1. Kid el rokui, ngngera kired el meruul er ngii?

 NGKIRED el meruul omelilt er a bek el sils. A bebil lomelilt a beot a doruul el ua ngngera kede mo mengang er a tutau me a lechub e ngtela klok e kede mo mechiuaiu. A kuk bebil a meringel. Ngngar ngii a locha lebo lerellii er a health er kid, deurreng er kid, rebetik er a rengud, me a lechub ngomengull er kid. E soad a omelilt er kid a bo luchul a klungioled, kid me a telungalek er kid. A ngaruchei er ngii, ngomeltked el kmo, a omelilt er kid a odeuir a rengul a Jehovah.—Rom 12:​1, 2.

2. Ngera sebechel ngosukau el mo mellomes el melilt?

² Ngklou a techellem el mo mellomes el melilt a lsekum (1) ke ngmai a rokui el information, (2) ke nguu a uldesuel a Jehovah el kirel, e (3) mo kerekikl el melatk a options er kau. Tia el suobel a mo mesaod aika el edei el tekoi e mo ngosukid el mo meduch el merriter a ungil me a mekngit me bo lsebeched el mellomes el melilt.—Osi. 2:11.

MNGAI A ROKUI EL INFORMATION

3. Momekesiu er a uchul me ngkirem el ngmai a rokui el information er a uchei er omoruul omelilt.

³ A kot el tekoi el kirem el meruul er ngii e ngmo sebechem el mo ungil el melilt, a omngai a rokui el information. Ngera uchul me tia kmal klou a ultutelel? Kam imagine er a chad el smecher el mo omes er a toktang le ngngar ngii a oberaod el secherel. A toktang ngdi diak el examine er ngii el kot me a lechub e loker a ker e msang a kar? Ngkmal diak. Kau me ke dirrek el mo ungil melilt a lsekum a kot e ke ngmai a rokui el information el kirel a tekoi el omngar er ngii. Ngmekera sebechem el meruul er tiang?

4. Ngua lolekoi a Osisechakl 18:​13, ngera sebechem el meruul er ngii me mngai a rokui el information? (Dirrek el momes er a siasing.)

⁴ Ngsebechem el ngmai a information loeak sel moker a ker. Okmo te invite er kau el mora gathering. Ngungil obong? A lsekum  ngdiak modengelii a oungerachel er ngii me a lechub e ngngera mo er ngii er tia el gathering, e ngkirem el loker a ker el uai a: “Ngmo er ngii er ker e mo er ngii er oingerang? Ngtela ildisir a rechad el mong? Ngtecha mo supervise? Ngtechang a mong? Ngera te mla plan el kirir a rechad el mong? Te mo serve a mesisiich el ilumel?” A nger er aika el ker a mo ngosukau el mo mellomes el melilt.—Monguiu er a Osisechakl 18:13.

5. Ngera ungil moruul er ngii er a uriul er a omngai a rokui el information?

⁵ Uriul er a omngai a rokui el information, e mesa cherrungel el siasing. El ua tiang, okmo ke mo medengei el kmo a rechad el diak el respect omellach er a Biblia a mo er tia el gathering me a lechub e te mo serve a mesisiich el ilumel engdi ngdiak a supervise? Omomdasu e ngngar ngii a techellel tia el gathering el mo ulekeangel el omilil? (1 Pe. 4:3) Me a lechub okmo a temel tia el gathering a mo melemall er a temel a miting me a lechub e ngodingel er kau? Sel omesang a siasing el rokir e ngmo beot er kau a mo ungil el melilt. Engdi ngngar ngii a lmuut el ta er a tekoi el kirem el meruul er ngii. Kau a medengelii a osengem el kirel, engdi ngngua ngera osengel a Jehovah el kirel?—Osi. 2:6.

MNGUU A ULDESUEL A JEHOVAH

6. A doltirakl er a Jakobus 1:​5, e ngera uchul me ngungil a doluluuch lolengit er a ngelsuil a Jehovah?

⁶ Molengit er a Jehovah me lengesukau el mo medengelii a uldesuel. A Jehovah tibir el kmo  ngmo meskid a llomeserreng me ngsebeched el mo mtebengii el kmo a omelilt ngodeuir a rengul me a lechub e ngdiak. Ngomeskid el “ungil a tekingel el diak a le kiresii” a llomeserreng.—Monguiu er a Jakobus 1:5.

