1. Ngera ngrirellii el mora ta el kekerei chad a cheldecheduch el tilobed er a klou el ongdibel er a 1935?

NGIKA el kekerei el chad a mle 18 a rekil er sel taem er a lemetecholb er a 1926. A rechad er a blil a mle Resioning er a Jehovah, el seikid el taem e te okedongall el Remesuub er a Biblia. Tirka teim el ochad, el tedei el sechal me a teru el redil, e tirka mlukeroul el mo mesiou er a Jehovah e oukerebai er a Jesus Kristus. Me ngika di ua Remesuub er a Biblia er seikid el taem el milenga er a blauang e millim er a bilong er a bek el temel a Chedaol Belsoil er a Rubak. Me nguaisei, engdi a cheldecheduch el “The Great Multitude” a ngildechii a klengar er ngii. Tia el cheldecheduch a lultebedii a J.  F.  Rutherford er a 1935 er sel klou el ongdibel el mla er ngii er a Washington, D.C., U.S.A. Ngera el tekoi a blo lodengelii a Remesuub er a Biblia er tia el klou el ongdibel?

2. A Odam el Rutherford ngsilodii a ngera el beches el klemedengei er a cheldechedechal?

² A Odam el Rutherford a silodii er a cheldechedechal el kmo te rua techang a rullii a “kloul ildois” (King James Version), me a lechub e ng “kloul seked” el losaod er ngii a Ocholt 7:9. Uchei er tiakid el taem, e te ulemdasu el kmo a kloul seked a tirke el chad el mora eanged engdi te dimlak loba osisiu el blakerreng er a rengellitel. Me a Odam el Rutherford a uluusbech a Bades el smodii el kmo, a kloul seked a diak lebora eanged, te bai rekuk  bebil el sib * er a Kristus el tir a mo suobel er a “kloul ringel” e mo kiei el diak a ulebengelel el ngar tia el chutem. (Och. 7:14, BT) A Jesus a tilbir el kmo: “E ngar er ngii a rekuk bebil el sib er ngak, el diak el bebil er aikang, aikei me ngdirrek el kirek el mengetikaik, me te mo orrenges er a ngerek, me ngmo ta el delebechel el obengkel a ta el mengkar.” (Jn. 10:16, NW) Me tirka melutk el kirir a reblak a rengrir el Sioning er a Jehovah, el tir oba omelatk el mo kiei er a Baradis el chutem el mo cherechar. (Mt. 25:31-33, 46) Me bo desa el kmo ngmekera tia el beches el klemedengei e ngmla ngmodech a klengar er a rebetok el chedal a Jehovah, el uldimukl er ngika el 18 a rekil el odam.​—Psa. 97:11; Osi. 4:18.

3-4. Ngar sel klou el ongdibel er a 1935, e a rebetok el telael te mlo medengelii a ngerang el kirel omeltkir, e ngera uchul?

³ A mle ileakl el tekoi el dilubech er tia el klou el ongdibel, a sel taem el ngike el milengedecheduch a uleker er a seked el kmo: “Ngsebechir tirke el rokui loba omelatk el di kiei er tia el chutem el mo dechor?” Me a doltirakl a tekingel a ta er tirke el mla er isei, e a ruumesingd er tirke el 20,000 el chad a mlo dechor. Isei e a Odam el Rutherford a dilu el kmo: “Mesang! A kloul ildois!” Me a rechad a mlo klou a ngerir el omrotech. Tirka el mlo dechor a mlo medengei el kmo te dimlak el mengilt el mo nguu a klengar er a eanged. Te mle medengei el kmo te dimlak lemengilt lokiu a chedaol reng er a Dios. A ongingil sils, e a re 840 el chad a miltecholb el Sioning er a Jehovah, e a ruumesingd er tir a rekuk bebil el sib.

⁴ Uriul er tia el cheldecheduch, e ngike el kekerei el chad el dulsaod er ngii me a rebetok el telael a mlo diak longa blauang e lolim a bilong er a temel a Chedaol Belsoil er a Rubak. Me a rebetok a oba uldesuel a ta er a ngariou a rengul el odam el dilu el kmo: “A Chedaol Belsoil er a 1935 a mle ulebongel el taem el kulai aike el klekedall. Ak miltebengii el kmo, a Jehovah dimlak lengiltak lokiu a chedaol reng el mo nguu a klengar er a eanged, ak bai oba omelatk el mo kiei el mo cherechar el ngar tia el chutem e mo olengeseu el meruul er ngii el mo baradis.” (Rom 8:16, 17; 2 Ko. 1:21, 22) Seikid el taem el mei er chelechang, e a ildisel a kloul seked a di meleketek, e tir a oureor lobengterir a rengellitel.

