1-3. Ngera locha uchul me a rechedal a Jehovah a mo lmangel?

 OINGERANG a mle last er kau el kmal lmangel? A lebebil e kede lmangel le ngkmal dmeu a rengud. Me nguaisei engdi oumesingd el taem e kede lmangel el kngtil a rengud a uchul. El ua tiang, kede lmangel sel lemad a betik er a rengud. A odos er a Merikel el Lorilei a melekoi el kmo: “Ngar ngii aike el taem el kmal bo kulechesuar a ringelel a kodellel a ngelekek el redil e diak a sebechel el cholodak. Ak mlo omdasu el kmo ngdiak a sebechel mekerur tia el chelemuul el renguk.” *

² Nglocha ngar ngii a kuk ngodech luchul me kede mo lmangel. A Hiromi el pioneer er a beluu er a Siabal a kmo: “Ngar ngii aike el taem el lesal kmal mo mechitechut a renguk le ngdiak a rechad el sorir lorrenges er a klumech er a Biblia. A lebebil e ak meluluuch el mora Jehovah el lmangel el kmo mngesukak el metik er a chad el losiik er a klemerang.”

³ Kau, a lebebil e ke mo omelechesiu a kngtil a rengrir tirka el odos? Rebetok er kid a uaisei. (1 Pe. 5:9) Ngsoad el “blekebek e [mengull] el meluluuch er a RUBAK” engdi kede locha mo lmangel a lebebil le kede chelebangel er a klengiterreng me a lechub e ngmo mechitechut a rengud me a lechub e kede chelebangel er a blekeradel el melasem er a blakerreng er kid er a Dios. (Psa. 6:6; 100:2) Ngmekera sebeched el outekangel sel bo dechelebangel chouaika el blekeradel?

4. Ngera kede mo mesaod er tia el suobel?

⁴ Ngsebeched el ngmai a klubeled er a Jesus. Ngika dirrek el mlo chobangel a blekeradel el uchul me ng “lilangel.” (Jn. 11:35; Lk. 19:41; 22:44; Heb. 5:7) Ka me dosaod aika el blekeradel  e deues aike el sebeched el suub er ngii. Kede dirrek el mo mesaod aike el sebeched el meruul loutekangel a blekeradel el uchul e kede mo lmangel.

5. Ngera kede suubii el kirel a Jesus er a Johanes 11:32-36?

⁵ A sechelil a Jesus er a Lasarus a mlo smecher e mad er a temel a kelekolt er a 32 C.E. (Jn. 11:3, 14) Ngika mla er ngii a reteru el ochedal el Maria me a Martha, e a Jesus a kmal mle betik a rengul er tir. Tirka el odos a kmal mle mekngit a rengrir er a lemad a ochederir. Me sera lemad ngii el Lasarus e a Jesus a mlora belurir er a Bethania. A Martha er a lerenges el kmo a Jesus a ngar omerollel el mong e ngdi mle mereched el mo olsiuekl er ngii. Molatk er a kngtil a rengul er a ledu el kmo: “Chomko ke mlar tiang e Rubang, e ng dimlak le mad ochedak!” (Jn. 11:21) A Jesus er a lesa Maria me a relmuut el bebil el lmangel e ngdirrek el “lilangel.”​—Monguiu er a Johanes 11:32-36.

6. Ngera uchul me a Jesus a lilangel?

⁶ Ngera uchul me a Jesus a lilangel? A Insight on the Scriptures a kmo: “Kodellel a sechelil er a Lasarus me a kngtil a rengrir a ruchedal a uchul me a Jesus a ‘kmal mlo imis el mekngit a rengul.’” * A Jesus a locha mlo melatk er a ringel el ble lechebangel er ngii a Lasarus er a lsecher me a uldesuel er a bo lomelechesiu el kmo ngdi kmedu el mad. Ngdirrek el locha kmal lilangel er a lesa kngtil a rengul a Maria me a Martha. Ke locha kmal medengelii a ringel el lulemelechesiu er ngii tirka el teru el odos a lsekum e ngngar ngii a sechelim me a lechub e ngchedam el mla mad. Molatk a edei el tekoi el desuub er tia el blekeradel.

