1. Ngera me ngsebeched el melekoi el kmo a Jehovah a ouklalo a rokui el tekoi? (Momes er a siasing er a uchelel a suobel.)

 A ROKUI el tekoi a kloklel a Jehovah! “Ng mo lmuut er sel kot el ngar bab er a ikel eanged el di kloklel a RUBAK. A beluulchad ma ikel bek el ngar a chelsel me ng dirrek el di kloklel.” (Duteronomi 10:14; Ocholt 4:11) Me a Jehovah el ulemeob er a rechad a uchul me kede rokui el kloklel. (Psalm 100:3) Engdi ngar er a delongelir tirke el rokui el chad el mla kiei, e a Dios a mla ngiltiterir a rebebil el mo kloklel el ngar er a ileakl el rolel.

2. A doltirakl er a Biblia, e te rua techang a mlo kloklel a Jehovah el ngar er a ileakl el rolel?

² El ua tiang, a Psalm 135 a mesaod er a reblak a rengrir el mengull er a Jehovah el chad er a Israel el ileakl el “chedal.” (Psalm 135:4) Ngdirrek a Hosea a ulemlaoch el kmo a rebebil el diak el chad er a Israel a mo chedal a Jehovah. (Hosea 2:23) E tia el ulaoch a tilaut er sel taem el Jehovah ulemuchel el melilt er a rediak el chad er a Israel el mo mengedereder er a eanged el  obengkel a Kristus. (Rellir 10:45; Rom 9:23-26) E tirka el mlengilt er a chedaol reng a okedongall el “chedaol renged,” el tir a “bereked ra Dios.” (1 Petrus 2:9, 10, BT) E kuk mekerang el kirir tirke el rokui el blak a rengrir el Kristiano er chelecha el taem el oba omelatk el mo kiei er tia el chutem el diak a ulebengelel? A Jehovah a dirrek el omekedong er tir el ‘chedal’ e ‘ngellitel el chedal.’​—Isaia 65:22, NW.

3. (a) Te rua techa ngar er ngii a ileakl el deleuill er tir me a Jehovah er chelecha el taem? (b) Ngera kede mo mesaod er tia el suobel?

³ Chelecha el taem e a “kekerel delebechel,” el oba omelatk el mo kiei er a eanged el diak a ulebengelel, me a “kuk bebil . . . el sib” el oba omelatk el mo kiei er a chutem el diak a ulebengelel a dmak el mesiou er a Jehovah el ua “tal delebechel.” (Lukas 12:32; Johanes 10:16) Me ngmera el soad el ochotii el mora Jehovah a klungel a omereng el saul er kid le kid el ngar er ngii a ileakl el deleuill er kid el obengkel. Me ngar tia el suobel, e kede mo mesaod er a rolel e ngsebeched el ochotii a omereng el saul er kid el mora Jehovah el kirel tia el ileakl el techall.

4. Kede mekera mereng a sulel a Jehovah e le ngii el mechikid me ngar er ngii a deleuill er kid me ngii, e milekera Jesus e mirruul er a osisiu el tekoi?

⁴ Kede ochotii a omereng el saul er kid el mora Jehovah sel detib a rengud el mo er ngii e bo demetecholb. E seikid e ngsebechir a rokui el chad el mesa el kmo kede kloklel a Jehovah e kongei el olengesenges er ngii. (Hebru 12:9) A Jesus a mirruul er a osisiu el tekoi er sera bo lemetecholb. Alta e ngdi mla chedal a renged el mesiou er a Jehovah, engdi tilengetengii a klengar er ngii el mora Jehovah el ua ledu el kmo: “Dios er ngak, ng kmal soak el meruul a tekingem.”​—Psalm 40:7, 8.

5, 6. (a) Ngerang dilu Jehovah er sera lemetecholb a Jesus? (b) Ngera el okesiu a sebechel el ngosukid el mo medengelii a uldesuel a Jehovah el kirel a telbilel a rengud?

