1. Kede ulebeob el uangera urunguled?

 NGMO uangera uldesuem a lsekum a chad el modengelii, e oba omengull el bedulngii a obes er a ngklem me a lechub e ngdiak el dengchau? Nglocha kmal mo mekngit a rengum. E ngera uchul? E le derta er kid a ngar ngii a urunguled el soad el nguu a kengei er a rechad. Engdi ngdiak di lsoad a lodengelkid e lemerekong, e ngbai soad a bo lodengei el kmo kede uangera el chad, e ngera kede mla remuul.​—Ulecherangel 11:16; Job 31:6.

2, 3. Ngera sebechel duubech el urunguled el soad el nguu a kengei er a rechad? (Momes er a siasing er a uchelel a suobel.)

² Engdi a lsekum ngdiak dekerekikl, e tia el urunguled el soad el nguu a kengei er a rechad a sebechel el mo mekngit. Tia el beluulechad er a Satan a soal meruul er kid el mo merael a chised, e dirrek el mo meklou a ultuteled el chad er a chelsel. Engdi sel bo deuaisei, e ngmo diak debsa ngika el Demad el ngar er a eanged el Jehovah el Dios, sel chetengakl me a omengull el ngii a rredemelel.​—Ocholt 4:11.

 ³ Sel taem er a Jesus, e a rebebil mengeteklel a klechelid a kuk mle ngodech a uldesuir el kirel tia el tekoi. Me a Jesus a milengelechel er a redisaiplo er ngii el kmo: “Bo mkerekikl el kirir a re sensei er a Llach, el sorir el oubail a mekemanget el bail el mererorael e sorir a re chad a loutkeu e longull er tir er a blil a makit; e melilt a ngarbab el kingall er a blil ongdibel ma ikel kot el ungil kingall sel le ngar ngii a blengur.” Ngdirrek el dilu el kmo: Tirkang a “mo meringel a belsir!” (Lukas 20:46, 47) Engdi a Jesus a kuk mle ngodech a uldesuel. Ngchilat er ngike el chebuul el melakl dil el millenget a teblo el sens, er sel taem el rechad a locha dimlak lutebengii a omerellel. (Lukas 21:1-4) Me ngbleketakl el kmo a uldesuel a Jesus el kirel a blekeradel el mo ungil medengelterir a rechad a kmal mle ngodech er a uldesuir a rebebil. Me tia el suobel a mo ngosukid el meklemeltii a uldesued el kirel a klemedengei er kid er a rechad, el ngii a uldasu el soal a Jehovah el Dios a bo dobang.

4. Ngera kot lungil rolel a bo lodengelkid a rechad, e ngera uchul?

⁴ Ngera kot lungil rolel a bo lodengelkid a rechad? Ngdiak el sel uldesuir a rebetok el chad el melasem el melai er ngii lokiu a ngarbab el skuul, me a ungil siobai me a lechub e ngchetengakl er tia el beluulechad. A Paulus a milsaod er ngii er a ledu el kmo: “E chelechang e kom mla mo medengelii a Dios, ng diak, ng bai Dios a mla mo medengelkemiu, e ngera me ng somiu el lmuut el mo sibil a ikel mechitechut e diak a ultutelel el chelid?” (Galatia 4:9) Ngkmal ileakl a techall el dobang el ‘Dios a mla mo medengelkid’ el ngii a Kot el Ngarbab el Merreder er a eanged me a chutem! A Jehovah a ungil medengelkid, e betik a rengul er kid e soal a bo dekeed er ngii. Ngii a ulemeob er kid me ngsebeched el mo sechelil.​—Olisechakl 12:13, 14.