7. Ngera kede suubii el kirel a Jehovah er a llangel a Jesus el kirel a resechelil?

⁷ Jehovah a ungil medengelii a uchul me ke omelechesiu el uaisei. A Jesus a “kmal diak le ngodech” er a Demal. (Heb. 1:3) Me sera llangel e ngullecholt aike el mlara rengul a  Demal. (Jn. 14:9) A lsekum e kau outekangel er a ringelel a kodellel a betik er a rengum e ngkmal sebechel mo ulterekokl a rengum el kmo a Jehovah medengelii a kngtil a rengum e dirrek el kmal mekngit a rengul el kirem. Ngkmal soal rullii a chelemuul el rengum el mo ungil.​—Psa. 34:18; 147:3.

8. Ngera uchul me ngsebechel mo ulterekokl a rengud el kmo a Jesus a mo olekiis er a rebetik er a rengud?

⁸ A Jesus a kmal soal lolekiis er a rebetik er a rengum. Uchei er a llangel a Jesus e ngulelterekokl er a rengul a Martha el kmo: “A ochedam a lmuut el mo chad.” E a Martha kmal uluumerang er ngii. (Jn. 11:23-27) Martha mle blak a rengul mesiungel a Jehovah me ngulterekokl el medengei el kirel a okiis el lurruul a Elias me a Elisa er a betok el telael el rak er uchei. (1 Ki. 17:17-24; 2 Ki. 4:32-37) Ngdirrek el locha rirenges chisel okiis el lurruul a Jesus. (Lk. 7:11-15; 8:41, 42, 49-56) Me kau me ngkmal dirrek el sebechel mo ulterekokl a rengum el kmo a rebetik er a rengum el mla mad a lmuut el me ngar. Jesus el lilangel er a longelaod er a resechelil el kmal mle mekngit a rengrir a ochotii el kmo, a okiis a tekoi el kmeed er a rengul!

9. Ngmekera sebeched el mo ua Jesus el olengeseu er tirke el ngar er a klengiterreng? Mosaod er a ta er a olechotel.

⁹ Ngkmal sebechem el olengeseu er tirke el ngar er a klengiterreng. A Jesus a dimlak di el llangel lobengkel a Martha me a Maria ngdirrek el ulerrenges er tir el mengedecheduch e milengelaod er tir. Kid me ngdirrek el sebeched el meruul er a osisiu el tekoi el mo er tirke el chuarm er a klengiterreng. A Dan el ta er a remechuodel el kiei er a Australia a melekoi el kmo: “Ak kmal uluusbech a ngeso er a lemad a bechik. Te ngar ngii a rubekel el kmal mle kltmokl el olengeseu er ngak e orrenges er ngak. Te milechikak me a kuuchais a kngtil a renguk e dimlak bo lemerur er a klangel. Te dirrek el ngilsukak er a bebil lureor el ua melatech er a mlik, shopping a kelek, e meruul a kall er aike el taem el dimlak el sebechek el remuul aika el tekoi. Te kmal mle blechoel el meluluuch el obengkek. Tirka mera el sechelei e odam el tir a ‘ta er kid el . . . ngosukid er a chelebuul.’”​—Osi. 17:17.

10. Mosaod er a tekoi el dilubech el donguiu er ngii el ngar er a Lukas 19:36-40.

¹⁰ A Jesus a mlora Jerusalem er a Nisan 9, 33 C.E. Ngmerael el bedul a mats e a seked a mocha merk a bilir er a rael el lorael er ngii e kongei er ngii el King er tir. Tia mera el mle taem er a deurreng. (Monguiu er a Lukas 19:36-40.) Me a redisaiplo locha kmal mlo rrau a rengrir er a tekoi el dilubech er a uriul er tiang. “A Jesus er a lesal kmeda er a beluu me bocha lomes er ngii, e ng lilangel el kirel.” Nglilangel e ouchais er tir a mekngit el tekoi el mo duubech el mo er tirke el kiei er a Jerusalem.​—Lk. 19:41-44.

11. Ngera uchul me a Jesus a lilangel el kirir tirke el kiliei er a Jerusalem?

¹¹ A Jesus a kmal mle mekngit a rengul le alta tirka el chad a kmal luluutkeu er ngii engdi oumesingd er a Rechijudea a diak bo lekengei er a klumech er a Renged. Sei a uchul me a Jerusalem a mo metemall e tirke el Chijudea el mo suobel er a telemellel a mo mengai el mo blebaol. (Lk. 21:20-24) Ngklengiterreng le ngdi ua ledilu Jesus a ruumesingd el chad a ultngeklii. Ngera uldesuir a ruumesingd el chad el kirel a klumech er a Renged er a basio el omngar ngii? A lsekum e ngdiak el betok er tir a kongei er a klemerang, e ngngera sebechem el suub er a lengelel a Jesus? Molatk a lmuut el edei el tekoi.

