1. Ngera uchul me a lebebil e kede mo medakt?

 KEDE rokui el ngar ngii aike el taem el bo demedakt. Me nguaisei a omesubed er a Biblia mla rullid el mo mimokl er a dekted er a rulekoad, remekngit el chelid, me a ngar medad el klebesei. Engdi kede dirk kiei er a taem er a “kdekudel el tekoi” el ua mekemad, delengerenger, me a rakt. (Lk. 21:11) Kede locha dirrek el mo medakt er a rechad, el ua rechad er a kabelment loldechelakl er kid me a lechub e te chedad el lomtok er a mera el omengull. A rebebil a locha bekikl a bo lak el sebechir el otekur a ringel lechelebangel er ngii er chelechang me a lechub a ngar medad el klebesei.

2. Mosaod er a blekeradel el lemla er ngii a David er a lengar er a Gath.

² A David a ngar ngii aike el taem el blo lemedakt. El ua tiang, ngchiliis el mora Gath el beluu er a Filistia er sel taem el King Saul ulsiik er ngii el soal lomekoad er ngii. A King Akis er a Gath a mlo medengei el kmo a David ngike el mesisiich el soldau el lulengitakl el kirel el kmo ngmilekodeterir a “re 10,000” el chad er a Filistia. Me a David a “kmal mlo medakt.” (1 Sa. 21:​10-12) Ngmle medakt er a bo lerellii a Akis el mo er ngii. Me ngmilekera e mo mesisiich er a dektel?

3. A doltirakl er a Psalm 56:​1-3, 11, e ngmilekera David e mo mesisiich er a dektel?

 ³ A Psalm 56 a mesaod aike el mla er a rengul a David er a lengar er a Gath. Ngouchais a mle dektel a David me a dirrek el rolel e ngmlo mesisiich er a dektel. Sera bo lemedakt a David e nguluumera el ulsirs er a Jehovah. (Monguiu er a Psalm 56:​1-3, 11.) E mera el mle sebechel loumerang el ulsirs er ngii. Ngoeak a klengeltengat er a Jehovah e a David a mlo meruul er a ngodech el teletael: Ngmle pretend el kmo ngkebelung! Me a Akis a bai kmal mlo checherd a rengul er a David e mle soal a lorael, me a David a mlo sebechel chemiis.—1 Sa. 21:13–22:1.

4. Ngmekerang a desisichii a klaumerang er kid er a Jehovah? Momekesiu.

⁴ Kid me ngdirrek el sebeched el mo mesisiich er a dekted loeak sel doumerang el ulsirs er a Jehovah. Engdi ngmekerang a desisichii a klaumerang er kid er a Jehovah, tokubets sel bo demedakt? Molatk er tia el okesiu. A lsekum ke metik el kmo ngngar ngii a rektem e a uchelel e ke locha kmal mo medakt. Me nguaisei engdi omoumerang er a toktang er kau e ngsebechel mo diak msal medakt e chelellakl a rengum. A toktang er kau a locha mla ngosuterir a rebetok el chad el osisiu a secherir er kau. Nglocha mo kerekikl lorrenges er kau e oterekeklii a rengum el kmo ngkmal ungil medengelii omomelechesiu er ngii. E locha mo ouchais er kau er a bedengel a ukeruul el mla oureor el kirir a rebebil. Ngdi osisiu, kede smisichii a klaumerang er kid er a Jehovah loeak a dolatk aike el bla leruul, aike el loruul er chelechang, me aike el bo loruul el kired. Tiakid a lurruul er ngii a David. Chelecha el dorriter a mlukreng el tekingel el ngar er a Psalm 56, e molatk er a rolel e ngdirrek el sebechem el smisichii a klaumerang er kau er a Jehovah e mo mesisiich a dektem.

NGERA NGMLA REMUUL A JEHOVAH?