5. Ngua ngera uldesuel a Jehovah el kirir tirke el mla mo diak lolai a klekedall er a Chedaol Belsoil?

⁵ Ngua ngera uldesuel a Jehovah el kirir tirke el uriul er a 1935 e te mlo diak lolai a klekedall er a Chedaol Belsoil? E kuk mekerang a lsekum a telecholb el Sioning a oumerang el kmo, ngkirel melai a klekedall er a Chedaol Belsoil er a Rubak engdi a uriul e ngmlo medengei el kmo, ngdimlak el mengilt loeak a chedaol reng? (1 Ko. 11:28) A rebebil a millai aika el klekedall e le ngdimlak lemelemalt a klemedengei er tir el kirel omelatk el lobang. Me nguaisei, engdi a lsekum e te kongei el kmo te mle cheleuid, e mo diak lolai, e melemolem el blak a rengrir el mesiou er a Jehovah, e a Jehovah a mo kongei er tir el uldimukl er a rekuk bebil el sib. Me alta te diak longa blauang e lolim a bilong, engdi te dirk mora Chedaol Belsoil e le tir loba klou el omereng el saul el kirel aike el bla leruul a Jehovah me a Jesus el kirir.

6. A Jesus ngdilu er a rechanghel el mo mekerang?

⁶ Me chelecha lolekeda kloul ringel, e ngkmal mo melisiich er kid a bo de dmolech el mesaod a lolekoi a 7 el bliongel er a Ocholt el kirir a rengellitel el Kristiano me a kloul seked er a rekuk bebil el sib. A Jesus a dilu er tirke el teua el anghel me lorers aike el eua el uchul a eolt me lak loloko er a beluulechad. Ngdiak el kirir el meloko er a beluulechad el dimerekmo a rokui el ngellitel a lengai olengchelir er a Jehovah. (Och. 7:1-4) A rengellitel el odam er a Kristus a mo ngmai omeksulir el kirel a blakerreng er tir, sel bo leking e prist lobengkel el ngar er a eanged. (Och. 20:6) Seikid e a telungalek er a Dios el ngar er a eanged a mo dmeu a rengrir el meseterir a re 144,000 el nguu a omeksulir.

7. El ua lolekoi a Ocholt 7:9, 10, a Johanes ngmilseterir a rua techang er a ues, e ngera te mirruul er ngii? (Momes er a siasing er a medal tia el babier.)

⁷ A uriul er a Johanes a louchais el kirir a re 144,000 el king e prist, e ngmilsa ta er a klebokel el ues, el ngii a “kloul seked” er a rechad el silobel er a Armakedon. Tirka diak el ua tirke el 144,000 e le te lmuut el betok e diak lulterekokl a ildisir. (Monguiu er a Ocholt 7:9, 10.) Te “bliull a becheleleu el bail” e tia ochotii el kmo, te diak ‘le chelsechusem’ er a beluulechad er a Satan e mla lomelemii a blakerreng er tir el mora Dios me a Kristus. (Jak. 1:27, BT) Te klou a ngerir el melekoi el kmo te mla nguu a osobel el Jehovah me a Jesus el Ngelekel a Sib er a Dios, a uchul. Te dirrek el olab a chucher el olechotel a kmo, te dmeu a rengrir el kongei er a Jesus el telutk el King er a Jehovah.​—Momekesiu er a Johanes 12:12, 13.

8. A Ocholt 7:11, 12, ngngera ngouchais er kid el kirel a telungalek er a Jehovah er a eanged?

⁸ Monguiu er a Ocholt 7:11, 12. Ngera dilubech er a eanged er a leseterir a kloul seked? A Johanes a milsa telungalek er a Jehovah er a eanged el dmeu a rengrir e oldanges er a Dios. Tia el telungalek er a Jehovah er a eanged a mo dmeu a rengrir el mesa otutel tia el ues er sel taem el kloul seked a suobel er a kloul ringel.

9. A doltirakl er a Ocholt 7:13-15, BT e ngera ngmeruul er ngii a kloul seked er chelecha el taem?

⁹ Monguiu er a Ocholt 7:13-15, BT. * A Johanes a milluches el kmo a kloul seked a “sililek a bilir ra rsechel a Ngelekel a Sib el mo becheleleu.” Tia belkul a kmo, ngklikiid a ukltkir e tir a melemalt er a osengel a Jehovah. (Isa. 1:18) Me te telecholb el Kristiano el mesisiich a klaumerang er tir er a tengetengel a Jesus e ngar ngii a deleuill er tir el obengkel a Jehovah. (Jn. 3:36; 1 Pe. 3:21) Sei a uchul me ngsebechir el dechor er a medal a kingellel a Dios e “mesiou er ngii er a llomes ma klebesei” el ngar tia el chutem. Me chelecha el taem e te blak a rengrir el meruul er a ureor er a berkel a klumech er a Renged e meruul er a remo disaiplo, e le te mla nguu a Rengedel a Dios el mo kot el klou a ultutelel tekoi er a klengar er tir.​—Mt. 6:33; 24:14; 28:19, 20.

