1. Ngera ngulturk osengir er ngii a rebetok?

 KAU, ke mtebengii el kmo a rebetok er chelechang a dimla mo melatk er a di tir? El ua tiang, a rebebil a ousbech er a social media el lolecholt er tir me a tekoi el bla leruul. Me nguaisei engdi te di kesai el chad er chelechang a omsa Jehovah klebkall. Ngar tia el suobel e kede mo mesaod er a belkul a domsa Jehovah klebkall me aike el kirel lodbechid el mo mengebkall er ngii. Kede dirrek el mo mesaod a rolel e ngsebeched el msa Dios a klebkall el lerredemelel a nguu, me a rolel e ngii a mo mengebkall er a ngklel er a kmal di kmedung.

NGERA BELKUL A DEBSA JEHOVAH KLEBKALL?

2. Ngmilekera Jehovah e ochotii a klebkellel er a Rois Sinai? (Dirrek el momes er a siasing.)

² Ngerang a klebkall? Ngar er a Biblia e a tekoi el “klebkall” a sebechel melutk el kirel a ngii di el ngerang el rullii a chad el mo ileakl. Jehovah ulechotii a klebkellel er a kedeb el taem er uriul er a losebelii a renged er a Israel er a klsibai er a Ekipten. Ka mlechesii tiang er a uldesuem: Te betok el miliol el chad er a Israel el kldibel er a uchul a Rois Sinai el me orrenges er a Dios er tir. E a chedelekelek el eabed a dokedekii a rois. E ngmo mengetechat e mocha er ngii a desiu me a bisebusech me a derumk, me a klou el ngerel a trombetang. (Exo. 19:​16-18; 24:17; Psa. 68:8)A rechad er a Israel a ulterekokl el mlo mechas a rengrir er tia el klungel a klisiich el lochotii a klebkellel.

3. Ngera belkul a debsa Jehovah klebkall?

³ Engdi rechad a mekerang? Ngmera el sebeched el mo uchul a klebkall el mora Jehovah? Chochoi. A ta er a rolel e kede msa Jehovah klebkall a oeak sel douchais er a rebebil a klebokel el blekerdelel me aike el bla leruul. Kede msa Jehovah klebkall sel debsa credit el kirel a tekoi el bla deketmokl loeak a klisichel.  (Isa. 26:12) A King David a ta er a kmal ungil kerebai er a chad el milsa Jehovah klebkall. Ngar er a nglunguchel er mederir a rechad er a Israel e ngdilu el kirel a Dios el kmo: “Kau e RUBAK a ngarbab, e mesisiich, e kebkall, e chetengakl, e meang, ele ikel ngar ngii er a eanged ma chutem a di kloklem, ma renged me ng kloklem e RUBAK, ele kau a merreder a rokui el tekoi.” Sera lebo el merek a David el meluluuch e a “rokui el chad a uleldanges er a RUBAK.”—1 Kr. 29:​11, 20.

4. Ngmilekera Jesus e msa Jehovah klebkall?

⁴ A Jesus er a lengar er tia el chutem, e ngmilengebkall er a Demal er a louchais er a rechad el kmo a Jehovah a milsa klisiich el meruul a mengasireng el tekoi. (Mk. 5:​18-20) A Jesus a dirrek el milsa klebkall er a Jehovah loeak a rolel a longedecheduch el kirel a Demal me a dirrek loeak omerellel el mora rebebil. A ta el taem e a Jesus ullisechakl er a blil ongdibel er a Rechijudea. A ta er a rulerrenges er ngii a redil el mle cheltikaik er a mekngit el chelid el 18 el rak. Ngika el mekngit el chelid a rirellii el mo deluoik a ulkel el diak el sebechel el metamet. Ngulterekokl el kmal mle uchul a ringel el mo er ngii! Klechubechub a uldbechii a Jesus el mo mengedecheduch er ngii el kmo: “Redil, ke mla mo ungil er a rektem!” Ngmilor a chimal er ngii me ngdi mle mereched el metamet a chelechedal e “mocha oldanges er a Dios.” Ngkmal uleba omereng el saul e le Jehovah mla rullii el lmuut el mo mesisiich a bedengel. (Lk. 13:​10-13) Ngika el redil a mla er ngii a ungil luchul me ngmilsa Jehovah klebkall, me kid el dirrek.

