A JESUS er a lolisechakl er a redisaiplo er ngii er a rolel a lomerk er a ungil chais, e ngulemeklatk er tir el kmo ngdiak leblechoel a rechad el semeriar el orrenges er tir. (Lukas 10:3, 5, 6) E tiang a osisiu el kirel a omesiunged er chelecha el taem. A rebebil er a rechad el debetik er tir a locha mo mekngit a tekingir me a omerellir el bedul kid. E sel loruul uaisei, e nglocha mo meringel er kid el olecholt er a klechubechub, e mo diak el soad el omerk er a klumech el mo er tir.

A chad el chubechubechad a omes aike el lousbech a rebebil me a mondai er tir, e mo mekngit a rengul er tir e dirrek el mo soal lolengeseu er tir. Engdi ngera mo duubech a lsekum ngmo diak dolecholt er a klechubechub el mora rechad el debetik er tir sel doldingel? Kede oridii a blakerreng er kid, el belkul a kmo ngmo diak desemeriar el omerk er a klumech el mo er tir me ngmo diak el sebeched el ngosuterir. Ngsebeched el omekesiu er a blakerreng er kid el mora ngau. A ngau a ousbech a betok el idungel el rullii me ngmelemolem el kmard. Me ngdi osisiu, a blakerreng er kid a ousbech er a klou el klechubechub me lolemolem el mesisiich!​—1 Thesalonika 5:19.

Me kede mekera mekurulii a klechubechub er kid el mo lmuut er a taem el bo lemeringel er kid? Me bo dosaod a edei el blekerdelel a klechubechub el sebeched el oukerebai el ngii a kerebai er a Jehovah me a Jesus, me a apostol el Paulus.

Ngmla mo betok el telael rak el rechad a ouchais a blulak el tekoi el kirel a Jehovah, engdi Ngii a di melemolem el “ungil mor a re diak loreng a saul ma re dengerenger.” (Lukas 6:35) Ngmekera lolecholt a ungil lomerellel? Ngokiu a kllourreng er ngii el mora rokui el chad. A Jehovah a kmal “soal a rokui el chad a bo le sobel.” (1 Timothy 2:3, 4) Me alta e ngkmal chetil a chelebirukel, engdi a rechad a kmal mekreos er osengel, e Ngii a dirrek el chetil a ngii di el ta er tir a lemad.​—2 Petrus 3:9.

A Jehovah medengei el kmo a Satan a kmal meduch lousbech a blulak el mengeuid a uldesuir a rechad. (2 Korinth 4:3, 4) Me a rebetok a mla mosisechakl er a blulak el tekoi el kirel a Dios er sel taem er a dirk lemekekerei. Tiaikid a uchul me sel rolel a lomdasu e lomelechesiu a tekoi a rulleterir el mo meringel er tir el kongei er a klemerang. Engdi Jehovah a kmal semeriar lolengeseu er tir. Kede mekerang e mo medengelii tia el tekoi?

Ka di molatk er a uldesuel a Jehovah el kirir a rechad er a beluu er a Ninive. Alta tirka mle mekngit a blekerdelir, engdi Jehovah a dilu er a Jona el kmo: “Ngak ngdiak bai el kirek el mekngit a renguk er a Ninive, el klou el beluu el ngar ngii a rekuk betok er a 120,000 el chad el diak lodengelii a klekakerous er a llemalt me a chelebirukel?” (Jona 4:11, NW) A Jehovah a kmal mle chubteterir tirka el chad e le ngdimlak lodengei a klemerang el kirel a uchul me ngulderechii a Jona el mo omeklatk er tir.

Me kid a di ua uldesuel a Jehovah el kirir a rechad. Kede omes er tir el mekreos. Me kede ua Jehovah el kmal semeriar el ngosuterir el mesuub el mo medengelii el mo lmuut er a taem el domdasu el kmo ngdiak lekengei er a klemerang.

Me a rechad sel bo lemekngit a uldesuir el kirel a klumech el domerk er ngii, e ngkired el melasem el mo medengelii a uchul me te meruul uaisei. Nglocha ngar ngii a mekngit luldesuir el kirel a Biblia, me a lechub a Rekristiano e le te mla meseterir a rebebil el melekoi el kmo te Kristiano el meruul a mekngit el tekoi. Me a rebebil a locha mla remenges a blulak el tekoi el kirel a tekoi el doumerang. Me a relmuut el bebil a locha bekikl e le te melatk el kmo a rechederir me a lechub a rechad er a belurir a mo melenguul er tir a lsekum te mengedecheduch er kid.

A rebebil el debetik er tir a locha chilebangel a mekngit el tekoi el mlo uchul a klou el telemellel a uldesuir. A missionari el ngklel a Kim a melekoi el kmo, a rebetok el chad el ngar er a belual a silobel er a mekemad e urriid a rokui el kloklir. Me ngdiak a omeltkir el kirel a ngar mederir el klebesei. Ngkmal kesib a rengrir e dirrek el diak loumerang er a ngii di el chad. A rechad er tia el belual a blechoel melasem el merrob er a Resioning me ngdiak lomerk er a klumech. E a ta el taem e ngika el Kim a mlodechelakl er a loldingel a obliil.

