 21:45; 23:14) Ngbetok a ungil luchul e ngmeruul er tiang. A kot, ngmeruul er ngii el kirel a ngklel, me a lechub a chisel. A Jehovah a mla tibir el kmo ngmo omekerreu er a reblak a rengrir el mesiungel, e medengei el kmo ngerechelel loltaut er tia el telbilel. (Psa. 31:1-3) Me a lmuut el tang, a Jehovah a medengei el kmo ngmo mekngit a rengud a lsekum ngdiak lomekerreu er a rokui el chedal a telungalek er ngii. Ngmla tibir el mo omesterir a remesiungel aike el lousbech er a klechad me a klereng er tir, e diak a ngii di el ngerang el sebechel  torebengii me lak lotutii tia el telbilel!​—Mt. 6:30-33; 24:45.

15. (a) Ngera el omelsemai a blo lecharm er ngii a Rekristiano er a irechar? (b) A Psalm 37:18, 19, ngoterekokl a rengud el kirel a ngera el tekoi?

¹⁵ Sel dolatk er a uchul me a Jehovah di blechoel el oltaut a telbilel, e ngmo ulterekokl a rengud el kmo ngmo ngosukid el mo lmuut er a taem el bo lak a ududed. Ka molatk a omeruul el dilubech el mora Rekristiano er a irechar. Sel taem er a lebo er ngii a meringel el odechelakl el mora ongdibel er a Jerusalem, e a “rokui el oumerang a di ulebriid . . . e ngdi re apostol a dimlak.” (Rel. 8:1) Ka di molatk, tiang a klou el chelebuul! A Rekristiano a urriid a blirir me a dirrek el siobai er tir. Me nguaisei, engdi a Jehovah a dimlak a ta el bo lecheroid er tir, me tir a di millemolem el dmeu a rengrir. (Rel. 8:4; Heb. 13:5, 6; Jak. 1:2, 3) A Jehovah a ngilsuterir tirka el blak a rengrir el Kristiano, me ngdirrek el mo olengeseu er kid.​—Monguiu er a Psalm 37:18, 19.

16. Ngera el tekoi a rullid el mo omdasu el kmo a omengull er kid a dikea ultutelel er a osengel a Jehovah?

¹⁶ Sel dorael el mo mechuodel, e kede locha mo omdasu el kmo ngdikea ngera el sebeched el msa Jehovah. A King David a dirrek el mle suebek a rengul el kirel tia el tekoi er sera lechudelang. (Psa. 71:9) Me ngoeak a ngera el rolel e a Jehovah a sebechel ngosukid?

17. Ngera sebeched el suubii er a tekoi el dilubech el mora Jheri?

¹⁷ Ka molatk er a tekoi el dilubech el mora odos er kid el Jheri. Ngmlokedong el mora miting el kirel a maintenance training el ngar a Blil a Ongdibel, engdi ngmle chetil el mong. Ngdilu el kmo: “Ak chudelang, e melakl dil e diak a ngera el kmeduch er ngii. Ngdiak a ultutelek.” Sel kesus er a uchei er tia el training, e ngmilluluuch el ouchais er a Jehovah aike el rokui el  ngar a rengul. Me sera lebo er a Blil a Ongdibel e ngdirk millatk el kmo ngdiak a ultutelel el lebong. Engdi ngar sel prokuram, e a ta er tirke el milengedecheduch, a millisiich er a tekoi el kmo sel dekengei el mosisechakl er a Jehovah, seikid a klou a ultutelel. Me a Jheri a melekoi el kmo: “A kumdasu, ‘e tiaikid a kmeduch er ngii el tekoi!’ Ak lilangel e le ak mlo medengei el kmo a Jehovah a onger er a nglunguchek. Ngii a olterekokl er a renguk el kmo ngar ngii a sebechek el rullii e Ngii a kongei el olisechakl er ngak!” Me sel lolatk er tia el tekoi, e ngdmu el kmo: “Ak mlo soiseb er tia el training el bekikl, e mechitechut a renguk, e mekngit a uldesuek. Engdi sera ktobed, e ngulterekokl a renguk e mla mo mesisiich e dirrek el melechesukak el ngar ngii a ultutelek!”

18. Ngoeak a ngera el rolel e a Biblia a ochotii el kmo a Jehovah a dirk melemolem lomes er a omengull er kid el mekreos alta kede chudelang?

¹⁸ Me a cherengel a taem el dorael el mo chuodel, me ngdirk ulterekokl a rengud el kmo ngdirk ngar ngii a sebeched el remuul el mora Jehovah. (Psa. 92:12-15) A Jesus a ullisechakl el kmo mo lmuut me a lsekum kede omes aike el sebeched el ua lemekekerei el tekoi, engdi a Jehovah a omes el kmal mekreos. (Lk. 21:2-4) Me bo lultaut a osengem er aike el sebechem el meruul. Ngsebechem el ouchais el kirel a Jehovah, e meluluuch el kirir a rudam er kau, e dirrek el melisiich er a rebebil me lolemolem el blak a rengrir. A Jehovah a omes er kau el kldemel er a ureor, el diak lultuil er aike el sebechem el meruul, e ngbai kau el kongei el olengesenges er ngii.​—1 Ko. 3:5-9.

19. A Rom 8:38, 39, ngsmisichid el mo oumerang er a ngera el tekoi?

¹⁹ Kede kmal mereng a saul el mlo sebeched el mengull er a Jehovah, el ngii a Dios el omes er tirke el mesiou er ngii el mekreos! Ngmilebid el mo meruul a soal, e a mera el omengull a uchul me ngar ngii a belkul a klengar er kid. (Och. 4:11) Me alta e a beluulechad a omes er kid el ua lak a ultuteled, engdi a Jehovah a kmal ngodech a osengel el bedulkid. (Heb. 11:16, 38) Me sel bo lemechitechut a rengud, el secher me a chelebuul me a lechub e ngcheluodel, e lak dobes el kmo ngdiak a ngii di el tekoi el sebechel oridid er sel bltkil a rengul ngika el Demad el ngar a eanged.​—Monguiu er a Rom 8:38, 39.