1-2. Ngoeak a ngera el rolel e a Kristiano di ua klou el omekedecheraol? (1 Korinth 15:58, NW)

 NGAR er aike el ulebongel el rak er a 1970, e te ulemekedechor er a klou el omekedecheraol er a Tokyo, el beluu er a Siabal el 60 el chellibel. A rechad lulemes er ngii a millatk el kmo tia ngsebechel melemolem el dechor, e le tia el beluu a mle blechoel el mo er ngii a desiu er ngii. Ngmekera sebechel otekau a desiu? A rechad el mle design er tia el omekedecheraol a rirellii el mo mesisiich engdi osisiu el taem e ng flexible me lsebechel lotekau a desiu. A Rekristiano a di ua tia el omekedecheraol. Ngoeak a ngera el rolel?

² A Kristiano kirel balance a klisichel dechor me a mo flexible. Ngkirel mesisiich el dechor e diak lolmesim el kirel a llechul a Jehovah. (Monguiu er a 1 Korinth 15:58, NW. b) Ng “kltmokl el mo olengesenges” e diak el mechetakl. Ngdi osisiu el taem e ng “tabesul” me a lechub e ng flexible a lsekum e ngsebechel me a lechub e ngmo kirel. (Jak. 3:17, NW) A Kristiano el mla suubii el mo oba tabesul uldasu a diak el meringel a tekingel me a lechub e lebeot a rengul. Ngar tia el suobel e kede mo mesaod er a rolel e ngdiak demesim. Kede dirrek el mo mesaod eim el tekoi el lousbech a Satan el mengitechut er kid me a rolel e ngsebeched el mo mesisiich er ngii.

3. Ngera el llach el mla er ngike el kot el ngarbab a llemeltel el meruul a llach a debetik er a Rellir 15:28, 29 (BT)?

³ A Jehovah ngike el kot el ngarbab a llemeltel el meruul a llach e mla remuul el mo beot er a rechedal a mo medengei. (Jak. 4:12) El ua tiang, a governing body er a taem er a rekot el  Kristiano uluuchais a edei el tekoi el kirir el otirakl: (1) oltngakl a bleob el chelid, e di ta el Jehovah longull er ngii, (2) mengull er a cheledolel a rasech, e (3) oltirakl a llach er a Biblia el mo omekiai a deleboes. (Monguiu er a Rellir 15:28, 29, BT. c) Te mekera Rekristiano er chelecha el taem e olengesenges aika el edei el tekoi?

4. Ngmekera debsa Jehovah cherrungel el omengull er kid? (Ocholt 4:11)

⁴ Kede oltngakl a bleob el chelid, e di ta el Jehovah dongull er ngii. Jehovah dilu er a rechad er a Israel el kmo, ngdi ngii el tang a longull er ngii. (Dut. 5:6-10) Me sel taem el Diabelong a milengesuseu er a Jesus, e ngdilu er ngii el kmo ngdi ta el Jehovah kired el mengull er ngii. (Mt. 4:8-10) Me ngdiak dongull a bleob el chelid. Ngdirrek el diak dongull er a rechad e doruul er tir el mo ua dios, el ua remengeteklel a klechelid, rechad er a balatiks, me a lechub a remerael chisir el chad er a klekool me a lechub e ng TV. Kede dechor el kirel a Jehovah e mengull er ngii el “mileob a rokui el tekoi.”​—Monguiu er a Ocholt 4:11.

