1. Ngmekera mo klungioled sel debora Chedaol Belsoil er a kodellel a Kristus er a bek el rak?

 KULTEREKOKL el kongei el kmo a olubet a mekreos el sengk! (2 Ko. 9:15) Jesus el tilengetengii a klengar er ngii a uchul me ngsebechel mo er ngii a kmes el deleuill er kau me a Jehovah el Dios. Ngdirrek el sebechem el mo kiei el mo cherechar. Me ngkmal kired lochotii omereng el saul er kid el kirel olubet me a dirrek el Jehovah, el milskid olubet le ngkmal betik a rengul er kid. (Rom 5:8) Me a Jesus a kiltmeklii a Chedaol Belsoil el doruul er ngii er a bek el rak me bo dolemolem el loba omereng el saul e lak bo dorrekakl er a olubet.—Lk. 22:​19, 20.

2. Ngera kede mo mesaod er tia el suobel?

² Chelecha el rak e a Chedaol Belsoil a mo er ngii er a Sebadong, April 12, 2025. Kede ulterekokl el rokui el melib el mei er tia el ongdibel. Ngmo uchul a klou el klungioled a lsekum kede mengoit a taem er a temel a blsechel a Chedaol Belsoil el melebedebek a aike el bla leruul a Jehovah me a Ngelekel el kired. Ngar tia el suobel e kede mo mesaod aike el losisecheklid olubet el kirel a Jehovah me a Ngelekel. A ongingil el suobel a mo mesaod a klengeltengat el dengai er a olubet me a rolel e ngsebeched el lochotii omereng el saul er kid el kirel.

AIKE EL LOSISECHEKLID OLUBET EL KIREL A JEHOVAH

3. Ngmekera kodellel a di ta el chad e uchul osobelir a rebetok el miliol el chad? (Dirrek el momes er a siasing.)

³ A olubet osisecheklid el kmo a Jehovah melemalt. (Dut. 32:4) Ngoeak a ngera el rolel? Molatk er tiang: A Adam a mlo diak lolengesenges e uliuelii a klengit el mei er kid luchul me kede mo mad. (Rom 5:12) A Jehovah ulderchii a Jesus el mei  el me melubet er kid er a klengit me a kodall. Engdi ngmekera tengetengel a di ta el cherrungel el chad e melubet er a rebetok el miliol el chad? A apostol Paulus a smodii el kmo: “Ng oeak a orrengesmengoit er a di tal chad [Adam], e a re betok el chad a mlo mekngit; me ng dirrek el ua isei el oeak a blekongesenges er a di tal chad [Jesus] e a re betok el chad a mo muklemalt er medal a Dios.” (Rom 5:19; 1 Ti. 2:6) Me ngbelkul a kmo ngoeak a ta el cherrungel el chad el mlo diak lolengesenges e kede mlo sibil a klengit me a kodall. Me ngoeak a blekongesenges er a ta el cherrungel el chad e kede mo mimokl.

4. Ngera uchul me a Jehovah diak el sebechel di kongei er a remelemalt a rengrir el uldidellel a rsechel a Adam me lekiei el mo cherechar?

⁴ A Jesus, ngmera el uluusbech el mo mad el lolsobel er kid? A Jehovah ngdiak el sebechel di kongei er a remelemalt a rengrir el uldidellel a rsechel a Adam me lekiei el mo cherechar? Ngar osengir a rediak el mecherrungel el chad e tia ungil loruul er ngii. Me nguaisei engdi ngdiak el melemalt el tekoi er osengel a Jehovah. Ngii el melemalt omerellel a uchul me ngkmal diak bo le ignore er a Adam el mlo diak lolengesenges.

5. Ngera uchul me ngsebechel mo ulterekokl a rengud el kmo a Jehovah mo blechoel el meruul er a llemalt?

⁵ Ngera mo duubech a lsekum a Jehovah dimlak leketmeklii olubet e mechiteterir a rediak el mecherrungel el ngelekel a Adam me te kiei el mo cherechar? A rechad a locha mo melatk el kmo, a Dios ngdirrek el diak bo lochotii a llemalt el ngar er a lmuut el bebil er a tekoi. El ua tiang, ngmo otaut a rokui el telbilel? Me nguaisei engdi ngdiak a belkul debekikl el kirel tiang. A Jehovah el rirellii a llemalt alta ngmlo kirel kokedir a kmal ngarbab el char, er a letengetengii a betik er a rengul el Ngelekel, olterekokl er a rengud el kmo ngmo blechoel el meruul er a llemalt.