AIKE EL LODBECHID EL MO MSA JEHOVAH KLEBKALL

5. Ngera uchul me kede respect er a Jehovah?

⁵ Kede mengebkall er a Jehovah e le kede kmal respect er ngii. Ngbetok a uchul me kede respect er a Jehovah. A Jehovah olab a bek el klisiich, me ngdiak a telkelel a klisichel. (Psa. 96:​4-7) A llemesel a rengul a bleketakl el mues er a blebelel. Ngii a uchul a klengar me aike el dousbech el mo melemolem el ngar. (Och. 4:11) Ngoba blakerreng. (Och. 15:​4, NW) Me a rokui el tekoi el loruul a di mo ungilbesul, me ngii a blechoel loltaut a telbilel. (Jos. 23:14) Sei a uchul me a profet Jeremia millekoi el kirel a Jehovah el kmo: “Ng diak a ua ikau er a delongelir a re bek el mellomes a rengrir er a ikal beluu, ma lechub a delongelir a re bek el king.” (Jer. 10:​6, 7) Me ngngar ngii a kmal lungil luchul me kede respect er a Demad el ngar er a eanged. Me nguaisei a Jehovah diak di lenguu a respect er kid, ngdirrek el nguu a bltkil a rengud.

6. Ngera uchul me ngbetik a rengud er a Jehovah?

⁶ Kede mengebkall er a Jehovah e le ngkmal betik a rengud er ngii. Molatk a bebil er a blekerdelel a Jehovah el rullid el kmal mo betik a rengud er ngii. Ngbekokuii e chubechubechad. (Psa. 103:13; Isa. 49:15) Ngomelechesiu aike el domelechesiu. Sel lemetemall a rengud e ngmetemall a rengul. (Sek. 2:8) Ngrullii el mo beot er kid a mo kmeed er ngii e mo Sechelil. (Psa. 25:14; Rel. 17:27) Ngngariou a rengul, ng “omes el mer iou er a eanged ma chutem . . . Ng olekiis er a re mechebuul er a chebechab.” (Psa. 113:​6, 7) Ngmekera chad e diak el soal mengebkall el ngika el kmal ngarbab el Dios er kid?—Psa. 86:12.

7. Ngera el ileakl el techall a dobang?

⁷ Kede mengebkall er a Dios e le ngsoad a rechad a bo lodengelii. Te betok a diak lodengelii a klemerang el kirel a Jehovah. E ngerang? E le Satan a mla chodeng a rengrir loeak a blulak el lomerk el kirel a Jehovah. (2 Ko. 4:4) A Satan a mla rulleterir a rechad el mo omdasu el kmo a Jehovah kesib a rengul Dios, diak lomekerreu er kid, e uchul a betok er aika el ringel el dechuarm. Me nguaisei, engdi kid a  medengelii a klemerang el kirel a Dios er kid! Ngngar ngii a ileakl el techelled el lochotii el kmo a Dios ngmera el uangerang, e kobkellii. (Isa. 43:10) A Psalm 96 er a mesaod a rolel a debsa Jehovah klebkall. Chelecha el bo dosaod a bebil er a bades er tia el Psalm e molatk aike el rolel e ngsebechem el msa Jehovah a klebkall el lerredemelel a nguu.

NGMEKERA SEBECHED EL MSA JEHOVAH KLEBKALL EL LERREDEMELEL A NGUU?

8. Ngera ta er a rolel e kede mengebkall er a Jehovah? (Psalm 96:​1-3)

⁸ Monguiu er a Psalm 96:​1-3. Ngsebeched el kobkellii a Jehovah loeak aike el dolekoi el kirel. Ngar er aika el bades e a rechedal a Dios a longemedaol er tir el mo ‘mengitakl . . . el mor a RUBAK,’ ‘oldanges er ngii,’ ‘ouchais a ungil chais el kmo ngii a mla olsobel er kid,’ e ‘ouchais a klebkellel el mor a ngodech el beluu.’ Aika el rokui a rolel e ngsebeched el mengebkall er a Demad el ngar e a eanged. A Rechijudea el uleba blakerreng me a rekot el Kristiano a kmal mle sorir el louchais er a rebebil aike el rokui el ungil el bla leruul a Jehovah el kirir e mesebechakl er a chisel. (Dan. 3:​16-18; Rel. 4:29) Ngmekera sebeched el meruul er a osisiu el tekoi?

9-10. Ngera ke suub er a experience er a Angelena? (Dirrek el momes er a siasing.)

⁹ Molatk er a experience er a Angelena a el lodos er a beluu er a Merikel. Ngika mle bekeu el mesebechakl er a chisel a Jehovah er a kombalii el luluureor er ngii. Ngii el dirk mle start loureor er tia el kombalii a uchul me te mle invite er ngii me a relmuut el bebil el dirk beches el mora miting, el ngii a mo mesterir a techellir louchais el kirir el mora rechad er a ureor. A Angelena mle prepare er a slide show lolecholt er a deurreng el lobang el ta er a Sioning er a Jehovah. Me nguaisei engdi a uchei er a lebo el temel e a ta er a chad er a ureor a mle introduce er ngii el kmo ngmlukeroul el ta er a Sioning er a Jehovah. Ngmlo melekoi a mekngit el kirel a klaumerang er kid. A Angelena a kmo: “Ngmlo melekedukem a uluk. Engdi ak mlo melatk: ‘Ngak, ak mo mecherei ngika el chad me ngmelekoi a blulak el kirel a Jehovah? Me a lechub ak mo mesebechakl er ngii?’”

