1. Nglocha ngera el ker a bo loker er ngii a rebebil, el ua King David?

KEDE rokui el soad a lebudech a klengar er kid. Ngdiak a chad el soal di suebek a rengul. Engdi a lebebil er a taem e nglocha mo suebek a rengud. A rebebil mesiungel a Jehovah a locha mo oker er a osisiu el ker el luleker er ngii a King David el kmo: “Ng mo oingerang el di lecharm a renguk er a ringel, e ua klteketel a ngerang el di kngar a klengiterreng er a bek el sils?”​—Psa. 13:2.

2. Ngera kede mo mesaod er tia el suobel?

² Me alta kede rokui el mo suebek a rengud a lebebil er a taem me nguaisei engdi ngsebeched el chollakl a rengud. Ngar tia el suobel, e kede mo mesaod a bebil tekoi el sebechel rullid el mo suebek a rengud. E mo mesaod a elolem el tekoi el sebeched el meruul el chollakl a rengud sel bo dechelebangel a mondai.

3. Ngera el orrimel a dechelebangel, e uangera klisiched er ngii?

³ Nglocha diak a klisiched er aike el tekoi el rullid el mo suebek a rengud. El ua tiang, ngdiak a klisiched er a cheral a kall, bail, me a blai el di merael mo meringel a cheral. Ngdiak a klisiched er a ildisel a omengesuseu er a rechad er a urered me tirke el dedak el ngar er a skuul el melasem el meruul er kid el mo mengeblad me a lechub e kede mora deleboes. E diak el sebeched torob a delengerenger el duubech er a basio el dekiei er ngii. Me kede chelebangel aika el omelsemai e le kede kiei er a beluulechad el oumesingd el chad a diak loltirakl a omellach er a Biblia. Ngdirrek el Satan el chelid er tia el beluulechad a medengei  el kmo a rebebil a mo mechei “a sebekreng er tial klengar” me ngrulleterir el mo diak losiou er a Jehovah. (Mt. 13:22; 1 Jn. 5:19) Tiaikid a uchul me tia el beluulechad a mui er a tekoi el rullid el mo suebek a rengud!

4. Ngera sebechel duubech a lsekum ngkmal mo suebek a rengud er a mondai er kid?

⁴ Ngsebechel kmal mo suebek a rengud me kede di melatk a mondai er kid. El ua tiang, kede locha mo bekikl el kmo a ududed a ngesonges er aike el dousbech me a lechub e kede locha mo smecher el luchul me ngdiak el sebeched el mo oureor me a lechub e kede oridii a urered. Ngdirrek el sebeched el mo bekikl el kmo ngdiak bo delemelemii a blakerreng er kid sel bo demekesuseu el mo melemall a llechul a Dios. Ngdi kmedung e a Satan a mo ousbech er tirke el oltirakl er ngii el mo oldechelakl er a rechedal a Dios, me kede locha bekikl el kmo kede mo mekerang er seikid el taem. Me kede locha mo melatk el kmo, ‘Ngmekngit a lsebek a renguk el kirel aika el tekoi?’

5. Ngera mle belkul a tekingel a Jesus er a ledu el kmo: “Lak el sebek a rengmiu”?

⁵ Kede medengei el kmo a Jesus a dilu er a rultirakl er ngii el kmo: “Lak el sebek a rengmiu.” (Mt. 6:25) Tia ngbelkul a kmo, ngdiak el kirel mo suebek a rengud er a ngii di el ngerang? Ngdiak leuaisei! A rebebil er a reblak a rengrir el mesiungel a Jehovah er a irechar a mlo suebek a rengrir engdi te millemolem loba kengei er a Jehovah. * (1 Ki. 19:4; Psa. 6:3) A Jesus a bai olterekokl a rengud. Ngdiak el soal a lesal mo suebek a rengud er a tekoi er tia el klengar me bo luchul e lak dungil kutmeklii a omesiunged el mora Dios. Me a leuaisei, ngera sebeched el meruul el chollakl a rengud?​—Momes er a baks el “ Rolel Omoruul er Ngii.”

6. A doltirakl er a Filipi 4:6, 7, e ngera sebechel chollakl a rengud?

⁶ (1) Bo blechoel meluluuch. A Rekristiano el chelebangel a orrimel a sebechir el mo mechelaod a rengrir sel loluluuch el mora Jehovah. (1 Pe. 5:7) A Jehovah sebechel longer er a nglunguchem sel lebeskau a “budech er a Dios, el diak el sebechel a chad el mo cherrungel el medengelii.” (Monguiu er a Filipi 4:6, 7.) Ngmo meskau tia el budech lokiu a chedaol reng er ngii.​—Gal. 5:22.

