1-2. Ngera uchul me kede mora Chedaol Belsoil er a bek el rak?

 NGKMEED el 2,000 el rak er a mla me mong e a Jesus a tilengetengii a klengar er ngii el kired me bo lsebeched el nguu a diak a ulebengelel el klengar. Sel kesus er a uchei er a lemad e ngdilu er a rultirakl er ngii me lak lobes er tia el lerirellii loeak a loruul er a beot el belsoil er a blauang me a bilong.​—1 Ko. 11:23-26.

² Kede olengesenges a tekingel a Jesus le ngkmal betik a rengud er ngii. (Jn. 14:15) Ngar aike el sandei er a uchei me a uriul er a Chedaol Belsoil er a bek el rak, e kede ochotii omereng el saul el kirel a Jesus loeak sel dongoit a taem el meluluuch e melebedebek er a belkul a kodellel el kired. Ngdirrek el dmeu a rengud el menglou er a temed lomerk er a klumech el melisiich er a rokui el sebechir el me teloi er kid er tia el ileakl el sils. E uaisei, kede mla rullii a rengud el diak debechei a ngii di el ngerang me bo luchul e lak debora Chedaol Belsoil.

3. Ngera kede mo mesaod er tia el suobel?

³ Ngar tia el suobel e kede mo mesaod a edei el rolel e a rechedal a Jehovah mora tkurrebab el sebechir el mengedaol er a kodellel a Jesus: (1) meruul er a Chedaol Belsoil el ngar er a rolel el lechilderderii a Jesus, (2) invite er a rechad el mei er a Chedaol Belsoil, me a (3) meruul er a Chedaol Belsoil er a chelsel a meringel el blekeradel.

4. Ngera el klemerang a dosaod er a bek el rak er a Chedaol Belsoil, e ngera uchul me ngdiak el kired el mo meterekakl aika el klemerang el dodengei? (Lukas 22:19, 20)

⁴ Bek el rak er a temel Chedaol Belsoil e kede orrenges er a cheldecheduch el mengai er a Biblia el meskid a bleketakl el nger er a betok el ker. Kede suubii a uchul me a rechad ousbech er a olubet me a rolel a kodellel a ta el chad a kokedir a kngterir a rebetok. Kede muklatk el kmo a blauang me a bilong ngomtechei a ngerang e techa melai aika el klekedall. (Monguiu er a Lukas 22:19, 20.) Kede dirrek el melebedebek aike el klengeltengat er a ngar medad el taem el kirir tirke el oba omelatk el mo kiei er tia el chutem. (Isa. 35:5, 6; 65:17, 21-23) Ngkmal diak el soad el mo merekakl aika el klemerang. Rebetok el biliol el chad a diak lodengei ikang e diak lodengelii a kerresel a tengetengel a Jesus. Te dirrek el diak loruul er a Chedaol Belsoil el ngar er a rolel lechilderderii a Jesus. E ngera uchul?  

5. Uriul er a lemad a oumesingd er a rechapostol er a Jesus, e a rechad te mlo mekera longedaol er a kodellel a Jesus?

⁵ Uriul er a lemad a ruumesingd er a apostol er a Jesus, e a reklsuul Kristiano siliseb er a ongdibel. (Mt. 13:24-27, 37-39) Te ‘ulumulak e milengetikaik er a ruumerang el mo oltirakl er tir.’ (Rel. 20:29, 30) A ta er ngii el ‘blulak’ el blo lolisechakl tirka el klsuul el Kristiano a kmo, a Jesus a dimlak el di le “tal le modars el tenget el kirel loltour a kngterir ar betok,” el ua lolekoi a Biblia, e ngbai ngkirir di meruul er a tengetengel. (Heb. 9:27, 28, BT) A rebetok el chad er chelecha el taem oumerang er tia el klsuul losisechakl. Te mora ikelesia er a bek el sandei, a lebebil e ngbek el sils, el mo meruul er a tekoi lomekedong er ngii el “Klou el Misang.” b Aike el kuk bebil er a klechelid a diak longedaol er a kodellel a Jesus el uaisei, me nguaisei engdi oumesingd er a rechad er ngii a diak lodengelii a belkul a tengetengel a Jesus. A rebebil a locha melatk el kmo, ‘A kodellel a Jesus ngmera el sebechel mo uchul e a kngtik a musubes?’ Ngera uchul me te oker er tia el ker? E le rechad el diak loumera el kmo, a kodellel a Jesus a uchul me ngsebechel musubes a kngtid a mla rulleterir el mo omdasu el uaisei. Te mekera remera el oltirakl er a Jesus e mla ngosuterir a rechad el mo medengelii a belkul a tengetengel a Jesus me a melemalt el rolel a dongedaol er a kodellel? 

