1. Ngera uchul me a Chedaol Belsoil a kot el klou a ultutelel sils er a rak? (Lukas 22:​19, 20)

 A RECHEDAL a Jehovah omes er a Chedaol Belsoil er a kodellel a Kristus el kot el klou a ultutelel sils er a rak. Ngdi chimo el sils el Jesus a dilu er a rultirakl er ngii me te meruul er ngii. (Monguiu er a Lukas 22:​19, 20.) Ngbetok a uchul me kede kmal omes el beduluchei el kirel Chedaol Belsoil. Me dosaod a bebil er ngii.

2. Ngera bebil er a uchul me kede kmal omes el beduluchei el kirel a Chedaol Belsoil?

² A Chedaol Belsoil a ngosukid el mo melatk er a kerresel a olubet. Ngomeklatk er kid a kakerous el rolel e ngsebeched el ochotii omereng el saul er kid el kirel a tengetengel a Jesus. (2 Ko. 5:​14, 15) Ngdirrek el meskid a techelled el mo “dul kasisiich” kid me a rudam me a rudos er kid. (Rom 1:​12, BT) Bek el rak e te ngar ngii a re inactive el mei er a Chedaol Belsoil. Ungil omerellir a rudam me a rudos a uchul me a rebebil er tir a mo sorir el lmuut el mei er a Jehovah. Me aike el leues e lerenges a resemeriar el chad el mei a uchul me a rebetok er tir a sorir lomuchel el merael er a rael el mora klengar. Aika uchul me a Chedaol Belsoil a kmal mekreos er a rengud!

3. Ngmekera Chedaol Belsoil e rullii a klodam el mo tang? (Dirrek el momes er a siasing.)

³ Mdirrek el melatk er a rolel e a Chedaol Belsoil a rullii a klodam el mo tang. Meliuekl er a beluulechad el rokir e a Resioning er a Jehovah mo kldibel sel lengelt a sils. Kede rokui lorrenges er a cheldecheduch el melisiich er a klungel a ultutelel a olubet. Kede mengitakl a teblo el chelitakl er odanges, pass a klekedall er a Chedaol Belsoil, e oba rengud el rokir el dmu “amen” er aike  el kleuang el nglunguuch el mo er ngii. Chelsel a 24 el sikang e a rokui el ongdibel a mla otireklii tia el teletael. Ka dim imagine er a deuil a rengul a Jehovah me a Jesus sel lomes er kid el tang el mengebkall er tir el ngar tia el rolel!

4. Ngera kede mo mesaod er tia el suobel?

⁴ Ngar tia el suobel e kede mo mesaod aika el ker: Ngmekera sebeched el kutmeklii a rengud el kirel a Chedaol Belsoil? Ngmekera dengesuterir a rebebil el ngmai a klungiolir er ngii? E mekera dengesuterir tirke el inactive? A nger er aika el ker a mo ngosukid el mo kltmokl el kirel tia el kmal klou a ultutelel el ongdibel.

NGMEKERA DEKETMEKLII A RENGUD EL KIREL A CHEDAOL BELSOIL?

5. (a) Ngera uchul me ngungil dolatk er a kerresel a olubet? (Psalm 49:​7, 8) (b) Ngera ke suubii er a video el Ngera me a Jesus a Mlad?

⁵ A ta er a kot el klou a ultutelel el rolel e ngsebeched el kutmeklii a rengud el kirel a Chedaol Belsoil a oeak sel dolatk er a kerresel a olubet el tengetengel a Jesus Kristus. Ngkmal diak el sebeched el di kid el ngubetid er a klengit me a kodall. (Monguiu er a Psalm 49:​7, 8; dirrek el momes er a video el Ngera me a Jesus a Mlad?) a Me a Jehovah kiltmeklii a rolel e a Jesus a mo tongetengii a klengar er ngii el kired. Tia kmal mle ngarbab el char el kirel a Jehovah me a betik er a rengul el Ngelekel. (Rom 6:23) Sel deluut el mo dmolech el melebedebek a lekilengei el meruul er ngii a Jehovah me a Jesus el kired, e nglmuut el mo dmolech a omereng el saul er kid el kirel olubet. Kede mo mesaod a bebil luchul me a olubet a ngarbab el char el kirel a Jehovah me a Jesus. Engdi kot, e ngera mle uldimukl er a olubet?

