1. Ngera sebeched el meruul er ngii me derellii a Jehovah el mo dmeu a rengul?

 KAM imagine el kmo ke msang a chad el betik a rengum er ngii a ileakl el sengk el kmal klebokel e dirrek el ngosukii. Nglocha kmal mo mekngit a rengum a lsekum ke metik el kmo ngmla nguu el loia er a storage e dikea el lluut el melatk er ngii! Me nguaisei, engdi ngkmal mo ungil a rengum a lsekum ngousbech er ngii e mereng a sulem el kirel. Ngera point? A Jehovah milskid a Ngelekel. Ngkmal mo dmeu a rengul sel dochotii omereng el saul er kid el kirel tia el kmal mekreos el sengk me a bltkil a rengul el mei er kid, el ngii a uldbechii el mo meskid a olubet!—Jn. 3:16; Rom 5:​7, 8.

2. Ngera kede mo mesaod er tia el suobel?

² Me nguaisei engdi omerollel a taem e ngsebeched lomuchel el merrekakl er tia el sengk er a olubet. Ngua denguu tia el sengk er a Dios el loia er a storage. Ngungil a rengud el mla nguu, engdi kede nguu loia er a basio el diak desang me ngdiak dolatk er ngii. Me ngkired el melemolem lomekbeches er a omereng el saul er kid el mora Dios me a Kristus el kirel aike el bla leruul el mei er kid me lak leduubech tia el tekoi. Tia el suobel a mo ngosukid el meruul er tiang. Kede mo mesaod a klengeltengat el dengai er chelechang el olubet a uchul me a dirrek el klengeltengat el bo dengai er ngii er a ngar medad. Kede dirrek el mo melatk er a rolel e ngsebeched el lochotii omereng el saul er kid el kirel a bltkil a rengul a Jehovah, tokubets a temel a blsechel a Chedaol Belsoil.

KLENGELTENGAT EL DENGAI ER CHELECHANG

3. Ngera ta er a rolel e kede melai a klengeltengat er a olubet er chelechang?

³ Mo lmuut er chelechang me kede melai a klengeltengat er a olubet el tengetengel a Kristus. El ua tiang, ngoeak a olubet el  tenget e a Jehovah ousubes a kngtid. Ngika diak lekirel lousubes er kid, engdi ngsoal lousubes er kid. A ta er a milluches er a Psalm a milengitakl el kmo: “Kau a ungil, e ousubes a tellemall.”—Psa. 86:5; 103:​3, 10-13.

4. A Jehovah ngkiltmeklii a olubet el kirir a rua techang? (Lukas 5:32; 1 Timothy 1:15)

⁴ A rebebil a feel el kmo te diak el rredemelel a nguu a klausubes er a Jehovah. E mera er ngii ngdiak a ngii di el techa er kid el rredemelel. A apostol Paulus a mle medengei el kmo ng “diak [el rredemelel] chokedongall el apostel.” Me nguaisei ngdilu el kmo: “Ngdi grazia ra Dios a uchul ma kngar sel kngarngii er chelechang.” (1 Ko. 15:​9, 10, BT) Sel dobult er a kngtid, e a Jehovah ousubes er kid. E ngerang? Ngdiak el belkul a kmo ke derredemelel e ngbai betik a rengul er kid me ngousubes er kid. Me a lsekum ke mo feel el kmo ngdiak mrredemelel a nguu a klausubes er a Jehovah e lak mobes el kmo, a Jehovah kiltmeklii a olubet el kirir a rechad el lobult er a kngterir ngdiak lebo er tirke el diak a kngterir.—Monguiu er a Lukas 5:32; 1 Timothy 1:15.

5. Ngngar ngii a ngii di el techa er kid el sebechel lomdasu el kmo ngrredemelel a nguu a klechubechub er a Jehovah? Mosaod.

⁵ Ngdiak a ngii di el techa er kid el kirel mo omdasu el kmo ngrredemelel a nguu a klechubechub er a Jehovah e le ngmla mesiou er ngii el betok el rak. Nguaisei, a Jehovah appreciate er a blakerreng er kid. (Heb. 6:10) Engdi ngika milskid a Ngelekel el diak locheraol el sengk, ngdiak el cheral aike el bla deruul el mo er ngii. A lsekum kede mo omdasu el kmo kede rredemelel a klechubechub er ngii, e ngngua dedu el kmo ngdiak a belkul a kodellel a Kristus.—Momekesiu er a Galatia 2:21.

