1. Ngera belkul sel dousbech er a tekoi el “klemerang”?

“KE MILEKERANG e mo medengelii a klemerang?” “Ke mlukeroul er a klemerang?” “Ngmla mo tela el rak el mngar er a klemerang?” A rechad a locha mla oker er kau aika el ker me a lechub e ke mla oker er a rebebil. Ngera belkul sel dousbech er a tekoi el “klemerang”? Tiang a mesaod aike el tekoi el doumerang, rolel a omengull er kid, me a rolel a klengar er kid. A rechad el “ngar er a klemerang” a medengei a osisecheklel a Biblia e kiei loltirakl a omellach er ngii. Sei a uchul me te mla mengubet er a osisecheklel a klsuul klechelid e dmeu a rengrir er a klengar alta te kiei er a beluulechad er a Satan.​—Jn. 8:32.

2. A doltirakl er a Johanes 13:34, 35, e ngera rullii a chad el mo soal a klemerang?

² Ngera rirellau el mo soam a klemerang? Nglocha mle ungil blekerdelir a rechedal a Jehovah. (1 Pe. 2:12) Me a lechub e ngsel bltikerreng el lulechotii. A rebetok a mlo melechesuar tia el bltikerreng er a lekot el mei er a miting. Te locha diak latk a tekoi el mildung engdi ngdiak lobes er tia el bltikerreng. Me tia diak lemechas a rengud er ngii e le Jesus a dilu el kmo, a redisaiplo er ngii a mo medangch lokiu a bltikerreng er a delongelir. (Monguiu er a Johanes 13:34, 35.) Engdi a lsoad a bo lemesisiich a klaumerang er kid, e ngar ngii a kired el meruul.

3. Ngera sebechel duubech a lsekum a klaumerang er kid er a Dios a di ultuil er a bltikerreng el lolecholt er ngii a rudam me a rudos?

³ Me a klaumerang er kid a diak di lultuil er a bltikerreng el desa er a delongelir a rechedal a Dios. E ngerang? E le a lsekum e ngdi ultuil er tia el bltikerreng, e ngbeot er kid el mo diak a klaumerang er kid. El ua tiang, ngsebeched el mo diak dosiou er  a Jehovah a lsekum a kldemed, el ta er a remechuodel me a lechub e ng pioneer a ruebet er a oberaod el klengit. Me a lechub e ngmo diak dosiou er a Jehovah a lsekum a ta er a kldemed a soibesengid me a lechub e ngmo omtok a mera el osisechakl e melekoi el kmo aike el doumerang a klsuul. Me a desuubii el tekoi a kmo: A lsoad el mo mesisiich a klaumerang er kid, e ngkirel mengai a uchetemel er a mesisiich el deleuill er kid me a Jehovah. A uldesued el kirel a Jehovah me a rechedal a sebechel ngosukid el mekurulii a klaumerang er kid. Engdi ngdirrek el klou a ultutelel a dosuub er a Biblia, e bo dodengei aike el dosuub, e doruul a research me bo lulterekokl a rengud el kmo kede mesuub a klemerang el kirel a Jehovah.​—Rom 12:2.

4. A doltirakl er a Mateus 13:3-6, 20, 21, e te mekera rebebil sel lemeasem a klaumerang er tir?

⁴ A Jesus a dilu el kmo a rebebil a mo “dmeu a rengrir” el kongei er a klemerang, engdi ngmo mechitechut a klaumerang er tir sel bo lechelebangel a omelsemai. (Monguiu er a Mateus 13:3-6, 20, 21.) Te locha dimlak lutebengii el kmo a doltirakl er a Jesus e ngmo uchul a omelsemai me a ringel. (Mt. 16:24) Me a lechub e te ulemdasu el kmo a de Kristiano e ngdiak a mondai er a klengar er kid, ngdi klengeltengat. Engdi ngar tia el mekngit el beluulechad, e ngmo er ngii a omelsemai. Ngsebechel mengodech a blekeradel, el uchul me ngmo diak el deu a rengud el telkib el taem.​—Psa. 6:6; Oli. 9:11.

5. Ngmekera e a klou el ildois er a rudam me a rudos er kid e ochotii el kmo, ngulterekokl a rengrir el kmo te oba klemerang?

⁵ A klou el ildois er a rudam me a rudos er kid a mla ochotii el kmo ngulterekokl a rengrir el kmo te oba klemerang. El oeak a ngera el rolel? Ngdiak lemesim a klaumerang er tir alta ta er a rekldemir a tomellii a rengrir me a lechub e ngruebet er a klengit. (Psa. 119:165) Me a bek el taem el bo lechelebangel a omelsemai, e a klaumerang er tir a diak bo lemechitechut, ngbai merael el mo mesisiich. (Jak. 1:2-4) Ngmekera omteketekii a chouaisei el mesisiich el klaumerang?

