1. Ngmekera dongoit a taem el obengkel a Jehovah?

 NGKMAL soad lobengterir a rebetik er a rengud el chad. A rebechiil el chad a kmal sorir el mengoit a taem el dmak. A remekekerei el chad a kmal sorir el obengterir a resechelirir. E kid el rokui a kmal mengreos aike el taem el dedak lobengterir a rudam me a rudos er kid. E a ngaruchei er ngii el rokui, ngkmal soad el mengoit a taem el obengkel a Dios er kid. Kede mengoit a taem lobengkel sel doluluuch, donguiu er a Tekingel, e dolebedebek er a moktek er ngii me a blekerdelel. Ngmera el mekreos a taem el dongoit el obengkel a Jehovah!​—Psa. 139:17.

2. Ngera el omelsemai a dechelebangel er ngii?

² Me alta ngkmal soad el mengoit a taem lobengkel a Jehovah engdi ngmo duubech a omelsemai. Ngkmal betok a kired el meruul e tia sebechel rullii el mo meringel er kid a metik a taem el kirel a omengull er kid el mora Jehovah. Urered, ngerecheled er a telungalek, me a lmuut el bebil el kired el meruul a sebechel mo uchul e kede mo omdasu el kmo ngkmal diak a temed el meluluuch, e mesuub, e melebedebek.

3. Ngera dirrek el sebechel mo nguu a temed?

³ Ngar ngii a lmuut el ta er a tekoi el sebechel mo nguu a temed. A lsekum e ngdiak dekerekikl e ngsebeched el mo mechesang el meruul a tekoi el alta ngdiak lemekngit engdi ngmo nguu a taem el sebeched lousbech er ngii lolekes er a deleuill er kid me a Jehovah. El ua tiang, molatk a tekoi er a omilil. Ngungil el kired sel dongoit a taem el olengull e milil. Me nguaisei alta bedengel omilil el doruul a diak lemekngit engdi ngsebechel nguu a klou el temed me ngmo diak el sebeched el meruul er a omengull  er kid. Ngdiak el kired lobes el kmo a tekoi er omilil a diak lekot el klou a ultutelel.​—Osi. 25:27; 1 Ti. 4:8.

4. Ngera kede mo mesaod?

⁴ Ngar tia el suobel e kede mo mesaod er a uchul me ngkired el melilt aike el kot el meklou a ultutelel er a klengar er kid. Kede dirrek el mo mesaod er a rolel e kede mo ungil lousbech a temed el obengkel a Jehovah me a klungiaol el dengai sel doruul el uaisei.

5. Ngmekera ulekrael el ngar er a Efesus 5:15-17 e ngosuir a ngeasek el mo ungil melilt er a rolel e ngmo ousbech er a klengar er ngii?

⁵ Mngiltii sel kot el ungil rolel a klengar. A rengeasek a blechoel el melatk el kmo te mo mekera er a klengar er tir. A resensei er a skuul me a rechederir el diak el Sioning a locha mo melisiich er tir el mora ngarbab el skuul me bo lungil a urerir er a ta er a klebesei. Tia mo nguu a kmal klou el temir. A rechad er a blirir me a resechelirir a locha mo melisiich er tir el mo ousbech er a klengar er tir el mesiou er a Jehovah. Ngera sebechel ngosuir a ngeasek el betik a rengul er a Jehovah el mo meruul er sel kot lungil omelilt? Ngmo uchul a klungiolel a lsekum e ngmenguiu e melebedebek er a Efesus 5:15-17. (Monguiu.) Uriul er a longuiu aika el bades e ngsebechel di ngii loker el kmo, ‘Ngngera “soal a Rubak”? Ngngera el omelilt a mo odeuir a rengul? Ngera el omelilt a mo uchul e ak mo ungil lousbech a temek?’ Lak mobes el kmo “ng mekngit el taem er chelechang” e tia el beluulechad el longedereder er ngii a Satan a di kmedu el mo nguemed. Me ngolechotel a llomeserreng a lsekum e kede mo ousbech er a klengar er kid er a rolel e ngodeuir a rengul a Jehovah.

