A demak a mle ta er a remechuodel er a United Church of Canada el mlara belumam me a bek el sandei e ngak me a ochedak a mlora Sunday school e a 11:00 a.m. aki mo teloi er ngii el ngar er a ikelesia. E a ieta sils e aki obengkel a delemam el mora Blil a Ongdibel. Ngkmal mle sebecham el mesa klekakerous er aika el teblo el klechelid.

A delak a mle share er a klaumerang er ngii lobengterir a remeketeketang el sechelil er a Bob me a Marion Hutcheson, el tir a kilengei er a klemerang. A 1958 e tirka el obekel a ngilikak lobengterir me a retedei el ngelekir el sechal el mora Divine Will International Assembly el mlara New York City, el ngii a mle eai el klebesei. Chelechang e ak mtebengii el kmo ngdimlak el beot el tekoi a lolai er ngak el obengterir, me nguaisei engdi tia el convention a ta er aike el kot lungil taem er a klengar er ngak.

Sera kngeasek e aki kiliei er a sers e kmal soak el omekerreu a charm. Me ak kmal millatk a mo toktang er a charm. A delak a uluuchais er tiang el mora ta er a remechuodel. Ngulemeklatk er ngak el kmo kede kiei er a “uriul sils” e uleker el kmo a bo kulai a rak el ngar er a daingak e ngngera ngmo rullii el mora deleuill er ngak me a Jehovah. (2 Ti. 3:1, BT) Tiakid a uchul me ngmlo diak kullatk a mora daingak.

 Ak dirk millatk el kmo, ngak ak mo mekerang er a uriul er a ktobed er a skuul. Alta kulemerk er a klumech er a bek el weekend engdi ngdimlak el deu a renguk el omerk me ak millatk el kmo ngdiak el sebechek el mo pioneer. E a demak me a ochellel el tir a diak el Sioning, a millisiich er ngak el mo oureor el mui el taem er a klou el kombalii er a insurance el ngar er a Toronto. A angko er ngak a mle klou a ultutelel el chad er tia el kombalii me ak kilengei.

Sera kngar er a Toronto e ak di uluureor el overtime e di ulebengterir a rechad el diak el Sioning a uchul me ngdimlak kngar er a bek el miting e kuldingel. A uchelel e ak kiliei lobengkel a demal a demak el ngii a diak el Sioning, engdi sera lemad e ngmlo kirek losiik er a blik.

A re Hutcheson el tir a kulebengterir el mora convention er a 1958 a mlo ua le demak me a delak. Te ngilikak el mo kiei el obengterir e ngilsukak el mukeroul er a klereng. Me a 1960 e ngak me a ngelekir er a John a miltecholb. A John ulemuchel el pioneer e tia millisiich er ngak el mo menglou er a temek lomerk er a klumech. A rudam er a ongdibel er a lesa el kmo ak mla olengeriakl, e te tiltkak el mo ngike el odam el oungerachel er a tedebechel a miting el domekedong er ngii er chelechang el kmo Miting er a Klengar me a Omesiunged.

A 1966 e ak mlo bechiil ngak me a Randi Berge, el ta er a blak a rengul pioneer el kmal mle soal mo mesiou er a beluu lousbech a ngeso. Odam loldingel er a ongdibel er kemam ulechotii a klemeriarreng er kemam e millisiich er kemam el mo mesiou er a ongdibel el ngar er a Orillia, Ontario. Me aki di mle mereched el mong.

Sera ki bora Orillia e ak mlo teloi er a Randi el ta er a regular pioneer. A klemeriarreng er ngii a rirellak el dirrek el kmal mo semeriar! Uriul er a kuureor el meringel el mo ungil pioneer e ak mlo chormii a deurreng el ousbech er a Biblia e meseterir a rechad el mo mtebengii a klemerang. Ngmera el klengeltengat el mlo sebechek el ngosuir a obekel er a Orillia el meruul omelodech e mo mesiungel a Jehovah!

Ak mlo medengelii a Arnold MacNamara er a ki bora Toronto, el ngii a ta er a odam el omekrael a ureor er a Bethel. Nguleker el kmo ngsomam el mo special pioneer. Ak di mle mereched el dmu el kmo: “Ochoi! Ngii di lak ki bora Quebec!” A uldesuek a mle cheltikaik er a mekngit el uldesuir a rechad er a Canada el millekoi a tekoi er a Merikel el kirir a rechad er a Quebec, el tir a millekoi a French. Tiakid el taem e a rechad ulemtok er a kabelment e mle sorir a Quebec a bo le independent er a Canada.

A Arnold a dilu el kmo, “Chelecha el taem e a branch a di oldurokl er a re special pioneer el mora Quebec.” Me aki kilengei. Ak mle medengei el kmo a Randi a soal mesiou er tiang. Uriul e ak mlo mtebengii el kmo tia ta er aike el kot lungil omelilt er a klengar er kemam!

