1. Ngera me der er a uldesuem sel molatk el kirel a Jehovah?

 NGMLA ta el molatk el kmo a Jehovah ngngua ngerang? Sel moluluuch el mo er ngii, e ngera me der er a uldesuem? Alta ngdiak el sebeched el mesa Jehovah engdi Biblia mesaod er ngii el ngar er a kakerous el rolel. Ngomekedong er ngii el “sils e omekreakl” e “ngau el meleseb.” (Psa. 84:​11, NW; Heb. 12:29) A ta el milluches er a Biblia milsaod er a Jehovah er a ues el lilsang el kmo ngdi ua teletelel a mekreos el bad el sapphire, medidiich el ua brons, me a orrekim. (Ese. 1:​26-28) Nglocha kmal obal a rengud er a bebil er aika el omesodel a teletelel a Jehovah me a lechub e ngrullid el mo melatk el kmo kid a kmal diak dengerang sel domekesiu er kid er ngii.

2. Ngera uchul me nglocha meringel er a rebebil el mo kmeed er a Jehovah?

² Kid el diak el sebeched el mesa Jehovah a uchul me nglocha mo meringel er kid oumerang el kmo ngbetik a rengul er kid. Tekoi el dilubech er a klengar er tir er a ngar er a mong a uchul me a rebebil omdasu el kmo ngkmal diak el sebechel a Jehovah el mo betik a rengul er tir. Nglocha dimlak a demad el betik a rengul er kid. A Jehovah understand a feelings er kid me a lerellii er kid. Me ngouchais er kid el kmo ngua ngera el chad loeak a Tekingel.

3. Ngera uchul me ngungil a bo dedmolech el merriter er a bltikerreng er a Jehovah?

³ A chimo el tekoi el kmal lungil smodii a Jehovah a bltikerreng. (1 Jn. 4:8) A Biblia kmo, a Jehovah a bltikerreng. Rokui el tekoi el loruul oeak a bltikerreng. A bltikerreng er a Dios a mekeald e mesisiich me ngdirrek lolecholt er ngii el mo er tirke el diak el betik a rengrir er ngii. (Mt. 5:​44, 45) Ngar tia el suobel e kede mo dmolech el mesaod er a Jehovah me a bltikerreng er ngii. Sel bo ledmolech a klemedengei er kid el kirel a Dios er kid, me ngii a lmuut el mo dmolech a bltkil a rengud el mo er ngii.

 A JEHOVAH A KMAL BETIK A RENGUL ER KID

4. Ngmo uangera uldesuem sel molatk er a blekokuii me a klechubechub er a Jehovah? (Dirrek el momes er a siasing.)

⁴ “A Rubak a kmal bekokuii e chubechubchad.” (Jak. 5:11) Ngar er a Biblia e a Jehovah omekesiu er ngii el mora chedil. (Isa. 66:​12, 13) Molatk er a chedil el kmal ungil lomekerreu er a kekerei el ngelekel. Ngorreked er ngii e ngmelechesokl er bebul ochil. Sel llangel me a lechub e ngngar ngii a meringel er ngii e ngdi mereched el mo ngosuir. Me sel dechuarm er a ringel e ngkmal sebeched lultuil er a bltikerreng er a Jehovah. A ta er a milluches er a Psalm a kmo: “Sel lesal mo ouedikel a renguk, e ng kau a cholodak e rullii a renguk el mo ungil.”—Psa. 94:19.

