1. Ngmekera omosaod er a telungalek er a Jakobus?

 A JAKOBUS el ochellel a Jesus a mlukeroul el chedal a telungalek el mesisiich er a tekoi er a klereng. * A delal me a demal er a Josef me a Maria kmal mle betik a rengrir er a Jehovah e mle blak a rengrir el mesiou er ngii. Ngdirrek el mla er ngii a lmuut el ta er a klengeltengat el mo er ngii. A ta er a klebesei e a obekul a mo ngike el telbiil el Mesias. Ngmera el mle ileakl a techellel a Jakobus el chedal tia el telungalek.

2. Ngera ungil luchul me a Jakobus a locha kmal milengull er a obekul?

² A Jakobus a mla er ngii a betok lungil luchul e nglocha kmal milengull er a obekul. (Mt. 13:55) El uai tiang, a Jesus er a le 12 a rekil e ngkmal mle ungil medengei a bades me a resensei er a Jerusalem a kmal mlo mechas a rengrir. (Lk. 2:46, 47) A Jakobus a locha uluureor lobengkel a Jesus el chad er a daiksang. A leuaisei e tiakid a uchul e ngkmal mlo ungil medengelii a obekul. A Nathan H. Knorr a mle blechoel el melekoi el kmo, “Ke suub a betok el kirel a chad sel moureor el obengkel.” * A Jakobus a dirrek el locha mle sebechel mesa el kmo a “Jesus a mirrael el mo meklou a bedengel ma llemesel a rengul, e dul mle ungil er a rengul a Dios e ungil er a rengrir a re chad.” (Lk. 2:52) Me kede locha mo omdasu el kmo ngii a mle ta er tirke el mle kot el mo disaiplo er a Jesus. Engdi ngdimlak el uaisei.

3. Ngmilekera Jakobus er a lomuchel er a omesiungel a Jesus?

³ A Jakobus a dimlak bo le ta er a disaiplo er a Jesus er a loruul  er a omesiungel er tia el chutem. (Jn. 7:3-5) Ngika locha mle ta er tirke el chedal a Jesus el ulemdasu el kmo ng “mla mo kebelung!” (Mk. 3:21) E dirrek el diak a olechotel a kmo a Jakobus a ulebengkel a derrir er a Maria er sera a lemedeel a Jesus er a teluo el kerrekar.​—Jn. 19:25-27.

4. Ngera kede mo mesaod?

⁴ A uriul e a Jakobus a mlo oumerang er a Jesus e mlo ta er a remechuodel er a ongdibel er a Rekristiano. Ngar tia el suobel e kede mo mesaod a eru el tekoi el sebeched el suub er a Jakobus: (1) a uchul me ngkired el melemolem el ngariou a rengud me a (2) rolel e ngsebeched el mo ungil lolisechakl.

5. Ngmilekera Jakobus er a uriul er a lebo el duum er ngii a Jesus?

⁵ Ngoingerang e a Jakobus a mlo blak a rengul loltirakl er a Jesus? A Jesus er a lebekiis er a kodall e ng “mlo duum er a Jakobus, e mo duum er a re apostol el rokui.” (1 Ko. 15:7) Tia el odngelel a Jesus a ngildechii a klengar er a Jakobus. Ngika mle teloi er a rechapostol er a lengar er a delemerab el mengiil er a ngeiul a chedaol reng. (Rel. 1:13, 14) Uriul e a Jakobus a mlo er ngii a techellel el mesiou el chedal a governing body er seikid el taem. (Rel. 15:6, 13-22; Gal. 2:9) E a uchei er a rak er a 62 C.E. e ngmlukreng el mo luchesii a babier el mora rengellitel el Kristiano. Tiakid el babilengel a uchul a klungioled er chelechang a doba omelatk el mora eanged me a lechub e ngtia el chutem. (Jak. 1:1) A doltirakl a tekingel a Josephus el mesuub a reksi er a Rechijudea, e a Ngarbab el Prist er a Rechijudea el Ananias el ngelekel a Anas a ultebedii a tekingel me lokodir a Jakobus. Me a Jakobus a uleba blakerreng el mo lmuut er a lerekir a klengar er ngii er tia el chutem.