5. Ngera uchul me kede olengesenges er a llechul a Jehovah el kirel a cheledolel a klengar me a rasech?

⁵ Kede olengesenges er a llechul a Jehovah el kmo a klengar me a rasech a chedaol. E ngerang? E le Jehovah kmo a rasech omtechei er a klengar, el mekreos el sengk er ngii. (Lev. 17:14, NW) A Jehovah er a lekengei er a rechad me longa charm, e ngdilu el kmo ngdiak longa rsechel. (Gen. 9:4) Ngulemelekl er tia el llechul er a lebesterir a rechad er a Israel a Llach er a Moses. (Lev. 17:10, NW) E ulemekrael er a governing body er a taem er a rekot el Kristiano el mo melekoi er a rokui el Kristiano me ‘bo lomekiai a . . . rasech.’ (Rel. 15:28, 29, BT) Kede olengesenges er tia el llach sel dolilt a rolel a ukeruul. d

6. Ngera kede meruul me bo lsebeched lolengesenges a llechul a Jehovah el kirel a deleboes?

⁶ Kede oltirakl a llechul a Jehovah el kirel a deleboes. (Heb. 13:4) A apostol Paulus a mengelechel er kid el mo ‘mekoad’ a mekngit el ngelbesel a rengud, el belkul a kmo ngkired el mora tkurrebab el sebeched el oltobed a mekngit el ngibes er a chelsel a rengud. Ngdiak bo domes me a lechub e doruul a ngii di el tekoi el sebechel mo uchul e kede mo meruul a deleboes. (Kol. 3:5; Job 31:1) E sel demekesuseu el mo meruul er a tekoi el mekngit, e kede mereched lotngeklii ngii el uldasu me a lechub e ngomeruul el sebechel tomellii a deleuill er kid me a Dios.

7. Ngera soad el rullii er a rengud el mo meruul er ngii, e ngerang?

⁷ A Jehovah mengerechir er kid el mo ‘ngar er a rengud el olengesenges.’ (Rom 6:17, BT) A ulekrael er ngii a mo uchul a klungioled, me a llechul a diak el sebechel mengodech. (Isa. 48:17, 18; 1 Ko. 6:9, 10) Kede mora tkurrebab el sebeched el odeuir a rengul a Jehovah e ochotii a osisiu el reng lulebang a ta er a milluches er a Psalm, el ngii a dilu el kmo: “Ak mla tibir er a renguk el di olengesenges a llechum el mor a kodellek.” (Psa. 119:112) Me nguaisei, a Satan a mo meruul er ngii el mo meringel er kid a melemolem el mesisiich el dechor. Ngera el tekoi a lousbech el mengitechut er kid?

8. Ngmekera Satan a lousbech a odechelakl el mengitechut er kid el mo diak dolemolem el mesisiich el dechor?

⁸ Odechelakl. A Diabelong ousbech odechelakl me a orimel el melasem el mengitechut er  kid. A moktek er ngii a ‘omerekakl’ er kid, e tomellii a deleuill er kid me a Jehovah. (1 Pe. 5:8) A rekot el Kristiano a lulemekdakt er tir, lulengelebed er tir, e omekoad er tir le tir rirellii er a rengrir el mo mesisiich el dechor. (Rel. 5:27, 28, 40; 7:54-60) A Satan er chelecha el taem a melemolem lousbech odechelakl. Tia bleketakl el moues er a omeruul el mora rudam me a rudos er kid el ngar er a Russia me a lmuut el bebil er a beluu me a odechelakl er a rumtok el mora derta er kid.

9. Mouchais er a uchul me ngkired el mo kerekikl aike el diak lebleketakl el orimel?

⁹ Diak el bleketakl el orimel. A Satan a dirrek el ousbech a “ulekbat.” (Efe. 6:11. BT) Molatk er a odam el Bob, el mlo niuing le ngmle kirel mora klou el botk. Ngdilu er a retoktang el kmo ngkmal diak lekengei el mo ousbech a rasech. Ngike el mlo omotk er ngii a kilengei er a ongtil. Me nguaisei, sel kesus er a uchei er a lebora botk e a toktang lomekoad a ringel a mlo omes er ngii er uriul er a lorael a telungalek er ngii el mo remei. Ngdilu er a Bob el kmo, te locha diak bo lousbech a rasech engdi te mo loia er bita er tir lomech er a bo lousbech er ngii. Ngika el toktang a locha ulemdasu el kmo a Bob a mo ngodechii a uldesuel sel bo lak lengar bita er ngii a telungalek er ngii. Engdi Bob a dimlak lemesim, e dilu el kmo a ngii di el tekoi el duubech me ngii a kmal diak el kengei el mo ousbech a rasech.

