1-3. (a) Nglocha oingerang e ngmilluches a Psalm 147? (b) Ngera sebeched el mo medengei sel dosuub er tia el bliongel er a Psalm?

KEDE blechoel el chemat er a chad sel bo lemechas a rengud er a tekoi el ledillii me a lechub e ngomeruul el lerirellii. Me tiang a ochotii el kmo ngkmal kired el chemat er a Jehovah el Dios! Kede chemat er ngii el kirel a klou el klisichel, el sebeched el mesang el okiu a klebokel el blebelel, kede dirrek el chemat er ngii el kirel tia el klou el bltkil a rengul el mei er kid, el sebeched el mesang el okiu a olubet el tengetengel a Ngelekel.

² Me sel donguiu er a Psalm 147, e ngmo bleketakl er a rengud el kmo, ngike el milluches er ngii a kmal mle soal el oldanges er a Jehovah. Ngdirrek el millisiich er a rebebil el mo oldanges er a Dios lobengkel.​—Monguiu er a Psalm 147:1, 7, 12.

³ Ngdiak dodengei el kmo ngtecha milluches er a Psalm 147. Engdi ngika el milluches er ngii a locha kiliei er sel taem el rechad er a Israel a liluut el mo er a Jerusalem er a uriul er a lotebedeterir er a Babilon a Jehovah. (Psalm 147:2) Me ngika el milluches er tia el psalm a uleldanges er a Jehovah e le ngmla lmuut el osobelterir a  Rechedal me ngmo sebechir el mengull er ngii er a belurir. Ngdirrek el milsaod a lmuut el betok el ungil el uchul me ngkired el oldanges er a Jehovah. Me aikang ngera el tekoi? E ngera uchul me kede oldiu el kmo “Hallelujah!,” me a lechub e “Modengesii Rubak!”?​—Psalm 147:1.

4. Ngmlo uangera uldesuir a rechad er a Israel er sera loltobed er tir a King el Sairus? E ngera uchul?

⁴ Ka di molatk er a rolel a klengar er a rechad er a Israel er a bo leblebaol er a Babilon. Tirke el ngiltiterir el mong a uluucharm er tir e dilu el kmo: “Mchiteklii a tar a chelitakl el kirel a Sion!” Engdi a rechad er a Judea a dimlak lsorir el mengitakl. A Jerusalem el mle uchul a klou el deurreng er tir a mla metemall. (Psalm 137:1-3, 6) Me ngkmal mla mecham a rengrir, me te kmal ousbech a ongelaod. Engdi ngua lulemlaoch a tekingel a Dios el kmo, a Jehovah a mo olsobel er a rechedal. El okiu a ngera el rolel? A King el Sairus er a Persia a mlo mesisiich er a Babilon e milsaod el kirel a Jehovah el kmo: “A Rubak el Dios er a eanged a milskak a rokui el renged er a beluulchad, e milskak a ngerchelek el mo meleketek er a blil er a Jerusalem el ngar a Juda.” E sola e dilu er a rechad er a Israel el kmo: “Ma ngii di le chad er a chelsiu el rokui el chedal a Rubak le bor a Jerusalem, e a Dios er kemiu bo lobengkemiu.” (2 Kronika 36:23) Me tiang a mera el milengelaod er a rechad er a Israel el mla er a Babilon!

5. Ngera omesodel a milluches er a psalm el kirel a klisichel a Jehovah el omekungil er kid?

⁵ A Jehovah a dimlak di lebesterir a ongelaod er a rechad er a Israel e lemerekong, e ngdirrek el milengelaod er a derta el chad. Me ngmeruul er a osisiu el tekoi el kired er chelechang. Ngike el milluches er tia el psalm a kmo “Ng omekungil a chelemuul el reng, e omkar a telemall er a bedengir.” (Psalm 147:3) Me sel bo desecher me a lechub e ngmo mekngit a rengud, e ngulterekokl a rengud el kmo a Jehovah a omekerreu er kid. Ngkmal soal el mengelaod er kid, e omekungil a telemall er a bedenged. (Psalm 34:18; Isaia 57:15) Ngmeskid a llomeserreng me a klisiich me ngsebeched el outekangel a ngii di el mondai el dechelebangel.​—Jakobus 1:5.

6. Kede mekerang e ngmai a klungioled er a tekingel a milluches er a Psalm 147:4? (Momes er a siasing er a uchelel a suobel.)