6. Ngera el omelilt a lerirellii a Maria, e ngera uchul me tia mle ungil omelilt?

⁶ Molilt aike el meklou a ultutelel. A lsoad el mo ungil lousbech a temed e nglocha mo kired el melilt er a delongelel a teblo el tekoi el ngii a diak el mekngit. Sel cheldecheduch er a Biblia el kirel a Jesus er a lebora blil a Maria me a Martha a ochotii tiang. A Martha locha kmal mle dmeu a rengul er a lebora er a blil a Jesus e mle soal meruul er a klou el blengur el kirel. Me nguaisei engdi a ta er ngii er a Maria mlo dengchokl lobengkel a Jesus e orrenges er ngii el olisechakl. Me alta Martha mle ungil a moktek er ngii me nguaisei engdi Maria ngileltii a “klou a belkul.” (Lk. 10:38-42) Cherengel a taem e a Maria locha mlo obes aike el lulengang er seikid el taem engdi ngkmal diak bo lobes aike el lesiluub er a Jesus. Me ngdi ua Maria el kmal kirresii a taem el lulengoit er ngii lobengkel a Jesus, kid me kede dirrek el kmal mengreos a temed el obengkel a Jehovah. Me kede mekera mo ungil lousbech a temed?

7. Ngera uchul me ngklou a ultutelel el doluluuch, dosuub, e dolebedebek?

⁷ Bo modengei el kmo a nglunguuch, omesuub, me a omelebedebek a telengtengil omengull er kid. Sel doluluuch e kede mengedecheduch er a Demad el ngar er a eanged el ngii a kmal betik a rengul er kid. (Psa. 5:7) Sel dosuub er a Biblia e kede melai er a “klemedengei er a Dios” el uchul a rokui el llomes. (Osi. 2:1-5) Sel dolebedebek e kede melatk a ungil blekerdelel a Jehovah me a moktek er ngii el kirel a rokui el blebelel, el kid a uldimukl er ngii. Tiakid a kot el ungil rolel e kede mengoit a temed. Engdi kede mekera mo ungil lousbech er tia el temed? 

8. Ngera sebeched el suub er a Jesus er a longoit er a taem el ngar er a ked?

⁸ A lsebechel e mngiltii a basio el diak a cherrodech er ngii. Molatk er a kerebil a Jesus. Uchei er a lomuchel er a omesiungel er tia el chutem e ngmilengoit er a 40 el klebesei el ngar er a ked.  (Lk. 4:1, 2) Ngar tia el diak a cherrodech er ngii el basio e a Jesus a mle sebechel meluluuch el mora Jehovah e melebedebek er a soal a Demal el kirel. Tia ngilsuir el kutmeklii el kirel aike el omelsemai el bo lechebangel. Ngmekera sebechem el ngmai a klungiolem er a kerebil a Jesus? A lsekum e ngklou a telungalek er kau e nglocha diak el sebechem el metik er a basio er a blai el diak a cherrodech er ngii. A leuaisei e nglocha sebechem el sikii a ungil basio er a ikrel a delengchekliu. Tiakid a loruul er ngii a Julie sel soal mengoit a taem el obengkel a Jehovah er a nglunguuch. Ngii me a bechil a kiei er a kmal kekerei el apartment er a France me ngmeringel a lebetik er a basio el sebechel di ngii el tang e diak a mengesang er ngii. Me a Julie a melekoi el kmo: “Ngbek el sils el bo kurael er a park. Ngar isei e ngsebechek el di ngak el tang e mo ungil mengedecheduch er a Jehovah.”

9. Alta Jesus a kmal mle mechesang engdi ngmilekera ochotii el kmo a deleuill er ngii me a Jehovah a kmal klou a ultutelel er ngii?