7. Ngmekera sebechem el mo medengelii a uldesuel a Jehovah? Momekesiu.

⁷ Sel obo mo merek el meluluuch el kirel a ulekrael er a Jehovah, e mkerekikl lomes er a nger er ngii el kirel a nglunguchem. Ngsebeched lomekesiu er ngii er tiang: A lsekum ke travel e mla mo diak modengelii a omngar er ngii e ngsebechem lolengit er a ngelsuil a chad el kiei er ngii el beluu. Engdi kau, ke mo merael er a uchei er a longer er kau? Ngkmal diak. Ke mo kerekikl lorrenges a ulekrael er ngii. Ngdi osisiu uriul er a omolengit er a llomeserreng er a Jehovah, e molasem el mo medengelii a nger er ngii loeak omosiik a llach me a omellach er a Biblia el chatter er a blekeradel el mngar ngii. El ua tiang, a uchei er omolilt el mo er sel gathering el dulsaod er ngii er a uchei, e ngsebechem el lomes aike el lolekoi a Biblia el kirel a ulekeangel el omilil, mekngit el klausechelei, me a klungel a ultutelel a denguu a Renged el mo ngaruchei er aike el soad.—Mt. 6:33; Rom 13:13; 1 Ko. 15:33.

8. Ngera sebechem el meruul er ngii okmo kousbech a ngeso losiik a information? (Dirrek el momes er a siasing.)

⁸ Me nguaisei, engdi a lebebil e kousbech a ngeso el mo metik a ulekrael el mousbech.  Nglocha sebechem el nguu a advice er a odam me a lechub e ngodos el ngar ngii a experience er tir el kirel. Me nguaisei engdi ngdirrek el sebechem el ngmai a klungiolem sel di lekau el research. Ngkmal betok a information er aike el dongu er kid er omesuub el sebechel el ngosukau el uai a Research Guide for Jehovah’s Witnesses me a Scriptures for Christian Living. Lak mobes el kmo ngngera a turrekong er kau: meruul omelilt el ngii odeuir a rengul a Jehovah.

9. Ngmekera sebechel mo ulterekokl a rengud el kmo a omelilt er kid odeuir a rengul a Jehovah? (Efesus 5:17)

⁹ Ngmekera sebechel mo ulterekokl a rengud el kmo a omelilt er kid odeuir a rengul a Jehovah? A kot, e ngkired el mo ungil medengelii a Jehovah. A Biblia a kmo: “Klemedengei er Ngikel Chedaol a sekutaberreng.” (Osi. 9:10) Nguaisei, ngmo er ngii a mera el klemedengei sel bo dodengei a blekerdelel a Jehovah, moktek er ngii, me a soal me aike el louketui. Di lekau el oker, ‘Ngoltirakl aike el kudengei el kirel a Jehovah, e ngera el omelilt a sebechek el meruul el ngii a mo odeuir a rengul?’—Monguiu er a Efesus 5:17.

10. Ngera uchul me a omellach er a Biblia a lmuut el klou a ultutelel er a siukang er a telungalek er kid me a lechub e ngsiukang er a beluad?

¹⁰ A bo dodeuir a rengul a Jehovah e a lebebil e ngmo kired el tomall a rengrir tirke el kmeed er kid. El ua tiang, a rebebil loungalek a locha mo oldubech er a ngelekir el redil me bo lebechil a chad el ungilbesul er a klechad me a lechub e ngsebechel mesterir a klou el bus, alta ngdiak lemesisiich er a tekoi er a klereng. Nguaisei el sorir a ngelekir a bo lemukerreu er aike el lousbech, engdi ngtecha mo ngosuir el mukeroul er a tekoi er a klereng? Ngua ngera osengel a Jehovah el kirel tia el tekoi? Kede metik er a nger er tiang er a Mateus 6:33 (NW). Tia el bades a melisiich er a Rekristiano me “lenguu a Renged el mo kot.” Me alta kede mengull er a rechad er a blid me a rechad el kiei el iliuekl er kid, me nguaisei engdi sel kot el klou a ultutelel er kid a odeuir a rengul a Jehovah.

MKEREKIKL EL MELATK A OPTIONS ER KAU

11. Nger el tekoi el losaod er ngii a Filipi 1:​9, 10 (NW) a mo ngosukau el mo kerekikl el melatk a options er kau?

¹¹ Sel bla bo modengei omellach er a Biblia el ngar ngii a lerellii er a omelilt er kau, e ngkirem el mo kerekikl el melatk a options er kau. (Monguiu er a Filipi 1:​9, 10, NW. a) Sel bo meduch el merriter a ungil me a mekngit e ngmo ngosukau el mtebengii a mo rsel a derta er aika el option er kau. A lebebil e ngsebeched el di mereched el melilt. Me nguaisei, engdi ngdiak el rokui el omelilt a bleketakl a nger er ngii. Omerriter a mo ngosukau el mo mellomes el melilt el mo lmuut er a chelsel a kmal meringel el blekeradel.

12-13. Ngmekera omerriter e sebechel ngosukau el mo mellomes el melilt el kirel a tekoi er a ureor?

