1-2. Ngera el ringel a locha bo lechebangel a reblak a rengrir el mesiungel a Jehovah?

 OBERAOD el tekoi el duubech a sebechel di ngodechii a klengar er kid. El ua tiang, a Luis a el blak a rengul el odam a mlo medengei el kmo ngkasinoma. A toktang a dilu er ngii el kmo ngdi chad el sesei el buil. E a Monika me a bechil a mle mechesang el mesiou er a Jehovah. A ta er a klebesei e a Monika miltik el kmo a bechil el ngii a ta er a remechuodel, a mla mo betok el rak el lomart er ngii e meruul er a klengit. E a Olivia el mesobil lodos a mle kirel chemiis e le ngmo er ngii a mesisiich el eolt. Sera lluut el mo remei e a blil a mla meteruud. Ngkmal di mle mereched el mengodech a klengar er tirka el tedei. Kau, ke medengelii a tekoi el lomelechesiu er ngii? Ngngar ngii a oberaod el tekoi el dilubech el mla ngodechii a klengar er kau?

² Kid el blak a rengud el mesiungel a Jehovah a ua rebek el chad el mo chobangel a ringel me a secher. Nglocha dirrek el kired el loutekangel a ultok me a lechub e ngodechelakl. Alta Jehovah diak lorrob aika el tekoi, ngtibir el mo ngosukid. (Isa. 41: 10) Ngoeak a ngelsuil e ngsebeched el melemolem el loba deurreng, e mo ungil melilt, e melemolem loba blakerreng el mo er ngii er a chelsel a kmal meringel el blekeradel. Ngar tia el suobel e kede mo merriter a eua el rolel e a Jehovah olengeseu er kid sel leduubech a klou el tekoi er a chelsel a klengar er kid. Kede dirrek el mo mesaod aike el kired el meruul el mo ngmai a ngeso el lomeskid a Jehovah.

JEHOVAH MO KOKERENGAU

3. Sel duubech a klou el tekoi er a klengar er kid, e nglocha mo meringel er kid el mekerang?

³ Omelsemai. Sel leduubech a klou el tekoi er a klengar er kid e ngmo meringel er kid a ungil el lomdasu e melilt. E ngerang? A rengud oberaod er a klou el ringel. E oberaod a uldesued er a sebekreng. Ngua dorael er a cheltechat el rael el diak dodengei el kmo kede mo bedul ker. Molatk a blo lomelechesiu tirke el teru el odos el dulsaod er tir er a uchei. Olivia kmo: “Ak kmal mlo feel er a klou el berraod. Ngdimlak kudengei el kmo ak mo mekerang er a lemeteruud a blik.” A Monika mesaod el kirel a kngtil a bechil el kmo: “Ngdimlak di el mekngit a renguk. Ngmera el miltemall a renguk. Ngdi mlo diak el sebechek el meruul a ngii di el ngerang. Ngkmal dimlak kumdasu el kmo tia sebechel duubech el mei er ngak.” Ngera ngtibir el mo meruul er ngii a Jehovah sel bo domelechesiu er a klou el berraod?

4. A doltirakl er a Filipi 4:​6, 7, e ngera ngtibir el mei er kid a Jehovah?

⁴ Loruul er ngii a Jehovah. Ngtibir el mo meskid a lolekoi er ngii a Biblia el kmo ng “budech er a Dios.” (Monguiu er a Filipi 4:​6, 7.) Tia el budech a melutk er sel chelellakl el reng el domelechesiu er ngii le kid el ngar ngii a mekreos el deleuill er kid me ngii. Tia el budech a “diak el sebechel a chad el mo cherrungel el medengelii,” ngengelakl er a ngii di el tekoi el sebeched el mdesuii. Ngmla ta el bom feel er a budech er uriul er a omeringel el meluluuch el mora Jehovah? Tiakid el feeling a “budech er a Dios.”

5. Ngmekera budech er a Dios e mengkar er a uldesued me a rengud?

⁵ Tia el osisiu el bades a kmo budech er a Dios a “mo mtebechel” me a lechub e ngmo kokar a ‘rengud me a uldesued.’ A tekoi el moiuid el kokar a mesaod el kirel a soldau el mengkar er a mats e omekerreu er ngii er a odechelakl. Me a rechad el kiliei er a mats el ngar ngii a mengkerengel a mle sebechir el mechiuaiu el ngar er a budech, e le te medengei e kmo ngngar ngii a resoldau el mengkar. Ngdi osisiu, a budech er a Dios sel longkar er a rengud me a uldesued e ngchelellakl a rengud le kede medengei el kmo kede selebechakl. (Psa. 4:8) Ngdi ua Hana, a blekeradel el dengar ngii a locha diak lemereched el mengodech, engdi kede melechesuar er a budech. (1 Sa. 1:​16-18) E sel de budech e ngsebeched el lungil omdasu e ungil melilt.