10. A kloul seked ngulterekokl a rengrir er a ngerang, e ngera el telbiil a bo lesa otutel?

¹⁰ A kloul seked el mo suobel er a kloul ringel a ulterekokl a rengrir el kmo, a Dios a mo omekerreu er tir e le ‘ngikal dengchokl er a kingall a mo mesebechakl er tir, e di ngar bita er tir.’ Me a telbiil el lulengiil er ngii a rekuk bebil el sib a mo tmaut el kmo: “[A Dios a] mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel.”​—Och. 21:3, 4.

11-12. (a) A doltirakl er a Ocholt 7:16, 17, e ngera el klengeltengat a ngar ngii el kirel a kloul seked? (b) Ngera sebechir a rekuk bebil el sib el meruul er ngii er a Chedaol Belsoil, e ngera uchul?

 ¹¹ Monguiu er a Ocholt 7:16, 17. Chelecha el taem, e a rebebil chedal a Jehovah a chuarm er a klengerenger el keizai er a beluu me a lechub e nguldikel me a mekemad a uchul. A rekuk bebil a kelebus el klaumerang er tir a uchul. Me nguaisei, engdi a kloul seked a dmeu a rengrir e le te medengei el kmo sel lesobel er a telemellel tia el mekngit el blekeradel, e ngmo diak a ngelsengesel a kall er a klechad me a klereng. Me a Jehovah sel bo lolekngemed er tia el mekngit el blekeradel, e a kloul seked a mo mukerreu er a ngesechel a rengul, el ngii a ua “kleald el mo melul” aika el renged. A uriul er a kloul ringel, e a Jesus a mo omekrael er tirke el suobel el mora “madedok el ralm er a [diak a ulebengelel el] klengar.” Ka di molatk er tiang, a kloul seked oba mengasireng el omelatk. Te betok el biliol el chad a mla kiei er tia el chutem engdi ngdi tirkang a diak a ta el bo lemad!​—Jn. 11:26.

¹² Me a rekuk bebil el sib a oba omereng el saul el mora Jehovah me a Jesus el kirel a mengasireng el omelatk el lobang! Te dimlak lemengilt el mo kiei er a eanged, engdi te mekreos er a osengel a Jehovah. Me a rekuk bebil el sib me a rengellitel a sebechir loldanges er a Dios me a Kristus. A ta er a rolel a loruul er tiang, a oeak sel lebora Chedaol Belsoil er a Rubak.

13-14. Ngera uchul me a rokui el chad a kirir el mora Chedaol Belsoil?

¹³ Ngar aika el dirk mlo merek el rak, e ngar er a chelsir a rederta el 1,000 el chad el mora Chedaol Belsoil e ngdi ta el chad a melai er a blauang me a bilong. A oumesingd el ongdibel er a beluulechad el rokir a diak a chad er ngii el mo menga er a blauang e melim er a bilong er a Chedaol Belsoil. Me a klou el ildois er a rechad el mora Chedaol Belsoil a oba omelatk el mo kiei er tia el chutem. Ngera uchul me te mora Chedaol Belsoil er a Rubak? Ngdi osisiu el uchul me a rechad a mora merengel a chebechiielel a sechelirir. Te mong e le ngsorir lochotii a bltkil a rengrir el mo er tirka el mo bechiil. Me a rekuk bebil el sib a mora Chedaol Belsoil e le ngsorir lochotii a bltkil a rengrir el mora Kristus me a rengellitel. Te dirrek el  mong lolecholt er a omereng el saul el kirel a tengetengel a Jesus, el ngii el tenget a uchul me ngsebechir el mo kiei er tia el chutem el mo cherechar.

¹⁴ A dirrek el ta er a klou a ultutelel luchul me a rekuk bebil el sib a mora Chedaol Belsoil, a tir lolengesenges a tekingel a Jesus. A Jesus er a lerellii tia el ileakl el belsoil el lobengterir a reblak a rengrir el apostol er ngii e ngdilu er tir el kmo: “Moruul er tiang el kirel a omeltkiu er ngak.” (1 Ko. 11:23-26) Me te melemolem el meruul er tiang el dimerekmo bo lak a ta el ngellitel er tia el chutem. Te dirrek el mengemedaol er a rokui el chad el me obengterir.