6. Ngera uchul me a Paulus a mle meringel loureor el ngar er a omesiungel el mora Jehovah?

⁶ A Paulus a mle medengei el kmo a ildisel a tekoi el loruul el mora Jehovah a kmal diak bo lerellii el mo sebechel rodemii a kengei er ngii. Me ngngera uchul me ngmle meringel loureor el ngar er a omesiungel el mora Jehovah? Ngmirruul el uaisei lolecholt er omereng el saul er ngii el kirel a krasia er a Jehovah. (Efe. 3:7) Ngdi ua Paulus, ngblak a rengud el mesiou er a Jehovah el diak el kirel me bo derredemelel a klechubechub er ngii kede bai olecholt er omereng el saul er kid.

7. Ngera lmuut el ta er a klengeltengat el denguu er a olubet er chelechang? (Rom 5:1; Jakobus 2:23)

⁷ A lmuut el ta er a klengeltengat el denguu er chelechang er a olubet a ngii el sebechel mo er ngii a kmes el deleuill er kid me a Jehovah. a Ngua losaod er ngii a uleak uchei el suobel, kede mechell el diak a deleuill er kid me a Dios. Engdi olubet a uchul me ngsebechel mo budech a “delongeled kid ma Dios” e sebeched el mo kmeed er ngii.—Monguiu er a Rom 5:1; Jakobus 2:23.

8. Ngera uchul me ngkired el loba omereng el saul el mora Jehovah el kirel a ileakl el techall er a nglunguuch?

⁸ Molatk er a ta er a telengtengil a deleuill er kid me a Jehovah, el ngii a ileakl el techall el sebeched el meluluuch el mo er ngii. A Jehovah diak di lorrenges a nglunguuch el medung el kirir a rokui el chad sel bo dekldibel, ngdirrek lorrenges a nglunguchir a derta er kid. A nglunguuch a sebechel chollakl a rengud e meskid a budech er a uldasu, me nguaisei tia diak di doruul er ngii me bo lungil a rengud. Tia sebechel rullii el mo dmolech a deleuill er kid me a Dios. (Psa. 65:2; Jak. 4:8; 1 Jn. 5:14) A Jesus er a lengar er tia el chutem e ngmle blechoel el meluluuch e le ngmle medengei el kmo a Jehovah orrenges er ngii me a nglunguuch a dirrek el luchul me a deleuill er ngii me a Demal a melemolem el mesisiich. (Lk. 5:16) Kede mera el oba  omereng el saul e le tengetengel a Jesus a uchul me ngsebeched el mo sechelil a Dios e sebeched el mengedecheduch er ngii loeak a nglunguuch!

KLENGELTENGAT EL BO DENGAI ER A NGAR MEDAD

9. Ngera el klengeltengat a bo lengai er a olubet er a ngar medad a reblak rengrir el mesiungel a Jehovah?

⁹ Ngera el klengeltengat a bo lengai er a olubet er a ngar medad a reblak rengrir el mesiungel a Jehovah? A Jehovah mo mesterir a diak a ulebengelel el klengar. A rebetok omdasu el kmo tia diak el sebechel tekoi e le rechad tirkaikid er a di le kaimekmad. Me nguaisei a dimla moktek er a Jehovah el kirir a rechad a mo kiei el mo cherechar. Okmo Adam a dimlak lebora klengit e ngdiak a chad lomdasu el kmo ngdiak el sebeched el kiei el mo cherechar. Me alta diak a ulebengelel el klengar a kora meringel er kid oumerang er ngii er chelechang, engdi ngkmal sebeched loumerang er ngii e le Jehovah kilkedir a kmal ngarbab el char, el ngii a klengar er a Ngelekel me bo lsebechel el mo tekoi.—Rom 8:32.