6. Sera 1872, e ngera te mlo medengelii a kekerei el cheldebechel el milerriter er a Biblia?

⁶ Sera ulebengelel aike el rak er a 1800 e a kekerei el delebechel el mesuub er a Biblia lulemekrael er ngii a Charles Taze Russell, a ulemuchel el merriter a Bades. Ngmle sorir el mo medengelii a mera el belkul a tengetengel a Jesus me a rolel e ngkired el mengedaol er a kodellel. Sera 1872 e te mlo medengei el kmo a Jesus a mera el kiltmeklii olubet el kirir a rokui el chad. Te dimlak el di el luk el kirel aika el lesiluub. Te bai ulemerk er ngii el mora rebebil loeak a babier, newspaper, me a magazine. E kedeb el taem er uriul er tiang e te mlo oltirakl er a rekot el Kristiano e mlo meruul er a Chedaol Belsoil el di ta er a ta el rak.

7. Ngoeak a ngera el rolel e kede melai a klungioled er a research er tirke el milerriter er a Biblia?

⁷ Chelecha el taem e kede melai a klungioled  er aika el research er tirka el Kristiano. Ngoeak a ngera el rolel? Ngoeak a klengeltengetel a Jehovah e kede mla mo medengelii a belkul a tengetengel a Jesus me aike el bo leketmokl el kired a rechad. (1 Johanes 2:1, 2) Kede dirrek el mla suubii el kmo ngteblo omelatk el kirir a rechad el lodeuir a rengul a Jehovah. Aikang a diak el sebechel metemall el klengar er a eanged el kirir a rebebil me a diak a ulebengelel klengar er tia el chutem el kirir a rebetok el miliol el chad. Kede lmuut el mo kmeed er a Jehovah sel dolatk er a klungel a bltkil a rengul el mei er kid me aike el klungiaol el dengai er a tengetengel a Jesus. (1 Pe. 3:18; 1 Jn. 4:9) Me ngdi uai tirka el blak a rengrir el odam er kid er a ngar er a mong, kede invite er a rechad el me teloi er kid el mengedaol er a Chedaol Belsoil loltirakl er a rolel el lechilderderii a Jesus.

8. Ngera te mla meruul a rechedal a Jehovah el invite er a rechad el mei er a Chedaol Belsoil? (Momes er a siasing.)

⁸ A rechedal a Jehovah mla mo betok el rak el le invite er a rechad el mei er a Chedaol Belsoil. A 1881 e a rudam me a rudos er a beluu er a Merikel a ble le invite er tir el mora blai er a Allegheny, Pennsylvania el mengedaol er a Chedaol Belsoil. Uriul e a derta el ongdibel a di mlo tir el meruul er ngii. E sera March 1940 e te dilu er a re publisher el kmo ngsebechir el invite er a ngii di el chad er a territory er tir el semeriar. A 1960 a mle kot el taem el Bethel a milsterir a rechad a printed el invitation. Seikid el taem el mei e ngbetok el biliol el invitation a mla merous. Ngera uchul me kede meringel loureor el invite er a rechad?

9-10. Te rua techa ngmai a klungiolir er a urered el invite er a rechad el mei er a Chedaol Belsoil? (Johanes 3:16)

 ⁹ A ta er a uchul me kede invite er a rechad el me mengedaol er a Chedaol Belsoil a soad tirke el ketengir el mei a bo lodengelii a klemerang el kirel a bla lerellii a Jehovah me a Jesus el kired el rokui. (Monguiu er a Johanes 3:16.) Ngomeltked el kmo aike el leues e lerenges er a Chedaol Belsoil a mo rulleterir el mo sorir el mesuub a lmuut el betok e mo mesiungel a Jehovah. Te ngar ngii a relmuut el bebil el dirrek el ngmai a klungiolir.