6. Ngera ta er a rolel e a olubet ochotii a bltkil a rengul a Jehovah? (1 Johanes 4:​9, 10)

⁶ Alta olubet a ngosukid el mo mesa el kmo a Jehovah melemalt, ngtokubets el ngosukid el mo medengelii a delechel a bltkil a rengul. (Jn. 3:16; monguiu er a 1 Johanes 4:​9, 10.) A olubet ochotii el kmo a Jehovah a diak di el soal a bo dekiei el mo cherechar, ngdirrek el soal a bo dechedal a telungalek er ngii. Molatk er tiang: A Adam er a lebora klengit e a Jehovah uldikii er a telungalek er ngii. Sei a uchul me kid el rokui a mechell el diak dechedal a telungalek er a Dios. Engdi ngoeak a olubet e a Jehovah ousubes a kngtid, me a ta er a klebesei e ngmo rulleterir a rokui el chad el loumerang e olengesenges er ngii el mo chedal a telungalek er ngii. Mo lmuut er chelechang  me ngsebechel mo er ngii a deleuill er kid me a Jehovah me a dirrek el rudam me a rudos er kid. A Jehovah a mera el betik a rengul er kid!—Rom 5:​10, 11.

7. Ngmekera ringel el blo lechuarm er ngii a Jesus e ngosukid el mo medengelii a klungel a bltkil a rengul a Jehovah el mei er kid?

⁷ Ngsebeched el mo medengelii a klungel a bltkil a rengul a Jehovah el mei er kid sel dolatk er a lerirellii olubet el mo er ngii. A Satan a kmo ngdiak a ngii di el mesiungel a Dios el mo melemolem el loba blakerreng el mo er ngii sel bo lemeringel er tir. A Jehovah milecherei a Ngelekel me ngmo chuarm e mad el lomeketakl el kmo tia blulak. (Job 2:​1-5; 1 Pe. 2:21) Ngulemes er a rumtok er a Jesus el mengeteklel a klechelid el melekoi a kmal mekngit el tekoi el mo er ngii, e a resoldau a cholebedii el di mo merserasech, e te dmelii er a teluo el kerrekar. E mocha omes er a betik er a rengul el Ngelekel el chuarm er a ringel e mad. (Mt. 27:​28-31, 39) A Jehovah mle sebechel torob aika el tekoi. El ua tiang, a rumtok er a lolekoi el kmo: “A lsekum ng soal a Dios e ka bo desang el mo osebelii er chelechang,” e ngmle sebechel a Jehovah el rullii tiang. (Mt. 27:​42, 43) Me nguaisei engdi a lsekum e ngmlo meruul el uaisei e ngdimlak lemekekad olubet me ngdiak a omelatk el dobang. Me a Jehovah milecherei a Ngelekel me ngchuarm el dimerekmo lemad.

8. A Jehovah ngmlo omelechesiu a ringel er a lomes er a Ngelekel el chuarm? Mosaod. (Dirrek el momes er a siasing.)

⁸ Ngdiak el kired el mo omdasu el kmo a Dios olab a bek el klisiich me ngdiak a feelings er ngii! Kede ulebeob lokesiul, el sebeched el feel me ngbelkul a kmo a Jehovah dirrek el ngar ngii a feelings er ngii. A Biblia mesaod el kirel el kmo ngmo feel el “mekngit a rengul” e ‘omekringel er ngii.’ (Psa. 78:​40, 41) Mdirrek el melatk er a tekoi el dilubech el mora Abraham me a Isak. A Jehovah dilu er a Abraham me letengetengii a di ta el ngelekel. (Gen. 22:​9-12; Heb. 11:​17-19) Molatk aike el betok el tekoi el blo lomelechesiu a Abraham er a bocha lolai er a klengar er a ngelekel. Me a Jehovah mlo omelechesiu er a lmuut el klou el ringel er a lomes er a rechad el lomekcharm er a Ngelekel e mekodir!—Momes er a video el Imitate Their Faith—Abraham, Part 2 el ngar er a jw.org.

9. A Rom 8:​32, 38, 39 ngmekera ngosukau el mo medengelii a delechel a bltkil a rengul a Jehovah el mo er kau me a rekldemem er a klemerang?