10. Ngera te omes el beduluchei el kirel a rengellitel me a rekuk bebil el sib?

¹⁰ Me alta diak a ulebengelel el klengar a tekoi er a ngar medad, a Jehovah a soal a dolatk el kirel er chelecha el taem. A rengellitel a kmal lomes el beduluchei el kirel a klengar er tir er a eanged el mo mengedereder er a beluulechad lobengkel a Kristus. (Och. 20:6) A rekuk bebil el sib omes el beduluchei el mo kiei er a baradis el chutem el diak a ringel me a klengiterreng er ngii. (Och. 21:​3, 4) Kau, ke ta er a rekuk bebil el sib loba omelatk el mo kiei er tia el chutem el mo cherechar? Tia el diukes a diak lengariou er a klengar el mora eanged! Tiakid a de ulebeob a rechad el kirel. A klengar er tia el chutem a mo rullid el kmal mo dmeu a rengud.

11-12. Ngera bebil el klengeltengat er a Baradis el sebeched el lomes el beduluchei el kirel? (Dirrek el momes a siasing.)

¹¹ Ka di molatk er a mo klengar er kau er a Baradis er tia el chutem. Ngdiak mluut el mo bekikl el kirel a secher me a kodall. (Isa. 25:8; 33:24) A Jehovah mo otaut a rokui el lungil el soam. Ngera soam el mo mesuub el kirel?  Ngsoam el mesuub el kirel a charm? Mo meduch lousekool er a ta er a klekedall er a ongngak? Mo meduch lousunga? A Baradis e kede mo ousbech er a rechad el meduch el design e omekedechor a blai. Kede dirrek el mo ousbech er a rechad lomekeroul e meruul a kall, meruul a dongu, e melalem e omekerreu a dellomel. (Isa. 35:1; 65:21) Sel debo dekiei el mo cherechar e ngmo er ngii a temem el meruul aika el rokui me a lmuut el betok!

¹² Ngdirrek el mo dmeu a rengud el loutkeu er a remekiis er a kodall! (Rel. 24:15) Ka mdirrek el melatk er kau el mo suub a lmuut el betok el kirel a Jehovah loeak omorriter aika el betok el blebelel. (Psa. 104:24; Isa. 11:9) Ngaruchei er ngii kede mo mesiou er a Jehovah el diak a kngtid! Kau, ke mo otngakl aika el klengeltengat el kirel a di “tedeb el deurreng”? (Heb. 11:25) Ngkmal diak! Aika el klengeltengat a lmuut el lungil er a ngii di el tekoi el denguu er tia el beluulechad er chelechang. E lak mobes, a ta er a klebesei e a Baradis er tia el chutem a mo diak el tekoi el dongiil er ngii, ngmo klengar er kid er a bek el sils. Aika el rokui a sebechel mo tekoi e le Jehovah kmal betik a rengul er kid me ngmilskid a Ngelekel!

MOCHOTII EL KMO KE OBA OMERENG EL SAUL EL KIREL A BLTKIL A RENGUL A JEHOVAH

13. Ngmekera dochotii el kmo kede oba omereng el saul el kirel a bltkil a rengul a Jehovah? (2 Korinth 6:1)

¹³ Ngmekera dochotii el kmo kede oba omereng el saul el kirel a Jehovah el milskid a olubet? Loeak sel denguu a urerel el mo kot el klou a ultutelel er a klengar er kid. (Mt. 6:33) A Jesus a mlad el “kirel me tirikel ngar a dikea le ngar el di kirir, e te bai ngar el kirel ngikel mlad e mokiis el kirir.” (2 Ko. 5:​15, BT) Ngkmal diak el soad el rullii a krasia er a Jehovah el mo diak a ultutelel.—Monguiu er a 2 Korinth 6:1.

14. Ngmekera dochotii a klaumerang er kid er a ulekrael er a Jehovah?

¹⁴ Ngdirrek el sebeched el lochotii el kmo kede oba omereng el saul el kirel a bltkil a rengul a Jehovah loeak a dochotii a klaumerang er kid er a ulekrael er ngii. Ngmekera doruul er tiang? Sel doruul omelilt el uai a klemengetel a skuul el bo dolai er ngii me a rolel a ureor el dekengei, e ngkired el melatk er a soal a Jehovah a doruul er ngii. (1 Ko. 10:31; 2 Ko. 5:​7, BT) Sel lebora omeruul a klaumerang er kid e ngduubech a kmal mengasireng el tekoi. A klaumerang er kid me a deleuill er kid me a Jehovah lmuut el mo mesisiich. A omeltked a lmuut el menga el mo ulterekokl er a rengud.—Rom 5:​3-5; Jak. 2:​21, 22.