7. Ngera kired el melatk er ngii sel doluluuch el mora Dios?

⁷ Sel moluluuch el mora Jehovah, e mouchais er ngii aike el rokui el ngar er a rengum. Mouchais er ngii er a mondai el mchelebangel er ngii me a uldesuem el kirel. A lsekum e ngar ngii a semecheklel, e molengit er ngii me lebeskau a llomeserreng me bo modengelii a kirem el meruul er ngii e dirrek el beskau a klisiich el mo rullii. Engdi a lsekum e ngdiak a ngera el sebechem el rullii, e molengit er ngii me lengesukau me lak el sal mo suebek a rengum el kirel. Sel bo lebleketakl a tekoi el molengit, e ngmo sebechem el mes a nger er a Jehovah el kirel. A lsekum e ngdiak lemereched el monger a nglunguchem, e lak meterob. A Jehovah a diak di longerechir er kid el mo bleketakl a nglunguched ngdirrek el soal a lak demekimd el meluluuch el kirel.​—Lk. 11:8-10.

8. Ngera kirel uldimukl er a nglunguched?

⁸ Me sel douchais er a Jehovah a tekoi el suebek a rengud er ngii, e lak dobes el mereng a sulel. Ngungil a deblechoel melatk a rokui el ungil tekoi er a klengar er kid, alta kede chelebangel a meringel el blekeradel. E a lsekum e ngmo meringel er kid a mesaod a tekoi lomekringel er a rengud, e lak dobes el  kmo a Jehovah dirrek el onger a kedeb el nglunguuch el ua, ‘Mngesukak!’​—2 Kr. 18:31; Rom 8:26.

9. Kede mekera metik er a mera el ulekerreu?

⁹ (2) Multuil er a llomeserreng er a Jehovah, el diak el llemesel a rengum. Sera taem er a profet Isaia, e a rechad er a Juda a mle medakt a odechelakl er a rechad er a Asiria. Ngdimlak el sorir el mo mechitechut er a Asiria me te ullengit a ngeso er a Ekipten. (Isa. 30:1, 2) Me a Jehovah a ulemeklatk er tir el kmo tia mo uchul a telemellir. (Isa. 30:7, 12, 13) Ngokiu a Isaia, e a Jehovah a silebedeterir er a rolel e te mo metik er a mera el ulekerreu. Ngdilu el kmo: “Di mchelellakl el oumeral ulsirs er [a Jehovah]. Isei e kom mo mesisiich.”​—Isa. 30:15b.

10. Ngera el blekeradel a meskid a techelled el mo ochotii el kmo kede oumera el ulsirs er a Jehovah?

¹⁰ Kede mekera ochotii el kmo kede oumera el ulsirs er a Jehovah? Momtab a bebil olechotel. A merreder er a ureor a soal meskau a ureor el klou a udoud er ngii, engdi ngousbech er a klou el temem me ngmo diak el sebechem el mesiou er a Jehovah el uai chelechang. Me a lechub a chad er a urerem a melekoi a tekingel er kau, engdi ngika diak el telecholb el mesiungel a Dios. Me a lechub a betik er a rengum el chedam a dmu er kau me ke melilt: “Ngak me a lechub e ng Dios er kau.” Ngar er a derta er aika el blekeradel, e ke mo meruul er a meringel el omelilt, engdi a Jehovah a mo meskau a ulekrael el mousbech er ngii. (Mt. 6:33; 10:37; 1 Ko. 7:3) A ker a kmo, ke mo oumera el ulsirs er a ulekrael el lebeskau e mo otireklii?