¹⁰ Kede dirrek el invite er tirke el mla mo diak losiou er a Jehovah. Kede meruul el uaisei louchais er tir el kmo a Dios a kmal dirk betik a rengul er tir. A rebetok a kongei el mei, e kmal dmeu a rengud el meseterir. Sel lebora Chedaol Belsoil e ngrulleterir el mo melatk er a deurreng el lulebang er a losiou er a Jehovah. Molatk er a Monica. c Temel a COVID-19 pandemic e ngliluut el mo omerk er a klumech. Uriul er a lebora Chedaol Belsoil er a 2021 e ngdilu el kmo: “Tia el Chedaol Belsoil a kmal ileakl er a renguk. Tia ketengek er a uriul er a 20 el rak el mo omerk er a klumech el mora rechad e invite er tir el mei er a Chedaol Belsoil. Ak kmal uleba renguk el rokir el meruul er ngii le ak mera loba omereng el saul el kirel a lerirellii a Jehovah me a Jesus el kirek.” (Psa. 103:1-4) Kede mora tkurrebab el sebeched el invite er a rechad a lekengei er kid me a lak, e le kede medengei el kmo a Jehovah appreciate er a blakerreng er kid.

11. Ngmekera Jehovah e mla omekngeltengat er a urered el invite er a rechad el mei er a Chedaol Belsoil? (Hagai 2:7)

¹¹ Jehovah kmal mla omekngeltengat er a urered el invite er a rechad el mei er a Chedaol Belsoil. Alta ngmla er ngii a melsemai er kid er a COVID-19 pandemic er a 2021, engdi tia sel rak el mle kot el betok a rechad el mei er a Chedaol Belsoil. Te mle 21,367,603 a mlei, el klou er a eru el chachisois el ildisel a Resioning er a Jehovah! Me nguaisei engdi a Jehovah diak lolatk er a ildisir a rechad e ngbai melatk er a derta el chad el mei. (Lk. 15:7; 1 Ti. 2:3, 4) Ngkmal ulterekokl a rengud el kmo Jehovah ousbech er a urered el merous a invitation el olengeseu er kid el osiik er tirke el bliochel a rengrir.​—Monguiu er a Hagai 2:7.

12. Ngera el blekeradel a sebechel rullii el mo meringel er kid a meruul er a Chedaol Belsoil? (Momes er a siasing.)

¹² A Jesus ulemlaoch el kmo, a taem er a uriul sils e kede mo chobangel a betok el ringel el ua ultok er a telungalek, odechelakl, mekemad, rakt, me a lmuut el bebil. (Mt. 10:36; Mk. 13:9; Lk. 21:10, 11) A lebebil e aika el blekeradel a rullii el mo meringel er kid a mengedaol er a kodellel a Jesus. Ngera te mla remuul a rudam me a rudos er kid el mo mesisiich er aika el omelsemai, e mekera Jehovah e mla ngosuterir?

13. Ngmilekera Jehovah e omekngeltengat er a blekengel a Artem me a blakerreng er ngii el mengedaol er a Chedaol Belsoil er a taem el lekelebus?

¹³ Kelebus. A rudam er kid el kelebus a meruul aike el sebechir el mo mengedaol er a kodellel a Jesus. Molatk er a Artem. Aike el sandei er uchei er a lebo er ngii a Chedaol Belsoil er a 2020 e ngmle kelebus el lobengterir a reteim el chad er a chelsel a cell el mle 183-sq-ft a klungel. Alta ngmle kelebus engdi ngmle sebechel metik aike el lousbech el kirel a klekedall er a Chedaol Belsoil, e millatk el mo oltobed er a cheldecheduch er a Chedaol Belsoil el kirel. Engdi tirka el mle kelebus lobengkel a milloko a dekool e uluusbech a betok el  mekngit el tekoi. Me ngmilekerang? Ngullengit er tir me lak loloko e lousbech a mekngit el tekoi el ta el sikang. Ngkmal mlo mechas a rengul e le te kilengei el diak loloko e lolekoi a mekngit el tekoi er a sils er a Chedaol Belsoil. Artem a kmo, “Ak mle offer louchais er tir el kirel a Chedaol Belsoil.” Alta te dilu el kmo ngdiak el sorir el lorrenges engdi uriul er a lomes er a Artem el meruul er a Chedaol Belsoil, e ngmlo betok a kerrir el kirel.