6. Ngera sebeched el meruul er ngii me denguu a budech er a Dios? (Dirrek el momes er a siasing.)

 ⁶ Kired el meruul er ngii. Sel bo lengar ngii a mengesang er kau e mokerir a mengkar. Ngmekera moruul er tiang? Moluluuch el dimerekmo bo momelechesiu er a budech er a Dios. (Lk. 11:​9, NW; 1 Th. 5:​17, BT) Luis el dulsaod er ngii er a uchei a smodii a rolel e ngii me a bechil er a Ana a mle sebechir el loutekangel er a bo lodengei el kmo ngmo mad er a chelsel a sesei el buil. Ngkmo: “Ngar tiakid el taem e ngmeringel er kid a melilt a rolel a ukeruul me a lmuut el bebil. Engdi ngmle sebecham el mo omelechesiu er a budech el nglunguuch a uchul.” A Luis me a bechil a kmo te kmal mle meringel el meluluuch e dimlak el mekimd el meluluuch, lolengit er a Jehovah me lomudech a uldesuir, longellakl a rengrir, e lebesterir a llomeserreng el mo ungil melilt. Me te mlo melechesuar er a ngelsuil. A lsekum ke chelebangel er a meringel el blekeradel e bo leblak a rengum el meluluuch. Seikid e ke mo omelechesiu er a budech er a Jehovah el mengkar er a uldesuem me a rengum.—Rom 12:12.

JEHOVAH MO MTEBECHELAU

7. Kede locha mo omelechesiu a ngerang sel dechelebangel er a meringel el blekeradel?

⁷ Omelsemai. Sel dechelebangel er a meringel el blekeradel e ngdiak domdasu, domelechesiu, me a lechub e doruul a tekoi el ua blechoel el blekerdeled. Ngdi ua diall el ses el eolt obang el mong e mei, a kakerous el feelings er kid me ngsebechel lobekid el mong e mei. Ana el dulsaod er ngii er a uchei a kmo ngmlo omelechesiu a kakerous el tekoi er a lemad a Luis. Ngmelekoi el kmo: “Sel lebebil ak kmal mo depressed e di ngak el mo chubkak. Ngdirrek el kmal mo kesib a renguk le ngii el mla mo dibus.” A Ana dirrek el mlo sabisi e kesib a rengul el melilt a tekoi el mle ngerechelel a Luis. A lebebil e ngmo feel el kmo ngchelebangel er a mesisiich el eolt er a melengel a kereker. Ngmekera Jehovah olengeseu er kid sel demeeleb er a kakerous el feelings?

8. Ngua losaod a Isaia 33:6 (NW), ngera ngolterekokl er a rengud er ngii a Jehovah?

⁸ Loruul er ngii a Jehovah. Ngolterekokl er a rengud el kmo ngmo mtebechelid. (Monguiu er a Isaia 33:​6, NW. b) A diall sel lechebengelii a ses el eolt e ngmo omteuitech e tia kengaol. Me ngngar ngii a ileakl el desemelel me tobed er cheungel a daob er a bitang me a bitang. Aika rullii a diall el mo diak el sal lomteuitech me a rechad el ngar er a diall a selebechakl e ungil a rengrir. Engdi ika el tebechelel a diall a ungil loureor a lsekum a diall a merael el beduluchei. Ngdi osisiu a Jehovah mo mtebechelid sel dolemolem el merael el beduluchei loba blakerreng er a chelsel a ringel.

9. Ngmekera aike el dongu er kid el kirel a research e sebechel ngosukid el mtebechel a rengud me a uldesued? (Dirrek el momes er a siasing.)