11. Ngera el cheldecheduch er a Biblia a sebeched el mesuub el chollakl a rengud sel dechelebangel a meringel ultok?

¹¹ (3) Mngai a klubelem er a rungil me a remekngit el kerebai. A Biblia a betok a cheldecheduch er a chelsel el melisiich er a klungel a ultutelel a dolemolem el chelellakl e doumera el ulsirs er a Jehovah. Sel mosuub aika el cheldecheduch, e momtab el kmo ngera ngilsuterir a remesiungel a Dios el chollakl a rengrir alta te chilebangel a meringel ultok. El ua tiang, a rechad er a olbiil er a Judea er a ledu er a rechapostol me lak lomerk er a klumech, e te dimlak bo lemedakt. Te bai mle bekeu el melekoi el kmo: “Kemam a kiram el olengesenges er a Dios el kuk ngar uchei er a kim olengesenges er a re chad.” (Rel. 5:29) Ngmo lmuut me a uriul er a lemechelebed me te dimlak bo el medakt. E ngera uchul? Te mle medengei el kmo a Jehovah a mo ngosuterir. Te uleba kengei er ngii. Me te millemolem el omerk er a ungil chais. (Rel. 5:40-42) Ngdi osisiu, a disaiplo el Stefanus er a lechebengelii a kodall, e ngkmal mle budech a medal me te dilu el kmo a medal a “ua medal a anghel.” (Rel. 6:12-15) E ngera uchul? Ngmle ulterekokl a rengul el kmo ngoba kengei er a Jehovah.

12. A doltirakl er a 1 Petrus 3:14 me a 4:14, e ngera me ngsebechel mo dmeu a rengud sel demodechelakl?

¹² A rechapostol a mla er ngii a bleketakl el olechotel a kmo a Jehovah a ulebengterir. Ngmilsterir a klisiich el mo meruul a ongasireng. (Rel. 5:12-16; 6:8) A Jehovah a diak lebeskid a klisiich el mo meruul a ongasireng er chelecha el taem. Me nguaisei engdi ngokiu a Tekingel e ngolterekokl a rengud el kmo, sel bo dechuarm el llemalt a uchul e kede odeuir a rengul me a chedaol reng er ngii a obengked. (Monguiu er a 1 Petrus 3:14; 4:14.) Me lak domdasu el kirel a kmo kede mo mekerang er a chelsel a meringel el odechelakl, bai dolasem er a tkurrebab el sebeched el smisichii a klaumerang er kid er a Jehovah el sebechel ngosukid e osebelid. Bo deuai tirke el disaiplo  er a uchei el oumerang er a telbilel a Jesus el kmo: “Ele kmo meskemiu a tekingiu ma llemesiu, ma re cherrouiu a mo diak lesaod ma lechub e lutekangel.” A Jesus a tilbir el kmo: “A le meduch a rengmiu el outekangel, e kom mo osobel a klengar er kemiu.” (Lk. 21:12-19) Lak dobes el kmo a remesiungel a Jehovah el mad el oba blakerreng el mo er ngii a ngar er a omeltkel me bo el sebechel olekiis er tir.

13. Ngmekera mo klungioled a dosuub a tekoi el dilubech el mo er tirke el dimlak lolemolem el chelellakl e loumera el ulsirs er a Jehovah?

¹³ Kede dirrek el ngmai a klubeled er a tekoi el dilubech el mo er tirke el dimlak lolemolem el chelellakl e loumera el ulsirs er a Jehovah. A dosuub aikang e ngngosukid el oibngid er a cheleuid el tekoi el lurruul. El ua tiang, ngar er a uchelel a omengederederel a King Asa er a Juda, e a klou el ildois er a resoldau a mlo oldechelakl er ngii. Ngmle ultuil er a Jehovah, me ngulemekngeltengat er ngii me ngmlo mesisiich. (2 Kr. 14:9-12) Uriul e a King Baasa er a Israel me a kekerei el ildois er a resoldau a mlo oldechelakl er ngii, engdi a Asa dimlak lultuil er a Jehovah el mo olsobel er ngii el ua ngar er a mong. Ngbai ulemechar er a rechad er a Siria el me olengeseu er ngii. (2 Kr. 16:1-3) Me sera lebo er ngii a meringel rektel e lekeda er a ulebengelel a klengar er ngii, e ngdimlak lultuil er a Jehovah el mo olengeseu er ngii.​—2 Kr. 16:12.

