1. A doltirakl er a Filipi 2:3, e ngmekera e mo ungil a deleuill er kid me a rebebil a lsekum e ngmo ngariou a rengud?

KEDE oba ngariourreng el olengesenges er a Jehovah e le kede medengei el kmo Ngii a medengei a kot el ungil kired. (Efe. 4:22-24) A ngariourreng a rullid el mo nguu a soal a Jehovah el mo ngaruchei er aike el soad e mo omes er a rebebil el kuk ngarbab er kid. Seikid e ngmo er ngii a ungil deleuill er kid me a Jehovah me a rekldemed er a klaumerang.​—Monguiu er a Filipi 2:3.

2. Ngera el tekoi a ble lodengelii a apostol Paulus, e ngera bo dosaod er tia el suobel?

² Engdi a lsekum e ngdiak dekerekikl e ngsebeched el mechetakl el mo ua rechad er tia el beluulechad el mekedidai a rengrir e di melatk er a di tir. * A rebebil er a Rekristiano er a irechar a locha mlechetakl, e le apostol Paulus a milluches el mora rechad er a Rom el kmo: “[Ak] melekoi rar derta er kemiu el kmo, lak bo lkididai a uldesuiu el bedul kemiu el engelakl er sel kiriu lomdasu er ngii, e bai . . . mo ulserechakl el melebedebek.” (Rom 12:3, BT) Ngmle medengei el kmo ngkirel mo ungil a uldesued el kired. Me nguaisei, engdi a ngariourreng a ngosukid el mo tabesul a osenged el kired. Tia el suobel a mo mesaod a edei el tekoi el ngariourreng a ngosukid er ngii me ngdiak bo domdasu el kmo ngkmal meklou a ultuteled. Aikang a (1) chebechiieled, (2) techelled er a omesiou, me a (3) usbeched er a social media.

3. Ngera me ngsebechel mo er ngii a mondai er a chebechiil, e te mekera rebebil a lolasem el mesmechokl?

³ A Jehovah a rirellii a chebechiil el mo uchul a deurreng er a bechiil el sechal me a redil. Me nguaisei engdi ngdiak a chad el cherrungel, me ngsebechel mo er ngii a mondai er a chebechiil. A Paulus a milluches el kmo tirke el mo bechiil a mo metik a ringel. (1 Ko. 7:28) A rebebil a blechoel el di kautoketok, me te omdasu el kmo nglocha dimlak el kirir el mo bechiil. Me a lsekum e te mla mechetakl er a uldasu er tia el beluulechad, e te mo omdasu el kmo ngkirir el dortii a chebechiielir. A uldesuir a kmo a kot el klou a ultutelel el tekoi a bo lolatk a ungil el kirir.

4. Ngera diak el kired el meruul er ngii?

⁴ Ngdiak el kired el omdasu el kmo a chebechiieled a mla mo mekngit. Kede medengei el kmo a di ta el uchul a dertel a chebechiil el mengai er a Bades a laokreng. (Mt. 5:32) Me sel bo dechelebangel er sel ringel el lulluches el kirel a Paulus, e lak debecherei kldidairreng me lerellid el mo melatk el kmo: ‘Tia el chebechiil, ngmeskak aike el kuusbech? Ak nguu a bltikerreng el kuusbech er ngii? Ak mo metik er a klou el deurreng a bo kubengkel a ta er a chad?’ Mutebengii el kmo aika el ker a di mesaod er a soam. A llomeserreng er tia el beluulechad a dmu er kau el kmo, bo moltirakl er a soal a rengum e mrellii sel meskau a deurreng alta ngmo kirem el dortii a chebechiielem. Engdi a llomeserreng er a Dios a kmo ‘bo le beiusech a medam el omes a ikel mo klungiolel a ta ma tang . . . e lak di momdasu er a di kau.’ (Fil. 2:4) Me a Jehovah a soal a mlemelemii a chebechiielem. (Mt. 19:6) Ngdiak el soal a di molatk er a soam, e ngbai kirem el kot e ke lotkii.