5. Ngera belkul er kau a diak lemengodech el bltikerreng er a Jehovah?

⁵ A Jehovah oba blakerreng. (Psa. 103:8) Ngdiak le give up er kid sel derellii a cheleuid. A renged er a Israel a mlo betok el taem el di letemellii a rengul a Jehovah engdi ngdi millemolem lolecholt er a bltikerreng el mora rechedal el mlora bulterreng e olterekokl a rengrir el kmo: “Ke mekreos er ngak, ele kmeskau a chetengakl, e betik a renguk er kau.” (Isa. 43:​4, 5) A bltikerreng er a Dios a dirkak el lemengodech. Ngkmal sebeched lultuil er a bltkil a rengul. Mo lmuut me a bla derellii oberaod el klengit me a Jehovah diak lebo lechitid. Sel douuchel er a rengud e dobult el lmuut el mo er ngii, e kede mo mesa el kmo ngkmal dirk betik a rengul er kid. Ngmla tibir el kmo ng “ousubes a klengit.” (Isa. 55:7) A Biblia mesaod er tia el klausubes er ngii el kmo ng “blsechel chomelisiich el mlar medal a Rubak.”—Rel. 3:​19, BT.

6. Ngera ngosisecheklid a Sekaria 2:8 el kirel a Jehovah?

⁶ Monguiu er a Sekaria 2:8. A Jehovah omekesiu er kid el mora chelsul a medal. A chelsul a medad a kmal sensitive e mekreos el part er a bedenged. Me a Jehovah a ua lolekoi el kmo, ‘A ngii di el chad el melemall er kau, el chedak, a melemall er a tekoi el kmal mekreos er a renguk.’ Ngii el betik a rengul er kid a uchul me ngkmal sensitive el kirel a feelings er kid e kmal soal protect er kid. Ngmo mekngit a rengul sel lemekngit a rengud. Me ngsebechel mo ulterekokl a rengud el meluluuch el kmo: “Momekerreu er ngak el ua omomekerreu er a chelsul a medam.”—Psa. 17:​8, NW.

7. Ngera uchul me ngkired el smisichii a klaumerang er kid er a bltkil a rengul a Jehovah?

⁷ A Jehovah soal a bo lulterekokl a rengum el kmo ngbetik a rengul er kau. Engdi ngmedengei el kmo a tekoi el dilubech er a klengar er kid er a  ngar er a mong a uchul me kede oumededenger el kmo ngsebechel mo betik a rengul er kid. Me a lechub e kede chelebangel a blekeradel er chelechang el melasem er a klaumerang er kid er a bltkil a rengul a Jehovah. Ngera mo oterekeklii a rengud? Sel bo dodengelii a rolel e a Jehovah olecholt er a bltkil a rengul el mora Jesus, rengellitel, me kid el rokui.

ROLEL A JEHOVAH OLECHOLT ER A BLTIKERRENG ER NGII

8. Ngera uchul me a Jesus a mle ulterekokl a rengul er a bltkil a rengul a Demal el mo er ngii?

⁸ Jehovah me a Ngelekel a mla dmak el kuk kemanget el taem er a ngii di el chad. Ngar er a chelsel aika el betok el biliol el rak el ledak el ngar er a eanged e te kmal mlo close e kaubltikerreng. A Jehovah uluuchais er a bltkil a rengul el mora ngelekel el ua donguiu el kirel er a Mateus 17:5. A Jehovah mle sebechel di melekoi el kmo, ‘Ngika odeuir a renguk.’ Engdi mle soal a bo dodengelii a klungel a bltkil a rengul el mora Jesus me ngulemekedong er ngii el “Ngika betik er a renguk el Ngelekek.” A Jehovah kmal mle proud er a Jesus me a tekoi el bo loruul. (Efe. 1:7) Me a Jesus a dimlak loumededenger er a bltkil a rengul a Demal el mo er ngii. Ngmera el mle mera el tekoi er a rengul a Jesus a bltkil a rengul a Demal el mo er ngii. Ngmle betok el taem el lolekoi el kmo a Demal a betik a rengul er ngii.—Jn. 3:35; 10:17; 17:24.