⁹ A Jesus a kmal mle mechesang. A rechad a mle blechoel di merael el okiuellel er a loruul er a omesiungel er tia el chutem e tir rokui a kmal sorir el mengoit a taem el obengkel. A ta el taem e a “rokui el chad er a beluu a di mle meseked er medal a blai” el sorir el omes er ngii. Me nguaisei engdi Jesus a kiltmeklii a taem el longoit er ngii el meluluuch el mora Jehovah. Uchei er a lengasech a sils e ngmirrael el mora basio el “diak a re chad er ngii” e milengoit a taem el obengkel a Demal.​—Mk. 1:32-35.

10-11. A doltirakl er a Mateus 26:40, 41, e a Jesus ngmillisiich er a redisaiplo er ngii el mo mekerang er a lengar er a sers er a Gethsemane? Engdi ngngera dilubech?

¹⁰ Ngar sel ulebongel el kesus er ngii er tia el chutem er a bocha lemerek a omesiungel e a Jesus a mlo sikii a basio el diak a cherrodech er ngii el mo meluluuch e melebedebek. Ngmlora sers er a Gethsemane. (Mt. 26:36) Ngar tiakid el taem e nguluuchais er a redisaiplo er ngii a klou a ultutelel tekoi el kirel a nglunguuch.

¹¹ Molatk er a tekoi el dilubech. Sera lebocha er a sers er a Gethsemane e ngkmal mla mo chosoi. A Jesus ullengit er a redisaiplo er ngii me ‘longkar’ e ngii a mirrael el mo meluluuch. (Mt. 26:37-39) Engdi sera loluluuch e te liliit a mederir. Sera lebetik er tir el mechiuaiu e ngliluut el dmu er tir el kmo “mongkar e moluluuch.” (Monguiu er a Mateus 26:40, 41.) A Jesus a miltebengii el kmo ngkmal mle betok a oberaod er a uldesuir me tir a mle mesaul a bedengir. Klechubechub er ngii a uchul me ngdilu el kmo a “klechad er [a chad] a mechitechut.” Me nguaisei engdi ngeru el taem el le liluut el mo meluluuch e me metik er tir el mechiuaiu e diak loluluuch.​—Mt. 26:42-45.

12. Ngera sebeched el meruul er ngii a lsekum e kede omelechesiu el kmo kede kmal stress me a lechub e ngkmal mesaul a bedenged me ngdiak el sebeched el meluluuch?

¹² Mngiltii a ungil taem. A lebebil e kede kmal  mo stress me a lechub e ngkmal mesaul a bedenged me ngdiak el sebeched el meluluuch. A lsekum e tia duubech el mo er kau e modengei el kmo ngdiak di lekau el tang a omelechesiu el uaisei. Engdi ngngera sebechem el meruul er ngii? A rebebil el tir a blechoel el meluluuch el mora Jehovah er a ulebengelel a sils er tir a mla metik el kmo ngkmal ngosuterir sel loluluuch er a dirk kebesesengei le ngdirkak el sal mo mesaul a bedengir. A rekuk bebil a mla metik el kmo a teletelir sel loluluuch a dirrek el kmal ngosuterir, el uai a dengchokl me a lechub e te outubuach e meluluuch. Engdi ngmekera a lsekum e ngkmal betok a mengesang er a uldesuem me a lechub e ngkmal mechitechut a rengum me ngdiak el sebechem el meluluuch? Mouchais er a Jehovah el kirel. Ngkmal sebechel mo ulterekokl a rengum el kmo a chubechub el Demad a kmal medengelii a omolechesuar er ngii.​—Psa. 139:4.