¹⁰ Sera bo lemerek ngii el chad el mengedecheduch e a Angelena milluluuch el ngar er a rengul er a kedeb el nglunguuch. E dilu er ngii el chad el ngar er a ungil rolel el kmo: “Ngak a kmeed el osisiu a ulekurulek er kau. Ak dirrek  el mlukeroul el ta er a Sioning er a Jehovah, e dirk ta er a Sioning el me lmuut er chelechang.” Alta ngmle sebechel el feel er a tension, engdi ngmillemolem el loba chelellakl el reng e ullecholt a siasing er ngii me a resechelil el dmeu a rengrir el mesiou er a Jehovah, e uleba omengull el mesebechakl er a klaumerang er ngii. (1 Pe. 3:15) Me ngngera dilubech? Sera bo lemerek el mengedecheduch a Angelena e ngika el chad a mla calm down. Ngdirrek el dilu er a Angelena el kmo ngmla er ngii a ungil memory er ngii er a ulekurulel el ta er a Sioning er a Jehovah. A Angelena a kmo: “A Jehovah rredemelel a dosebechakl er ngii. Ngmera el chetengakl el techall a dosebechakl er a ngklel.” Kid me ngdirrek el ngar ngii a chetengakl el techelled el loldanges er a Jehovah e mengebkall er ngii, mo lmuut er a lolekoi mekngit el kirel a rechad.

11. Ngmekera rokui el mera el mengull er a Jehovah er a chelsel a reksi el mei e oltirakl er a omellach el ngar er a Psalm 96:8 (NW)?

¹¹ Monguiu er a Psalm 96:8 (NW). b Ngsebeched el mengebkall er a Jehovah lolab aike el ngar ngii er kid. Remera el mengull er a Jehovah a blechoel el mengebkall er ngii loeak tia el rolel. (Osi. 3:9) El ua tiang, a rechad er a Israel a millenget el kirel okedecherul me a omengetmeklel a templo. (2 Ki. 12:​4, 5; 1 Kr. 29:​3-9) A rebebil er a disaiplo er a Kristus a milsiou er ngii me a rechapostol er ngii lousbech “a ikel ngar ngii er tir.” (Lk. 8:​1-3) A rekot el Kristiano a dirrek el millenget lolengeseu er a rudam me a rudos er tir el mle chuarm er a bosech er a kall. (Rel. 11:​27-29) Kid me ngdirrek el sebeched er chelecha el taem el mengebkall er a Jehovah loeak sel dolenget.

12. Ngmekera tengetenged e sebechel msa Jehovah klebkall? (Dirrek el momes er a siasing.)

¹² Molatk er a di ta er aike el experience el lochotii a rolel e a tengetenged a msa Jehovah klebkall. A report er a rak er a 2020 ochotii el kmo ngmla er ngii a kansoki el kemanget el taem er a Zimbabwe. Te betok el miliol el chad a mle sebechir el mad er a klengerenger luldimukl er tir a odos el ngklel a Prisca. Alta ngkmal mle meringel a blekeradel, a Prisca millemolem er a schedule er ngii loldingel sel Wednesday me a Friday, mo lmuut er a blsechel omelalem el dellomel. A retonari er ngii a mlo medenguul er ngii el mo oldingel er a bai loureor er a sers, e melekoi er ngii el kmo, “Ke mo  mad er a klengerenger.” A Prisca blechoel el ulterekokl a rengul el melekoi er tir el kmo, “A Jehovah a dirkak a ta el lechitak.” Kedeb el taem er uriul e a Prisca ngilai a ngeso er a cheldebechel. Aika el ngeso a mlo er ngii el tengetenged a uchul. A retonari er a Prisca a kmal mle impressed e dilu er ngii el kmo, “A Dios a blechoel el lolengeseu er kau, me ngsomam el mo medengei a lmuut el betok el kirel.” A reteuid er a tonari er ngii a ulemuchel el ngar er a miting.