9. Ngera el tekoi a lousbech er ngii el mesaod er a bltkil a rengul a Jehovah el mora rengellitel? Mosaod. (Rom 5:5)

⁹ Jehovah dirrek el louchais er a bltkil a rengul el mora rengellitel. (Monguiu er a Rom 5:5.) Momtab er a tekoi el “moitel.” A ta el reference a mesaod er ngii el kmo “ngomaoch el mei er kid.” Tia mera lungil omesodel a klungel a bltkil a rengul a Jehovah el mora rengellitel! A rengellitel a medengei el kmo a “Dios . . . a betik a rengul er tir.” (Jud. 1, BT) A apostol Johanes a uluuchais aike el mlara rengul er a loluches el kmo: “Ka mosa kmal klou el bltkil a rengul a Dios er kid! Ng kmal klou a bltkil a rengul er kid me kede okedongall el kmo, ngelekel a Dios.” (1 Jn. 3:1) A Jehovah, ngdi betik a rengul er a rengellitel? Ngdiak, a Jehovah mla ochotii el kmo ngbetik a rengul er kid el rokui.

10. Ngera sel kot el ngarbab lolechotel a bltkil a rengul a Jehovah el mo er kau?

¹⁰ Ngera sel kot el ngarbab lochotel a kmo a Jehovah betik a rengul er kid? Ngolubet a kot el ngarbab lolechotel a bltikerreng er a uldekial a cherrengelel a eanged me a beluulechad! (Jn. 3:16; Rom 5:8) Jehovah milskid a mekreos er a rengul el Ngelekel, e mecherei me ngmad el kirir a rokui el chad me bo lsebechel musubes a kngtid e bo desechelil. (1 Jn. 4:10) Sel bo dolebedebek er a char el lekilkedir a Jehovah me a Jesus e ngmo sebeched el understand er a klungel a bltkil a rengrir el mei er a derta me a derta er kid. (Gal. 2:20) A olubet a dimlak lemekekad loltirakl er a llemeltel a Jehovah. Ngsengk er a bltikerreng. A Jehovah mla ochotii a bltkil a rengul el mei er kid loeak a letengetengii a Jesus, el ngike el kot el mekreos er a rengul. Ngmilecherei a Ngelekel me ngmo chuarm e mad el kired.

11. Ngera kede suubii er a Jeremia 31:3?

¹¹ Ngua bla dosaod, a Jehovah diak lorreked a bltkil a rengul e ngbai bleketakl louchais er a bltkil a rengul el mei er kid. (Monguiu er a Jeremia 31:3.) Jehovah mla okedid el mo er ngii le ngbetik a rengul er kid. (Momekesiu er a Duteronomi 7:​7, 8.) Ngdiak a chad me a lechub e ngngii di el ngerang el sebechel choridid er tia el bltikerreng. (Rom 8:​38, 39) Ngera ngrullii tia el bltikerreng el mo er kau? Monguiu er a Psalm 23 e mesa el kmo ngera ngrirellii el mora David a bltkil a rengul me a ulekerreuil a Jehovah el mo er ngii me a lerellii el mei er kid el rokui.

NGERA KE MO FEEL ER NGII SEL MOLATK ER A BLTIKERRENG ER A JEHOVAH?

12. Ngmekera om summarize er a Psalm 23?

¹² Monguiu er a Psalm 23:​1-6. Ngar er a Psalm 23 e a David a melekoi el lulterekokl a  rengul er a bltkil a rengul me a ulekerreuil a Jehovah. Ngmesaod er a mesisiich el deleuill er ngii me a Mengkerengel er a Jehovah. A David a mle feel safe lomechei er a Jehovah me ngomekrael er ngii, me a David a dirrek el kmal mle ultuil er a Jehovah. Ngmle medengei el kmo a bltikerreng er a Jehovah mo obengkel er a bek el sils er a klengar er ngii. Ngera uchul me ngkmal mle ulterekokl a rengul?

13. Ngera uchul me a David a mle ulterekokl a rengul er a ulekerreuil a Jehovah?

¹³ “Ng diak a kngesonges er ngii.” A David a mle feel el kmo a Jehovah ulemekerreu er ngii le ngmle blechoel omsang aike el lousbech. Ngdirrek el mle medengei el kmo a Jehovah a sechelil me ngii oba kengei er a Jehovah. A uchul me ngmle ulterekokl a rengul el kmo a ngii di el tekoi el mo duubech er a ngar medal e a Jehovah mo melemolem lomsang aike el lousbech. A klaumerang er ngii er a bltkil a rengul a Jehovah el mo er ngii a mle lmuut el mesisiich er aike el tekoi el omeksebek er a rengul, e milsang a dmolech el deurreng.—Psa. 16:11.