⁵ Ngmle uangera uldesuel a Jehovah er sera lemetecholb a Jesus? A Biblia a melekoi el kmo: “Me ng di meltecholb a Jesus e mo tokerekl, e sola e a eanged a ulebok me ng milsa Reng er a Dios el ua teletelel a belochel el mer bebul. E a ngor a mlar a eanged e melekoi el kmo, ‘Ngkaikid a betik er a renguk el Ngelekek, el ngii odeuir a renguk.’” (Mateus 3:16, 17) Me a Jesus a di mla kloklel a Jehovah engdi ngmle dmeu a rengul er sera lesa Jesus el kongei el ousbech er a klengar er ngii el mesiou er Ngii el di ngii el tang. A Jehovah a dirrek el dmeu a rengul sel lesekid el tuib a rengud el mo er ngii, e ngii a mo omekngeltengat er kid.​—Psalm 149:4.

⁶ A rokui el tekoi a di kloklel a Jehovah! Me ngera sebeched el ngmai el msang? Ka mkora omtab er a chad el ngar er ngii a klebokel el sersel er a bung. A ta el taem e a kekerei el ngelekel el redil a chilebngii a ta er a bung e nguu el mo msang. Me alta ngii el bung a mle dellemelel a demal engdi ngika el chedam a mera el dmeu a rengul er tia el sengk. Me tia ochotii el kmo ngika el ngalek a betik a rengul er ngii. Tia el bung el mlara ngelekel a lmuut el mekreos er a osengel er aike el rokui el bung er a sersel. Me ngdi osisiu, a Jehovah a mera el dmeu a rengul sel lesekid el kongei el tuib a rengud el mo er ngii.​—Exodus 34:14.

7. Ngmilekera Malakai e ngosukid el mo medengelii a uldesuel a Jehovah el kirir tirke el kongei el mesiou er ngii?

⁷ Monguiu er a Malakai 3:16. Ngera me ngklou a ultutelel el detib a rengud el mora  Jehovah e mo metecholb? Ngklemera el tekoi el kmo sel taem er a obechell, e ke kloklel Ngike el Ulemeob er kau el Jehovah. Engdi ka molatk el kirel sel deuil a rengul a Jehovah sel mkengei er ngii el mo Merredelem, e mtibir a rengum el mo er ngii! (Osisechakl 23:15) A Jehovah medengelterir tirke el kongei el mesiou er ngii, e ngii a lmuches a ngklir er a ‘babilengel.’

8, 9. Ngera ngmengerechir er ngii a Jehovah er tirke el llechukl a ngklir er a ‘babilengel’?

⁸ A lsekum e ngsoad a ngkled a lolemolem el ngar er a ‘babilengel’ a Jehovah e ngar er ngii a tekoi el kired el rullii. A Malakai a dilu el kmo ngkired el meluu er a Jehovah e melatk el kirel a ngklel. Me a lsekum kede mengull er a ngii di el chad me a lechub e ngii di el ngerang e ngmengubet a ngkled er ngii el babier!​—Exodus 32:33; Psalm 69:28.

⁹ Me ngdiak di deruul a telbiled el mo meruul a soal a Jehovah e mo metecholb e lemerekong. Aika el tekoi a doruul el di ta el taem engdi omengull el mora Jehovah a rolel a klengar. Me ngkirel el bek el sils er a klengar er kid el dochotii er a blekerdeled el kmo kede olengesenges er a Jehovah.​—1 Petrus 4:1, 2.

10. Ngera kirel el bleketakl el klekakerous er tirke el mesiou er a Jehovah me tirke el diak losiou er Ngii?

¹⁰ Ngar sel mlo merek el suobel, e kede silubii el kmo a Kain, me a Salomon, me a rechad er a Israel a millekoi el kmo te milengull er a Jehovah engdi te dimlak leblak a rengrir er Ngii. Aika el kerebai a osisecheklid el kmo ngdiak di dedu el kmo kede mengull er a Jehovah e lemerekong. Ngkired el mo ouketui a mekngit e mo betik a rengud er a ungil. (Rom 12:9) A Jehovah dilu el kmo ngmo er ngii a bleketakl el klekakerous er a “melemalt ma chebirukel chad, ma klekakerous er a chad el mesiou er ngak ma chad el diak losiou er ngak.”​—Malakai 3:18.

