1-2. (a) Oingerang e kid a kmal mo melatk er a betik er a rengud el mla mad? (b) Ngera ngkiltmeklii a Jesus er sel kesus er a uchei er a lemad?

 ALTA ngmeketeket er a lemad a rebetik er a rengud, engdi ngkmal dirkak dobes er tir. Kede tokubets el mo melatk er tir er sel sils el lemlad er ngii.

² Bek el rak e kede mo teloi er a rebetok el miliol el chad el meliuekl er a beluulechad el rokir el mengedaol er a kodellel a kmal betik er a rengud el Jesus Kristus. (1 Pe. 1:8) Kede mo dmak el melatk er ngika el tilengetengii a klengar er ngii el olubet el kired e ulsebelid er a klengit me a kodall. (Mt. 20:28) A Jesus a kmal mle soal a rultirakl er ngii a lak lobes er a kodellel. Sel kesus er a uchei er a lemad e ngkiltmeklii a ileakl el belsoil e dilu el kmo: “Moruul er ngii el kirel omeltkiu er ngak.”​—Lk. 22:19.

3. Ngera kede mo mesaod er tia el suobel?

³ A kekerei el delebechel er tirke el mora Chedaol Belsoil a oba omelatk el mora eanged. Me nguaisei, a rebetok el miliol loba omelatk el mo kiei er tia el chutem a dirrek el mo er tia el ongdibel. Ngar tia el suobel e kede mo mesaod a uchul me aika el teblo el group a kmal sorir el mora Chedaol Belsoil er a bek el rak. Kede dirrek el mo mesaod a klungiolel sel debong. Me a kot e me dosaod a bebil luchul me a rengellitel a mora Chedaol Belsoil.

4. Ngera uchul me a rengellitel a menga er a blauang e melim er a bilong er a temel a Chedaol Belsoil?

⁴ A rengellitel a kmal dmeu a rengrir el mora Chedaol Belsoil er a bek el rak el mo melai a klekedall er a Chedaol Belsoil. Ngera uchul me te menga er a blauang e melim er a bilong? A bo donger er tiang e me dolatk a dilubech er sel ulebongel el kesus er a klengar er a Jesus er tia el chutem. Uriul er a bo lemerek el meruul er a Baskua e a Jesus a kiltmeklii a Chedaol Belsoil er a Rubak. Ngika milsterir a blauang me a bilong e dilu er tir me longang e lolim. Ngmilsaod el mo er tir a eru el telbiil, el ngii a beches el telbiil me a telbiil el kirel a Renged. * (Lk. 22:19, 20, 28-30) Aika el telbiil a mlo uchul me tirka el apostol me a rebebil a sebechir el mo king e prist er a eanged. (Och. 5:10; 14:1) Me te di rengellitel el chedal aika el telbiil a sebechir el menga er a blauang e melim er a bilong.

5. Ngera te mtebengii a rengellitel el kirel a omelatk el bla lenguu?

⁵ Tiakid a dirrek el ta er a uchul me a rengellitel a kmal sorir el mora Chedaol Belsoil: Ngmesterir a techellir el mo melatk el kirel a omeltkir. A Jehovah a mla mesterir a mengasireng el omelatk el mo nguu a diak el ngemed el klengar er a eanged e mo mengedereder lobengkel a Jesus Kristus el ta er a re 144,000. E a ngaruchei er ngii te mora medal a Jehovah el Dios! (1 Ko. 15:51-53; 1 Jn. 3:2) A rengellitel a mtebengii el kmo te mla nguu a ileakl el techall el mora eanged, me nguaisei engdi ngkirir el lomelemelii a blakerreng er tir el mora kodall e mo nguu tia el omelatk. (2 Ti. 4:7, 8) Ngkmal dmeu a rengrir sel lolatk er tia el omeltkir. (Tit. 2:13) E kuk mekerang a “rekuk bebil el sib”? (Jn. 10:16, NW) Ngera bebil er a uchul e te mora Chedaol Belsoil?