6. A redisaiplo er a irechar, te milleketek a klaumerang er tir er a ngera el tekoi?

⁶ A redisaiplo er a irechar a tileketekii a klaumerang er tir lokiu a klemedengei er tir er a Bades me a osisecheklel a Jesus Kristus, el ngii a “klemera ra evangkelio.” (Gal. 2:5, BT) Tia uldimukl er a rokui el tekoi el doumerang a Rekristiano, el ua klemerang el kirel a olubet el tengetengel a Jesus me a okisel. A apostol Paulus a mle ulterekokl a rengul el kmo aika el osisechakl a klemerang. E ngerang? E le nguluusbech a Bades el “omeketakl el kmo a Mesias a mle kirel el mo chuarm e mekiis er a kodall.” (Rel. 17:2, 3) A redisaiplo me te dirrek el kilengei aika el osisechakl e uleltuil er a ulengesuil a chedaol reng el mo medengelii a Tekingel a Dios. Te mirruul a research el oterekeklii el kmo aika el osisechakl a mlengai er a Bades. (Rel. 17:11, 12; Heb. 5:14) Ngdimlak loleketek a klaumerang er tir lokiu a bltikerreng er tir er a rechad, e dimlak di losiou er a Jehovah e le ngmle ungil a rengrir el teloi er a rekldemir er a klaumerang. Te bai milleketek a klaumerang er tir er a mera el “klemedengei . . . er a Dios.”​—Kol. 1:9, 10, BT.

7. A klaumerang er kid er a klemerang el ngar er a Biblia, ngera ngmo rullii el mei er kid?

⁷ Me a klemerang el ngar er a Tekingel a Dios a diak lemengodech. (Psa. 119:160) El ua tiang, ngdiak lemengodech a lsekum a kldemed a soibesengid me a lechub e ngruebet er a oberaod el klengit. E diak lemengodech sel bo dechelebangel a mondai. Me ngkired el kmal mo ungil medengei a osisecheklel a Biblia e mo ulterekokl a rengud el kmo ngklemerang. A mesisiich el klaumerang er kid er aika el klemerang el ngar er a Biblia a mo cholleklid er a taem er a omelsemai, el di ua uak el cholleklii a chert er a temel a  ses el eolt. Ke mekera e smisichii a klaumerang er kau el kmo ke oba klemerang?

8. Ngmilekera Timothy e mlo ulterekokl a rengul el kmo ngoba klemerang, el ua lolecholt a 2 Timothy 3:14, BT, 15?

⁸ A Timothy a mle ulterekokl a rengul el kmo ngoba klemerang. Ngmilekera medengelii tiang? (Monguiu er a 2 Timothy 3:14, BT, 15.) * A delal me a delal mechas a uluuchais er ngii a osisechakl er a “Chedaol Llechukl.” Engdi ngii me ngulterekokl el milengoit a temel me a klisichel el mesuub aika el llechukl. Sei a uchul me ngmle “ulterekokl loumerang” el kmo aika mle klemerang. A uriul, e a Timothy, delal, me a delal mechas a mlo medengei osisecheklir a Rekristiano. Me a Timothy a ulterekokl el kmal mle mechas a rengul er a bltikerreng el lullecholt er ngii tirka el uleltirakl er a Jesus, e kmal mle soal teloi er tir e omekerreu er tir. (Fil. 2:19, 20) Me nguaisei, engdi klaumerang er ngii a dimlak el meteketek lokiu a bltikerreng er ngii er a rechad, e ngbai milteketek lokiu a klemerang el rirellii el mo kmeed er a Jehovah. Kau me ngdirrek el kirem el kerekikl el omtab a tekoi el mosuub el kirel a Jehovah el ngar er a omengiuem er a Biblia.

9. Ngera el edei el meklou a ultutelel el tekoi a kirel mo ulterekokl a rengum er ngii?

⁹ Ngkirel mo ulterekokl a rengum er a edei el meklou a ultutelel el tekoi. A kot, e ngkirel mo ulterekokl a rengum el kmo a Jehovah el Dios a Ulemeob a rokui el tekoi. (Exo. 3:14, 15; Heb. 3:4; Och. 4:11) E a ongerung, e ngkirel mo ulterekokl a rengum el kmo a Biblia a klemechel a Dios el mei er kid a rechad. (2 Ti. 3:16, 17) E a ongedei, e ngkirel mo ulterekokl a rengum el kmo a Jehovah a ngar ngii a rechedal el mesiou er ngii er cheungel a ulekrael er a Kristus e tir a Resioning er a Jehovah. (Isa. 43:10-12; Jn. 14:6; Rel. 15:14) E tia diak el belkul a kmo ngkirem el mo medengei a rokui el tekoi er a Biblia. A turrekong er kau a mo ‘merriter’ a tekoi el mosuub me bo lulterekokl a rengum el kmo ke oba klemerang.​—1 Th. 5:21.