10. Ngera uchul me a uldesuir tirke el oltngakl a llechul a Dios a kengaol? (1 Korinth 3:19, 20)

¹⁰ Uldesuir tirke el oltngakl a llechul a Dios. A lsekum kede omes a tekoi el olab a uldesuir a redi chad, e kede locha mo otngakl a llechul a Jehovah. (Monguiu er a 1 Korinth 3:19, 20.) A “llomeserreng er tial beluulchad” a blechoel el oltirakl a ngelbesir a rechad. A rebebil Kristiano er a Perkamum me a Thiatira milechetakl er a uldasu lulebang a rechad er aika el beluu, el tir a mirruul a deleboes e mengull a bleob el chelid. A Jesus a milsa ika el teblo el ongdibel a mesisiich el omesmechokl le te kilengei a deleboes el omeruul. (Och. 2:14, 20) Chelecha el taem e kede dirrek el chelebangel orimel el mo kongei a mekngit el uldasu. Telungalek er kid me a rechad el dodengelterir a locha mo melasem el meruul er kid el mo omdasu el kmo ngkmal mesisiich a tekingel a Jehovah e dmu er kid el mo melemall. El ua tiang, te melekoi el kmo ngdiak a belkul a dolemolem el klikiid, me a llach er a Biblia tekoi er a ngar er a mong.

11. Chelecha el dolemolem el mesisiich el dechor, e ngera kired el mengeroid er kid er ngii?

¹¹ A lebebil e kede locha mo omdasu el kmo a ulekrael er a Jehovah diak el bleketakl. Ngsebeched el mekesuseu el mo “[engelakl] ra ikel ngara chedaol Llechukl.” (1 Ko. 4:6, BT) A remengeteklel a klechelid er a taem er a Jesus a mle chelsechusem er tia el klengit. Te uldak a llecherir er a Llach e rirellii el mo meringel er a rechad el olengesenges. (Mt. 23:4) A Jehovah meskid a bleketakl el ulekrael loeak a Tekingel me a cheldebechelel. Ngdiak a ungil luchul a dolechel a ulekrael lomeskid. (Osi. 3:5-7) Sei a uchul me ngdiak el soad el engelakl er aike el tekoi el llechukl er a Biblia me a lechub e doruul a llach el kirir a rekldemed er a klemerang el kirel aike el tekoi el diak longerechir a Biblia.

12. Ngmekera Satan a lousbech a “bechachau lomengeblad”?

¹² Cheleblad. A Satan ousbech a “bechachau lomengeblad” me a “uldedelid el cheldecheduch rar chad” el mengeuid e meleakl er a rechad. (Kol. 2:8, BT) Sera taem er a rekot el Kristiano e aika mle uldimukl er a osisechakl el mlengai er a di uldesuir a rechad, osisecheklir a Rechijudea el dimlak el lemengai a uchetemel er a Bades, me a osisechakl el kmo a Rekristiano kirir el oltirakl er a Llach er a Moses. Aika el  tekoi a mle cheleblad le ngngiluu osengir a rechad el mo cheroid er ngike el mera el Uchul a llomeserreng el Jehovah. Chelecha el taem e a Satan ousbech a media me aika el social network el omerk a diak el klemerang el tekoi el kmo ngkabelment me a lechub e ngta er a mesisiich el cheldebechel a uchul a meklou el tekoi el mla duubech er a beluulechad me a dirrek el blulak el chais el lolsiich a rechad er a balatiks. Tia dulsang er a leduubech a COVID-19 pandemic. e A Resioning er a Jehovah el ulerrenges a ulekrael el lultobed a cheldebechel a mlochib er a sebekreng el blo lechebangel a rebetok le tir lulerrenges aika el blulak.​—Mt. 24:45.