6. Ngera uchul me a rekuk bebil el sib a mora Chedaol Belsoil er a bek el rak?

⁶ A rekuk bebil el sib a mora Chedaol Belsoil el diak bo lolai a klekedall te bai di omes. A ileakl el invitation el mora Chedaol Belsoil a tilobed el mora rekuk bebil el sib er a 1938. A The Watchtower er a March 1, 1938 a melekoi el kmo: ”Ngkmal melemalt el tekoi el [rekuk bebil el sib] a mo teloi er a oketmeklel a miting er a Chedaol Belsoil. . . . Ngkirel dmeu a rengrir e uaisei el dmeu a rengrir el teloi er tia el ongdibel.” Ngdi ua rechad el dmeu a rengrir el mora merengel a chebechiil, a rekuk bebil el sib me te dirrek el kmal dmeu a rengrir el mora Chedaol Belsoil.

7. Ngera uchul me a rekuk bebil el sib a kmal semeriar el kirel a cheldecheduch er a Chedaol Belsoil?

⁷ A rekuk bebil el sib me te dirrek el melatk el kirel a omeltkir. Te kmal semeriar el kirel a cheldecheduch er a Chedaol Belsoil, e le klou er ngii a mesaod el kirel aike el bo loruul a Kristus me a re 144,000 el kirir a reblak a rengrir el chad er sel Ta el Telael el Rak er Omerreder. Ngar cheungel a ulekrolel a King er tir el Jesus Kristus e tirka el 144,000 a mo olengeseu el meruul er tia el chutem el mo baradis e ngosuterir a rechad el mo mecherrungel. Ka di molatk er a deurreng el lolechesuar tirka el betok el miliol el mora Chedaol Belsoil sel lolebedebek otutel a ulaoch er a Biblia el uaike el debetik er a Isaia 35: 5, 6; 65:21-23; me a Ocholt 21:3, 4. Sel lolebedebek er tir me a rebetik er a rengrir el ngar er a beches el blekeradel e ngsmisichii a omeltkir el kirel a ngar mederir e smisiich a rengrir el mo melemolem el mesiou er a Jehovah.​—Mt. 24:13; Gal. 6:9.

8. Ngera dirrek el ta er a uchul me a rekuk bebil el sib a mora Chedaol Belsoil?

⁸ Molatk er a ta er a uchul me a rekuk bebil el sib a mora Chedaol Belsoil. Ngsorir lolecholt er a bltkil a rengrir me a support er tir el mora rengellitel. A Tekingel a Dios a ulemlaoch el kmo ngmo er ngii a kmes el deleuill er a rengellitel me tirke el oba omelatk el di kiei er tia el chutem. Ngoeak a ngera rolel? Ka me dosaod a bebil lolechotel.

9. Sel ulaoch el ngar er a Sekaria 8:23, NW ngouchais el kmo ngmo uangera uldesuir a rekuk bebil el sib el bedul a rengellitel?

⁹ Monguiu er a Sekaria 8:23, NW. * Tia el ulaoch a klebokel el mesaod er a uldesuir a rekuk bebil el sib el kirir a rengellitel el odam me a odos er tir. A tekoi el “chad er a Judea” me a “obengkemiu” a di dul melutk el kirir a rengellitel. (Rom 2:28, 29) E a “reteruich el chad er a bek el omelekoi er aike el ngodech el beluu” a melutk er a rekuk bebil el sib. Tirka ‘orrekedeterir’ er a rengellitel e mo obengterir el ngar er a bliochel el omengull. Me sel kesus er a Chedaol Belsoil e a rekuk bebil el sib a mo teloi er a rengellitel el olecholt er a bltkil a rengrir el mo er tir.

10. Ngera ngmla meruul er ngii a Jehovah el oltaut er a ulaoch el ngar er a Esekiel 37:15-19, 24, 25?

¹⁰ Monguiu er a Esekiel 37:15-19, 24, 25. A Jehovah a ultutii tia el ulaoch er a relleterir a rengellitel me a rekuk bebil el sib el mo dmak el oureor. Tia el ulaoch a mesaod el kirel a teblo el teluo er a ulelkael el kerrekar. Tirke el oba omelatk el mora eanged a di ua sel kerrekar “er a Juda” (el ngii sel kebliil el letilobed er ngii a reking er a Israel) e tirke el oba omelatk el di ngar tia el chutem a di ua sel kerrekar er a “renged er a Israel.” * A Jehovah a mo oldak aika el erung me ngdi mo ua “di le teluong el ulelkael.” Tia belkul a kmo te dmak el mesiou er cheungel a di chimo el King er tir el Kristus Jesus. Bek el rak e a rengellitel me a rekuk bebil el sib a mora Chedaol Belsoil el diak el eru el kakerous el group e ngbai “tal delebechel” el ngar cheungel a “tal mengkerengel a sib.”​—Jn. 10:16.