5. David er a bo lemedakt e ngngera ngmlo melebedebek? (Psalm 56:​12, 13)

⁵ Me alta David a dirk mla er a chelsel a kdekudel el blekeradel engdi ngmle ulturk osengel er aike el bla leruul a Jehovah. (Monguiu er a Psalm 56:​12, 13.) Tia lurruul er ngii a David er a klengar er ngii el rokir. El ua tiang, ngmillebedebek a blebelel a Jehovah, el ngii ulemeklatk er ngii er a klisichel a Jehovah me a bltkil a rengul el mora rechad. (Psa. 65:​6-9) Ngdirrek el millebedebek aike el bla leruul  a Jehovah el kirir a rechad. (Psa. 31:19; 37:​25, 26) E kmal millebedebek aike el bla leruul a Jehovah el kirel. A Jehovah ullengeseu e ulemekerreu er a David er a letolechoi el me klou. (Psa. 22:​9, 10) A omelebedebekel er aika el tekoi a ngilsuir el smisichii a klaumerang er ngii er a Jehovah!

6. Sel bo demedakt, e ngera sebechel ngosukid el mo oumerang el ulsirs er a Jehovah?

⁶ Sel bo medakt e di lekau el oker, ‘Ngera ngmla remuul a Jehovah?’ Molatk a blebelel. El ua tiang, sel ‘domes’ er a rolel a Jehovah omekerreu a charm el suebek me a bung, el ngii a dimlak lobeob lokesiul me a ka el sebechel mengull er ngii, e ngsmisichii a klaumerang er kid el kmo ngdirrek el mo omekerreu er kid. (Mt. 6:​25-32) Mdirrek el melatk aike el bla leruul el kirir a remengull er ngii. Nglocha sebechem el mesuub el kirel a chad er a Biblia el lulechotii a mesisiich el klaumerang me a lechub e ke menguiu er a experience er a ta er a mesiungel a Jehovah er chelecha el taem er kid. a Ngdirrek el sebechem el melebedebek er a rolel e a Jehovah a mla omekerreu er kau. Ngmilekera mekrolau el mei er a klemerang? (Jn. 6:44) Ngmekera mla onger a nglunguchem? (1 Jn. 5:14) Ngera el klungiaol omolai er a bek el sils el tengetengel a betik er a rengul el Ngelekel a uchul?—Efe. 1:7; Heb. 4:​14-16.

7. Ngmilekera experience er a profet Daniel e ngosuir a Vanessa el mo diak el medakt?

⁷ A Vanessa b el lodos er a Haiti a mlo chobengelii a kdekudel el blekeradel. Ngngar ngii a chad el mle call e message er ngii er a bek el sils el lorrimel er ngii el mo obengkel. A Vanessa di mle bleketakl el dmu er ngii el kmo ngdiak el soal. Engdi ngika el chad a liluut el kmal mo mekdekudem e omekdakt er ngii. A Vanessa kmo: “Ak kmal mlo medakt.” Me ngera ngilsuir? Ngmirruul aike el sebechel lomekerreu er ngii. E a ta er a remechuodel a ngilsuir el mo mengedecheduch er a rebulis. Engdi ngdirrek el mlo melatk er a rolel e a Jehovah ulemekerreu er a rechedal er a irechar. Ngkmo: “A kot el chad el blo kulatk er ngii a profet Daniel. Ngika ulebidokl er a blil a resongerenger el laion alta ngdimlak a ngera el temellii. Engdi Jehovah ulemekerreu er ngii. Me a kullengit er a Jehovah me bo loungerachel er tia el tekoi. Uriul er tiang, e ngmlo diak medakt.”—Dan. 6:​12-22.

NGERA NGMERUUL A JEHOVAH ER CHELECHANG?