5. A doltirakl er a Efesus 5:33, e ngkirir a rebechiil chad el mo uangerang omerellir el mora rebecherir?

⁵ A bechiil el sechal me a bechiil redil a kirir  el mo kaubltikerreng e kakull. (Monguiu er a Efesus 5:33.) A Biblia olisechakl er kid el mo blechoel el merous er a bai dolai. (Rel. 20:35) Ngera el blekeradel a mo ngosuterir a rebechiil el chad el mo kaubltikerreng e kakull? Ng ngariourreng. A rebechiil el sechal me a rebechiil el redil el ngariou a rengrir a diak bo losiik a mo uchul a klungiolir, e te bai osiik a ungil er a rebecherir.​—1 Ko. 10:24.

6. Ngera ke suubii er a tekingel a Steven me a Stephanie?

⁶ A ngariourreng a mla ngosuterir a rebetok el rubekel el Kristiano el metik a klou el deurreng er a chebechiielir. El ua tiang, a Steven a kmo: “A lsekum e kom ua ta el team, e kom dmak el oureor, el ileakl sel duubech a mondai. Me ngdiak bo momdasu el kmo ‘ngera ungil el kirek?’ e ke bai melatk el kmo ‘ngera ungil el kiram?’” A bechil er a Stephanie me nguaisei a uldesuel. Ngdmu el kmo: “Ngdiak a chad el soal kiei el obengkel a cheraro. Me sel leduubech a mondai, e aki tirterii a uchul tia el mondai. E meluluuch, e meruul a research, e mesaod er a rolel e ngsebecham el sumecheklii. Aki dmak el mesmechokl er a mondai, el diak kim kautoketok.” Me a rebechiil el sechal me a rebechiil el redil a ngmai a klungiolir sel lak lolatk el kmo te kuk meklou a ultutelir er a becherir.

7. Ngkirel mo uangera uldesuel a odam sel lenguu a ileakl el techall er a omesiou?

⁷ Kede omes er ngii el ileakl el techall el sebeched el mesiou er a Jehovah el ngar er a bek el bedengel a omesiou. (Psa. 27:4; 84:10) Me a lsekum a odam a kongei er a ileakl el techall er a omesiou, e kede chemat er ngii. A Biblia a kmo: “A lsekum a chad a semeriar el mo mengeteklel a ikelesia, e ng soal el osiik er a kot el ungil el ureor.” (1 Ti. 3:1) Me nguaisei, engdi sel lenguu a ngerachel, e ngdiak el kirel el mo omdasu el kmo ngmla mo klou a ultutelel. (Lk. 17:7-10) Ngbai kirel mo mesiou er a rebebil loba ngariourreng.​—2 Ko. 12:15.

8. Ngera kede suubii er a Diotrefes, Usia, me a Absalom?

⁸ Me a Biblia a mengelechel er kid el kirir a rechad el ulemdasu el kmo ngkmal meklou a ultutelir. A Diotrefes a dimlak letabesul a uldesuel el kirel me ngmle soal “oumerreder er ngii” er a ongdibel. (3 Jn. 9) A kldidiul a rengul a Usia a rirellii el mo meruul er a ureor el dimlak el moterekokl er ngii. (2 Kr. 26:16-21) E a Absalom a ulechau a rengrir a rechad el mo er ngii e le ngmle soal el mo king. (2 Sa. 15:2-6) Me a Biblia bleketakl lochotii el kmo, a Jehovah a diak el deu a rengul er a rechad el osiik a chetengakl. (Osi. 25:27) A cherengel a taem, e a kldidairreng me a sebesabel el reng a di mo uchul a tellemall.​—Osi. 16:18.

9. Ngera el kerebai a lebilecherei a Jesus?

⁹ A Jesus a dimlak el kedidai a rengul el uai tir. A Biblia a kmo “ngmle teletelel a Dios, e dimlak lomdasu el kmo, ‘Kungreos er ngak me di kua Dios.’” (Fil. 2:6, BT) Me alta Jesus a ongerung el kot el mesisiich, engdi ngdiak lomdasu el kmo ngkmal klou a ultutelel. Ngdilu er a redisaiplo er ngii el kmo: “Ele ngikel kot el ngariou er a delongeliu el rokui, ingikei ia kot el ngarbab.” (Lk. 9:48) Kede mera el ngeltengat el sebeched el mesiou el obengterir a re pioneer, remesiou er a ongdibel, remechuodel, me a rudam el oldingel a ongdibel, el tir a ngariou a rengrir el uai a Jesus! A rengariou a rengrir el mesiungel a Jehovah a melisiich er a bltikerreng el ngii a olengchelel a cheldebechelel a Dios.​—Jn. 13:35.