⁶ A ongingil, e ngika el milluches er a psalm a ulemes el bedul a eanged e dilu el kmo a Jehovah a “olterekokl a ulecherengelel a btuch,” e dirrek el “melibech a ngklel a derta er ngii.” (Psalm 147:4) Ngika el chad a mle sebechel el omes a btuch, engdi ngkmal dimlak lodengei el kmo ngua ngera ildisel. Me chelecha el taem e a re scientist a medengei el kmo ngar er a chelsel tia el galaxy er kid e ngar er ngii a betok el biliol el btuch. E meliuekl er tia el melidiul e nglocha ngar er ngii a betok el triliol el btuch er a chelsel! Me a rechad a kmal diak el sebechir el mechur a rokui el btuch, engdi ngike el Ulemeob a sebechel. Ngmera el sebechel e le ngmedengei a derta er ngii el btuch e mla duibech a ngklel a derta er ngii. (1 Korinth 15:41) Me ngika el Dios el medengei a lengar er ngii a derta el btuch a dirrek el kmal ungil medengelkau. Ngdirrek el kmal ungil medengei el kmo ke kirel ker, e uangera uldesuem, e ngera kousbech!

7, 8. (a) A Jehovah, ngmedengei a ngera el tekoi el kired? (b) Msodii a tekoi el olechotel a klechubechub er a Jehovah.

⁷ A Jehovah a kmal ungil medengei a ringeled,  e kmal ngar er ngii a klisichel el ngosukid er a mondai er kid. (Monguiu er a Psalm 147:5.) Me kede locha mo omdasu el kmo a ringel el dechuarm er ngii a kmal meringel me ngdiak el sebeched el outekangel er ngii. Engdi Dios a kmal ungil medengei aike el sebeched, e le “ng melatk el kmo kid a di chebechab.” (Psalm 103:14) Me kid el diak demecherrungel a uchul me kede di mo remuul a cheleuid, el rullid el mo mechitechut a rengud. Me kede mo ouuchel a rengud er a tekoi el dullekoi, me a mekngit el urunguled, me a lechub a telkib el chelechei er a rengud! Engdi Jehovah a kmal diak a chelitechetul, e ungil medengei el kmo ngua ngera uldesued.​—Isaia 40:28.

⁸ Ngmla ta el bo molechesuar a chimal a Jehovah el lolengeseu er kau er a mondai er kau? (Isaia 41:10, 13) Tiang a dilubech el mo er a ta el pioneer el Kyoko. A uriul er a lolukl el mo er a beches el ngerechelel, e ngkmal mlo mechitechut a rengul. Engdi ngmilekerang a Kyoko e mo medengei el kmo a Jehovah a ungil medengei a mondai er ngii? Ngar er a chelsel tia el beches el ongdibel er ngii, e te kmal mle betok a ungil medengelii a uldesuel. Me ngmlo melechesuar el kmo a Jehovah a mengedecheduch er ngii el kmo: “Ngkmal betik a renguk er kau el diak lebelkul a kmo kau el pioneer, e ke bai ngelekek el redil el mla tibir er a rengum el mei er ngak. Me ngkmal soak a bo ledeu a rengum er a klengar er kau el ta er a Sioning er ngak!” Me nguleak a ngera el rolel e a Jehovah a ulechotii er kau el kmo “a klemedengei er ngii a diak el sebechel el metuk”?

9, 10. Ngera kot el klou a ultutelel el rolel e a Jehovah a olengeseu er kid? Mosaod.

⁹ Kede rokui el ousbech a kall me a bail me a blai. Me alta e ngmo suebek a rengud a lebebil er a taem el ngelsengesel a keled a uchul. Engdi a Jehovah a milebii tia el chutem el mo omekdubech a kall el kirir a rokui el chad, e ngdirrek el “omekang a mekekerei el raven sel le langel.” (Monguiu er a Psalm 147:8, 9.) Me a lsekum a Jehovah a omekang a raven, e ngkmal kirel el mo ulterekokl a rengud el kmo ngmo meskid aike el dousbech er a klengar er kid.​—Psalm 37:25.