Uriul er aki molai er a klas er omelekoi el tekoi er a French el eim el sandei, e ngak me a Randi me a lmuut el ta er a obekel a mlora Rimouski, el bekord el 336 el mael a cherridel er a diluchesungos er a Montreal. Ngkmal dirk mle betok a kiram el mesuub, e tia kmal ulebeketakl er a ta el miting el kuleltobed a subed. Ak dilu el kmo ngkmal mo betok a “re delegate el ostrich” alta ngmle kirek el melekoi el kmo “re delegate el chad er a Austria.”

Reteua el mesobil odos me a telungalek er a Huberdeau el mle teru rengelekir el redil, a mle teloi er kemam er a Rimouski. A telungalek er a Huberdeau a milleng er a blai el mle kleuid el delemerab, e lekiliei er ngii a rokui el pioneer e aki kaingeseu er a olengil. Aki ulemekedong er ngii el White House e le medal tia el blai a mle becheleleu me a tengal me ngbecheleleu. Aki mle bekord el 12 el mo 14 el chad el kiliei er ngii. Ngak me a Randi ulemerk er a klumech er a tutau, ieta sils, me a kebesengei me ngkmal mle dmeu a rengmam le ngmle blechoel el ngar ngii a rechad lobengkemam, mo lmuut er a kebesengei er a temel a winter.

Aki kmal mlo kmeed er tirka el blak a rengrir el pioneer me te mlo ua le telungalek er kemam. A lebebil e aki dilengchokl el iliuekl er a cheluml el ngau me a lechub e ngngar ngii a ike el sils el ki mdilak el meruul a dumpling el kakerous a techel. A ta er a odam a mle chad er a ongngak, me sel Sebadong er a kebesengei e aki mle blechoel mengitakl e meloik.

A rebetok er a rechad er a Rimouski a kmal mle sorir el mesuub a Biblia! Ngdi mle chelsel a eim el rak e a remesuub a Biblia ulengeriakl el mo nguu a techolb me a ongdibel a mlukeroul el mo 35 a rechad er ngii.

Aki kmal millai a klubelam el omerk er a klumech er a Quebec. Aki milsa rolel e a Jehovah olengeseu er kemam el omerk er a klumech me aike el ki muluusbech. Me a lmuut kung, ngkmal mlo betik a rengmam er tirka el chad el millekoi a French, omelekingir, me a siukang er tir el uchul me ngmlo somam a lmuut el bebil er a siukang.​—2 Ko. 6:13, NW.

A branch ullengit er kemam el mora kekerei el beluu er a Tracadie el ngar er a ongos er a New Brunswick e ngar bita er a daob. Tia mlo uchul a bebil omelsemai le ki dirk mle sign er a lease er a apartment e mla er ngii a contract er ngak el olisechakl er a skuul el part-time. Me a lmuut el tang, a rebebil er a study er kemam a dirk mlo publisher me kemam a mlara melengel omekedechor er a Blil a Ongdibel.

 Aki di milluluuch er tia el weekend e mlo odngelii a Tracadie, el ngii a kmal mle ngodech er a Rimouski. Engdi ki millilt el kmo, a Jehovah soal aki bong, me aki mong. Aki millasem er a Jehovah e milsa el kmo ngdiledaes a bek el omelsemai. (Mal. 3:10) A Randi el kmal mesisiich a deleuill er ngii me a Jehovah, e melatk er a rebebil, e sebechel ocherchur er a tekoi, a rirellii omelukl el mo beot.

Ngdi mle ta el Robert Ross a mechuodel er tia el ongdibel. Ngika mlei el me pioneer ngii me a bechil er a Linda, e sera lebo er ngii a kot el ngelekir e te millilt el di kiei. Me alta te ulemekerreu er a kekerei el ngelekir el sechal, engdi te kmal millisiich er ngak me a Randi le te kmal ulemetechakl er kemam e mle blak a rengrir er a berkel a klumech.

Ngmle eru el rak el ki em pioneer er a Tracadie, e aki nguu ongit el mo mesiou loldingel ongdibel. Aki milsiou ongdibel el melekoi a tekoi er a Merikel el euid el rak, e te assign er kemam el mo oldingel a ongdibel er a Quebec el melekoi a tekoi er a French. A Léonce Crépeault el mle district overseer er a Quebec a mle blechoel el chemat er ngak sel kultobed a cheldecheduch. Engdi uriul e ngblechoel el oker, “Ngmekera sebechem el remuul el ngar er a rolel e ngsebechel ngosuterir a rechad?” a Tia ngilsukak el remuul osisechakl el mo ileakl el tekoi el sebechir el suubii e beot er tir a mtebengii.