13. Ngmekera omerelled e msa Jehovah klebkall? (Psalm 96:9)

¹³ Monguiu er a Psalm 96:9. Ngsebeched el mengebkall er a Jehovah loeak omerelled. A reprist el milsiou er a templo er a Jehovah mle kirir el mengikiid a bedengir. (Exo. 40:​30-32) Engdi sel lmuut el klou a ultutelel a mle kirir el klikiid omerellir. (Psa. 24:​3, 4; 1 Pe. 1:​15, 16) Ngkired el meringel el loureor el lomedobed er “ngikel mechut el chad” el ngii aike el diak el klikiid el uldasu me a omeruul, e mo omekbail er kid “ngikel beches el chad” el ngii a mo omdasu e meruul a tekoi el lolecholt a blekerdelel a Jehovah. (Kol. 3:​9, 10, BT) Ngoeak a ngelsuil a Jehovah, e ngmo lmuut er tirke el kmal mirruul a mekngit a sebechir el mengodech el mo oubail er ngike el beches el chad.

14. Ngera ke suub er a experience er a Jack? (Dirrek el momes er a siasing.)

¹⁴ Molatk er a Jack el kmal mle violent e kengaol el chad, el lulemekedong er ngii el Mekngit el Chelid. Mekngit el tekoi el leriruul a Jack a uchul me te mle sentence er ngii el mo okodall. Me nguaisei engdi sera longiil er otutel a sentence er ngii e ngmlo kongei el mesuub a Biblia lobengkel a odam el luleldingel er a blil a kelebus el lemla er ngii. Alta ngriruul a betok el kmal mekngit el tekoi, a Jack a mildebedii ngike el mechut el chad el choitii me a cherengel a taem e ngmiltecholb. A Jack a kmal mlengodech a blekerdelel me sel sils er a bo lokodall e a rebebil er a milengkar er a blil a kelebus a mlo merael er a iuosech er a mederir er a lolmesumech er ngii. A sergeant er a blil a kelebus a dilu el kmo: “A ta el taem e a Jack a mle ngike el kot el mekngit el chad el kelebus. Chelechang ngta er tirke el kot lungil kelebus.” Sel sandei er uriul er a lokodir a Jack e a rudam a mlei el me oltobed er a miting er a blil a kelebus e mocha meet er a kelebus el ketengel el mei er a miting. Ngera uldbechii el mei? Ngkmal mle impressed er a omeldechel omerellel a Jack e mle soal mo medengei el kmo ngngera kirel el meruul el mo mengull er a Jehovah.  Me ngbleketakl el kmo a omerelled a sebechel mo uchul a klebkall el mora Demad el ngar er a eanged!—1 Pe. 2:12.

NGMEKERA JEHOVAH BO LONGEBKALL ER A NGKLEL ER A KMAL DI KMEDUNG?

15. Ngmekera Jehovah e mo cherrungel el kobkellii a ngklel er a di kmedung el taem? (Psalm 96:​10-13)

¹⁵ Monguiu er a Psalm 96:​10-13. Aika el ulebongel el bades er a Psalm 96 a mesaod er a Jehovah el melemalt el King e chad er a kerrekeriil. Ngmekera Jehovah bo longebkall er a ngklel er a kmal di kmedung? Sel lotutii a llemalt. Ngdi kmedung e ngmo okngemedii a Kloul Babilon, el mla remuul a betok el kmal mekngit el tekoi e melekoi a kmal mekngit el blulak el kirel. (Och. 17:​5, 16; 19:​1, 2) A rebebil el mo mesa telemellel a Kloul Babilon a locha mo sorir el me teloi er kid er a mera el omengull. E a ulebongel e a Jehovah mo okngemedii a beluulechad er a Satan er a Armakedon, e okngemedeterir tirke el rokui el omtok er ngii e melemall er a ngklel, e olsobel er tirke el rokui el betik a rengrir er ngii e olengesenges er ngii e sorir el mengebkall er ngii. (Mk. 8:38; 2 Th. 1:​6-10) Sel bo lemerek a ulebongel el omelsemai el mo er ngii er a lulebengelel a Ta el Telael el Rak el Omengederederel a Kristus, e a Jehovah a mla ochotii el kmo ngrredemelel a longull er ngii a rokui el chad. (Och. 20:​7-10) Seikid el taem e a “beluulchad a mo mui er a klemedengei er a klebkellel a Dios el ua ngouaol el mui er a daob.”—Hab. 2:14.

16. Ngera ke mla rullii er a rengum el mo meruul er ngii? (Dirrek el momes er a siasing.)

¹⁶ Ngmera el mo ileakl el taem sel rokui el chad el ngar a mo omsa klebkall a Jehovah el ngklel a rredemelel! Engdi chelecha el dongiil er tia el taem e doruul er a part er kid loeak a dousbech a bek el techall el mo msa Dios er kid a klebkall. A Governing Body a sorir el melisiich er tia el kmal klou a ultutelel el ngerachel me te mla ngiltii a Psalm 96:8 (NW) el mo bades er kid er a rak er a 2025: “Bsa Jehovah a klebkall el ngklel a rredemelel.”