6. Ngera mle uldimukl er a olubet?

⁶ A olubet a char el sel lemekekad e kede lmuut el nguu a tekoi el durridii. Ngike el kot el chad el Adam a ulebeob el cherrungel. Sera lerebet er a klengit e ngurridii a diak a ulebengelel el klengar el kirel ngii me a rokui el ngelekel. Me a Jesus a tilengetengii a cherrungel el klengar er ngii el lmuut el melai er a klengar el lurridii a Adam. Klengar er a Jesus el rokir er tia el chutem e “ng dimlak a tal le bor a klengit, ma dimlak a blulak el tuobed er a ngerel.” (1 Pe. 2:22) Sel taem er a lemad a Jesus e a cherrungel el klengar er ngii a mle osisiu er a klengar el lurridii a Adam me ngmle sebechel kokedir.—1 Ko. 15:45; 1 Ti. 2:6.

7. Ngera bebil er a omelsemai el lechilebangel a Jesus er a lengar tia el chutem?

⁷ A Jesus er a lengar er tia el chutem e bo lechebangel a betok el omelsemai e ngmillemolem el cherrungel el lolengesenges er a Demal el ngar er a eanged. Sera lengalek e ngmillemolem lolengesenges er a rediak el mecherrungel el delal me a demal alta ngmlechell el cherrungel. (Lk. 2:51) E sera bo lengeasek e ngmle kirel lotngakl orimel el mo diak el lolengesenges er a rechad er a blil me a lechub e ngmo diak loba blakerreng el mora Jehovah. E sera bo le klou el chad e ngmle kirel loltngakl omengesuseu er a Satan el Diabelong, el uldimukl er a Diabelong el melekoi er ngii me bo lak loba blakerreng el mora Dios. (Mt. 4:​1-11) A Satan a mle soal meruul er a Jesus me lerebet er a klengit me bo lak el sebechel kokedir a olubet.

8. Ngera lmuut el bebil er a omelsemai el Jesus a mle kirel loutekangel?

⁸ A Jesus er a loruul er a omesiungel e ngdirrek el luluutekangel a lmuut el bebil er a omelsemai. A recherrouel a uleldechelakl er ngii e millasem lomekoad er ngii. (Lk. 4:​28, 29; 13:31) E mle kirel loutekangel a chelitecheterir a rultirakl er ngii. (Mk. 9:​33, 34) E sera lebora kerrekeriil el kirel a klengar er ngii e te ulemekcharm e oltuub er ngii. E te mekodir er a meringel e omekrur el kodall. (Heb. 12:​1-3) E mle kirel di ngii loutekangel er a ulebongel el omelsemai  el mo er ngii, el Jehovah dimlak lomekerreu er ngii. b—Mt. 27:46.

9. Ngera uldesued er a tengetengel a Jesus? (1 Petrus 1:8)

⁹ Me kede mera el mesa el kmo a olubet a mle ngarbab el char el kirel a Jesus. Sel dolatk aika el tekoi el lekilengei a Jesus el mo meruul el kired, e ngdiak el sal kmal mo dmolech a bltkil a rengud el mo er ngii?—Monguiu er a 1 Petrus 1:8.

10. Ngera ngrirellii olubet el mora Jehovah?

¹⁰ E a Jehovah mekerang? Ngerang ngkilengei el meruul me lsebechel a Jesus el kokedir a olubet? A Jehovah me a Jesus oba kot el kmes el deleuill el sebechel mo er ngii er a delongelel a chedam me a ngalek. (Osi. 8:30) Me ka di molatk el kmo ngera ngrirellii el mora Jehovah er a lomes er a Jesus el loutekangel aika el betok el omelsemai er a lengar tia el chutem. A Jehovah locha kmal mlo feel er a klou el ringel er a lomes er tir el mekngit er a Ngelekel e lotngeklii e lomekcharm er ngii.

11. Mosaod er a example el lochotii a blo lomelechesiu er ngii a Jehovah er a lomes er a okodellel a Jesus.

¹¹ Ngii di el chad loungalek el mla mo smecher a ngelekel a medengelii sel klou el klengiterreng el lomelechesiu er ngii tirke el mla mad a ngelekir. Ngngar ngii a mesisiich el klaumerang er kid er a olubet, engdi tia diak lecheridii a ringel el dolechesuar er ngii sel lemad a betik er a rengud. Tia el example a ngosukid el mo understand er a blo le feel er ngii a Jehovah er a lomes er a betik er a rengul el Ngelekel el chuarm e mad er a 33 C.E. c—Mt. 3:17.