14. Ngmekera Jehovah e locha mo omekerreu er kid?

¹⁴ A Jehovah omekerreu er kid tokubets sel leduubech a mekngit er a klengar er kid. A Claire a el mesiou el ngar er a Bethel el mla mo betok er a 20 el rak a mlo diak lodengei el kmo ngmekerang er a bo le mekdekudem a oberaod el mondai el duubech el mora telungalek er ngii. A demal a milloched, a merrengel a milsuld a ngklel, me a telungalek er ngii urridii a kekerei el siobai er tir me a blirir. Ngmilekera Jehovah e ochotii a bltkil a rengul el mo er tir? A Claire a kmo: “A Jehovah ulterekeklii el kmo a telungalek er ngak a mla er ngii aike el lousbech er a bek el sils. Ngkmal mlo betok el taem el Jehovah milskemam lengelakl er aike el ki mousbech. Ak blechoel el melatk aike el taem el blok feel er a bltkil a rengul a Jehovah el mei er ngak, e kmal  mengreos. Aika mla ngosukak el melemolem el mesiou er a Jehovah er a temel a ringel.”

15. Ngera uchul me a David a mle feel el kmo ngngiluu a beches el klisiich? (Dirrek el momes er a siasing.)

¹⁵ “Ng meskak a beches el klisiich.” A lebebil e a David a mlo omelechesiu er a klou el berraod er a mondai me a ringel el ble lechebangel. (Psa. 18:​4-6) Engdi bltkil a rengul me a ulekerreuil a Jehovah a milsang a beches el klisiich. Jehovah ulemekrael er ngika el sechelil el kmal mesaul a bedengel el mora “mellekulek el chudel” me a “chelellakl ralm.” Me a David a mlo mesisiich e mle sebechel melemolem el mesiou er ngii loba deurreng.—Psa. 18:​28-32.

16. Ngmekera bltikerreng er a Jehovah e mla meskau a beches el klisiich?

¹⁶ Ngdi osisiu, ng “diak lemengodech el bltikerreng er a Jehovah uchul me ngdiak de ngemed” sel bo dechebangel a omelsemai me a ringel. (Kle. 3:​22, NW; Kol. 1:11) Molatk er a Rachel. Ngkmal mlo mekngit a rengul er a bechil a lechitii e lechitii a Jehovah er a temel a COVID-19 pandemic. Ngera ngmirruul er ngii a Jehovah el kirel? Ngkmo: “A Jehovah rirellak el mo melechesuar el kmo te ngar ngii a rebetik a rengrir er ngak. Ngrirellak el mo iliuekl er a resechelik el milengoit a taem el lobengkek, ullab a kelek el mei, send a message me a bades el mei er ngak el melisiich er ngak, mle smile er ngak, e millemolem lomeklatk er ngak el kmo a Jehovah omekerreu er ngak. Ak kmal blechoel el di mereng a sulel a Jehovah el mla meskak a klou el telungalek er ngak el kmal betik a rengrir er ngak.”

17. Ngera uchul me a David a ‘dimlak bo lemedakt’?

¹⁷ “Ng diak bo kmedakt e RUBAK, ele kau a obengkek!” A David a mle blechoel el mo chobangel a kdekudel el blekeradel e mle betok a remesisiich el cherrouel. Me nguaisei engdi bltkil a rengul a Jehovah a uchul me ngmle feel selebechakl. A David a mle feel er a Jehovah lobengkel er a chelsel a bek el blekeradel, e tia kmal ulelterekokl er a rengul. A uchul me ngmle sebechel mengitakl el kmo: “[Jehovah] ngilbetak er a rokui el dektek.” (Psa. 34:4) Alta ngmla er ngii a ungil luchul me a David a mlo medakt me nguaisei engdi bltkil a rengul a Jehovah mle lmuut el mesisiich er aika el dektel.