⁹ A olubet osisecheklid el kmo ngdiak a ngii di el chad, el mo lmuut er a betik er a rengud el chedad me a lechub e ngsechelid el lmuut el betik a rengul er kid er a Jehovah. (Monguiu er a Rom 8:​32, 38, 39.) Bltkil a rengul a Jehovah el mei er kid a lmuut el ngaruchei er a bltkil a rengud el mora di kid. Kau, ngsoam el  kiei el mo cherechar? A Jehovah soal tia el kirem el ngaruchei er kau. Ngsoam a lemusubes a kngtim? A Jehovah soal tiang el ngaruchei er kau. A di lolengit er ngii er kid a bo dochotii omereng el saul el kirel tia el kmal mekreos el sengk er a olubet e bo doumerang e dolengesenges er ngii. A olubet a mera el ngarbab lochotel a bltkil a rengul a Dios. A beches el blekeradel e kede mo suub a lmuut el betok el kirel a bltkil a rengul a Jehovah.—Oli. 3:11.

AIKE EL LOSISECHEKLID OLUBET EL KIREL A JESUS

10. (a) Ngera kmal mlo mengesang er a Jesus el kirel a kodellel? (b) Ngoeak a ngera el rolel e a Jesus a silbecheklii a ngklel a Jehovah? (Dirrek el momes er a baks el “ A Blakerreng er a Jesus a Silbecheklii a Ngklel a Jehovah.”)

¹⁰ A Jesus a kmal lomekerreu er a chisel a Demal. (Jn. 14:31) A Jesus er a lemotelechakl el kmo ngoltuub er a Dios e dengerenger el chad e ngkmal mlo mengesang er ngii e le ngdimlak el soal a rechad a bo lomdasu a mekngit el kirel a Demal. Tiakid a uchul me ngmilluluuch el kmo: “Chedam, a bo le sebechel, e mnguu tial kob er a ringel el choridii er ngak!” (Mt. 26:39) Engdi ngii el luleba blakerreng el mora Jehovah el mo lmuut er a kodall a silbecheklii a ngklel a Demal.

11. Ngmilekera Jesus e ochotii a dmolech el bltkil a rengul el mora rechad? (Johanes 13:1)

¹¹ A olubet a dirrek el losisecheklid el kmo a Jesus a kmal omekerreu el kirir a rechad, tokubets a redisaiplo er ngii. (Osi. 8:31; monguiu er a Johanes 13:1.) El ua tiang, a Jesus a mle medengei el kmo a bebil er a tekoi el bo loruul er tia el beluulechad a kmal mo meringel, tokubets a meringel el kodall el lebo lolai er ngii. Me nguaisei a Jesus a dimlak di loruul aikang le Demal a dilu er ngii, ngbai kmal mle betik a rengul er a rechad. Ngmle blak a rengul lomerk, olisechakl, e olengeseu er tir. Mo lmuut er sel sils er a lemad, me ngmilengoit a  taem el merriso ocherir a rechapostol er ngii el lolisechakl er tir e mengedecheduch el mengelaod e melisiich er tir. (Jn. 13:​12-15) E sera ledeleel er a teluo el kerrekar e ngmilsa dengerenger el chad el mle deleel er bita er ngii omelatk, e oterekeklii el kmo a delal a mo ulekerreu sel lemad. (Lk. 23:​42, 43; Jn. 19:​26, 27) Me a Jesus ulechotii a bltkil a rengul el mora rechad er a klengar er ngii el rokir er tia el chutem, ngdiak el di loeak a kodellel.

12. Ngmekera Jesus e dirk oureor el kired?

¹² Me alta Kristus a “di mle tang” el lemad, ngika dirk meruul a betok el kired er chelechang. (Rom 6:​10, BT) Ngmekerang? Ngmelemolem loureor lomeskid a betok lungil, el olubet a uchul e ngmla mo sebechel mo tekoi. Molatk a lemechesang el meruul. Ngika King e Ngarbab el Prist er kid, e bdelul a ongdibel. (1 Ko. 15:25; Efe. 5:​23, BT; Heb. 2:17) Ngika dirrek el oungerachel er a ureor el mengudel er a rengellitel me a kloul seked, el ngii lureor a mo merek er uchei er a bo lemerek a kloul ringel. b (Mt. 25:32; Mk. 13:27) Ngdirrek el lolterekokl el kmo a reblak a rengrir el mesiungel er chelechang el uriul sils a okelall er a tekoi er a klereng. (Mt. 24:45) Me a dirrek el chelsel a Ta el Telael el Rak er Omengedereder e ngmo melemolem el loureor el kired. A Jehovah mera el milskid a Ngelekel!