5. Ngera kired el meruul me bo lsebechel a Dios el mo medengelkid?

⁵ Kede medengei el kmo a Moses a mle sechelil a Jehovah. Me sera lolengit er a Jehovah el kmo: “Ak ulengit me mochotii a uldesuem,” e a Jehovah a ulenger el kmo: “Ak di mor a ikel bla mdung, ele ng obotech a renguk er kau e ungil medengelkau.” (Exodus 33:12-17) Me a Jehovah a sebechel mo medengelkid. Engdi ngera kired el meruul me bo lsebeched el mo sechelil a Jehovah? Ngkmal kirel mo betik a rengud er ngii e dirrek el tongetengii a klengar er kid el mo er ngii.​—Monguiu er a 1 Korinth 8:3.

6, 7. Ngera sebechel rullid el mo oridii a klausechelei er kid lobengkel a Jehovah?

⁶ Me nguaisei, engdi ngkired el melemolem lomekerreu er tia el mekreos el deleuill er kid lobengkel ngika el Demad el ngar er a eanged. Kid a di ua Rekristiano er a Galatia er a irechar, el kmal kired el mo diak desibil “a ikel mechitechut e diak a ultutelel” el tekoi er tia el beluulechad el uldimukl er a chetengakl me a kerruul el lolisiich. (Galatia 4:9) Tirke el Kristiano el mlara Galatia a mle ungil medengelii a Dios, me a Dios a mle ungil medengelterir. Engdi a Paulus a milsaod el kmo tirka el osisiu el rudam a ‘liluut’ el mora diak a ultutelel tekoi. Tiaikid a uchul me nguleker er tir el kmo: ‘Ngera me ngsomiu el lmuut el mo sibil a ikel mechitechut e diak a ultutelel el tekoi?’

⁷ Tia el tekoi, ngsebechel duubech el mei er kid? Ochoi, ngsebechel. Kid a di ua Paulus, el sel taem er a bo doumerang, e kede locha milengoit a chetengakl me a kerruul er tia el beluulechad er a Satan. (Monguiu er a Filipi 3:7, 8.) Kede locha ultngakl a scholarship er a skuul, me a ungil lureor, me a lechub a techall el sebeched el korker a betok el udoud. Me a lechub e ngmle sebechel mo merael a chised me a lechub e kede mo merau e le ngar ngii a duch er kid er a chelitakl me a ongngak me a lechub e kede chad er a sports. Engdi kede ultngakl aika el rokui el techall.  (Hebru 11:24-27) Me ngkmal diak el rolel a llomeserreng a lsekum kede ouuchel a rengud el kirel a ungil lomelilt el durruul e dirrek el bo domdasu el kmo a klengar er kid a mo ungil oleko kede mlo osiik aika el tekoi! Chouaitia el uldasu a sebechel rullid el lmuut el mo meruul a tekoi er tia el beluulechad, el ngii el tekoi a bla bo dodengei el kmo ng “mechitechut e diak a ultutelel.” *​—Momes er a footnote.

8. Ngera mo smisichii a urunguled el soad a bo lungil medengelkid a Jehovah?

⁸ Ngmekera urunguled el soad a bo lungil medengelkid a Jehovah e mo mesisiich el rullid el mo diak doureng a chetengakl er tia el beluulechad? Ngkired el mo ultaut a osenged er a eru el klemerang el tekoi. Me a kot, a Jehovah a di blechoel medengelterir tirke el blak a rengrir el mesiou er ngii. (Monguiu er a Hebru 6:10; 11:6) Ngomes er a derta er tirka el blak a rengrir el mesiungel el kmal mekreos, me ngmelatk el kmo ‘ngchebirukel’ el tekoi a lsekum ngmengemikr er a ngii di el ta er tir. A Jehovah a di blechoel el medengelterir “a re chedal.” (2 Timothy 2:19) Ngungil medengei a blekerdelir a “re melemalt” e meduch el olsobel er tir.​—Psalm 1:6; 2 Petrus 2:9.