15. Ngera sebeched el meruul loldanges er a Dios me a Kristus er a Chedaol Belsoil?

¹⁵ Sel debora Chedaol Belsoil e ngngar ngii a techelled el mo oldanges er a Dios me a Kristus loeak a chelitakl me a nglunguuch. Me a dai er a cheldecheduch er chelecha el rak a, “Moba Omereng el Saul el Kirel Aike el Bla Leruul a Dios me a Kristus el Kirem!” Tia mo kilungii a omereng el saul er kid el kirel a Jehovah me a Kristus. Sel lorrael aike el klekedall er a Chedaol Belsoil e kede muklatk er aike el tekoi el lomekesiu, el bedengel me a rsechel a Jesus. Ngomeklatk er kid el kmo a Jehovah a milecherei a Ngelekel el mo mad me bo el sebeched el nguu a klengar. (Mt. 20:28) Me a rokui el chad el betik a rengrir er ngika el Demad el ngar er a eanged me a Ngelekel a sorir el mora Chedaol Belsoil.

16. Ngoeak a ngera el rolel e a rengellitel me a rekuk bebil el sib a di osisiu?

¹⁶ Me a klekakerous er a rengellitel me a rekuk bebil el sib a diak el tang a kuk mekreos er a tang er osengel a Jehovah. Kede rokui el mekreos er osengel. Ngika kilkedir a osisiu el char el kired el rokui, el ngii a klengar er a betik er a rengul Ngelekel. A tekoi el rulleterir el mo kakerous a omelatk el lobang. Te kirir el lomelemii a blakerreng er tir el mora Dios me a Kristus. (Psa. 31:23) Lak dobes el kmo a chedaol reng er a Dios a osisiu a klisichel el mei er kid el rokui. Tia belkul a kmo a Jehovah omsa chedaol reng er a derta el chad loltirakl er aike el lousbech.

17. A rengellitel ngngera te omes el beduluchei el kirel?

¹⁷ A rengellitel el Kristiano a diak lemechell loba omelatk el mo kiei er a eanged. A Dios a kirel dolemii tia el omelatk er a rengrir. Me te melatk el kirel a omeltkir, meluluuch el kirel, e kmal semeriar el mo nguu. Te diak lodengei el kmo ngmo uangera bedengir er a eanged. (Fil. 3:20, 21; 1 Jn. 3:2) Me nguaisei, engdi te omes el beduluchei el mo mesa Jehovah, Jesus, rechanghel, me tirke el bebil er a ngellitel. Te kmal semeriar el mo obengterir er a Renged el ngar er a eanged.

18. A rekuk bebil el sib te omes el beduluchei el kirel a ngerang?

 ¹⁸ A rekuk bebil el sib a omes el beduluchei el mo kiei er tia el chutem el mo cherechar. Tia urungulir a rokui el chad. (Oli. 3:11) Te omes el beduluchei el mo er sel taem el bo lerellii tia el chutem el mo baradis. Te oureng er sel taem el bo lsebechir lomekedechor a blirir, meruul a sersir, e omekeroul er a rengelekir el cherrungel a klisichel a bedengir. (Isa. 65:21-23) Te omes el beduluchei el mo er sel taem el sebechir el mesarech er tia el chutem el omes a rois, oreomel, me a daob e losuub el kirel a rokui el blebelel a Jehovah. E a ngaruchei er ngii, ngdmeu a rengrir el medengei el kmo a deleuill er tir me a Jehovah a di merael el mo mesisiich.

19. A Chedaol Belsoil ngmesterir a rederta el chad a ngera el techall, e mo er ngii er a oingerang?

¹⁹ A Jehovah mla mesterir a derta el mesiungel a kmal ungil omelatk el kirel a ngar mederir el klebesei. (Jer. 29:11) A Chedaol Belsoil er a kodellel a Kristus a mesterir a rederta er kid a klou el techall el mo oldanges er a Dios me a Kristus el kirel aike el tekoi el bla leruul me bo el sebechir el loldeu a rengrir er a klengar el mo cherechar. A Chedaol Belsoil a kot el klou a ultutelel miting el longedaol er ngii a Rekristiano er a bek el rak. Chelecha el rak e ngmo er ngii er a Sebadong, el March 27, 2021. Te betok a kiei aike el basio el sebechir el mimokl el mo er tia el klou a ultutelel miting. A rekuk bebil a mong alta te chelebangel a ultok. Me a rebebil a mo mengedaol er ngii er a kelebus. Me a Jehovah, Jesus, me a telungalek er a Dios el ngar er a eanged sel lomes e bo lsebechir a rederta el chad, group, me a ongdibel el mo er ngii a kmal ungil Chedaol Belsoil er tir!