LAK MSTOB EL MESUUB

13. Ngmekera omelebedebek e ngosukau el melemolem el mesuub el kirel a a bltkil a rengul a Dios me a Kristus el mei er kid?

¹³ Ngsebechem el melemolem el mesuub el kirel a bltkil a rengul a Jehovah el Dios me a Kristus Jesus el mei er kid a lsekum ke mo melebedebek el kirel. Nglocha sebechem er a temel a blsechel a Chedaol Belsoil er chelecha el rak el kerekikl el menguiu er a ta er a Ebangkelio me a lechub e ngbetok er a tang. Lak monguiu a betok el bliongel er a di ta el taem. Bai mokekokau el menguiu e mosiik a lmuut el bebil er a uchul me ngbetik a rengud er a Jehovah me a Jesus. E mouchais er a rebebil aike el obetik er a omengiuem.

14. Ngua losaod a Psalm 119:​97, ngmekera omeruul el research e ngosukid el mo melemolem el mesuub el kirel a olubet me a lmuut el bebil er a osisechakl? (Dirrek el momes er a siasing.)

¹⁴ A lsekum ke mla ngar er a klemerang el betok el rak, e ke locha mo melatk el kmo ngmera el sebechem el metik a beches el tekoi el sebechem el suub er a llemalt me a bltikerreng  er a Dios me a dirrek el olubet. A mera er ngii ngdiak a mo ulebengelel aike el beches el desuub er aika el tekoi me a lmuut el betok el topic. Me ngngera sebechem el meruul er ngii? Monguiu e mosuub aike el betok el tekoi el debetik er aika el babilenged. Sel obora tekoi el diak mungil understand er ngii e moruul a research. E a chelsel a sils er kau el rokir e molebedebek aike el obiltik me aike el louchais er kau el kirel a Jehovah, Ngelekel, me a bltkil a rengrir el mo er kau.—Monguiu er a Psalm 119:97.

15. Ngera uchul me ngklou a ultutelel a dolemolem el losiik a mekreos el tekoi er a Biblia?

¹⁵ Lak bo lemechitechut a rengum a lsekum ngdiak obetik a beches me a lechub ngkora kmal ileakl el tekoi sel bo mdengchokl el menguiu me a lechub e ke meruul a research. Momes er kau el ua chad el losiik a kolt. A rechad el losiik a kolt a klou a rengrir el mengoit a betok el sikang me a lechub e ngsils el di mo metik er a kekerei el kolt. Te blak a rengrir el meruul el uaisei e le derta el tebtebil a kolt a kmal mekreos er a rengrir. Aike el desuub er a Biblia lmuut el mekreos er a kolt! (Psa. 119:127; Osi. 8:10) Me bo moba kllourreng e molemolem loltirakl er a schedule er kau er a omengiuel a Biblia.—Psa. 1:2.

16. Ngmekera sebeched el loukerebai er a Jehovah me a Jesus?

¹⁶ Sel mosuub, e mosiik a rolel e ngsebechem loltaut aike el mosuub. El ua tiang, moukerebai er a llemeltel a Jehovah loeak sel le fair omerellem el mora rechad. Moukerebai er a bltkil a rengul a Jesus el mora Demal me a rebebil loeak omkengei el mo chuarm el kirel a ngklel a Jehovah e molengeseu er a rudam me a rudos er kau el mo lmuut me a lerellii a klengar a lebebil el mo meringel. Mdirrek loukerebai er a Jesus loeak sel momerk el mora rebebil me bo lsebechir el dirrek el mo nguu a mekreos el sengk er a Jehovah.

17. Ngera kede mo mesaod er a ongingil el suobel?

¹⁷ Sel lluut el mo klou klemedengei me a omereng el saul er kid el kirel olubet, me ngii lmuut el mo dmolech a bltkil a rengud el mora Jehovah me a Ngelekel. Me tir a lmuut el menga el mo betik a rengrir er kid. (Jn. 14:21; Jak. 4:8) Me bo dungil lousbech aike el bla lebeskid a Jehovah el mo melemolem el mesuub el kirel a olubet. A ongingil el suobel a mo mesaod a klengeltengat el dengai er a olubet me a rolel e ngsebeched el lochotii omereng el saul er kid el kirel a bltkil a rengul a Jehovah.