9. Mosaod a rolel e a Jehovah a mla ochotii a kengei er ngii el mora rechedal.

⁹ Ngar ngii a taem el Jehovah a ochotii el kmo ngkongei er a rechedal el ngar er a ileakl el rolel. (2 Kronika 20:20, 29) El ua tiang, ka molatk er sel rolel e a Jehovah a ulelsobel er a rechedal er sel taem el Farao me a mesisiich el urrurt er ngii a uleltoir er tir el mora Bekerkard el Daob. (Exodus 14:21-30; Psalm 106:9-11) Tiang a kmal mle mengasireng el tekoi me a rechad el mla er seikid el basio a dirk milsaod er ngii er a uriul er a 40 el rak. (Josua 2:9-11) Ngdirrek el kmal melisiich er kid sel lak dobes er a rolel e a Jehovah a uluubltikerreng e uluusbech er a klisichel el olsobel er a rechedal er a irechar, e le ngdi kmedung e a Kok er a Makok a me oldechelakl er kid. (Esekiel 38:8-12) Me seikid el taem, e ngmo dmeu a rengud e le kede ngiluu a kengei er a Dios el diak el tia el beluulechad.

10. Ngera lmuut el ta er a tekoi el kirel mo ulterekokl a rengud er ngii?

¹⁰ A ongerung, e ngkmal kirel el mo ulterekokl a rengud el kmo a Jehovah a mo ungil medengelkid el okiu a rolel el dimlak domdasu el kmo ngmo uaisei. A lsekum a rechad a meruul a ungil tekoi e le ngdi sorir a rechad a bo lechat er tir, e a Jehovah a kmal diak bo lomesterir a omeksulir. E ngera uchul? E le Jesus a dilu el kmo, sel lechat er tir a rechad, e seikid a omeksulir. (Monguiu er a Mateus 6:1-5.) Engdi a Jehovah a kuk ngodech a omerellel, e le ngii a “omes a berrotel” el omerellir tirke el diak lengai a odanges er a rechad el kirel a ungil lomerellir el bedul a rebebil. Ngungil medengei a omerellir me ngmo mesterir a omeksulir me a lechub e ngomekngeltengat er tir. E a lebebil er a taem e ngii el Jehovah a mesterir a omeksulir a remesiungel lokiu a rolel el dimlak lomdasu el  kmo ngmo uaisei. Me chelechang e bo dosaod a bebil er ngii.

11. Ngmilekera Jehovah e ochotii el kmo ngmle ungil medengelii a Maria?

¹¹ A Jehovah a ngileltii a ngariou a rengul redil el ngklel a Maria el mo delal a Ngelekel el sechal el Jesus. A Maria a kiliei er a kekerei el mats el Nasareth, el ngii a kmal cheroid er a Jerusalem me sel klebokel el templo er ngii. (Monguiu er a Lukas 1:26-33.) Ngera uchul me a Jehovah a ngileltii a Maria? A anghel Gabriel a mlo duum er ngii e uluuchais er ngii el kmo “ke kmal ngeltengat er medal a Dios.” Me ngsebeched el mesang el kmo ngika el Maria a kmal mle kmeed el sechelil a Jehovah, el okiu a tekoi el uluuchais el mora chedal el Elisabeth er a uriul. (Lukas 1:46-55) A Jehovah a mle blechoel lomes er a Maria, e dirrek el milsa ileakl el klengeltengat e le ngmle blak a rengul el mo er ngii.

12, 13. Ngmilekera loldanges er a Jesus er sera lemechell, me sel taem el Maria a ngiluu el mora templo er a 40 el klebesei er a uriul?

¹² A Jehovah nguluuchais er a rua techang el kirel a cherellel a Jesus? Ngdimlak louchais a chisel el mora rengarbab el chad er a beluu me a lechub a remerreder er a Jerusalem me a Bethlehem. Ngbai uldercheterir a rechanghel el mo mesubed er a rengariou a rengrir el mengkerengel a sib el mlara ked er a ikrel a beluu er a Bethlehem. (Lukas 2:8-14) Me tirka el klekerengel a sib a mlo oldingel er ngika el dirk milechell el tolechoi. (Lukas 2:15-17) A Maria me a Josef a locha kmal kilebetiekl er a lesa rolel a odanges el mileketmokl el mora Jesus. Me sel rolel a loruul a tekoi a Jehovah a kmal ngodech er a rolel a loruul a tekoi a Diabelong. E le sel taem el Satan a uldercheterir tirke el mesuub a btuch el mo oldingel er a Jesus me a rechad er a blil, e a rokui el chad er a Jerusalem a di mlo medengelii a cherellel a Jesus, e tiang a mlo uchul a klou el tellemall. (Mateus 2:3) Tiang a mlo uchul e a rebetok el diak a telemellir el ngalek a mlad er a uriul.​—Mateus 2:16.