8. Ngera ngmle ulterekokl a rengul a David er ngii? (Psalm 56:8)

⁸ Me alta David a mlara chelsel a kdekudel el blekeradel er a lengar er a Gath engdi ngdimlak lebechei a dektel me lechitechetur. Ngbai ngileltii el mo melatk aike el loruul a Jehovah el kirel er seikid el taem. Ngmle sebechel feel el kmo a Jehovah omekrael e omekerreu er ngii e understand a tekoi el lomelechesiu. (Monguiu er a Psalm 56:8.) Ngdirrek el mla er ngii a rungil sechelil er a Jonathan me a Ngarbab el Prist Ahimelek el tir a millisiich er ngii e olengeseu er ngii. (1 Sa. 20:​41, 42; 21:​6, 8, 9) E alta King Saul a mle soal lomekoad er ngii ngmle sebechel chemiis. Ngkmal mle ulterekokl a rengul a David el kmo a Jehovah ungil medengelii a ringel el lengar ngii.

9. Ngerang mtebengii a Jehovah el kirel a derta er kid?

⁹ Sel omchelebangel er a tekoi el rullau el mo medakt, e lak mobes el kmo a Jehovah omtab er a ringel el omngar ngii me a lerellii el mo er kau. El ua tiang, Jehovah dimlak di lomtab er a lomekcharm er a rechad er a Israel er a Ekipten, ngdirrek el “kmal mlo ungil medengei a rengelir” a rechedal. (Exo. 3:7) A David a milengitakl el kmo a Jehovah milsa ‘chelebulel’ me sera lengar  er a chelsel a “kerior.” (Psa. 31:7) Me a rechedal a Dios er a lechuarm er a ringel el kngterir a uchul me “ngmle meringel er [a Dios] aike el rokui el ringelir.” (Isa. 63:​9, NW) Me sel omedakt e a Jehovah kmal understand e kmal soal ngosukau el mo mesisiich er a dektem.

10. Ngera uchul me ngulterekokl a rengum el kmo Jehovah mesekau e mo ngosukau el loutekangel a ngii di el ringel?

¹⁰ A lsekum ke chelebangel er a blekeradel el rullau el mo medakt, e ke locha diak mesa rolel e a Jehovah olengeseu er kau. Ngera sebechem el meruul er ngii? Molengit er ngii me lengesukau el mesa rolel e ngolengeseu er kau. (2 Ki. 6:​15-17) E molatk: Ngngar ngii a cheldecheduch me a lechub e ng comment er a miting el millisiich er kau? Ngngar ngii a suobel, video, me a lechub e ng original songs el mla smisichau? Ngngar ngii a chad el mla share er a tekoi me a lechub e ngbades el milengelaod er kau? Kede locha di beot lobes er a klodam er kid me a okelel a reng el dolai. Engdi aika ileakl el sengk er a Jehovah. (Isa. 65:13; Mk. 10:​29, 30) Aika ochotii el kmo ngkmal betik a rengul er kau. (Isa. 49:​14-16) E ochotii el kmo ngrredemelel a nguu a klaumerang er kau.

11. Ngera ngilsuir a Aida el mo mesisiich er a dektel?

¹¹ A Aida el kiei er a Senegal a ulemtab er a rolel e a Jehovah ullengeseu er ngii er a lechebangel omelsemai. Ngika mle kot el klou el ngelekel a delal me a demal me te mle expect er ngii el mo mengereker a udoud el sebechel mesiou er ngii me a rechad er a blil. Engdi ngulemekbeot er a klengar er ngii me bo lsebechel mo pioneer e tia mlo uchul a ringelel a udoud. A telungalek er ngii a kmal mlo chetirir ngii e kesib a rengrir er ngii. Ngmelekoi el kmo: “Ak mle medakt el kmo ngmo el mo diak el sebechek el ngosuterir a rechad er a blik me a rechad el rokui a mo otngeklak. Ak mlo oltelechakl er a Jehovah el milecherei tia el blekeradel el kbla er ngii me ngkmal mo mekngit.” Engdi ngrirengesii a cheldecheduch er a miting. Ngmelekoi el kmo: “Odam el milengedecheduch ulemeklatk er kemam el kmo a Jehovah medenge rokui el ringel el ngar er a rengud. Ngoeak a advice er a remechuodel me a rebebil e ngmilekekokil mo ulterekokl a renguk er a bltkil a rengul a Jehovah. Me ak mlo meluluuch el mora Jehovah el ulterekokl a renguk, e mlo sebechek el feel er a budech er a kumes a nglunguchek el monger.”  Cherengel a taem e a Aida miltik er a ureor el sebechel mesiou er ngii el pioneer e dirrek el olengeseu er a rechad er a blil me a rebebil. Ngkmo: “Ak mla suubii el mo mui loumerang el ulsirs er a Jehovah. Me chelechang e sel bok merek el meluluuch e ngblechoel el mo diak kmedakt.”