14. Te milekera rechedal a Jehovah e mengedaol er a Chedaol Belsoil alta ngmla er ngii a COVID-19 pandemic?

¹⁴ COVID-19 pandemic. Sera ledubech tia el pandemic, e a Resioning er a Jehovah mlo diak el sebechir el meruul er a Chedaol Belsoil er a blil a ongdibel. Engdi tia dimlak le tomer er tir el mengedaol er tia el sils. d Aike el ongdibel el mla er ngii a access er tir el mora Internet a mirruul er ngii loeak a videoconference. Engdi te milekerang tirke el betok el miliol el dimlak a access er tir el mora Internet? Ngar er a bebil beluu e a branch office a kiltmeklii a rolel e ngsebechir lomes er a cheldecheduch er a TV me a lechub te orrenges er  ngii er a razio. A lmuut kung, a branch a mle record er a cheldecheduch el ngar er a betok er a 500 el omelekoi me tirke el kiei el cheroid er a rechad a mle sebechir el meruul er a Chedaol Belsoil. E a reblak a rengrir el odam a ngilai aika el recording el mesterir a rudam el kiei aika el basio.

15. Ngera ke suubii er a Sue el ta er a mesuub er a Biblia?

¹⁵ Ultok er a telungalek. Sel kot el klou lomelsemai el kirir a rekuk bebil a ultok er a telungalek. Molatk er a ta er a mesuub er a Biblia el Sue ngklel. Sel sils er uchei er a Chedaol Belsoil er a 2021 e a Sue dilu er ngike el mesuub lobengkel el kmo, ultok er a telungalek er ngii a uchul me ngdiak el sebechel mora Chedaol Belsoil. Ngika el mesuub lobengkel a chiliuii a Lukas 22:44. E silodii el mo er ngii el kmo sel bo dechelebangel a ringel, e ngungil doukerebai er a Jesus e mora Jehovah er a nglunguuch e mo mui lulsirs er ngii. Ongingil sils e a Sue a kiltmokl a klekedall er a Chedaol Belsoil e ulemes er sel ileakl el prokuram er a Morning Worship er a jw.org. Seikid el kesus er a di le ngii el tang el ngar er a room er ngii e ngmle connect el mora Chedaol Belsoil lousbech er a dengua er ngii. Uriul e ngmilluches el mo er ngike el mesuub lobengkel el kmo: “Ke kmal millisiich er ngak er chelii. Ak mirruul aike el rokui el sebechek el mora Chedaol Belsoil e a Jehovah ngilsukak. Ngmera el dmeu a renguk e mera loba omereng el saul!” Omomdasu e a Jehovah ngsebechel ngosukau obo mchebengelii a osisiu el blekeradel?

16. Ngera uchul me ngulterekokl a rengud el kmo a Jehovah mo omekngeltengat er a blakerreng er kid el mora Chedaol Belsoil? (Rom 8:31, 32)

¹⁶ Jehovah kmal mengreos er a blakerreng er kid el mo mengedaol er a kodellel a Jesus. Ngkmal sebechel mo ulterekokl a rengud el kmo ngmo omekngeltengat er kid sel dochotii a omereng el saul er kid el kirel aike el bla leruul el kired. (Monguiu er a Rom 8:31, 32.) Mada derellii er a rengud el mora Chedaol Belsoil er chelecha el rak e bo doruul a lmuut el betok el kirel a Jehovah er aike el sandei el oeak uchei me a oeak uriul er ngii.