6. Ngoeak a ngera el rolel e a Jakobus a mle ngodech er a remengeteklel a klechelid er a taem er ngii?

⁶ A Jakobus a mle ngariou a rengul. Ngera uchul me ngsebeched el melekoi el uaisei? Molatk er a klekakerous er a Jakobus me a rebetok el mengeteklel a klechelid. A Jakobus er a leues a bleketakl el olechotel a kmo a Jesus a Ngelekel a Dios, e ngmloriou a rengul e kongei. Tirke el prist er a Jerusalem a dimlak loruul el uaisei. El ua tiang, ngdimlak el sebechir el mtekengii el kmo a Jesus a ulekisii a Lasarus. Engdi ngdimlak el kengei el kmo a Jesus a mlodurech er a Jehovah e bai mlo sorir lomekoad er ngii me a Lasarus. (Jn. 11:53; 12:9-11) Uriul er a lebekiis er a kodall a Jesus e te  millasem el lomart er a okisel er a rechad. (Mt. 28:11-15) A kldidiul a rengrir a uchul me te ultngeklii a Mesias.

7. Ngera uchul me ngkired el mengeroid er kid er a kldidairreng?

⁷ Klubeled: Mongeroid er kau er a kldidairreng, e mkengei er a Jehovah me lolisechakl er kau. Ngdi ua rakt el sebechel docherecher a ngurd er a chaidirengul a chad luchul e ngmo diak el sebechel lomomb, ngdi osisiu a kldidairreng a sebechel docherecherii a rengud me ngmo diak el sebeched el kongei a ulekrael er a Jehovah. A Refarisi a dillecherecher a rengrir me ngdimlak el sebechir el kongei a bleketakl el ocholt er a chedaol reng er a Dios. (Jn. 12:37-40) Tia kmal mle kengaol le ngmlo uchul e ngdiak el sebechir el nguu a diak a ulebengelel el klengar. (Mt. 23:13, 33) Me ngkmal klou a ultutelel el dolemolem el lomechei er a Tekingel a Dios me a chedaol reng er ngii me lolodech a blekerdeled e lomekrael er a uldesued me a tekoi el dolilt! (Jak. 3:17) A Jakobus el mle ngariou a rengul a uchul me ngmle sebechel kongei el mosisechakl er a Jehovah. E ua bo desang, tia el klengariourreng er ngii a uchul e ngmlo ungil sensei.

8. Ngera mo ngosukid el mo ungil sensei?

⁸ A Jakobus a dimlak a kmal skulel. Me tirke el mengeteklel a klechelid er a taem er ngii a locha kmal ulemes er ngii el di ua apostol Petrus me a Johanes el kmo “te di chad el diak a skulir.” (Rel. 4:13) Engdi a Jakobus a silubii el mo ungil sensei, el ua desa er a babier el lelilechesii. Kid a locha di ua Jakobus el dimlak detobed er a ngarbab el skuul. Engdi ngoeak a ulengesuil a chedaol reng er a Jehovah me a training el dolai er a cheldebechelel e ngsebeched el mo ungil sensei. Ka me domes er a kerebai el lekiltmeklii a Jakobus me a tekoi el sebeched el suub er ngii.

9. Ngmekera omosaod er a rolel e a Jakobus a ullisechakl?

⁹ A Jakobus a dimlak lousbech a meklou el tekoi me a meringel el omesaod. Sei a uchul me a rechad lulerrenges er ngii a mle medengei a kirir el meruul me a rolel e te mo remuul. El ua tiang, molatk er a beot el omesodel a Jakobus er a lolisechakl er a Rekristiano el kmo ngkirir el kongei el mo chuarm a diak el melemalt el omeruul e diak longemekl a kngtil a rengrir. Ngmilluches el kmo: “Kede omes er tirke el  uluutekangel el dmeu a rengrir. Kom mla rongesii a chisel a Job el kmo nguluutekangel e milsa aike el riruul a Jehovah el kmo, a Jehovah a mui er a bltikerreng me a klechubechub.” (Jak. 5:11, NW) Mutebengii el kmo a uchetemel a osisecheklel a Jakobus a mlengai er a Bades. Nguluusbech er a Tekingel a Dios el lolengeseu er tirke el orrenges er ngii el mesa el kmo a Jehovah, el ua lurruul el mora Job, a mo omekngeltengat er tirke el oba blakerreng el mo er ngii. A Jakobus a ulsisechakl er tia el suobel lousbech a beot el omelekoi me a omesaod. Ngoeak tiakid el rolel e ngngilai a rokui el klebkall el msa Jehovah, el diak el ngii.