 ⁹ Kired el meruul er ngii. Sel mchelebangel er a ses el eolt er a klengar er kau e bora tkurrebab el sebechem el meluluuch, ngar er a miting, e omerk er a klumech. Nglocha diak el sebechem el meruul a betok el ua ngar er a mong engdi lak mobes el kmo, a Jehovah tabesul el Dios. (Momekesiu er a Lukas 21:​1-4.) Ngdirrek el mketmeklii a temem el mo meruul er a omesubem el di kau el tang me a omelebedebek. E ngerang? A Jehovah mla meskid a betok el suobel me a video loeak a cheldebechelel el ngii a ngosukid el mtebechelii a rengud me a uldesued. Ngsebechem lousbech er a JW Library^®app, Watch Tower Publications Index, me a Research Guide for Jehovah’s Witnesses el losiik omousbech. A Monika el dulsaod er ngii er a uchei a kmo nguluusbech aika el dongu el kirel a research er aike el taem el bo le feel er a sesengel a blekeradel el lebla er ngii. El ua tiang ngmle search er a tekoi el “anger.” E a lebebil e ng search er a “betrayal” me a lechub e ng “loyalty.” E menguiu aike el lebetik el dimerekmo bo lungil a rengul. Ngkmo: “Sel kumuchel el research e ngouedikel a renguk engdi sel kulemolem el menguiu e ak mo feel er a Jehovah el ua lomechull er ngak. Sera kunguiu e ak mlo mtebengii el kmo a Jehovah understand aika el kakerous el feelings er ngak e olengeseu er ngak.” Chouaika el ngelsuil a Jehovah ngosukid el mtebechel a rengud me a uldesued el mo er sel bo lemeiusech a blekeradel.—Psa. 119:​143, 144.

JEHOVAH MO NGOSUKAU

10. Uriul er a leduubech a klou el tekoi, e kede locha mo feel el uangerang?

¹⁰ Omelsemai. Uriul er a klou el tekoi el dilubech e ngmo er ngii aike el sils el diak a klisichel a bedenged me a rengud. Kede locha ua chad er a klekool el kmal mle bekerurt engdi chelechang e kede melechedoi. Nglocha meringel er kid el meruul a tekoi el uchei e ngkmal beot er kid el kutmokl, me a lechub e ngdiak a klemeriarreng er kid el meruul a tekoi el uchei e ngkmal soad el meruul. Kede locha mo ua Elias el meringel er kid a mekiis. Ngsoad el di mechiuaiu. (1 Ki. 19:​5-7) Ngera ngtibir a Jehovah sel bo lak a klisiched el meruul a ngerang?

11. Ngera ta er a rolel e a Jehovah olengeseu er kid? (Psalm 94:18)

¹¹ Loruul er ngii a Jehovah. Ngtibir el mo ngosukid. (Monguiu er a Psalm 94:18.) Ngdi ua injured el chad er a klekool el lousbech a ngeso el merael, kid me kede ousbech a ngeso el mo melemolem el meruul er a omesiunged el mora Jehovah. Ngar choua ikakid el taem e a Jehovah olterekokl a rengud el kmo: “Ngak a RUBAK  el Dios er kau; ak melisiich er kau e dmu er kau el kmo, ‘Lak medakt, e ak mo ngosukau.’” (Isa. 41:13) King David a ngiluu tia el ngeso. Sera lechelebangel a ringel me a recheraro e ngdilu er a Jehovah el kmo: “Kadekmel a chimam a ngilsukak.” (Psa. 18:35) Engdi ngmekera lolengeseu er kid a Jehovah?

12. Ngtecha bo lousbech er ngii a Jehovah lolengeseu er kid sel bo lemechitechut a rengud?

¹² Jehovah blechoel el lolengeseu er kid loeak a rebebil. El ua tiang, a David er a bo lemechitechut a rengul e a sechelil er a Jonathan a mlo odngelii e melisiich er ngii. (1 Sa. 23:​16, 17) A Jehovah dirrek el ngileltii a Elisa el mo olengeseu er a Elias. (1 Ki. 19:​16, 21; 2 Ki. 2:2) Chelecha el taem e a Jehovah locha mo ousbech er a telungalek er kid, resechelid, me a lechub e ngremechuodel el lolengeseu er kid. Me nguaisei engdi sel dechelebangel er a ringel e nglocha soad el di kid el tang. Ngdiak el soad a rechad a longesang er kid. E kid a rechad a mera el uaisei. Ngera sebeched el meruul er ngii me denguu a ngelsuil a Jehovah?