A ta er a assignment er ngak el kmal diak kubes er ngii a mle 1978 er a “Victorious Faith” International Convention el mla er ngii er a Montreal. Ak milsiou el ngar cheungel omeruul el kall. Te mle 80,000 el chad a mei me ngii a mlo er ngii a beches el rolel aki bo momekang er tir. A klekedall a mle beches, me a menu me a rolel aki em prepare a kall me ngmle beches. Ngmla er ngii a 20 el meklou el icebox el bebil er a taem e ngdiak loureor. E dimlak el sebecham el mora stadium el lebo er ngii a convention er sel kesus er uchei er a lomuchel le ngmla er ngii a klekool. E mle kiram el on oven er uchei er a lengasech a sils el meruul a breakfast! Ngkmal mle mesaul a bedengam engdi ak ngilai a klubelek er a meringel el urerir tirke el mle volunteer me a ulekurulir me a blekerdelir locherchur er a tekoi el meringel. A klausechelei er kemam a dirk melemolem el mei er chelechang. Ngkmal dmeu a renguk el mlo teloi er tia el mera el ileakl el convention el mla er ngii er a Quebec, el beluu el kmal  mle meringel odechelakl er ngii er a delongelel aike el rak er a 1940 me a 1960!

Ak siluub a kmal betok er a rudam lulemekrael er aike el convention el mla er ngii er a Montreal. A ta el rak e a David Splane el chelechang ngmesiou el ta er a chedal a Governing Body ulemekrael er a ureor er a convention. A convention el mlo uriul er ngii e te ullengit er ngak el mo meruul er tia el ngerachel. A David a kmal mle support.

Sera 2011 te ullengit er ngak el mo olisechakl er a skuul el kirir a remechuodel er a ongdibel, er a uriul er a 36 el rak el ki mosiou loldingel ongdibel. Chelsel eru el rak e aki mle bad a 75 el kakerous el bet, engdi ngkmal diak ki mouuchel a rengmam. Ulebengelel a bek el sandei, e a remechuodel a kmal uleba omereng el saul le te mlo melechesuar el kmo a Governing Body kmal ulemekerreu el kirel a tekoi er a klereng er tir.

Uriul e ak mlo olisechakl er a Skuul el Kirir a Rumerk er a Rengedel a Dios. A rengalek er a skuul a mle blechoel el mo mesaul a bedengir e suebek a rengrir el kirel a schedule er tir: dengchokl el euid el sikang er a ta el sils, meruul a homework el edei el sikang a leklebesei, e ngar ngii a bekord el euang me a lechub e ngeim el part er tir er a bek el sandei. Ngike el ta er a olisechakl me ngak a silodii el kmo ngkmal diak el sebechir a lak a ulengesuil a Jehovah. Ngkmal diak kubes er tir el kmal mo mechas a rengrir el kmo sel lultuil er a Jehovah e ngsebechir el remuul a lmuut el betok er aike el lulemdasu.

A klemeriarreng lulechotii a delak a ngilsuterir a re study el olengeriakl e melemedemek er a rengul a demak el kirel a klemerang. Edei el klebesei er uchei er a lemad, e a demak a mlei er a cheldecheduch el mora buai er a Blil a Ongdibel, e millemolem el ngar er a miting el 26 el rak. Alta ngdimlak el metecholb, a remechuodel a mle blechoel el ouchais er ngak el kmo ngta er tirke el kot el chad el mora miting.

A delak a dirrek el kmal ungil kerebai el kirek ngak me a ruchedak. Tirka el tedei el ochedak a blak a rengrir el mesiou er a Jehovah tir me a rebecherir. A reteru er tir a mesiou el ngar er a branch er a Portugal me a Haiti.

Ngak me a Randi er chelechang a mesiou el special pioneer er a Hamilton, Ontario. Sera ki mosiou lodingel ongdibel e ngkmal mle dmeu a rengmam lobengterir a rebebil el mora study me a return visit er tir. Engdi chelecha ngkmal dmeu a rengmam lomes er a study er kemam lolengeriakl er a tekoi er a klereng. Sel ki molekeed er kemam er a rudam me a rudos er a ongdibel e ngkmal melisiich er kemam el mesa rolel a Jehovah olengeseu er tir er a chelsel a ungil me a meringel el taem.

Sel ki momes er a klengar er kemam e aki kmal oba omereng el saul er a klemeriarreng lulechotii er kemam a rebetok. Me aki melasem el “olecholt a ulekerreu” el mora rebebil, e melisiich er tir el mo mesiou er a Jehovah el mora tkurrebab el sebechir. (2 Ko. 7:6, 7, NW) El ua tiang, ngar ngii a chimo el telungalek el chedil me a ngalek el sechal me a redil a mesiou el mui el taem. Me a kuleker er a chedam el kmo ngmla ta el lolatk a mo pioneer. Ngdilu el kmo, ngmesiou er a retedei el pioneer. Me a kuleker er ngii el kmo, “Kau, ngsebechem el lmuut lungil mesiou er tir er a Jehovah?” Ak millisiich er ngii el mo oldeu a rengul er aike el loldeu a rengrir er ngii a telungalek er ngii. Ngdi mle chelsel a elolem el buil e ngmlo ta er a pioneer.

Ngak me a Randi mo melemolem el “ouchais . . . a bek el cheroll el merael el mei” el kirel a “mengasireng el [omerellel]” a Jehovah, e omeltkam el kmo te mo dmeu a rengrir el mesiou er a Jehovah el uai kemam.​—Psa. 71:17, 18.