12. Ngera kede suubii el kirel a Jehovah er a llangel a Jesus el kirir a rengar bita er ngii?

 ¹² A Jehovah kmal betik a rengul er a rechad. A lengelel a Jesus a mekltkid er a Jehovah el kmal betik a rengul er a rechad. “Ng diak el soal a ngii di le chad a leriid, e bai soal a rokui el chad a lobult el mo imikr a kngterir.” (2 Pe. 3:9) Chelecha el taem e kede ochotii el kmo ngbetik a rengud er a rengar bita er kid loeak a blakerreng er kid el melasem el lolengeseu er tir el mo kongei er a ungil chais el kirel a Renged.​—Mt. 22:39. *

13-14. Ngmilekera Jesus e ochotii a klechubechub el mora rechad, e mekera debekurulii tia el blekeradel?

¹³ A Jesus a mle meringel loureor el meruul er a omesiungel. Ngulechotii a bltkil a rengul el mora rechad er a lousbech a bek el techall el mo olisechakl er tir. (Lk. 19:47, 48) Ngera rirellii el mo meruul er tiang? Ngika kmal mle chubteterir. A lebebil e ngkmal mlo betok a resorir el orrenges er ngii me ngmlo diak a techellel ngii me a redisaiplo er ngii “el omengur.” (Mk. 3:20) Ngika dirrek el kilengei el olisechakl a leklebesei le ngmle ungil el taem er a chad el soal lorrenges. (Jn. 3:1, 2) A ruumesingd er tirke el ulerrenges er a Jesus a dimlak bo le disaiplo er ngii. Me nguaisei engdi te mle ungil rongesii a klumech. Chelecha el taem e ngkmal soad el mesterir a techellir a rokui el chad el mo rongesii a ungil chais. (Rel. 10:42) A bo doruul el uaisei e nglocha kired el melodech a rolel a domerk er a klumech.

¹⁴ Mkengei el melodech a rolel a omoruul a tekoi. A lsekum ngdiak dolodech a temed el omerk er a klumech e nglocha diak el sebeched el mo metik er tirke el kongei lorrenges er a ungil chais. A Matilda el ta er a pioneer a kmo: “Ngak me a bechik a melasem losiik er a rechad er a kakerous el taem. Aki blechoel lou business territory sel ledirk tutau. Sel lesueleb el mo ieta sils el lebetok a rechad el omais er a rael e aki ou cart witnessing. E sel bocha lekebesesengei e aki oldingel obliil le ki metik er a rebetok el chad el ngar er a blai.” Ngkmal soad el melodech a temed me bo lsebeched el omerk er aike el taem el beot er kid a metik er a rebetok el chad, el diak di doruul er ngii er aike el taem el ungil er kid. Sel doruul el uaisei  e ngsebechel mo ulterekokl a rengud el kmo a Jehovah dmeu a rengul er kid.

15. Ngera dilubech er sel ulebongel el kesus er a klengar er a Jesus el ua losaod a Lukas 22:39-44?

¹⁵ Ng Nisan 14, 33 C.E. e mla mo chosoi e a Jesus a mocha er a sers er a Gethsemane. Ngar isei e ngmiluluuch louchais er a Jehovah aike el rokui el mlara rengul. (Monguiu er a Lukas 22:39-44.) Ngar tiakid el kmal meringel el taem er a klengar er ngii e “ng mle klou a ngerel e dirrek el lilangel er a loluluuch.” (Heb. 5:7) A Jesus ngmilluluuch el kirel a ngerang er tia el ulebongel el kesus er ngii er a uchei er a lemad? Ngmiluluuch lolengit er a Jehovah me lengesuir el lomelemii a blakerreng er ngii e lerellii a soal. A Jehovah rirengesii ongtil a Ngelekel e ulderchii a anghel el mo melisiich er ngii.