12. Ngera sebeched el meruul er ngii er aika el sandei er uchei er a Chedaol Belsoil?

¹² Delongelel chelechang me a Chedaol Belsoil, e molasem el mesuub a lmuut el betok el kirel a olubet er a temel omesubem el di kau el tang me a lechub e ng Temel a Omengull el Telungalek. Mousbech er a Research Guide for Jehovah’s Witnesses (a lsekum e ngngar ngii er a tekingem) me a lechub aike el lmuut el bebil er a ngeso er a omesubel a Biblia el dmolech el mesuub el kirel olubet. d E bo mkerekikl loltirakl er a schedule er a omengiuel a Biblia er a Chedaol Belsoil el ngar er A Klengar er Kid a Rekristiano me a Omesiunged—Subeled er a Miting. E sel sils er a Chedaol Belsoil e lak mobes lomes er sel ileakl el Morning Worship el motobed el kirel. Sel deketmeklii a rengud el kirel a Chedaol  Belsoil e ngmo sebeched el ngosuterir a rebebil el dirrek el ngmai a klungiolir er ngii.—Esr. 7:10.

MNGESUTERIR A REBEBIL EL NGMAI A KLUNGIOLIR

13. Ngera sel kot el rolel e kede ngosuterir a rebebil el ngmai a klungiolir er a Chedaol Belsoil?

¹³ Ngmekera dengesuterir a rebebil el ngmai a klungiolir er a Chedaol Belsoil? A kot e ngsebeched el invite er tir. Ngdiak di de invite sel domerk er a klumech ngdirrek el sebeched el rullii a list er a rechad el bo de invite er tir. A rengar er a list er kid a sebechel chedad, rechad el doureor lobengterir, rengalek el dedak el skuul, me a lmuut el bebil. A lsekum e ngdiak el enough a copy er a invitation e ngsebeched el share er a link er a invitation el mo er tir. Ngkmal diak dodengei el kmo te ngera mo kongei el mei!—Oli. 11:​6, NW.

14. Mosaod er a klisichel a debsa chad a copy er ngii er a invitation.

¹⁴ Ngkmal ngar ngii a klisichel a debsa chad a copy me a lechub e ng link er a invitation. A ta el odos el bechil a diak el Sioning a kmal mlo mechas a rengul er a ledu er ngii a bechil el kmo ngmo obengkel el mora Chedaol Belsoil. Ngera uchul me ngkmal mle mechas a rengul? Ngmla mo betok el taem el lolengit er ngii me lobengkel el mora Chedaol Belsoil engdi ngdirkak a ta el bong. Ngera uchul me ngkongei el mong er chelechang? A bechil a kmo, “Ngngar ngii a chad el milskak a invitation er ngak.” A ta er a remechuodel el luledengelii a mle invite er ngii. Me a bechil a mlora Chedaol Belsoil er tiakid el rak me a betok el rak er uriul.

15. Ngera soad el melatk er ngii sel de invite er a rechad el mei er a Chedaol Belsoil?

¹⁵ Molatk el kmo tirke el de invite er tir a locha mo er ngii a kerrir, tokubets a lsekum e ngdirkak a ta el lemei er a miting er kid. Ngsebeched el melatk a ker el locha bo loker e prepare er kid el kirel. (Kol. 4:6) El ua tiang, a rebebil a sorir el mo medengei el kmo: ‘Kede mo mekerang?’ ‘Ngngua ngera klemengetel?’ ‘Ngera ungil kuubail?’ ‘Ngkired el harau e mo soiseb?’ ‘Ngar ngii a chad el merael el melai a tenget?’ Me sel de invite er a chad el mei er a Chedaol Belsoil e ngsebeched el loker, “Ngngar ngii a kora kerim?” e onger er a keril. Ngdirrek el sebeched el lousbech  er a video el Molatk er a Kodellel a Jesus me a Ngera Meketmokl er a Blil a Ongdibel? el ngosuir a chad el mo medengelii a rolel a doruul a miting er kid. Me a 28 el suobel er a Mkiei el Mo Cherechar! a dirrek el betok a ungil tekoi er ngii el sebeched el share el lobengkel.

