NGAR er a Bible Lands Museum el ngar er a Jerusalem, e kede metik er a bad er a 700-600 B.C.E. el llechukl a tekoi er ngii. Te miltik er tia el bad er a chelsel a debull el ngii a diak el cheroid er a Hebron er a beluu er a Israel. A tekoi el llechukl er ngii a kmo: “Dellebeakl lebora Hagaf el ngelekel a Hagav, el mlara Yahweh Sabaot.” Ngmekera ika el tekoi e melisiich aike el lolekoi a Biblia? Ngochotii el kmo, ngar er a taem er a Biblia e a ngklel a Dios el Jehovah el llechukl el YHWH, a ble lodengelii a rechad me tir a uluusbech er ngii er a bek el taem. Me a lmuut kung, ngar ngii a bebil llechukl el debetik er a chelsel aika el debull el ochotii el kmo, tirke el mlo kebetech er aika el debull e ousbech el omart er tir a mle blechoel el meluches lousbech er a ngklel a Dios e dirrek el milluches a ngklir a rechad el mlengai er a ngklel a Dios er aika el bad.

A Dr. Rachel Nabulsi er a University er a Georgia a melekoi el kirel aika el llechukl el kmo: “Tir el mle blechoel el lousbech er a YHWH a klou a ultutelel. . . . Tia ochotii el kmo, a usbechel a YHWH a kmal mle klou ultutelel er a klengar er a rechad er a Israel me a Juda er a bek el sils.” Tia oltirakl er a Biblia, el sebeched el metik er a ngklel a Dios el YHWH el llechukl er ngii el betok el telael el taem. Oumesingd el taem e a ngklir a rechad el llechukl er a Biblia a mengai er tia el chedaol ngakl.

A tekoi el “Yahweh Sabaot,” el llechukl er tia el bad a belkul a kmo, “Jehovah el olab a bek el klisiich.” Tia ochotii el kmo, ngar er a taem er a Biblia e te dimlak di lousbech er a ngklel a Dios, te dirrek el mle blechoel el ousbech er tia el tekoi. Tia oltirakl er a Biblia el ngii ousbech er a “Jehovah el olab a bek el klisiich,” el 283 el taem er aike el bades el tekoi er a Hebru, el oumesingd ike el lulluches a Isaia, Jeremia, me a Sekaria.