13. Ngmekera electronic device e sebechel mo mengesang er a temed el obengkel a Jehovah?

¹³ Lak bechei a tekoi me bo longesang er kau. Ngdiak di le nglunguuch a melisiich er a deleuill er kid me a Jehovah. A omesubed er a Tekingel a Dios me a miting er a blil a ongdibel a dirrek lolengeseu er kid el lolekes er a deleuill er kid me ngii. Ngngar ngii a sebechem el meruul el lmuut el mo ungil lousbech a temem el mesuub me a temem el ngar er a miting? Di lekau loker. ‘Ngera blechoel el mo mengesang er ngak sel kngar er a miting me a lechub e sel kulasem el mesuub?’ Omomdasu e ng call, email, me a lechub e ng text er a rechad? Rebetok el biliol el chad er chelecha el taem ousbech aika el kmal ungil dongu. A rebebil er a mesuub a tekoi a kmo a lsekum a dengua a ngar bita er kid e ngkmal di beot er ngii el mo mengesang er kid a dolasem el ultaut a uldesued er a tekoi. A ta el brobesong a melekoi el kmo, “A bdelum a diak lultaut er a tekoi el omchelebangel er ngii e ngbai ngar er a kmung ker.” Ngblechoel el uchei er a assembly me a convention e te omeklatk er kid el mo mekoad a ngerel a dengua er kid me lak bo longesang er a rechad. Kid ngsebeched el meruul er a osisiu el tekoi sel di lekid el tang me lak a mo mengesang er kid me a temed lobengkel a Jehovah?

14. A doltirakl er a Filipi 4:6, 7, e ngmekera Jehovah mo ngosukid loltaut er a uldesued er a Tekingel?

¹⁴ Molengit er a Jehovah me lengesukau el mo oltaut osengem er a Tekingel. Sel bo momelechesiu el kmo a uldesuem a mocha omdasu a bebil el tekoi er a temel a omesubem me a  lechub e ngtemel a miting e molengit er a Jehovah me lengesukau. A lsekum e ngngar ngii a tekoi el mengesang er a uldesuem e nglocha mo meringel er kau oltaut er osengem er a Tekingel a Dios engdi ngkmal klou a ultutelel el bechei aika el sebekreng er kau. Moluluuch lolengit er a budech me lak di bo lomtebechel er a rengum ngdirrek el ‘uldesuem.’​—Monguiu er a Filipi 4:6, 7.

15. Ngera ta er a klungiolel a dongoit a taem el obengkel a Jehovah?

¹⁵ Ngmo uchul a klungiolem sel mongoit a taem el mengedecheduch, orrenges, e melatk el kirel a Jehovah. Ngoeak a ngera el rolel? A kot, e ke mo ungil melilt a tekoi. A Biblia olterekokl er a rengud el kmo ngike el ‘mesuub er a re mellomes a rengrir el chad . . . a mo mellomes a rengul.’ (Osi. 13:20) Me sel mongoit a taem el obengkel a Jehovah el ngike el uchul a llomes, e ngmo mellomes a rengum. Ke mo ungil medengei a rolel e ke odeuir a rengul e mo meduch el mengeroid er kau er aike el mo tomellii a rengul.

16. Mekera taem el dongoit er ngii lobengkel a Jehovah e ngosukid el lmuut el mo ungil lolisechakl?

¹⁶ Ongerung, e ke lmuut el mo ungil el sensei. Sel dosuub a Biblia el obengkel a chad e a ta er a kot el klou a ultutelel el tekoi el kired el meruul er ngii a ngosuir el mo kmeed er a Jehovah. Sel bo deblechoel el mengedecheduch er a Demad el ngar er a eanged e ngmengal mukeroul a bltkil a rengud el mo er ngii me kid a sebeched el mo ungil losisecheklii a chad el dosuub el obengkel el mo betik a rengul er Ngii. Molatk er a kerebil a Jesus. Ngika milsaod a klebokel el tekoi el kirel a Demal el mora rultirakl er ngii me tia rirelleterir el dirrek el kmal mo betik a rengrir er a Jehovah.​—Jn. 17:25, 26.