10. Ngera ta er a rolel e ngsebeched loukerebai er a Jakobus sel dolisechakl?

¹⁰ Klubeled: Bo lebeot a rolel omolisechakl e lemengai a uchetemel er a Tekingel a Dios. Ngdiak le turrekong er kid a olecholt er kid el kmo ngkmal betok a klemedengei er kid, e ngbai soad locholt aike el lodengei a Jehovah me a bltkil a rengul el mora rechad. (Rom 11:33) Ngsebeched lotutii tia el turrekong a lsekum a tekinged a mengai er a Bades. El ua tiang, ngdiak douchais er a chad el dosuub lobengkel a tekoi el kid a mo meruul er ngii a lsekum e kede mle ngii, e ngbai soad el ngosuir el mo omtab a kerebai er a Biblia e mo medengelii a uldesuel a Jehovah. Seikid e ngmo soal el odeuir a rengul a Jehovah, el diak el kid.

11. Ngera el omelsemai a ble lechebangel a rebebil Kristiano er a taem er a Jakobus, e ngera el ulekrael a lebilsterir? (Jakobus 5:13-15)

¹¹ A Jakobus a dimlak lolechib er osengel er a tekoi el mla er ngii. Ngar er a babilengel e kede mesa el kmo a Jakobus a mle medengei omelsemai el lechelebangel a rekldemel e milsterir a bleketakl el ulekrael el kirir el meruul el mo mesisiich. El ua tiang, a rebebil Kristiano a mle meoud el mo oltaut a ulekrael. (Jak. 1:22) A rekuk bebil a milengetukel e di mle sorir a remerau. (Jak. 2:1-3) E mla er ngii tirke el mle meringel er tir a mtebechel a ngerir. (Jak. 3:8-10) Tirka el Kristiano mla er ngii a mekngit el blekerdelir me nguaisei engdi a Jakobus uluumerang el kmo ngsebechir el ngmodech. Ngika di mle bleketakl el mesterir a ulekrael engdi nguleba delemedemek. Ngdirrek el millisiich er tirke el uluusbech a ngeso me lolengit er a remechuodel me lengesuterir.​—Monguiu er a Jakobus 5:13-15.

12. Mekera dolemolem loba ungil uldasu sel dolengeseu er a rechad el dosuub el obengterir?

¹² Klubeled: Lak molechib osengem er a tekoi, engdi molemolem el oba ungil uldasu el kirir. A rebetok er tirke el dosuub el obengterir a locha mo meringel er tir oltaut a ulekrael. (Jak. 4:1-4) Ngmo ousbech a taem el melodech a mekngit el omerellir e omekeroul a blekerdelir a Rekristiano. Ngsoad el mo ua Jakobus e mo oba blekeu louchais er tirke el dosuub el obengterir a tekoi el kirir el meruul el olengeriakl. Ngdirrek el kired el melemolem el oba ungil uldasu e oumera el kmo a Jehovah a omekrael er a rengariou a rengrir el chad el mo er ngii e mo mesterir a klisiich el mo meruul omelodech er a klengar er tir.​—Jak. 4:10.

13. El ua losaod er ngii a Jakobus 3:2, ngngera ngmiltebengii a Jakobus?

¹³ A Jakobus a mle melemalt a uldesuel el kirel. Ngika dimlak lomdasu el kmo a telungalek er ngii me a ileakl el ngerechelel a rirellii el mo ileakl me a lechub e ngngarbab er a rudam me a rudos er ngii. Ngika ulemekedong er tir el “kemiu el betik er a renguk el odam er ngak!” (Jak. 1:16, 19; 2:5) Ngdimlak el loruul er a rechad el mo omdasu el kmo ngii a kmal diak bo leruul a cheleuid. E ngbai sera loluches e ngdilu el kmo: “Kede rokui el blechoel el mo e mecheuid a omerelled.”​—Monguiu er a Jakobus 3:2.

14. Ngera uchul me ngkired el kongei el louchais el kmo kede dirrek el mo remuul a cheleuid?

 ¹⁴ Klubeled: Lak mobes el kmo kid el rokui a uldiukes er a klengit. Ngkmal diak el kired el omdasu el kmo kede ngarbab er tirke el dosuub el obengterir. E ngera uchul? A lsekum a kede rullii a chad el dosuub el obengkel el mo omdasu el kmo ngdiak doruul a cheleuid, e ngmo el mo omdasu el kmo ngkmal diak el sebechel cherrungel loltirakl a soal a Dios. Engdi sel bo debleketakl louchais er tir el kmo ngdimlak lebeot er kid oltirakl omellach er a Biblia e douchais er a rolel a Jehovah a mla ngosukid el mo mesisiich a omelsemai, e kede mo ngosuir el mo mesa el kmo ngkmal sebechel dirrek el mesiou er a Jehovah.