10. Ke mo mekerang a lsekum e ke omdasu el kmo a mondai er a ongdibel a diak lungil a semecheklel?

¹⁰ E kuk mekerang a lsekum ngar ngii a mondai er a ongdibel e kau a omdasu el kmo a remechuodel a diak losmechokl? Lak mongeremrum,  e bai molecholt er a ngariourreng el olengeseu er tirke el oungerachel. (Heb. 13:17) Ngsebechem el meruul er tiang sel di lekau el oker el kmo: ‘Aika el mondai ngkmal oberaod me ngkirel mesmechokl? Tia ngungil taem el lemesmechokl? Ngerechelek el mesmechokl? Ngak ak melasem el melisiich er a kltarreng, me a lechub e ngdi soak el olengesechekl er ngak?’

11. A doltirakl er a Efesus 4:2, 3, e ngera duubech sel dosiou er a Jehovah loba ngariourreng?

¹¹ A Jehovah omes er a ngariourreng el lmuut el klou a ultutelel er a dechal a chad, e omes er a kltarreng el lmuut el klou a ultutelel er a rechedel a oketmeklel a ureor. Me bo er a tkurrebab el sebechem el mesiou er a Jehovah loba ngariourreng. Sel moruul uaisei, e ke mo melisiich er a kltarreng er a ongdibel. (Monguiu er a Efesus 4:2, 3.) Bo leblak a rengum er a ureor er a berkel a klumech. E mosiik a rolel e ngsebechem el mesiou er a rebebil lokiu sel moruul a ungil tekoi el kirir. E momtechakl er a rechad, el uldimukl er tirke el diak a ngerechelir er a ongdibel. (Mt. 6:1-4; Lk. 14:12-14) Me sel moba ngariourreng el oureor el obengkel a ongdibel, e a rechad a mo mesa el kmo ngdiak di lengar ngii a duch er kau er a ureor, e ngdirrek el ngariou a rengum.

12. A Biblia ngmelisiich er kid el mo er ngii a resechelid? Mosaod.

¹² A Jehovah a soal a doldeu a rengud lobengterir a resechelid me a rechedal a telungalek er kid. (Psa. 133:1) A Jesus a mla er ngii a rungil sechelil. (Jn. 15:15) Me a Biblia a mesaod er a klungiolel a lengar ngii a remera el sechelid. (Osi. 17:17; 18:24) E melekoi el kmo  ngdiak el lungil a doleakl er kid er a rechad. (Osi. 18:1) A rebetok omdasu el kmo a social media a rulleterir el mo betok a resechelirir e mo diak lomelechesiu er tir el di tir el tang. Engdi, ngkired el mo kerekikl sel dousbech er a social media.

13. Ngera me a rebebil el ousbech er a social media a mo omdasu el kmo ngdiak a sechelirir e mo mechitechut a uldesuir?

¹³ A omesuub a mla metik er ngii el kmo tirke el mengoit er a klou el temir el omes e menguiu aike el loltobed a rechad er a social media a bai locha mo omdasu el kmo ngdiak a sechelirir e mo mechitechut a uldesuir. E ngerang? E le ta er a uchul a kmo a rechad a blechoel post aike el kot el ungil siasing er tir me aike el ileakl tekoi el mla duubech er a klengar er tir, me a dirrek el siasing er a resechelirir me a basio el bla lebo er ngii. Me a chad sel lomes e lomekesiu aikang er a klengar er ngii, e ngkora ua lak a ngera er a klengar er ngii. A ta el 19 a rekil el odos a kmo: “Ngmlo diak el deu a renguk sel kumes er a rebebil el milil sel le weekend, e ngak a ngar er a blai el diak a ngera el kurruul er ngii.”