NGERA NGMO MERUUL A JEHOVAH?

12. A doltirakl er a Psalm 56:​9, e ngera ngmle ulterekokl a rengul er ngii a David?

¹² Monguiu er a Psalm 56:9. Tia el bades ochotii a lmuut el ta er a rolel e a David a mlo mesisiich er a dektel: Alta ngdirk mlara chelsel a kdekudel el blekeradel ngmillebedebek aike el bo loruul a Jehovah el kirel. David a mle medengei el kmo a Jehovah mo osebelii er a melemalt el taem. A Jehovah dilu el kmo ngmo ongingil king er a Israel. (1 Sa. 16:​1, 13) Me ngar osengel a David e a ngii di el tekoi el ledung a Jehovah a ua bla letaut.

13. Ngera sebechel mo ulterekokl a rengud er ngii el kirel a Jehovah?

¹³ Ngera ngmla tibir el mo meruul el kirem a Jehovah? Ngdiak de expect er a Jehovah el mo mengeroid a rokui el mondai er kid. c Engdi ngdiak el soad el lobes el kmo a ngii di el ringel el bo dechebangel er tia el mekngit el blekeradel a bo lokngemed a Jehovah er a beches el blekeradel. (Isa. 25:​7-9) A Ulemeob er kid a kmal mesisiich el sebechel lolekiis er a rulekoad, omekungil er kid, e olekngemed er a rokui el omtok.—1 Jn. 4:4.

14. Ngera sebeched el melebedebek el kirel?

¹⁴ Me sel bo medakt e molebedebek aike el bo loruul a Jehovah el kirem er a ngar medad. Molatk er a feeling er kau sel bo el dibus a Satan, e bo lak a remekngit el chad te di mo remelemalt, e dorael el mo mecherrungel. A demonstration er a convention er a 2014 ulechotii a rolel e ngsebeched el melebedebek er a omelatk el dobang. A chedam a milsaod er a 2 Timothy 3:​1-5 lobengkel a telungalek er ngii e ngilodech a tekoi er a bades el mo melutk er a Baradis: “Ngar er a beches el blekeradel e ngmo blsechel a deurreng. E le rechad a mo omdasu er a rebebil, e sorir a ilteet er a klereng, e ngariou a rengrir, e oldanges er a Dios, e orrenges a tekingir a redemerir me a rederrir, e mereng a saul, e sorir el melatk er a chelid. Ngkmal betik a rengrir er a telungalek er tir, e ousubes a telemellir a rechad, e melekoi a ungil kirir a rechad, e ungil a blekerdelir, e diak el sorir el omekcharm er a rechad, e sorir a ungil tekoi. Te ouchais a klemerang, e diak el meterekakl e omekerreu, e diak el mekedidai a rengrir, e sorir a Dios el ngaruchei er a tametereng. Te chedal a chelid e chemolt er omerellir ochotel a klisichel a klemerang el lodengei. Molekeed er kau er a reuaisei el chad.” Kau ke mesaod er a klengar er a beches el blekeradel lobengterir a rechedal a telungalek er kau me a rekldemem er a klemerang?