13. Ngera uchul me ngkired el mo kerekikl me lak a mo mengesang er kid?

¹³ Tekoi el mengesang er kid. Ngkired el melemolem el ulturk osenged er aike el “lmuut el meklou a ultutelel el tekoi.” (Fil. 1:9, 10, NW) Sel lengar ngii a tekoi el mengesang er kid, e kede mengoit er a klou el taem me a klisiich el mle sebechel el mora ike el tekoi el mo uchul a klungioled. A tekoi el doruul er a bek el sils el ua blengur, omelim, omilil, me a ureor a sebechel mo mengesang er kid a lsekum e kede mechei me ngmo kot el meklou a ultutelel el tekoi er a klengar er kid. (Lk. 21:34, 35) Me a lmuut kung, a bek el sils e kede orrenges e menguiu el kirel a mondai me a klautok er a kabelment. Ngkired el mo kerekikl me aikang a diak bo longesang er kid. Aika sebechel rullid el mo omekbitang er a chelsel a rengud. A Satan ousbech aika el rokui el mla obasech er tia el parakurab el moktek er ngii a mengitechut er a urunguled el mo meruul a llemalt. Me dosaod a rolel e ngsebeched lotngakl a urerel a Diabelong e melemolem el mesisiich.

14. Ngera ta el tekoi el sebechel ngosukid el mo melemolem el mesisiich el dechor el kirel a Jehovah?

¹⁴ Molatk er a telbilel a rengum me a techelbem. Kau a mirruul aika el tekoi le ngmle soam el dechor el kirel a Jehovah. Molatk er a ngilsukau el mo ulterekokl a rengum el kmo ke mla metik er a klemerang. Ke mlo medengelii a Jehovah e mlo mengull er ngii e betik a rengum er ngii el Demam el ngar er a eanged. Ngmlo er  ngii a klaumerang er kau e mlo soam lobult. Ke mlo stob el meruul a tekoi louketui a Jehovah e mlo kiei loltirakl er a soal. Ngmlo ungil a rengum er a bo momelechesiu er a klausubes er a Dios. (Psa. 32:1, 2) Ke mlo ngar er a miting er a Rekristiano e ulemuchel louchais er a rechad a tekoi el mosuub. Chelecha el omtelecholb el Kristiano, e ke merael er a rael el mora klengar, e mla rullii er a rengum el mo melemolem el merael er ngii.​—Mt. 7:13, 14.

15. Ngera uchul me nguchul a klungioled a dosuub e dolebedebek?

¹⁵ Mosuub er a Tekingel a Dios e molebedebek. Ngdi ua kerrekar el sebechel melemolem el dechor a lsekum e ngdmolech a risel, me ngdirrek el sebeched el melemolem el mesisiich el dechor a lsekum a klaumerang er kid ourais er a Tekingel a Dios e dmolech a risel. Sel lemukeroul a kerrekar, e ngmo meklou e oberk a risel. Sel dosuub e dolebedebek, e ngsebeched el smisichii a klaumerang er kid me ngii a lmuut el mo ulterekokl a rengud el kmo a rolel a Dios a kot lungil. (Kol. 2:6, 7, BT) Molatk er a rolel a ulekrael me a ulekerreuil a Jehovah ngilsuterir a remesiungel er a ngar er a mong. El ua tiang, a Esekiel a mle kerekikl lomes er a anghel el meluk er a klungel a templo el lilsang er a ues. Tia el ues a silsichii a Esekiel e ouchais er kid er a rolel e ngsebeched el oltaut a llechul a Jehovah el kirel a bliochel el omengull. f (Ese. 40:1-4; 43:10-12) Ngdirrek el mo uchul a klungioled sel dongoit a taem el mesuub e melebedebek a dmolech el tekoi er a Tekingel a Dios.