15. Ngmekera omosaod a okesiu el luluusbech a Jakobus? (Jakobus 3:2-6, 10-12)

¹⁵ A Jakobus uluusbech a okesiu el ngii a remutech a rengrir a rechad. Nguaisei el Jakobus a locha mlongeseu loeak a chedaol reng engdi nglocha dirrek el kmal siluub a betok el kirel a rolel a dolisechakl er a losuub okesiu el luluusbech a obekul er a Jesus. A okesiu el luluusbech a Jakobus el ngar er a babilengel a mle beot me a otutel a mle bleketakl.​—Monguiu er a Jakobus 3:2-6, 10-12.

16. Ngera uchul me ngkired el mo ungil lousbech a okesiu?

¹⁶ Klubeled: Mousbech a okesiu el lodengei a rechad. Sel mungil lousbech a okesiu e ke ngosuterir a rechad el luchesii a tekoi el molisechakl er ngii er a uldesuir. Aika el siasing el leues er a uldesuir a ngosuterir el mo diak lobes a meklou a ultutelel klemerang er a Biblia. A Jesus a kmal meduch lousbech a okesiu e a ochellel er a Jakobus a uleltirakl er a kerebai er ngii. Ka me dosaod er a ta er a okesiu er a Jakobus e desa uchul me ngkmal uluureor.

17. Ngera uchul me ngkmal loureor a okesiu el debetik er ngii er a Jakobus 1:22-25?

¹⁷ Monguiu er a Jakobus 1:22-25. A okesiu er a Jakobus el kirel a dirk a betok a uchul me ngkmal loureor. Ngika ullisechakl er a ileakl el tekoi el kmo a lsoad el ngmai a klungioled er a Tekingel a Dios e ngdiak el sebeched el di menguiu ngkired loltaut. Me a Jakobus uluusbech er a okesiu el beot er kid a mtebengii. Ngchad el omes er ngii er a dirk. Ngera ngmillasem lolisechakl er ngii? Ngkmal klebelung el tekoi a lsekum a chad omes er a dirk e mesa tekoi el sebechel sumecheklii engdi ngdiak a ngera el lerellii. Ngdi osisiu, ngkmal klebelung a donguiu er a Tekingel a Dios e desa tekoi el  kired el melodech er ngii er a blekerdeled e diak doruul el uaisei.

18. Ngera el edei el tekoi a kired el meruul sel dousbech a okesiu?

¹⁸ Sel mousbech a okesiu e ngsebechem loukerebai er a Jakobus sel moruul aika el edei el tekoi: (1) Make sure el kmo okesiu el mousbech er ngii a chatter er a tekoi el mosaod er ngii. (2) Mousbech a okesiu el beot er a rechad el lorrenges el mo mtebengii. (3) Mrellii a belkul a okesiu el mo bleketakl. A lsekum e ngmeringel er kau a metik a ungil okesiu e ngsebechem el lomes er a Watch Tower Publications Index. Ngar cheungel a “Illustrations” e ke mo metik a betok el okesiu el sebechem el ousbech. Lak mobes el kmo a okesiu a di ua microphone el rullii a suobel molisechakl er ngii el mo stand out. Me ngkirem el di omekesiu aike el meklou a ultutelel tekoi el soam el olisechakl. Me nguaisei engdi sel kot el klou a ultutelel luchul me ngsoad el lmuut el mo ungil el olisechakl a mo olengeseu er a rechad el me chedal a telungalek er a Jehovah, el diak el meruul er kid el mo ungil er osengir a rechad.

19. Mekera dochotii el kmo kede mengreos er a telungalek er kid er a klereng?

¹⁹ A Jakobus a mla er ngii a obekul el mle cherrungel, engdi kid a diak. Me nguaisei engdi ngngar ngii a ileakl el techelled el mesiou er a Jehovah lobengkel tia el kmal klou el telungalek er kid er a klereng. Kede ochotii a bltkil a rengud el mo er tir loeak sel dongoit a taem el obengterir, dolai a klubeled er tir, e dedak el blak a rengud el omerk e olisechakl. Sel debora tkurrebab el klisiched el loukerebai er a Jakobus el ngar er a omerelled, uldesued, me a rolel a dolisechakl e kede kobkellii a Jehovah e ngosuterir a rengariou a rengrir el chad el mo kmeed er ngika el Demad el ngar er a eanged.