¹⁰ E a kot el ngaruchei, a Jehovah a omeskid aike el dousbech me lolemolem el mesisiich a klaumerang er kid, ngdirrek el meskid “a budech er [Ngii], el diak el sebechel a chad el mo cherrungel el medengelii.” (Filipi 4:6, 7) A odam el ngklel a Mutsuo me a bechil a milsa rolel e a Jehovah a ullengeseu er tir. Ngar er a rak er a 2011, e a klou el tsunami a silbechii er a Siabal, engdi te silobel er a lechiis el ngmasech er a chedoel a blirir. Te urriid a rokui el kloklir er seikid el sils. Me te kiliei er a chelsel a delemerab er a ongeru el chellibel er a blirir el di milkolk e kmal mle mekelekolt. Me sel tutau e te ulsiik er a ngii di el klalo el sebechel el mo melisiich er tir. Ngdi mle chimo el Year Book of Jehovah’s Witnesses, er a rak er a 2006. Me a Mutsuo a ulemiis er tia el babier e mlo metik er a dai el kmo “The Deadliest Tsunamis Ever Recorded.” Tiang a milsaod el kirel a desiu el mlo er ngii er a Sumatra er a rak er a 2004 el mlo uchul a kot el meklou el tsunami el mla ngar er ngii. Me a Mutsuo me a bechil a di lmangel sel longuiu aike el tekoi el dilubech el mo er a rudam me a rudos er kid. Te mlo melechesuar el kmo a Jehovah a mera el omesterir a omelisiich el tir a ousbech er ngii. A Jehovah a dirrek el ulemekerreu er tir el okiu a kuk bebil er a rolel. A rudam el mla er a bebil el beluu er a Siabal a milsterir a kelir me a bilir. Engdi sel kot el klou el omelisiich el lengiluu a sera bo loldingel er tir a rudam el cheldebechelel a Dios a uleldurech er tir el mong. Me a Mutsuo a kmo: “Ak mlo melechesuar el kmo a Jehovah a dechor er bita er a derta el kemam, e omekerreu er kemam. Tiang a kmal milengelaod er kemam!” Me a Dios a omuchel el meskid aike el dousbech el mo melisiich er a  klaumerang er kid, e a uriul e ngmo meskid aike el dousbech er a klengar er kid.

11. Kede mekerang e mo sebeched el nguu a klungioled er a ngelsuil a Dios?

¹¹ A Jehovah “a olekiis er a re mla merderd.” Ngkmal betik a rengul er kid e di kltmokl el lolengeseu er kid. (Psalm 147:6a) Me ngmekerang e mo sebeched el nguu a klungioled er a ngelsuil? Ngkmal kirel el mo kmes a deleuill er kid me ngii. E tiang a mo sebeched el meruul er ngii sel bo lengariou a rengud. (Sefania 2:3) Tirke el ngariou a rengrir a ultuil a rengrir er a Jehovah el kirel sel taem el bo losmechokl a rokui el chelebirukel e lokngemedii a ringelel a klechad. E a chouaitirka el chad a nguu a kengei er a Jehovah.

12, 13. (a) Ngera el tekoi a kired el mengeroid er kid er ngii, me bo lsebeched el nguu a ngelsuil a Dios? (b) A Jehovah, ngdmeu a rengul er a rua techang?

¹² Me a lmuut el tang, a Jehovah a “mengoit er a re dengerenger er a chutem.” (Psalm 147:6b)  Me ngkmal diak el soad el mo chormii tia el tekoi! Ngkmal soad a Dios a bo lolecholt er a dmolech el bltkil a rengul el mei er kid. Me ngkired el mo ouketui aike el tekoi el ngii a ouketui. (Psalm 97:10) El ua tiang, ngkired el mo ouketui a deleboes el omeruul. El belkul a kmo ngkmal kired el mengeroid er kid er a ngii di el tekoi el sebechel el mengesuseu er kid el mo meruul a deleboes, el uldimukl er a osengel a siasing er a remeau. (Psalm 119:37; Mateus 5:28) Tiang a locha mo meringel er kid el meruul er ngii, engdi ngmo uchul a klou el klungiaol, el ngii a klengeltengat er a Jehovah.

¹³ Ngkmal diak lsebechel di klisiched e bo demesisiich er tia el mekemad. Ngkmal kired el ultuil er a Jehovah. Omomdasu, e ngmo dmeu a rengul er kid a lsekum kede ultuil a uldesued er a tekoi el rechad a mo er ngii el kirel a ngeso? Ngdiak, a Jehovah a diak lolai er a deuil a “rengul [er] a klisichel a uos.” Me kid, ngkired el ultuil er a klisiched me a lechub e ngklisichir a rebebil? A Jehovah a diak el ultuil er a klisichir a “re bekeu el soldau.” (Psalm 147:10) Me ngbai kired el melemolem el meluluuch el mo er Ngii el olengit a ngeso er ngii me lengesukid er a chelitechetud. A Jehovah a kmal diak bo lturk a rengul el orrenges chouaika el nglunguuch. E ng “bai dmeu a rengul er tirkei el meluu er ngii, ng dmeu a rengul er tirkel oumeral ulsirs er a diak a ulebengelel el bltkil a rengul.” (Psalm 147:11) Me ngokiu tia el klou el bltkil a rengul, e kede mo medengei el kmo ngmo melemolem el lolengeseu er kid el mo mesisiich er aike el mekngit el urunguled.