16. Ngmilekera rengul a Bob el mle mesisiich e ngosuir? (Psalm 112:7)

¹⁶ Msisichii a rengum. King David a millekoi el kmo ngkmal diak bo loridii a bltkil a rengul el mora Jehovah er a longitakl el kmo: “A renguk a ultebechel e Dios.” (Psa. 57:7) Kid me ngdirrek el sebechel mo mesisiich a rengud, el mui loumerang er a Jehovah. (Monguiu er a Psalm 112:7.) Molatk er a rolel e tia ngilsuir a Bob el dulsaod er ngii er a uchei. Sera louchais er ngii el kmo a rasech a mo medechel lomech er a bo lousbech er ngii, e ngdi mle mereched el dmu el kmo a lsekum e ngar ngii a techall el bo lebsang a rasech, e ngtuobed er tia el osbitar. A uriul e a Bob a dilu el kmo, “Ngkmal dimlak kuumededenger me a lechub e kbekikl.”

17. Ngera sebeched el suub er a experience er a Bob? (Dirrek el momes er a siasing.)

 ¹⁷ A Bob a mle mesisiich a rengul le ngii el ngileltii el mo mesisiich el dechor er a kmal uchei er a lebo er a osbitar. A kot, e ngmle soal odeuir a rengul a Jehovah. Ongerung, ngmle kerekikl mesuub er a Biblia me aika el babilenged el mengai er a Biblia el mesaod er a cheledolel a klengar me a rasech. Ongedei, ngmle ulterekokl a rengul el kmo a loltirakl a ulekrael e ngmo mukngeltengat. Kid me ngsebechel mo mesisiich a rengud sel bo dechebangel a ngii di el bedengel a ringel.

18. Ngmekera kerebil a Barak e osisecheklid el mo oumerang el ulsirs er a Jehovah? (Momes er a siasing er a medal tia el babier.)

¹⁸ Moumerang el ulsirs er a Jehovah. Molatk er a rolel a Barak a mlo ungilbesul le ngii el uluumerang el ulsirs a ulekrael er a Jehovah. Alta ngdimlak a ta el omekreakl me a biskang er a beluu, a Jehovah dilu er ngii me bo loumekemad er a Sisera el mengeteklel a resoldau er a Kanaan me a resoldau er ngii, el tir a mle ungil kltmokl el kirel a mekemad. (Men. 5:8) A profet el Debora dilu er a Barak me lemetengel er a rois el mora oberberk el chutem el mo oumekemad er a Sisera me a 900 el kuruma er ngii. Alta ngmo ngmeringel er tir oumekemad er tirka el ngar er a kuruma er a oberberk el chutem, engdi Barak a di ullengesenges. Sera lorael el me metengel er a Rois Tabor e a Jehovah ultengelii a klou el chull. Aika el kuruma er a Sisera mle kosio, me a Jehovah milsa Barak a klisiich. (Men. 4:1-7, 10, 13-16) Ngdi osisiu, a Jehovah sebechel meskid a klisiich a lsekum kede mo oumerang el ulsirs er ngii me a ulekrael lomeskid loeak a cheldebechelel.​—Dut. 31:6.

19. Ngera uchul me ngsoam el rullii er a rengum el mo melemolem el mesisiich el dechor?

¹⁹ Chelechang el dekiei er a chelsel tia el blekeradel er chelechang, e ngkired el melemolem el oureor el meringel me demesisiich el dechor. (1 Ti. 6:11, 12; 2 Pe. 3:17) Me derellii a rengud me lak bo demesim er odechelakl, diak el bleketakl el orimel, uldesuir tirke el oltngakl a llechul a Dios, cheleblad, me aike el sebechel mo mengesang er kid. (Efe. 4:14) E bai bo demesisiich el dechor e mesisiich a bltkil a rengud el mora Jehovah, e diak demesim er a otirekled er a llechul. Osisiu el taem e bo doba tabesul uldasu. Ongingil suobel e kede mo mesaod er a rolel a Jehovah me a Jesus a cherrungel el kerebai er a tabesul uldasu.