15. Alta Tanja mlo medakt, engdi ngera ngilsuir el mo mesisiich er a dektel?

¹⁵ A Tanja el odos er a North Macedonia a mlo mesisiich er a dektel loeak a lolebedebek a klengeltengat er a ngar medad. A rechad er a blil a kmal ulemtok er a omesubel er a Biblia. Ngkmo: “A bebil er aike el tekoi el ble kmedakt el kmo ngmo duubech, a dilubech. A delak a milengelebed er ngak er a uriul er a bek el miting. Me a rechad er a blik ulemekdakt er ngak el kmo te mo mekodkak a bok ta er a Sioning er a Jehovah.” Cherengel a taem e te uldikii a Tanja. Me ngmilekerang? Ngdmu el kmo: “Ak millatk er a deurreng el bo kubang el diak a ulebengelel a lsekum ak ngiltii el mo melemolem el loba blakerreng. Ak dirrek el millatk er a rolel a Jehovah mo omekngeltengat er ngak er a beches el blekeradel el kirel aike el tekoi el kuriid er chelecha el taem me a rokui el mekngit a mo diak a  lmatk.” A Tanja millemolem loba blakerreng. E oeak a ngelsuil a Jehovah e ngmiltik er a basio el sebechel kiei er ngii. Chelecha el taem e a Tanja bechil a blak a rengul el odam e te dmeu a rengrir el dmak el mesiou el mui el taem.

CHELECHANG E MSISICHII A KLAUMERANG ER KAU ER A JEHOVAH

16. Ngera mo ngosukid el mo melemolem el oba blekeu sel letaut a ulaoch el ngar er a Lukas 21:​26-28?

¹⁶ Temel a klou el ringel e a rechad a mo “diak lodenge rengrir er a dakt.” Engdi rechedal a Dios a mo melemolem el loba blakerreng me a blekeu. (Monguiu er a Lukas 21:​26-28.) Ngera uchul me te diak el medakt? E le kid el mla suubii el mo oumerang el ulsirs er a Jehovah. Tanja el dulsaod er ngii er a uchei a kmo aike el tekoi el blo lechebangel er a ngar er a mong a ngilsuir el otekau a meringel el blekeradel. Ngmelekoi el kmo: “Ak mla mo medengei el kmo ngdiak a ngii di el blekeradel el Jehovah diak el sebechel lousbech er ngii el kirel a klungioled. A lebebil e kede mo feel el kmo ngrechad a control er a blekeradel engdi mera er ngii te oba klisiich el Jehovah mechititerir me te obang. E alta blekeradel a meringel, ngngar ngii a ulebengelel.”

17. Ngmekera ngosukid a bades er kid er a 2024? (Momes er a siasing er a medal tia el babier.)

¹⁷ Ngbetok a tekoi el rullid el mo medakt. Engdi ngsebeched el mo ua David e diak dobedikl er a dekted. A bades er kid er a 2024 a nglunguchel a David el mora Jehovah: “Sel bo kmedakt . . . e ak uumeral ulsirs er kau.” (Psa. 56:3) Ngdi ua lolekoi er ngii a ta el reference er a Biblia el kirel tia el bades, a David a “dimlak lolechel er a dektel me a lechub e di lolatk a mondai er ngii e ngbai ulemes el bedul ngike el olsobel er ngii.” Molatk er a bades er kid er chelecha el rak er aika el merael el mei el buil, tokubets sel bo mchebangel a blekeradel el lomekdakt er kau. Mongoit a taem el melatk aike el lurruul a Jehovah er a ngar er a mong, aike el loruul er chelechang, me aike el bo loruul er a ngar medad. E seikid e ngsebechem el melekoi el ua David el kmo: “Ngak oumeral ulsirs er a Dios me ng diak kmedakt.”—Psa. 56:4.