15. Ngmekera sebeched el lochotii omereng el saul er kid er a temel a blsechel a Chedaol Belsoil?

¹⁵ Ngngar ngii a lmuut el ta er a rolel e ngsebeched lochotii el kmo kede oba omereng el saul el kirel a bltkil a rengul a Jehovah. Ngsel dousbech er a blsechel a temel a Chedaol Belsoil el lochotii er a Jehovah el kmo kede oba omereng el saul el kirel olubet. Ngdiak di dolib el mora Chedaol Belsoil, kede dirrek el invite er a  rebebil el mei. (1 Ti. 2:4) Msodii el mo er tirke el em invite er tir el kmo ngngera meketmokl er a Chedaol Belsoil. Ke locha mo metik el kmo ngkmal ngosukau sel mocholt er tir a video el Ngera me a Jesus a Mlad? me a Molatk er a Kodellel a Jesus el ngar er a jw.org. A remechuodel a kirir el make sure el mo invite er a re inactive. Molatk er a deurreng el mo er ngii er a eanged me a chutem sel bo lsorir a rebebil er a ririid el sib er a Jehovah el lmuut el mei er a delebechel! (Lk. 15:​4-7) E a temel a Chedaol Belsoil e lak di doutkeu er a tang me a tang, ngbai tokubets tirke el beches el mei me a tirke el mla mo meketeket el diak el mei. Ngsoad el rulleterir el mo feel el kmo ngkmal dmeu a rengud le tir a mlei.—Rom 12:13.

16. Ngera uchul me ngungil dolatk a menglou er a temed el lomerk er a klumech er a temel a blsechel a Chedaol Belsoil?

¹⁶ Kau, ngsebechem el meruul a lmuut el betok el ngar er a omesiungem er a temel a blsechel a Chedaol Belsoil? Tia kmal lungil rolel e ke ochotii omereng el saul er kau el kirel aike el rokui el bla leruul a Dios me a Kristus el kired. Sel lluut el mo klou a temed el lomerk er a klumech, e ngmo sebeched el mesa Jehovah el lolengeseu er kid me a klaumerang er kid er ngii a lmuut el mo mesisiich. (1 Ko. 3:9) Mdirrek el make sure el mo menguiu er a omengiuel a Biblia er a Chedaol Belsoil el debetik er ngii er a days text me a lechub e ngsel chart el ngar er a subeled er a miting. Ngdirrek el sebechem lousbech aika el bades el meruul er a project er kau er a omesuub.

17. Ngera odeuir a rengul a Jehovah? (Momes er a baks el “ Rolel e Kede Ochotii Omereng el Saul er Kid el Kirel a Bltkil a Rengul a Jehovah.”)

¹⁷ Me nguaisei, a blekeradel er a klengar er kau a locha uchul me ngdiak el sebechem el meruul aike el rokui el losaod tia el suobel. Engdi lak mobes el kmo a Jehovah diak lomekesiu aike el moruul el mora rebebil, ngomes er sel ngar er a chelsel a rengum. Ngkmal mo dmeu a rengul sel lomes er a omereng el saul er kau el kirel a mekreos el sengk er ngii er a olubet.—1 Sa. 16:7; Mk. 12:​41-44.

18. Ngera uchul me kede oba omereng el saul el kirel a Jehovah el Dios me a Jesus Kristus?

¹⁸ Ngdi olubet a uchul me ngsebechel musubes a kngtid, mo er ngii a deleuill er kid me a Jehovah, e oba omelatk el mo kiei el mo cherechar. Mada deblechoel el lolecholt er omereng el saul el kirel a bltkil a rengul a Jehovah el ngii a uchul me ngsebeched el ngmai aika el klengeltengat. (1 Jn. 4:19) De dirrek lochotii a omereng el saul er kid el mora Jesus, el kmal betik a rengul er kid me ngkilengei el mo mad el kired!—Jn. 15:13.