14. Ngmle ulterekokl a rengul ngika el milluches er a psalm el kirel a ngerang?

¹⁴ A Jehovah a oterekokl a rengud el kmo ngmo ngosukid sel bo dechelebangel a mondai. Sel taem el rechad er a Israel a liluut el mo er a Jerusalem e ngika el milluches er tia el psalm a ulemdasu er sel rolel e a Jehovah a olengeseu er tir. Me ngmilluches el kmo: “Ng melisiich a chesmerel a siseball er kau, ng omekngeltengat er a re ngelekem. Ng meruul er a budech er oliochel er kau.” (Psalm 147:13, 14) Me sel tekoi el kmo a Jehovah a mo melisiich a chesmerel a siseball, a rirellii ngika el milluches er a psalm el mo melechesuar a ulekerreu. Tiang a ulterekeklii a rengul el kmo a Jehovah a mo omekerreu er a rechedal.

15-17. (a) Ngmo uangera uldesued a lebebil er a taem el bo dechelebangel a ringel, e mekerang a Tekingel a Jehovah e ngosukid? (b) Ka msodii a ta er a tekoi el ochotii el kmo a tekingel a Dios “a di mereched el mo motaut.”

¹⁵ Ke locha kmal mo suebek a rengum el mondai er kau a uchul, engdi a Jehovah a  sebechel el meskau a llomeserreng me ngsebechem el outekangel. Ngika el milluches er a psalm a dilu el kmo, “Ng oltobed a tekingel el mer a beluulchad, e a ikel le dung a di mereched el mo motaut.” E mlo mesaod el kirel a snow me a frost me a chull el kori, e sola el dilu el kmo: “Ng di dmung a tekingel e a ice a mo medemedemek.” (Psalm 147:15-18) Me ngika el Dios er kid el medengei a rokui el tekoi e sebechel el remuul a rokui el tekoi, e sebechel el omtebechel a chull el kori me a snow, a kmal sebechel el ngosukau el mo mesisiich er a ngii di el mondai er kau.

¹⁶ Chelecha el taem, e a Jehovah a omekrael er kid el okiu a Tekingel el Biblia. Ngika el milluches er a psalm a mesaod er a tekingel a Jehovah el kmo, ‘ngdi mereched el mo motaut’ el ngosukid. Me a Dios a omekrael er kid er sel ungil el rolel er a kot el ungil temel. Ka di molatk er sel rolel e ke ngmai a klungiolem er a Biblia me aike el babier el loltobed a “blak a rengul e mellomes a rengul mesiou,” me a JW Broadcasting me a jw.org, me a remechuodel er a ongdibel, me a dirrek el rudam me a rudos er kau. (Mateus 24:45) Me ngmla ta el bo molechesuar el kmo a Jehovah a di mle mereched el lomekrael er kau?

¹⁷ A odos el Simone a mlo melechesuar sel rolel e a Tekingel a Dios a ngilsuir. Ngulemdasu el kmo ngkmal diak a belkul el chad, me a Jehovah a kmal diak ledeu a rengul er ngii. Me nguaisei, engdi sel bo lemechitechut a rengul e ngmillemolem el meluluuch el mo er a Jehovah el olengit a ngeso. E millemolem el mesuub er a Biblia. Me ngdmu el kmo: “Bek el taem el kuruul el uaisei e ak mera el mo melechesuar a klisichel me a ulekrael er a Jehovah el melisiich er ngak.” Me tiang a kmal mla ngosuir a Simone el mo ungil a uldesuel el di kirel.

18. Ngera me komdasu el kmo a Jehovah a kmal kmeed er kau? E ngera uchul me ngkirem el mo “Odengesii a Rubak!”?

¹⁸ Ngika el milluches er tia el psalm a mle medengei el kmo ngar er a chelsel a rokui el renged er tia el chutem e a Jehovah a ngileltii a renged er a Israel er a irechar el mo chedal. Me ngdi mle tir el tang a ngilai a “tekingel” a Dios me a “llechul.” (Monguiu er a Psalm 147:19, 20.) Me chelecha el taem e kede kmal oba ileakl el techall el mo omtechei er a ngklel a Dios. Kede oba omereng el saul e le kede mla mo medengelii, e dirrek el oba Tekingel el omekrael er kid, e dirrek el sebechel el mo er ngii a kmes el deleuill er kid me ngii. Me kede di ua ngika el milluches er a Psalm 147, el ngar er ngii a betok el ungil el uchul me kede ‘oldanges er a Jehovah’ e dirrek el melisiich er a rebebil el mo meruul er a osisiu el tekoi.