¹³ A Llechul a Jehovah el mora rechad er a Israel a kmo a uriul er a 40 el klebesei er a lochellii a ngalek el sechal a chedil, e ngkirel el mo rullii a tengetengel el mora Jehovah. Me a Maria mirrael er a Bethlehem ngii me a Josef me a Jesus el bekord el elolem el mael (etiu el kilometer) el mora templo el ngar er a Jerusalem. (Lukas 2:22-24) Me sera lengar omerael a Maria, e  nglocha millatk el kmo a prist a locha mo rullii a ileakl el odanges el mora Jesus. A Jesus a mlodanges, engdi ngulekiu a rolel el Maria a kmal dimlak lolatk el kmo ngmo uaisei. A Jehovah a ngileltii a Simeon el “mle ungil chad, el meluu er a Dios” me a dirrek el profet el redil el Hana el 84 a rekil el melakl dil el mo ouchais el kmo a Jesus a ngike el telbiil el Mesias, me a lechub e ng Kristus.​—Lukas 2:25-38.

14. Ngmilekera Jehovah er a lebsa omeksulel a Maria?

¹⁴ A Jehovah, ngmillemolem lolecholt el kmo ngungil medengelii a Maria e le ngii el mle blak a rengul lomekeroul e omekerreu er a Jesus? Ochoi. A Dios a kiltmokl a bebil el tekoi el lullekoi a Maria me a lurruul, e liluches er a chelsel a Biblia. Ngsebeched el mtebengii el kmo a Maria a dimlak lsebechel lobengkel a Jesus er a chelsel aike el edei me a tedobech el rak er a omesiungel. Sel taem e nglocha mla mo melakl dil, me ngmle kirel di kiei er a Nasareth. Me ngdimlak a techellel el mes a bebil er aike el mengasireng el tekoi el ua rebebil er a rechad. Engdi ngulebengkel a Jesus er sel taem er a lemad. (Johanes 19:26) E a uriul e ngii el Maria a mlara Jerusalem lobengterir a redisaiplo er a Jesus er a uchei er a lenguu a chedaol reng er a Dios er a Pentekost. (Rellir 1:13, 14) Me ngulterekokl el mlo ta er tirke el ngiluu a chedaol reng el teloi er a rebebil disaiplo. Me a lsekum e nguaisei, e ngbelkul a kmo ngmlo er ngii a techellel el mo obengkel a Jesus el ngar er a eanged el mo cherechar. E tiang a kmal mengasireng el sengk el lengiluu el blakerreng er ngii el kirel a omesiungel a uchul!

15. Ngmilekera Jehovah e ochotii el kmo ngkongei er a Jesus er sel taem er a lengar er a chutem?

¹⁵ A Jesus a mle chetil a ngii di el rolel a odanges el mlara remengeteklel a klechelid me a lechub a remengeteklel a balatiks. Engdi ngmle edei el taem el Jehovah a mlara eanged el melekoi el ochotii er a Ngelekel el Sechal el kmo ngbetik a rengul er ngii. Tia locha kmal millisiich er a rengul a Jesus! Telkib el taem er a uriul er a lemetecholb er a Omoachel el Jordan, e a Jehovah a dilu el kmo: “Ngkaikid a betik er a renguk el Ngelekek, el ngii odeuir a renguk.” (Mateus 3:17) E locha di mle ta el Johanes el Chad er a Techolb a mle sebechel remenges aika el tekoi. E a uriul er a bekord el ta el rak er uchei er a lemad a Jesus, e a retedei el apostol er ngii a  rirengesii a Jehovah el melekoi el kirel a Jesus el kmo: “Ngika betik er a renguk el Ngelekek el odeuir a renguk me morrenges er ngii!” (Mateus 17:5) E a ulebongel er ngii a sesei el klebesei er a uchei er a kodellel a Jesus, e a Jehovah a mlara eanged e liluut el mengedecheduch er a Ngelekel el Sechal.​—Johanes 12:28.