¹² Molatk er tia el blekeradel. Ke osiik a ureor me bo lsebechem el support er a telungalek er kau. Ke metik a teblo el ureor. Me ke review a rokui el information el uai a ngngua ngera el bedengel a ureor, schedule, klemengetel a taem el momekall el mora ureor, me a lmuut el bebil. A doltirakl er a bades e aika el teblo el ureor a diak lemekngit. E locha soam a ta er ngii el kuk ngaruchei er sel tang, e le ngsoam el bedengel a ureor me a lechub e nglmuut el ngarbab a udoud er ngii. Me nguaisei, engdi ngngar ngii a lmuut el kirem el melatk er a uchei er omoruul er a omelilt.

¹³ El ua tiang, aika el ureor ngmo melemall er a temel a miting er kau? Aika el ureor ngmo  melas er a taem el mousbech er ngii lolengeseu er a telungalek er kau er aike el lousbech er a uldesuir me a rengrir me a klereng er tir? Sel molatk chouaika el ker e ngmo ngosukau el ngmai aike el “lmuut el meklou a ultutelel el tekoi” el mo ngaruchei er a kerruul. Seikid e ngmo sebechem el meruul omelilt el Jehovah mo omekngeltengat er kau el kirel.

14. Ngmekera omerriter me a bltikerreng e ngosukid me ngdiak bo dolibas er a rebebil?

¹⁴ A omerriter a dirrek el sebechel ngosukid el mo melatk er a bo lerellii el mora rebebil a omelilt er kid, me ngdiak bo ‘dolibas er a rebebil.’ (Fil. 1:​10, NW) Tia kmal klou a ultutelel sel doruul omelilt er kid er a rolel a doubail e domesiich er kid. El ua tiang, nglocha soad a ileakl el style me a lechub e ngbesiich. Engdi kede mo mekerang a lsekum e ngmo melibas er a rechad er a chelsel me a lechub e ngikrel ongdibel? Omerriter er kid a mo ngosukid el mo respect a feelings er tir. A bltikerreng a mo ngosukid el mo osiik a klungiolir a “re bebil” e mo oba ulserechakl el reng. (1 Ko. 10:​23, 24, 32; 1 Ti. 2:​9, 10, BT) Seikid e kede mo meruul omelilt el ngii ochotii a bltikerreng me a respect er kid el mora rebebil.

15. Ngera ungil omolatk er a uchei er omoruul er a kmal klou a ultutelel el omelilt?

 ¹⁵ A lsekum ke meruul er a kmal klou a ultutelel el omelilt, e molatk aike el kirem el meruul el mo otutii. A Jesus a olisechakl er kid el kmo, ‘momekbuk er a cheral.’ (Lk. 14:​28, BT) Me molatk er a klungel a taem, ureor, me a tekoi el mousbech el mo kutmeklii ngii el lomelilt. Ngar er a bebil blekeradel e nglocha mo kirem el mengedecheduch er a telungalek er kau el mo mesa el kmo ngera kirel a derta er tir el meruul el mo support er ngii el lomelilt. Ngera uchul me a om plan a kmal klou a ultutelel? Nglocha mo ngosukau el mesa el kmo ngngar ngii a bebil el tekoi el kirem el melodech me a lechub e ngngar ngii a ta er a lmuut el lungil el option. E sel mongedecheduch er a telungalek er kau e mkerekikl lorrenges er tir, le nglocha mo rulleterir el mo sorir el lolengeseu er kau el lotutii omelilt er kau.—Osi. 15:22.

MORUUL OMELILT EL NGII A MO UNGILBESUL

16. Ngera el bakes a mo ngosukau el rullii omelilt el mo uchul e ngmo ungilbesul? (Dirrek el momes er a baks el “ Rolel a Doruul a Mellomes el Omelilt.”)

¹⁶ A lsekum ke mla remuul aika el rokui el tekoi el bla desaod, e ke mla mo kltmokl el meruul er a mellomes el omelilt. Ke mla ngmai a rokui el information e mla merriter a rokui el omellach el ngii mo ngosukau el rullii omelilt el lodeuir a rengul a Jehovah. Chelechang e ngsebechem el lolengit er a Jehovah me lengesukau me a omelilt er kau a mo ungilbesul.

17. Ngera sel ngaruchei el mo ngosukau el meruul a ungil omelilt?

¹⁷ Mo lmuut me a lsekum a ngar er a mong e ke riruul a ungil omelilt, e lak mobes el kmo sel ngaruchei el mo ngosukau el meruul a ungil omelilt, a omultuil er a llomeserreng er a Jehovah ngdiak el llemesel a rengum me a lechub e ng experience er kau. Ngdi ta el Jehovah sebechel meskau a mera el klemedengei, sekutaberreng, me a omerriter el ngii a tengal a llomeserreng. (Osi. 2:​1-5) A Jehovah sebechel el ngosukau el meruul omelilt el ngii odeuir a rengul.—Psa. 23:​2, 3.