11. Te mekera “sib” el losaod er ngii a Mateus 25:31-36, 40 e ochotii a ngelsurir el mora rudam er a Kristus?

¹¹ Monguiu er a Mateus 25:31-36, 40. “A sib” er tia el okesiu a melutk el kirir a rekuk bebil el sib el tir tirke el melemalt el chad er a taem er a ulebongel el oba omelatk el mo kiei er tia el chutem. Te blak a rengrir lolengeseu er a rengellitel odam er a Kristus el kutmeklii a ngerechelir el meruul er a ureor er a beluulechad el rokir el omerk e olisechakl.​—Mt. 24:14; 28:19, 20.

12-13. Ngera lmuut el bebil er a rolel e a rekuk bebil el sib a olengeseu er a rudam er a Kristus?

¹² Bek el rak e a sesei el sandei er uchei er a Chedaol Belsoil e a rekuk bebil el sib a olengeseu er a rudam er a Kristus el invite er a rechad er a beluulechad el rokir el mo er tia el ongdibel. (Momes er a baks el “ Kau, Ngdi Uchei e Ke Melib el Kirel a Chedaol Belsoil?”)  Te dirrek el lolengeseu me bo lsebechel a bek el ongdibel er a beluulechad el rokir el mo mengetmokl er tia el miting alta ruumesingd el chedal aika el ongdibel a diak lolai a klekedall er a Chedaol Belsoil. Tirka el kuk bebil el sib a kmal dmeu a rengrir el olengeseu er a rudam er a Jesus el ngar er aika el rolel. Te medengei el kmo a Jesus a omes omerellir el mora rengellitel el ua le omerellir el mo er ngii.​—Mt. 25:37-40.

¹³ Ngera lmuut el bebil er a uchul me kid el rokui a mora Chedaol Belsoil?

14. Ngmekera Jehovah me a Jesus e mla ochotii a klou el bltkil a rengrir el mei er kid?

¹⁴ Kede oba omereng el saul el kirel a bltikerreng el bla lochotii a Jehovah me a Jesus el mei er kid. A Jehovah mla ochotii a bltkil a rengul el ngar er a betok el rolel engdi a chimo er ngii a kmal ileakl. A Dios er kid ulechotii a kot el klou el lolechotel a bltkil a rengul el mei er kid er a loderechii a Ngelekel el me chuarm e mad el kired. (Jn. 3:16) Kede dirrek el medengei el kmo a Jesus a ulechotii a klou el bltkil a rengul er a lekengei el me mad el kired. (Jn. 15:13) Ngkmal diak el sebeched el mtechei a sulir el kirel a bltikerreng el bla lochotii. Engdi ngsebeched lochotii omereng el saul er kid loeak a klengar er kid er a bek el sils. (Kol. 3:15) Kede dirrek el mora Chedaol Belsoil e le ngsoad el melatk er a bltkil a rengrir el mei er kid me a dirrek el bltkil a rengud el mo er tir.

15. Ngera uchul me a rengellitel me a rekuk bebil el sib a mengreos er a olubet el sengk?

¹⁵ Kede kmal mengreos er a olubet el sengk. (Mt. 20:28) A rengellitel a kmal mengreos er a olubet le tia uchul a omeltkir el mora eanged. A klaumerang er tir er a tengetengel a Kristus a uchul me a Jehovah omes er tir el melemalt e rodelterir el mo ngelekel. (Rom 5:1; 8:15-17, 23) A rekuk bebil el sib me te dirrek el kmal oba omereng el saul el kirel a olubet. Klaumerang er tir er a tengetengel a Kristus a uchul me te klikiid er osengel a Dios, sebechir el mesiou er ngii, e oba omelatk el mo suobel er a “kloul ringel.” (Och. 7:13-15, BT) A ta er a rolel e a rengellitel me a rekuk bebil el sib ochotii a omereng el saul er tir el kirel a olubet a sel lebora Chedaol Belsoil.