Me ngmilekera Kim e millemolem el olecholt er a klechubechub el mo lmuut er a taem el rechad a mo mekngit a omerellir el bedulngii? Ngblechoel melatk er a Osisechakl 19:11, el kmo: “A ungil uldasu a rullii a chad me ng meoud el ngmasech a rengul.” Me sel lolatk el kirel a tekoi el lechilarm er ngii a rechad el ngar er a belual, e ngrullii el mo chubteterir. E dirrek el diak el rokui el chad el lebetik er tir a mekngit a omerellir. Ngar ngii a rechad el semeriar el Kim a oldingel er tir el ngar er a belual.

Ngsebeched el di kid loker el kmo: ‘Oleko ngdimlak bo kudengelii a klemerang, e ak mo mekerang a lsekum a Resioning er a Jehovah omerk er a klumech el mei er ngak?’ El ua tiang, ngmo uangera uldesued a lsekum kede rirenges a betok el blulak el kirir a Resioning? Kede locha dirrek el mo mekngit a omerelled me ngkirel mocholt a klechubechub el mei er kid. A Jesus a dilu el kmo ngkmal kired el meruul el mora rebebil aike el tekoi el soad a loruul el mei er kid. Me ngkired el melasem el mo medengei a uldesuir a rebebil, e mo klou a rengud el bedul tir el mo lmuut er a taem el bo lemeringel er kid el meruul uaisei.​—Mateus 7:12.

A apostol el Paulus a ulechotii a klechubechub el mo lmuut er tirke el mle meringel el oldechelakl er ngii el kirel a klumech el lulemerk er ngii. E ngera uchul? E le ngmillatk a blekerdelel er a uchei. Ngdilu el kmo: “A ngar a mong e ak millekoi a mekngit el kirel, e uleldechelakl, e uleltuub er ngii. E ngdi Dios a mlo chubkak ele seikid e ng dirkak bo kuumerang e dimlak kudenge kuruul.” (1 Timothy 1:13) A Paulus a mle medengei el kmo a Jehovah me a Jesus a kmal ulechotii a klechubechub el bedulngii. Me ngmle ungil medengei a omerellir a rechad el mle sorir el merrob er ngii me lak lomerk er a klumech, e le ngmle ta el leuaisei a uldesuel.

Ngmla er ngii a taem el Paulus a miltik er a rechad el kmal mle mesisiich loumerang a klsuul losisechakl. Me ngmlo uangera uldesuel? Ngar er a Rellir 17:16, e  kede menguiu el kmo sel taem er a lengar a Athens, “e ng kmal mlo mekngit a rengul er a lesang ngiil beluu el di mui er a bleob el chelid.” Me nguaisei, engdi nguleak tiaikid el kngtil a rengul a Paulus, e ngmlo sebechel kongei el olisechakl er a rechad. (Rellir 17:22, 23) Ngildechii a rolel a lomerk er a klumech, e milengedecheduch er a rechad el kakerous a blekerdelel a klengar er tir el okiu a kakerous el rolel me bo el ‘sebechel el mor a bek el bedengel a ongedechuul el osebelterir a re bebil er tir.’​—1 Korinth 9:20-23

Me ngsebeched el meruul a tekoi el ua Paulus sel domerk er a klumech el mora rechad el mekngit a omerellir, me a lechub e ngtirke el cheleuid a klaumerang er tir. Ngsebeched lousbech aike el dodengei el tekoi el kirir el mo ngosuterir el mesuub el kirel a “ungil chais el chisel a budech!” (Isaia 52:7) A odos el ngklel a Dorothy a melekoi el kmo: “Ngar er a belumam, e te betok a mlosisechakl el kmo a Dios a kmal meringel a tekingel e di oukerrekeriil. Me ak chemat er tirka el chad el kirel a mesisiich el klaumerang er tir el kirel a Dios, e dirrek el omekrael a uldesuir el mora omesodel a Biblia el kirel aike el ungil el blekerdelel a Jehovah me aike el telbilel el kirel a ngar medad el klebesei.”

Ngdirrek el kired el melasem el melisiich er a rudam me a rudos er kid sel doldingel lobengterir. A Jessica a melekoi el kmo sel loldingel lobengterir a rebebil, e a ta er tir bo lechelebangel er a mekngit lomeruul, e ngmelasem el diak lolatk er a tekoi el dilubech. Ngbai mesaod el kirel a ungil tekoi, el uaike el ungil tekoi el duubech er a urered er a berkel a klumech alta e a rebebil a mo mekngit a omerellir el bedulkid.

A Jehovah a ungil medengei el kmo a lebebil er a taem e ngmo meringel er kid lomerk er a klumech engdi ngkmal dmeu a rengul sel dolasem el oukerebai er a klechubechub er ngii! (Lukas 6:36) Kede ungil medengei el kmo a Jehovah a diak lolemolem el lolecholt er a klechubechub me a kllourreng el mora rechad er tia el beluulechad el mo cherechar. Ngulterekokl a rengud el kmo Ngii a ungil medengei el kmo ngoingerang e ngmei a ulebongel. Me chelecha el mo lmuut er seikid el taem, e ngkmal orechudel tia el urered er a berkel a klumech. (2 Timothy 4:2) Mada dolemolem el blak a rengud lomerk er a klumech, e bo dolecholt er a klechubechub el mora “rokui el chad.”