14. Ngera sebeched el suub er a cheleuid el omerellel a Asa?

¹⁴ Sera uchelel e a Asa a mle ultuil er a Jehovah sel bo lechelebangel a mondai, engdi uriul e ngmlo diak lultuil er a Dios e di mlo ngii el melasem el mesmechokl. Sel domes er ngii e a uldesuel el mlo osiik a ngeso er a rechad er a Siria a mle ungil uldasu. Me nguaisei engdi ngdimlak lemeketeket el lengar ngii a budech. Ngoeak a profet e a Jehovah a dilu er ngii el kmo: “A uchul ma re soldau er a king er a Siria a mla chemiis er kau, kau el mlo ultuil er a king er a Siria e dimlak bo multuil er a RUBAK el Dios er kau.” (2 Kr. 16:7) Me ngkired el mo kerekikl me lak bo domdasu el kmo ngsebeched el di kid el sumechokl a mondai er kid e dobes el osiik a ulekrael er a Jehovah lokiu a Tekingel. Ngmo lmuut me a bo dechelebangel a blekeradel lousbech er kid el mereched el melilt, me ngkired el mo chelellakl a rengud e ultuil er a Jehovah e ngii a mo ngosukid el ungil melilt.

15. Ngera sebeched el meruul er ngii sel donguiu er a Biblia?

¹⁵ (4) Memorize a bades er a Biblia. Sel obetik a bades el olecholt er a klungel a ultutelel a dolemolem el chelellakl e doumera el ulsirs er a Jehovah, e molasem el memorize. Nglocha sebechem el menguiu el klou a ngerem me a lechub e ke lemuches er a babier e blechoel lomelekl. A Josua a mluchelechel el mo blechoel el menguiu er a babier er a Llach me bo el sebechel mo ungilbesul er aike el rokui el loruul. Aike el lulenguiu a dirrek el mo ngosuir me ngdiak bo lemedakt e bai mo oba blekeu el omekrael er a rechedal a Dios. (Jos. 1:8, 9) Ngbetok a bades el sebechel ngosukau el mo chelellakl a rengum me a uldesuem er a chelsel aike el blekeradel el rullau el mo suebek a rengum me a lechub e ke medakt.​—Psa. 27:1-3; Osi. 3:25, 26.

16. Ngmekera Jehovah e ousbech er a ongdibel el olengeseu er kid el melemolem el chelellakl e oumera el ulsirs er ngii?

¹⁶ (5) Mobengterir a rechedal a Dios. A Jehovah a ousbech er a rudam me a rudos er kid el olengeseu er kid el melemolem el chelellakl e oumera el ulsirs er ngii. Ngar er a miting e kede ngmai a klungioled er a cheldecheduch el motobed, nger er a rechad, me a dirrek el omelisiich el cheldecheduch er a delongeled.  (Heb. 10:24, 25) Kede dirrek el ngmai a omelisiich sel douchais er a resechelid aike el tekoi el suebek a rengud er ngii. “A ungil tekoi” el ledelii a sechelid a sebechel ngosukid el mo diak el sebek a rengud.​—Osi. 12:25.

17. A doltirakl er a Hebru 6:19, e ngmekera omeltked er a Renged e mengellakl er kid sel bo dechelebangel a omelsemai?

¹⁷ (6) Molemolem el melisiich er a omeltkem. A omeltked er a Renged a ua “otil a klengar er kid” el mengellakl er kid sel bo dechelebangel a omelsemai me a lechub e ngsebekreng. (Monguiu er a Hebru 6:19.) Molebedebek a telbilel a Jehovah el kirel a ngar medad. Seikid el taem e ngmo diak a tekoi el rullid el mo suebek a rengud. (Isa. 65:17) Momes er kau er a chelsel a beches el beluulechad el budech e diak a mekngit er ngii. (Mik. 4:4) Ke dirrek el smisichii a omeltkem sel mouchais er ngii el mora rebebil. Me moruul aike el rokui el sebechem er a ureor er a berkel a klumech me a omeruul el disaiplo. A omoruul uaisei e ngmo ulterekokl a rengum el kmo, a “ikel tekoi el molatk e mengiil [a mo tmaut].”​—Heb. 6:11.

18. Ngera sebechel duubech er a ngar medad, e kid kede mekera mo mesisiich er ngii?

¹⁸ Chelecha el lolekedang a ulebengelel tia el mekngit el blekeradel e ngmo betok a mondai el sebechel rullid el mo suebek a rengud. A bades er kid er a rak er a 2021 a sebechel ngosukid el outekangel aika el mondai e melemolem el chelellakl, e le kede oumera el ulsirs er a Jehovah el diak dultuil er a di klisiched. Chelecha el rak, e dochotii lokiu a omerelled el kmo, kede oumerang er a telbilel a Jehovah el kmo: “Di mchelellakl el oumeral ulsirs er ngak. Isei e kom mo mesisiich.”​—Isa. 30:15.