16. Ngera uchul me a Jesus a kmal mle oberaod a uldesuel er a loluluuch er a sers er a Gethsemane?

¹⁶ A Jesus a lilangel er a loluluuch er a sers er a Gethsemane e le ngkmal mle oberaod a uldesuel le rechad a mo omes er ngii el diak longull er a ngklel a Demal. Ngdirrek el mle medengelii a klungel a ngerachel el lulebang el mo sobecheklii a ngklel a Demal. A lsekum kau a chelebangel er a blekeradel el ngii a melasem er a blakerreng er kau el mora Jehovah, e ngngera sebechem el suub er a lengelel a Jesus? Molatk a lmuut el edei el tekoi.

17. Ngera kede suubii el kirel a Jehovah er a longer a ongtil a Jesus?

¹⁷ A Jehovah orrenges a ongtim el mo er ngii. A Jehovah a ulerrenges a ongtil a Jesus. E ngera uchul? E le sel kmal mle klou a ultutelel er a Jesus a blakerreng er ngii el mora Demal me a osebecheklel a ngklel. A lsekum e a blakerreng er kid el mora Jehovah me a dirrek el osebecheklel a ngklel a kot el klou a ultutelel er kid e ngmo onger a nglunguched el kirel a ngelsuil.​—Psa. 145:18, 19.

18. Ngoeak a ngera el rolel e a Jesus a ungil a blekerdelel sechelid el ungil medengei a tekoi el domelechesiu?

¹⁸ A Jesus a ungil medengei a uchul a tekoi el omomelechesiu. Sel bo loberaod a rengud el kirel a kmung ngngerang e ngkmal mo dmeu a rengud a lsekum e ngngar ngii a resechelid el medengei a tekoi el domelechesiu el mengelaod er kid, tokubets tirke el mla chobangel a osisiu el blekeradel. A Jesus a ngikakid el sechelid. Ngkmal lungil medengelii sel bo lemechitechut  a rengud e dousbech a ngeso. Ngmedengei a chelitechetud e mo oterekeklii el kmo kede mo nguu a ngeso el dousbech er ngii er “sel kirel blsechel.” (Heb. 4:15, 16, BT) Ngdi ua Jesus el kilengei er a ulengesuil a anghel er a lengar er a sers er a Gethsemane, kid me ngdirrek el kired el kongei a ngeso el lebeskid a Jehovah loeak a babier el motobed, video, cheldecheduch, me a lechub e ng odngelel a ta er a remechuodel me a lechub e ngodam me a lechub e ngodos.

19. Ngmekera sebechem el mo mesisiich sel bo mchebangel a omelsemai el melasem er a blakerreng er kau el mora Dios? Mouchais er a olechotel.

¹⁹ A Jehovah a mo meskau a “budech er a Dios.” Ngmekera Jehovah e mo smisichid? Sel doluluuch e kede metik er a “budech er a Dios, el diak el sebechel a chad el mo cherrungel el medengelii.” (Fil. 4:6, 7) A budech el lebeskid a Jehovah a olleklii a rengud e mtebechelii a uldesued. Tiakid a blo lomelechesiu er ngii a odos el Luz. Ngdmu el kmo: “Ak mle blechoel el mo sabisi. A lebebil e tia rullak el mo omdasu el kmo a Jehovah a diak lebetik a rengul er ngak. Engdi sel bo leuaisei a uldesuek e ak mera el di mereched louchais er a Jehovah. A nglunguuch a ngosukak el mtebechelii a renguk.” Me a experience ochotii el kmo a nglunguuch a kmal sebechel meskid a budech.

20. Ngera kede mla suub er a lengelel a Jesus?

²⁰ Me kede mera el mechelaod e ngmai a klubeled er a lengelel a Jesus! Kede muklatk el mo olengeseu er a resechelid el chuarm er a klengiterreng e mo oumera el kmo a Jehovah me a Jesus a mo ngosukid sel lemad a betik er a rengud. Kede blak rengud el omerk e olisechakl el oba klechubechub e le Jehovah me a Jesus olecholt er tia el blekeradel. Me kid a mechelaod a rengud sel dodengei el kmo a Jehovah me a Ngelekel a ungil medengei a uchul a tekoi el domelechesiu me a chelitechetud e sorir lolengeseu er kid el outekangel. Mada dolemolem el oltaut aika el bla desuub el mo lmuut er sel taem el Jehovah otutii a telbilel el “mo smuld a rokui el chiuosech er a [medad]”!​—Och. 21:4.