17. Ngera uchul me a nglunguuch me a omesuub a ngosukid el melisiich er a klaumerang er kid?

¹⁷ Ongedei, nglmuut el mo mesisiich a klaumerang er kau. Molatk a duubech sel molengit er a Dios el kirel a ulekrael, ongelaod, me a ngeso. Bek el taem el longer a nglunguchem a Jehovah e ngmukeroul a klaumerang er kau. (1 Jn. 5:15) Ngera dirrek el sebechel smisichii a klaumerang er kau? Omesubem el di kau el tang. Lak dobes el kmo a “chad a mo oumerang el okiu a tekoi el le renges.” (Rom 10:17) Me nguaisei, a omeleketek el klaumerang a diak di le omelai el klemedengei. Ngera dirrek el kired el meruul er ngii?

18. Momekesiu er a uchul me ngkired el melebedebek.

¹⁸ Ngkired el melebedebek aike el desuub. Molatk er ngike el milluches er a Psalm 77. Ngkmal mlo oberaod a rengul e le ngmlo omdasu el kmo ngii me a rebebil er ngii el chad er a Israel a mla oridii a kengei er a Jehovah. Ngkmal di milengesang er ngii me ngdimlak el sebechel mechiuaiu a leklebesei. (2-8 el kekerei el bades)  Me ngngera ngmirruul er ngii? Ngdilu er a Jehovah el kmo: “Ak mo melebedebek a rokui el urerem, ak melebedebek a mesisiich el omerellem.” (12 el kekerei el bades) Nguaisei el ngika el ta er a milluches er a Psalm a mle medengei aike el leriruul a Jehovah el kirel a rechedal er a ngar er a mong engdi nglocha dirk millatk el kmo: “A Dios ng mla obes er a klungiolel a rengul? A klsbengel a rengul ng mla choridii a klechubechub er ngii?” (9 el kekerei el bades) Ngika el ta er a milluches er a Psalm a millebedebek a omerellel a Jehovah me a rolel e ngullecholt er a klechubechub er a ngar er a mong. (11 el kekerei el bades) Me ngngera dilubech? Ngika mlo ulterekokl a rengul el kmo a Jehovah a kmal diak bo lechititerir a rechedal. (15 el kekerei el bades) Ngar er a osisiu el rolel e a klaumerang er kau a mukeroul el mo mesisiich sel molebedebek aike el bla leruul a Jehovah el kirel a rechedal me aike el bla leruul el kirem.

19. Ngmekera dirrek el mo uchul a klungioled sel dongoit a taem el obengkel a Jehovah?

¹⁹ Ongeuang, e dirrek el sel kot el klou a ultutelel a bltkil a rengum el mora Jehovah a medechel. A bltikerreng el ngar uchei er a ngii di el blekeradel a mo odbechau el mo olengesenges er a Jehovah e mo meruul aike el rokui el sebechem el mo odeuir a rengul e mo outekangel a omelsemai. (Mt. 22:37-39; 1 Ko. 13:4, 7; 1 Jn. 5:3) Ngdiak a ngodech el kmal mekreos el ua kmes el deleuill er kid me a Jehovah!​—Psa. 63:1-8.

20. Ngera ke mo meruul loterekeklii a taem el mongoit er ngii el obengkel a Jehovah?

²⁰ Lak mobes el kmo a nglunguuch, omesuub, me a omelebedebek a telengtengil a omengull er kid el mora Jehovah. Uai a Jesus, mosiik a techall me a dirrek el basio el diak a cherrodech er ngii el mo mengoit a taem lobengkel a Jehovah. Molengit er a Jehovah me lengesukau el mo ultaut a uldesuem er a tekingel sel moruul omesubem el di kau el tang me sel omngar er a miting. Sel bo mungil lousbech a temem er chelechang, e a Jehovah a mo omekngeltengat er kau er a klengar el mo cherechar er a beches el blekeradel.​—Mk. 4:24.