16, 17. Ngmilekera Jehovah er a loldanges er a Jesus el ngar er a ileakl el rolel?

¹⁶ A Jesus a mle medengei el kmo a rechad a mo omekedong er ngii el kmo ngoltuub er a Dios e dirrek el mo mad er a meringel el kodall. Me nguaisei, engdi ngmilluluuch el kmo lemotaut a soal a Dios el diak el ike el soal. (Mateus 26:39, 42) “Ngii a dimlak bo le mechitechut a rengul . . . me ng dimlak a belkul er ngii a rrengel a mo mad” e le ngmle soal nguu a kengei er a Demal el diak el tia el beluulechad. (Hebru 12:2) Me ngmilekera Jehovah e ochotii el kmo ngmle ungil medengelii a Jesus?

¹⁷ Sera lengar er a chutem a Jesus e ngmilluluuch lolengit er sel klebkall el lulebang er a uchei er a dirk lengar er a eanged lobengkel a Demal. (Johanes 17:5) Ngdiak a ta el lomesodel a Biblia el kmo ngmla er ngii a lmuut el ngodech el omelatk el lulebang a Jesus el kuk ngaruchei er tia el tekoi. Ngdimlak a ta el longerechir er a ileakl el omeksulel el kirel a blakerreng er ngii el meruul a soal a Jehovah er a lengar er a chutem. Engdi ngmilekera Jehovah? Ngmilsa odanges a Jesus el dimlak a ta el lomdasu el kmo ngmo uaisei. A Jehovah a ulekisii a Jesus er a kodall e “ulengesecheklii el mor sel kot el ngarbab el deruchall” el ngar er a eanged. Ngdirrek el milsa diak lengemed el klengar, el ngii a tekoi el dirkak a chad el nguu er a uchei! * (Momes er a footnote.) (Filipi 2:9; 1 Timothy 6:16, BT) Me ngmera el mengasireng a omerellel a Jehovah er a lomsa omeksulel a Jesus el kirel a blakerreng er ngii el meruul er a omesiungel!

18. Ngera mo ngosukid el nguu a kengei er a Jehovah el diak el tia el beluulechad?

¹⁸ Ngera mo ngosukid el nguu a kengei er a Jehovah el diak el tia el beluulechad? Ngkmal kired el melatk el kmo a Jehovah a di blechoel el medengelterir tirke el blak a rengrir el mesiungel e dirrek el blechoel el omekngeltengat er tir el ngar er a ileakl el rolel. Me ngsebeched el kora melatk er sel rolel e ngmo omekngeltengat er kid er a ngar medad el klebesei! Engdi chelecha el taem el dolasem el outekangel a mondai er kid me a ringel er tia el chebirukel el beluulechad, e lak dobes el kmo tia el beluulechad a mochu nguemed. Me aike el rokui el odanges el ngar er a chelsel a dirrek el mo nguemed. (1 Johanes 2:17) Engdi ngika el betik a rengul el Demad el Jehovah, a kuk ngodech e le ngkmal diak lsebechel lobes a blakerreng er kid me a bltkil a rengud el mora ngklel, e le ngikang a “diak le chebirukel.” (Hebru 6:10) Ngulterekokl el mo ochotii el kmo ngkongei er kid, alta e ngokiu a rolel el dimlak a ta el domdasu el kmo ngmo uaisei!