10. Sel bo dodengelii a klemerang, e ngera dirrek el kired el mo meduch el meruul er ngii?

¹⁰ Me sel bla bo lulterekokl a rengum er aika el edei el meklou a ultutelel el tekoi el kirel a Dios, Biblia, me a rechedal a Dios, e ngkirem el mo meduch lousbech er a Biblia el oterekokl aika el klemerang el mora rebebil. E ngerang? E le kid el Kristiano a ngar ngii a ngerecheled el olisechakl a klemerang el bla desuub el mo er tirke el kongei el orrenges er kid. * (1 Ti. 4:16) E sel dolasem el olterekokl a rengrir a rechad el kirel aika el klemerang er a Biblia, e kede dirrek el smisichii a klaumerang er kid.

11. Ngera el kerebai a lebilecherei a apostol Paulus el kirel a rolel a dolisechakl er a rechad?

¹¹ A apostol Paulus er a lolisechakl er a rechad, e ng ‘rirelleterir el mo oumera tekoi el kirel a Jesus el ousbech a tekoi el llechukl er a Llach er a Moses ma ikel lulluches a re profet.’ (Rel. 28:23) Ngmekera doukerebai er a Paulus sel dolisechakl er a rechad el kirel a klemerang? Ngdiak di douchais er tir a osisecheklel a Biblia. Ngkired el ngosuterir el mo mesuub e merriter a tekoi el losuub. Ngdiak el soad a bo lekengei er a klemerang e le tir el sorir kid, e te bai kongei er ngii e le tir el mla oterekeklii el kmo aike el losuub el kirel a betik a rengul Dios a klemerang.

12-13. Te mekera ruungalek e ngosuterir a rengelekir me lolemolem el ngar er a klemerang?

¹² Kemiu el oungalek a ulterekokl el somiu a rengelekiu a lolemolem el ngar er a klemerang. Me kom locha mo melatk el kmo a lengar ngii a ungil sechelirir er a ongdibel, e ngmo sebechir el olengeriakl. Me nguaisei, engdi a lsomiu a rengelekiu a bo lulterekokl a rengrir el kmo te oba klemerang, e ngar ngii a kirir el meruul. Ngkirel el mo er ngii a deleuill er tir me a Dios e mo ulterekokl a rengrir el kmo aike el lolisechakl a Biblia a klemerang.

¹³ Me a ruungalek a lsekum e ngsorir el osisecheklterir a rengelekir a klemerang el kirel a Dios e ngkirir el ochotii a ungil kerebai el kmo te mesuub er a Biblia. Ngkirir el mengoit a taem el melebedebek a tekoi el losuub. E seikid e ngmo sebechir el osisecheklterir a rengelekir el mo meruul er a osisiu el tekoi. Ngkirir losisecheklterir a rengelekir el mo ousbech aike el dongu el kirel a omesubel a Biblia, el ua Watchtower Online Library me a JW Library App, el di ua loruul er ngii el mora rechad el losuub lobengterir. A loruul uaisei, e te ngosuterir a rengelekir el moba omereng el saul el kirel a Jehovah me a “blak a rengul e mellomes a rengul el mesiou,” el lousbech er ngii a Jehovah el merous a kall er a klereng. (Mt. 24:45-47) Ruungalek, lak di molisechakl er a rengelekiu a beot el osisechakl er a Biblia. Mngesuterir el mo  mesisiich a klaumerang er tir lokiu sel molisechakl er tir a “dmolech ra Dios” el oltirakl a rekrir me a duch er tir.​—1 Ko. 2:10, BT.

14. Ngera me ngkired el mesuub a ulaoch er a Biblia? (Dirrek el momes er a baks el “ Ngsebechem el Smaod Aika el Ulaoch?”)

¹⁴ A ulaoch er a Biblia a klou a ultutelel el telengtengil a Tekingel a Dios el ngosukid el mo meleketek er a mesisiich el klaumerang er kid er a Jehovah. Ngera el ulaoch a melisiich er a klaumerang er kau? Ke locha mo melatk aike el ulaoch el kirel a “uriul sils.” (2 Ti. 3:1-5, BT; Mt. 24:3, 7) Engdi ngera bebil er a ulaoch el mla tmaut a dirrek el sebechel smisichii a klaumerang er kau? El ua tiang, ngsebechem el smodii el kmo mlekerang aike el ulaoch el ngar er a Daniel 2 me a 11 el bliongel e tilaut er a irechar me a dirrek el otutel er chelecha el taem? * A lsekum a klaumerang er kau a mengai a uchetemel er a Biblia, e ngdiak el sebechel metemall. Ka molatk er a kerebai er a rudam er kid el chilarm a meringel odechelakl er a Germany er a Ongeru el Mekemad. Alta ngdimlak a ungil klemedengei er tir er a ulaoch er a Biblia el kirel a uriul sils, engdi ngmla er ngii a mesisiich el klaumerang er tir er a Tekingel a Dios.