14. Ngmekera omellach er a Biblia el ngar er a 1 Petrus 3:8 e ngosukid el kirel a usbeched er a social media?

¹⁴ Me nguaisei, ngsebeched el ousbech er a social media el ngar er a ungil rolel, el ousbech er ngii el mengedecheduch er a telungalek er kid me a resechelid. Engdi ngsebechem el mtebengii el kmo aike el tekoi el post a rechad er a social media a rruul el mo olechau a osengir a rechad? “Mesekak” a tekoi el sorir a rechad a bo lodengelii. A rebebil a dirrek el mla post a diak lungil el tekoi er a siasing er tir me a lechub e ngsiasing er a rebebil er a rechad. E tiang a omtok er a ngariourreng me a bltikerreng er a klodam el kirir a Rekristiano el omekeroul.​—Monguiu er a 1 Petrus 3:8.

15. Ngmekera Biblia e ngosukid me ngdiak bo dolechau a osengir a rechad?

¹⁵ Me a lsekum e ke ousbech er a social media, e di lekau el oker el kmo: ‘A tekoi, siasing, me a lechub e ng video el bok post ngrulleterir a rechad el mo omdasu el kmo ngdi soak el mesaod er ngak? Ak mo rulleterir a rechad el mo mechechei er ngak?’ A Biblia a kmo: “Ma ikel rokuil el ngara belulechad, el ngibes ra tech, ma ngibes ra mad, ma ilad er a keruul a  dimlak le ngara Chedam el mei, e ngbai mlara belulechad.” (1 Jn. 2:16, BT) A kuk ta er a Biblia a oliuid er a “ilad er a keruul” el “ikel rokui el uchul e ng kedidai a rengrir.” Me a Rekristiano a diak el sorir lolechau a osengir a rechad. Te bai oltirakl er a omengelechel er a Biblia el kmo: “Ng diak el kired el oumead er kid, ma lechub e de kaiuengasechereng, ma ka de kachechei.” (Gal. 5:26) Me a ngariourreng a mo ngosukid me ngdiak demechetakl er a reng er tia el beluulechad el ngii a rulleterir a rechad el mo omdasu el kmo ngmeklou a ultutelir.

16. Ngera me ngdiak el kirel mo kedidai a rengud?

¹⁶ Ngkired el omekeroul er a ngariourreng e le tirke el mekedidai a rengrir a diak el “ulserechakl el melebedebek.” (Rom 12:3, BT) A remekedidai a rengrir a di sorir el loumondai e di oumead er tir. A uldesuir me a omerellir a blechoel mo uchul a telemellir tir me a rebebil. A lak lengedechii a uldesuir, e a Satan a sebechel rulleterir el mo diak lesa llomes e chodeng a rengrir. (2 Ko. 4:4; 11:3) Me a chad el ngariou a rengul a ulserechakl el melebedebek. Ngtabesul a osengel el di kirel, e medengei el kmo a rebebil a kuk ungil er ngii er a betok el rolel. (Fil. 2:3) Ngdirrek el medengei el kmo “a Dios omtok er a re ngarbab a rengrir, e ungil a tekingel er a re ngariou a rengrir.” (1 Pe. 5:5) Tirke el ulserechakl el melebedebek a diak el sorir a Jehovah a bo lecherrouir.

17. Ngera kired el meruul a lsoad el melemolem el ngariou a rengud?

¹⁷ Me a lsoad a lolemolem el ngariou a rengud, e ngkired el oltaut er a omellach er a Biblia el mo ‘medebedii el mo mecherei sel di mla klengar er kid el obengkel a omerellel, e . . . milid er a beches el klengar.’ E tia ousbech er a klou el ureor. Ngkired el mo mesuub er a kerebil a Jesus e mo oltirakl er ngii el mo er sel tkurrebab el sebeched. (Kol. 3:9, 10; 1 Pe. 2:21) A doruul uaisei, e ngmo klungioled. Me sel domekeroul er a ngariourreng, e ngmo klou a deurreng er a telungalek er kid, e mo er ngii a kltarreng er a ongdibel, e mo diak dousbech er a social media el olechau a osengir a rechad. E a ngaruchei, e kede mo nguu a klengeltengat me a kengei er a Jehovah.