A Jehovah a kmal soal a reteru el chad el mo bechiil a bo lengar ngii a deurreng er a chebechiielir e lolemolem el mesisiich. (Mt. 19:4-6) A lsekum e ke melatk a mo bechiil, e ngmekera sebechem el metik er a ungil kldemem? A Jehovah el ulemeob er kid a medengelii a rolel e a chebechiil a mo er ngii a deurreng er ngii. Ke mo metik er a mera el deurreng sel moltirakl aike el lomellach el lomeskid. Ka molatk a bebil er aika el omellach.

A kot e ngkired el mtebengii tia el tekoi el kmo: “Ng diak a cheblad el ua [rengul a chad]; ng kmal smecher me ng diak le mukar.” (Jer. 17:9) A reteru el chad sel bo el kasisiik e ngsebechel mereched el mouak a rengrir. Tia mo uchul e ngmo meringel er tir a ungil melilt a tekoi. A chad el mo bechiil el di oltirakl er a rengul, a blechoel el mo ouuchel er a rengul er uriul. (Osi. 28:26) Seikid a uchul me ngkmal diak di luchelel e le kauchais aike el ngar er a rengrir me a lechub e loruul a telbilir er a uchei er a bo lungil medengelii a chad.

A Osisechakl 22:3 a melekoi el kmo: “A medengei a tekoi el chad a mo mesa tellemall a le mei e oibngii er ngii, e ngdi diak lomdasu el chad a di mong, e a uriul e ng ouuchel er a rengul.” Ngera kngtil a dousbech aika el matchmaking website? Ngklengiterreng e le te ngar ngii a mlo medengelterir a rechad loeak aika el website, e a uriul e te mlo medengei el kmo a chad el lobengkel a ulumulak er tir. Ngdirrek el ngar ngii a rechad el omulak e remuul a fake el account el mengebelung er a rechad e merechorech a ududir. Tirke el mirruul aika el tekoi a dilu el kmo te Sioning.

Mdirrek el melatk er tiang. A bebil website a ousbech a ochur el losiik er a kmo te rua techang a chatter. Me nguaisei engdi ngdiak a olechotel a kmo aikang a oureor. Ngera uldesuem? Ngolechotel a llomeserreng a dotuil a klaumerang er kid er a computer program el loruul a rechad el mo olengeseu er kid el meruul er a klou ultutelel omelilt el ua melilt er ngike el mo bechid? Aika kmal diak el sebechel el mo ua omellach er a Biblia.​—Osi. 1:7; 3:5-7.

A omellach el ngar er a Osisechakl 14:15 a kmo: “A meleolt a rengul chad a oumerang a rokui el tekoi, e a mellomes a rengul a omes er a le bor ngii.” Me bo mungil medengelii  a chad er a uchei er a omolatk el mo bechiil. Me nguaisei, engdi obetik er a chad er a Internet e nglocha mo meringel er kau a mo ungil medengelii. Ngmera el sebechem el kmo ke medengelii a chad a lsekum e kom di share a profile er kemiu e blechoel el kau message? A rebebil a ulemdasu el kmo te mla metik er a true love er tir engdi a uriul e ngkmal mlo mechas a rengrir er a lekasoues er a mederir.

A ta er a milluches er a Psalm a dilu el kmo: “Ng diak kdengchokl el teloi er a re mengesuul el ka kubengterir a re cheblad.” (Psa. 26:4) A rebetok a omdasu el kmo a domulak er a profile er kid el meruul er a rechad el mo sorir kid a normal el tekoi. Te locha diak louchais me a lechub e te omart aike el mekngit el blekerdelir sel longedecheduch er a rechad er a Internet. E alta rebebil a kmo te Sioning er a Jehovah engdi ke medengei el kmo te mera el telecholb? Ngngar ngii a mesisiich el deleuill er tir me a Jehovah? Te oba omengull er a rechedal a ongdibel er tir? Me a lechub e te mekngit el kerebai e “dengerenger el chad” el diak lungil a deteloi er tir? (1 Ko. 15:33; 2 Ti. 2:20, 21) A doltirakl a omellach er a Biblia, e ngika el chad ngmimokl el mo bechiil? Ngkirem el mo medengei aika el tekoi engdi ngmeringel er kau a mo medengei a nger er a ikang a lak mongedecheduch er a rebebil Sioning el ungil medengelii ngika el chad. (Osi. 15:22) E uaisei, a blak a rengul mesiungel a Jehovah a kmal diak bo lolatk a mo obengkel a chad el diak el Sioning el ngii a “diak loumerang el ngara tal ongelungel.”​—2 Ko. 6:14, BT; 1 Ko. 7:39.

Me ngkmal kengaol a dousbech chouaika el website. E ngar ngii a lmuut lungil rolel a bo dodengelterir a rechad e dosiik er a mo ungil kldemed. Me kede mo er ker e metik er a chad el sebechel mo kldemed? Sel lsebeched el mo kldibel, e ngsebeched el mo medengelterir a rebebil er a miting er a ongdibel, ta el sils el ongdibel, meklou el ongdibel, me a gathering.

E a lsekum e ngdiak el sebeched el mo kldibel e le blekeradel el ua rakt el COVID-19 a uchul, e kede ousbech a electronics el ngar er a miting. Aikakid el taem a meskid a techall el mo medengelterir a rebebil mesobil el Sioning. Ngsebechem lomtab a blekerdelir sel lengar er a miting e orrenges a rolel a losaod er a klaumerang er tir sel longer. (1 Ti. 6:11, 12) Ngdirrek el sebechem el mengedecheduch er tir el ngar aike el breakout room er a uriul er a miting. Ngar aika el taem el omdak el betok el virtual e ngsebechem el omtab er ngika el soam el chad a ledak lobengterir a rebebil. Seikid e ngmo sebechem el mes a mera el blekerdelel. (1 Pe. 3:4) Cherengel a taem e ke mo ungil medengelii. Seikid e ke mo medengei el kmo ngosisiu a turrekong er kemiu e chatter me a lechub e ngdiak.

A remesobil el chad sel lekasisiik el oltirakl a omellach er a Biblia e ngsebechir el mo melechesuar a tekoi el losaod er ngii tia el osisechakl el kmo: “Ngike el metik er a ungil bechil a metkei er a ungil tekoi, e ngii a nguu a kengei er a Jehovah.”​—Osi. 18:22, NW.