13. Ngera kired el meruul er ngii a lsoad el ngmai a klungioled er a ngelsuil a Jehovah? (Dirrek el momes er a siasing.)

¹³ Kired el meruul er ngii. Molasem el diak moleakl er kau er a rechad. Sel doleakl er kid er a rechad e ngsebeched el di mo melatk er kid me a mondai er kid. Sel bo domdasu el uaisei e ngmo diak dungil el melilt. (Osi. 18:​1, NW) Nguaisei el ngar ngii aike el taem el soad el di kid tokubets sel leduubech a klou el tekoi er a klengar er kid. Engdi a lsekum kede meleakl er kid er a rechad el kemanget el taem, e kede locha otngeklii sel lousbech er ngii a Jehovah el lolengeseu er kid. Me alta ngkmal meringel engdi mkengei er a ngelsuil a telungalek er kau, resechelim, me a remechuodel. Momes er tir el ngeso el lousbech er ngii a Jehovah el kirem.—Osi. 17:17; Isa. 32:​1, 2.

JEHOVAH MO CHEMOLODAU

14. Ngera el tekoi a rullid el mo medakt?

¹⁴ Omelsemai. Ngar ngii aike el taem el bo louedikel a rengud. Ngar er a Biblia e kede menguiu el kirir a reblak a rengrir el mesiungel a Dios el mesaod aike el taem el lekmal mlo medakt e ouedikel a rengrir el cherrouir a uchul me a lechub e nglmuut el bebil er a bedengel orimel. (Psa. 18:4; 55:​1, 5) Ngdi osisiu, kede locha chelebangel a ultok er a skuul, ureor, telungalek er kid, me a lechub e ngkabelment. Me a lechub ngsechered a sebechel mo uchul a kodelled. Chelsel aikakid el taem e kede locha feel el ua kekerei el ngalek el diak el sebeched el mekerang. Ngmekera lolengeseu er kid a Jehovah er aikakid el taem?

15. Ngera ngolterekokl a rengud er ngii a Psalm 94:19?

 ¹⁵ Loruul er ngii a Jehovah. Ngmengelaod er kid e rullid el mo ungil a rengud. (Monguiu er a Psalm 94:19.) Tia el bades a rullid el mo omdasu er a kekerei el ngalek el redil el medakt e diak el sebechel mo mechiuaiu le ngngar ngii a derumk me a bisebusech. Kede locha melatk er a demal el mong e kiuekuii e obang el dimerekmo el iit a medal. Me alta ngdirk mekngit a eanged ngchellaod a rengul e feel safe er a chimal a demal. Sel dechelebangel er a blekeradel el rullid el mo medakt e kede ousbech er a Jehovah el menguoku er kid el dimerekmo bo lechelellakl a rengud. Ngmekera denguu chouaitia el ongelaod er a Jehovah?

16. Ngera sebeched el meruul er ngii me denguu ongelaod er a Jehovah? (Dirrek el momes er a siasing.)

¹⁶ Kired el meruul er ngii. Mblechoel el mengoit a taem lobengkel a Jehovah loeak omoluluuch e monguiu er a Tekingel. (Psa. 77:​1, 12-14) Me sel bom stress e a kot el tekoi el moruul er ngii a mora Demam el ngar er a eanged. Mouchais a dektem er a Jehovah me a tekoi el mbekikl el kirel. E becherei me longedecheduch e longelaod er kau loeak a Bades. (Psa. 119:28) Ke locha mo metik el kmo ngngar ngii a ileakl el bades er a Biblia el kmal mengelaod er kau sel omedakt. El ua tiang ke locha mo metik omelisiich er a babier er a Job, Psalm, me a Osisechakl me a dirrek el tekingel a Jesus el ngar er a 6 el bliongel er a Mateus. Sel moluluuch el mora Jehovah e monguiu er a Tekingel e ke mo feel er ngii el mengelaod er kau.

17. Ngera sebechel mo ulterekokl a rengud er ngii?

¹⁷ Ngsebechel mo ulterekokl a rengud el kmo a Jehovah obengked er aike el oberaod el taem er a klengar er kid. Ngkmal diak di lekid el tang. (Psa. 23:4; 94:14) A Jehovah tibir el kmo ngmo kokerengid, e mtebechelid, e ngosukid, e chemolodid. A Isaia 26:3 (NW) a melekoi el kirel a Jehovah el kmo: “Ke mo korekerengii ngike el cherrungel lultuil er kau. Ke mo melemolem lomsang a budech e le ngii el oumera el ulsirs er kau.” Me moumera el ulsirs er a Jehovah e moruul aike el rokui el sebechem el mo ngmai a klungiolem er a ngelsuil. Omoruul el uaisei e ke mo mesisiich el mo lmuut er a chelsel a meringel el taem.