16. Ngera dirrek el ta er a uchul e kede mora Chedaol Belsoil?

¹⁶ A dirrek el ta er a uchul me kede mora Chedaol Belsoil a kid el soad el olengesenges er a Jesus. Me alta ngkakerous omeltked engdi ngkmal soad el olengesenges er a tekingel a Jesus er sel kesus er a leketmeklii a Chedaol Belsoil: “Moruul er tiang el kirel a omeltkiu er ngak.”​—1 Ko. 11:23, 24.

17. Ngmekera Chedaol Belsoil e ngosukid el lmuut el mo kmeed er a Jehovah?

¹⁷ Kede lmuut el mo kmeed er a Jehovah. (Jak. 4:8) Me ngua bla desuubii, a Chedaol Belsoil a meskid a techelled el mo melatk el kirel a omelatk el bla lebeskid a Jehovah e mo melebedebek er a klou el bltkil a rengul el mei er kid. (Jer. 29:11; 1 Jn. 4:8-10) Sel dolatk er a omeltked el kirel a ngar medad me a diak lemekimd el bltkil a rengul a Dios el mei er kid, e nglmuut el mo dmolech a bltkil a rengud el mora Jehovah e okesengii a deleuill er kid me ngii.​—Rom 8:38, 39.

18. Sel dolebedebek er a kerebil a Jesus e ngodbechid el mo mekerang?

¹⁸ Ngodbechid el mo oukerebai er a Jesus. (1 Pe. 2:21) Ngar aike el sils er a uchei  er a Chedaol Belsoil e kede menguiu a cheldecheduch er a Biblia el kirel sel ulebongel el sandei er a Jesus er a lengar tia el chutem, kodellel, me a okisel. E sel kesus er a Chedaol Belsoil e a cheldecheduch el motobed omeklatk er kid er a bltkil a rengul a Jesus el mei er kid. (Efe. 5:2; 1 Jn. 3:16) Me sel donguiu e dolebedebek el kirel a kerebil a Jesus, e ngrullid el mo soad el mo “ua teletelel.”​—1 Jn. 2:6.

19. Ngmekera dolemolem el ngar er a bltikerreng er a Dios?

¹⁹ Ngmeruul a rengud el mo melemolem el ngar er a bltikerreng er a Dios. (Jud. 20, 21) Kede melemolem el ngar er a bltikerreng er a Dios sel dolengesenges er ngii, dosebechakl er a ngklel, e dodeuir a rengul. (Osi. 27:11; Mt. 6:9; 1 Jn. 5:3) A oketmeklel a Chedaol Belsoil a odbechid el mo meruul er a klengar er kid er a bek el sils el mo ua dedu er a Jehovah el kmo, ‘Ngsoak el melemolem el ngar er a bltikerreng er kau el mo cherechar!’

20. Ngera ungil luchul e kede mora Chedaol Belsoil?

²⁰ Me a omelatk el dobang el mora eanged me a lechub e ngdi ngar tia el chutem a meskid a ungil luchul e kede mora Chedaol Belsoil. Bek el rak el sel bo dedak er tiakid el sils e kede melatk er a kodellel a betik er a rengud el Jesus Kristus. E a ngaruchei er ngii e kede melatk er sel kot el ngarbab el olechotel a bltikerreng, el ngii a bltkil a rengul a Jehovah el mei er kid er a loderechii a Ngelekel el mei el mo olubet. Chelecha el rak e a Chedaol Belsoil a mo er ngii er a Friday, April 15, 2022. Ngkmal betik a rengud er a Jehovah me a Ngelekel me a uchul e ngdiak a ngodech el klou ultutelel el kired el meruul er ngii er sel sils er a kodellel a Ngelekel el ua mora Chedaol Belsoil.