11. Ngera me ngkirel el beot er a rokui el chad el mesa el kmo ngdi ta el Jehovah a dongull er ngii?

¹¹ Kede oba klou el omereng el saul el bedul a Jehovah el ngileltid el mo chedal! Ngkirel el beot er a rokui el chad el mesa el kmo kede olab el mora Jehovah. (Mateus 5:16; 1 Timothy 4:15) Me di lekau el merriter el kmo: ‘Ngsebechir a rebebil el mesa el kmo ak mera el olab el mora Jehovah? Ngak, ngdmeu a renguk el louchais er a rechad el kmo ak ta er a Sioning er a Jehovah?’ Ka di molatk er sel kngtil a rengul a Jehovah a lsekum kede merur el louchais er a rebebil el kmo kede kloklel.​—Psalm 119:46; monguiu er a Markus 8:38.

12, 13. Ngoeak a ngera el blekeradel e ngmo meringel er a rechad el dongcheterir a rebebil el kmo te Sioning er a Jehovah?

¹² Ngklengiterreng e le rebebil el Sioning a oltirakl er a “reng er a beluulchad,” el uchul me ngdiak a klekakerous er tir me tirke el diak longull er a Jehovah. (1 Korinth 2:12) A “reng er a beluulchad” a rulleterir a rechad el di mo melatk er a ngelbesel a rengrir. (Efesus 2:3) El ua tiang, a rebebil a melilt el mo oubail a diak lungilbesul el bail alta ngmla  motobed a betok el uleklatk el kirel a rolel a doubail. Te oubail a bail el kmal omechem e di olecholt a klekedellel a bedengir el mo lmuut er a taem el bo lekldibel el obengterir a Rekristiano el rudam me a rudos er tir. Me a lechub te melilt a kuk kmal ngodech el rolel a loruul a chiurir. (1 Timothy 2:9, 10) E aikang a mo uchul me ngmeringel er a rebebil el dongcheterir el kmo te Sioning er a Jehovah me a lechub e ngdiak.​—Jakobus 4:4.

¹³ Ngar er ngii a lmuut el bebil er a rolel e a rebebil el Sioning a ochotii el kmo te di ua chad er tia el beluulechad. El ua tiang, ngar er a temel a omilil, e a rebebil a meloik e meruul a tekoi el diak el kirir a Rekristiano el meruul. A rebebil a post a siasing er tir e meluches a tekingir er a social media el ochotii el kmo, te olab a uldasu er tia el beluulechad. Nglocha dirkak a ta lenguu a omellach er a chelsel a ongdibel er a Rekristiano el kirel a oberaod el klengit, engdi tirkang a sebechir el mengesuseu er a reblak a rengrir el rudam me a rudos el mo meruul a mekngit.​—Monguiu er a 1 Petrus 2:11, 12.

14. Ngera kired el meruul er ngii el mo omekerreu er tia el ileakl el deleuill er kid me a Jehovah?

¹⁴ A rokui el tekoi er tia el beluulechad a mileketmokl el meruul er kid el mo melatk a ‘mekngit el ngelbesel a klechad ma ikel leues a chad e nguibes er ngii, ma ikel rokui el uchul e ng kedidai a rengud.’ (1 Johanes 2:16) Me kid a kloklel a Jehovah me kede kmal ngodech. Kede “mo imikr a blekerdelel a klechad el diak leko Dios, ma ngibeserreng er tial beluulchad” e “kiei el ultebechel a rengud, e melemalt, e mengull er a Dios.” (Titus 2:12) Me a rolel a klengar er kid el uldimukl er a rolel a dongedecheduch, me a dongang e dolim, me a rolel a doubail e doureor a kirel el bleketakl el mora rokui el chad el kmo kede kloklel a Jehovah.​—Monguiu er a 1 Korinth 10:31, 32.

15. Ngera me ngkired el olecholt a ungil lomeruul e oubltikerreng el mora rekldemed el Kristiano?

¹⁵ Kede ochotii el kmo kede mengreos er tia el ileakl el deleuill er kid me a Jehovah lokiu sel bo lungil a omerelled el mora rudam me a rudos er kid. Tir a di uai kid el kloklel a Jehovah. Me sel dolemolem el melatk er tiang, e kede mo blechoel el olecholt a ungil lomeruul e oubltikerreng el mo er tir. (1 Thesalonika 5:15) Me ngua ngera berredel tia el tekoi? A Jesus a dilu er a rultirakl er ngii el kmo: “Cho bo mkaubltikerreng, e a rokui el chad a mo medengei el kmo kom obengkek.”​—Johanes 13:35.