18. Ngmekera omodengei el kmo a Jehovah a betik a rengul er kau e sebechel smisichau sel obo medakt?

¹⁸ Sel dodengei el kmo a Jehovah a betik a rengul er kid e ngmekera smisichid sel bo dechebangel a ulekdakt? A Susi el pioneer a mesaod er a uldesuel ngii me a bechil er a lenguu a klengar er ngii a ngelekir el sechal: “Sel leduubech a kmal mekngit el tekoi er a klengar er kau, e ngkmal klou a lerellii el mo er kau me kau a feel el kmo ngdiak modengei el kmo ke mo mekerang. Engdi bltkil a rengul me a ulekerreuil a Jehovah a mla rullemam el mo feel selebechakl.” A Rachel el dulsaod er ngii er a uchei a kmo: “A ta el kesus er a lesal el kmal mo meringel a uluk er a klengiterreng e ak mlo medakt e suebek a renguk, me  ak lilangel el meluluuch el mora Jehovah. Ak mlo feel er ngii el mengellakl er a renguk el ua chedil a loruul el mora ngelekel, e ngimiit a medak. Ngkmal diak kubes er tia el tekoi.” A Tasos el ta er a remechuodel a mlo kelebus el eua el rak le ngii el dimlak el kengei el mo soldau. Ngmilekera experience er a bltkil a rengul me a ulekerreuil a Jehovah? Ngkmo: “A Jehovah milskak a betok er aike el kuluusbech. Tia silsichii a klaumerang er ngak el kmo ngsebechek el ultuil er ngii. Ngdirrek el loeak a chedaol reng er ngii e a Jehovah milskak a deurreng alta ak mlara basio el sebechel rullid el mo depressed. Tia ngilsukak el mo mesa el kmo sel kuureor el kmeed er ngii e ak ngmai a klungiolek er a ungilreng er ngii. Me a kulemuchel el pioneer er ak kelebus.”

MOLEKEED ER KAU ER A DIOS ER KAU

19. (a) Ngmo uangerang a nglunguched sel dodengei el kmo a Dios a betik a rengul er kid? (b) Ngera el lomesodel a bltikerreng er a Jehovah kmal rutechii a rengum? (Momes er a baks el “ Tekoi el Ngosukid el Mo Feel er a Mekeald el Bltikerreng er a Jehovah.”)

¹⁹ Aika el experience el bla desaod ochotii el kmo a Jehovah el “Dios er a bltikerreng” a obengked! (2 Ko. 13:11) Ngar ngii a klemeriarreng er ngii er a derta er kid. Ngulterekokl a rengud el kmo kede “selebechakl er a diak le mengodech el bltikerreng er ngii.” (Psa. 32:10) Sel bo dolebedebek er a rolel e ngmla ochotii a bltkil a rengul el mei er kid, me ngii a lmuut el mo mera el chad er a rengud me kid a lmuut el mo kmeed er ngii. Ngsebeched el mimokl el meluluuch el mo er ngii e ouchais er ngii el kmo kede kmal lousbech er a bltkil a rengul. Ngsebeched louchais er ngii a tekoi el suebek a rengud er ngii, lulterekokl a rengud el kmo ng understand e kmal soal lolengeseu er kid.—Psa. 145:​18, 19.

20. Ngmekera bltkil a rengul a Jehovah e okedid er ngii?

²⁰ Ngdi uaikid el soad el mo kmeed er a ngau sel mekelekolt, ngdirrek el soad el mo kmeed er a mekeald el bltikerreng er a Jehovah. Alta bltikerreng er a Jehovah kmal mesisiich engdi ngdirrek el medemedemek. Me bo ledeu a rengum le Jehovah a betik a rengul er kau. E monger er a bltkil a rengul el mo er kau el kmo: “Ng betik a renguk er a RUBAK”!—Psa. 116:1.