16. Ngera lmuut el bebil er a kerrir tirke el mei er a Chedaol Belsoil?

¹⁶ Uriul er a Chedaol Belsoil e a rechad el semeriar a locha mo er ngii a lmuut el bebil er a kerrir. Te locha mo oker el kmo ngera uchul me te di kesai (me a lechub e ngdiak) a chad el melai a klekedall er a Chedaol Belsoil. Te locha mo oker el kmo ngtela el taem el doruul er a Chedaol Belsoil. E locha sorir el mo medengei el kmo a rokui el miting er a Resioning er a Jehovah ngnguaisei. Alta ika el tekoi a bo losaod er a temel a cheldecheduch er a Chedaol Belsoil, engdi tirka el beches el mei a locha mo sorir a komakai el omesodel. A suobel el dai er ngii a “Why Do Jehovah’s Witnesses Observe the Lord’s Supper Differently From the Way Other Religions Do?” el ngar er a jw.org a sebechel ngosukid longer a bebil er a kerrir. Ngsoad el meruul aike el rokui el sebeched er a uchei, temel, me a uriul er a Chedaol Belsoil el ngosuterir tirke el “rredemelel” el ngmai a klungiolir er ngii.—Rel. 13:​48, NW.

MNGESUTERIR TIRKE EL INACTIVE

17. Ngmekera sebechir a remechuodel el ngosuterir a re inactive? (Esekiel 34:​12, 16)

¹⁷ Ngmekera sebechir a remechuodel el ngosuterir a re inactive er a blsechel a Chedaol Belsoil? Mochotii el kmo ngbetik a rengum er tir. (Monguiu er a Esekiel 34:​12, 16.) A uchei er a Chedaol Belsoil e molasem el contact er tirke el rokui el sebechem. E molterekokl a rengrir el kmo ngbetik a rengum er tir e soam el lolengeseu er tir er a ngii di el rolel el sebechem. Em invite er tir el mei er a Chedaol Belsoil. E a lsekum te mei e moutkeu er tir. Molemolem el keep in touch lobengterir tirka el rudam me a rudos er a uriul er a Chedaol Belsoil e besterir a ngii di el ngeso lousbech el lmuut el mei er a Jehovah.—1 Pe. 2:25.

18. Ngmekera sebeched el rokui el lolengeseu er a re inactive? (Rom 12:10)

¹⁸ Rokui el chedal a ongdibel a sebechir  lolengeseu er a re inactive el mei er a Chedaol Belsoil. Loeak a ngera el rolel? Mochotii a bltikerreng el mo er tir. (Monguiu er a Rom 12:10.) Lak mobes el kmo nglocha mle meringel er tir a lmuut el mei er a miting. Te locha mle bekikl a uldesuir a rechad er a ongdibel. e Me lak moker a ker el sebechel rulleterir el mo merur me a lechub e molekoi a tekoi el rulleterir el mo mekngit a rengrir. (1 Th. 5:11) Tirka el odam me a odos a kldemed er a klemerang. Ngkmal dmeu a rengud el mla lmuut el mo dmak el mengull!—Psa. 119:176; Rel. 20:35.

19. Ngera el klungiaol a dengai sel dongedaol er a kodellel a Jesus?

¹⁹ Me kede mtebengii a uchul me a Jesus a dilu er kid el mo mengedaol er a kodellel er a bek el rak! Sel debora Chedaol Belsoil e ngbetok a klungiaol el dengai. (Isa. 48:​17, 18) Ngmukeroul a bltkil a rengud el mora Jehovah me a Jesus. Kede ochotii el kmo kede kmal oba omereng el saul el kirel aika el bla leruul el kired. E smisichii a deleuill er kid me a rekldemed er a klemerang. Kede locha mo ngosuterir a rebebil el mo medengelii a rolel e ngsebechir loldeu a rengrir er aike el klengeltengat el dengai el olubet a uchul. Mada de rokui el meruul aike el rokui el sebeched el mo kltmokl el kirel a Chedaol Belsoil, el ngii a kot el klou a ultutelel sils er a rak!