16. Ngera kede suubii er a Llach er a Moses el kirel a bltkil a rengul a Jehovah el mora rechedal?

¹⁶ A ta er a okesiu el ngar er a Llach er a Moses a sebechel el ngosukid el mo medengelii sel rolel e ngkirel el mo ungil a omerelled el mora rechad el ngar er a chelsel a ongdibel. Ngar er a templo er a Jehovah e ngmla er ngii a klekedall el luluusbech el kirel a ileakl el omengull er tir el mo er Ngii. A Llach a mle bleketakl el smodii a rolel e a rechad er a Levi a mle kirir el omekerreu aike el klekedall, me a ngii di el chad el dimlak loltirakl aika el ulekrael a mo okodall. (Ulecherangel 1:50, 51) Me a lsekum a Jehovah a ulemekerreu er a rolel a lousbech aika el klekedall tirka el chad el kirel a omengull er tir el mo er ngii, e nglmuut el kmal omekerreu a omerellir a rechad el mo er tirke el mla tuib a rengrir el mo mengull er Ngii! Me a Jehovah ouchais er a uldesuel el bedul kid sel ledu el kmo: “Ngikel mo merutech er kemiu a rutechii a chelsul a medak.”​—Sekaria 2:8.

17. A Jehovah, ngomes e ‘orrenges’ a ngerang?

¹⁷ A Malakai a dilu el kmo a Jehovah a ‘orrenges’ e omes a omeruul el meketmokl er a delongelir a rechedal. (Malakai 3:16) Ngii a ungil el “medengelterir a re chedal.” (2 Timothy  2:19) Ngkmal kerekikl a rokui el doruul me a dolekoi. (Hebru 4:13) Me sel doruul a mekngit el mora rudam me a rudos, e a Jehovah mo medengei. Engdi ngsebechel el mo ulterekokl a rengud el kmo a Jehovah a dirrek el mo medengei sel domtechakl er a rudam me a rudos, e dolecholt a blekeruraurreng, e dousubes e doruul a ungil.​—Hebru 13:16; 1 Petrus 4:8, 9.

18. Kede mekera ochotii a omereng el saul er kid el bedul a Jehovah e le ngii el ngileltid el mo chedal?

¹⁸ Ngsoad el ochotii a omereng el saul er kid el mora Jehovah le kid el chedal e kloklel. Kede medengei el kmo sera detib a rengud el mo er ngii e kede rirellii a kmal ungil omelilt. Me alta kede kiei el “teloi er a re chad el meruul a chebirukel ma mekngit el tekoi” engdi kid a sebeched el kiei el diak a ‘telemelled e klikiid’ e “dmiich el ua llomes” er a beluulechad. (Filipi 2:15) Me kede mla oterekokl a rengud el mo mengeroid er kid er a ngii di el tekoi el louketui a Jehovah. (Jakobus 4:7) E mo oubltikerreng e olecholt a omengull el mora rudam me a rudos er kid e le te dirrek el kloklel a Jehovah.​—Rom 12:10.

19. Ngmekera Jehovah lomekngeltengat er tirke el chedal?

¹⁹ A Biblia tibir el kmo a “RUBAK a diak lobes er a re chedal.” (Psalm 94:14) E tiang a mera el mo tmaut. A Jehovah a mo obengked er a chelsel a ngii di el blekeradel. Me alta kede mo mad engdi ngdiak lobes er kid. (Rom 8:38, 39) “Ma de ngar, e kede ngar el kirel a Rubak, ma de mad, e kede mad el kirel a Rubak; misei e a de ngar ma de mad, me kede di kloklel a Rubak.” (Rom 14:8, BT) Me kede kmal omes el beduluchei el mo er sel taem el Jehovah mo okiseterir a rokui el blak a rengrir el sechelil el mla mad. (Mateus 22:32) E me lmuut er chelecha el taem me kede mo oldeu a rengud er aike el ungil el sengk el mlara Demad. E di ua lolekoi a Biblia el kmo, “ngeltengat a beluu el oudios er a RUBAK; te ngeltengat el chad a le ngilteterir el mo chedal!”​—Psalm 33:12.