15-17. Ngmilekera omesubel a Biblia e smisicheterir a rudam er kid el tir a mlodechelakl er a rechad er a Nazi?

¹⁵ Ngar er a taem er a Nazi Germany, e te betok el telael el rudam me a rudos er kid a mlodurokl el mora concentration camp. A Hitler me a ta er a ngarbab el ofiser el Heinrich Himmler a uluuketui er a Resioning er a Jehovah. A ta el odos a millekoi el kmo a Himmler a dilu er a rebebil el rudos er a ta el concentration camp el kmo: “A Jehovah er kemiu a mengedereder er a eanged, engdi ngar tia el chutem e ngkemam a mengedereder! Aki mo ochotii er kemiu el kmo te rua techang a mo outekangel el kemanget el taem, kemiu me a lechub e ngkemam!” Me ngera ngilsuterir a rechedal a Jehovah me lolemolem el oba blakerreng?

¹⁶ Tirka el Mesuub er a Biblia a mle medengei el kmo a Rengedel a Dios a ulemuchel el mengedereder er a 1914. Me ngdimlak lemechas a rengrir er a meringel el odechelakl el lechillebangel.  Te bai mle ulterekokl a rengrir el kmo ngdiak a kabelment el sebechel torrebengii a moktek er a Dios me lak el taut. A Hitler a dimlak el sebechel lokngemedii a mera el omengull me a lechub e leketmeklii a kabelment el mesisiich er a Rengedel a Dios. A rudam er kid a mle ulterekokl a rengrir el kmo a lorael a taem el mong, e a omengederederel a Hitler a mo mokngemed.

¹⁷ Ngdimlak lecheleuid a klaumerang er tirka el rudam me a rudos. A telkib el taem er a uriul, e a kabelment er a Nazi a mlo mechitechut, e a Heinrich Himmler, el ngike el dilu el kmo “ngar tia el chutem e ngkemam a mengedereder” a mlo kirel chemiis. Ngar tiang e ngulsiueklii a Odam el Lübke, el ble lodengelii el ta er a kelebus. Me ngbelalk a medal e oker er a odam er kid el kmo: “E kau el ta er a Remesuub er a Biblia, chelechang e ngmekerang?” Me a odam er kid a dilu er ngii el kmo a Resioning er a Jehovah a mle medengei el kmo a kabelment er a Nazi a mo mechitechut e tir a mo mimokl. A Himmler, el kmal mle betok a mekngit el tekingel el kirir a Resioning, a di milechusem. A uriul er isei, e ngdi mle ngii el nguu a klengar er ngii. Me ngera klubeled er tiang? A omesubed er a Biblia, el uldimukl er a ulochel, a sebechel toketekii a mesisiich el klaumerang er kid er a Dios e meskid a ulterekokl el reng er a taem er a omelsemai.​—2 Pe. 1:19-21.

18. A doltirakl er a Johanes 6:67, 68, e ngera me kede ousbech el mo ‘ungil medengei a klemerang e meduch el melilt a ungil ma mekngit’ el ua losaod a Paulus?

¹⁸ A derta er kid a kired lolecholt er a bltikerreng, el ngii a olengchelir a remera el Kristiano. Engdi ngdirrek el kired el mo ‘ungil medengei a klemerang e meduch el melilt a ungil ma mekngit.’ (Fil. 1:9) E le lak, e ngsebeched el mechetakl er a “eltel a ngii di le diak le meral osisechakl er a re cheblad el chad,” el uldimukl er a rumtok a mera el osisechakl. (Efe. 4:14) A rebetok el disaiplo er a Jesus er a bo lak loltirakl er ngii, e a apostol Petrus a mle ulterekokl a klaumerang er ngii el kmo a Jesus a ullab a “tekoi er a diak a ulebengelel klengar.” (Monguiu er a Johanes 6:67, 68.) Me alta ngdimlak lodengei a belkul a tekingel a Jesus, engdi ngmillemolem el oba blakerreng e le ngmle medengei a klemerang el kirel a Kristus. Kau me ngdirrek el sebechem el smisichii a klaumerang er kau er a osisechakl er a Biblia. A omoruul uaisei, e ngmo melemolem el mesisiich a klaumerang er kau e mo sebechem el ngosuterir a rebebil el toketek a mesisiich el klaumerang er tir.​—2 Jn. 1, 2.