1. Ngera uchul me ngolechotel a llomeserreng a dongetmokl er kid el kirel a tellemall?

 SEL deketmeklid el kirel a tekoi e ngsebechel el osobel a klengar er kid. El ua tiang, sel leduubech a tellemall er a beluu e tirke el chad el kiltmeklterir el kirel, a klou a techellir el suobel er tirke el dimlak. A cheldebechel er a Europe el olengeseu er a rechad a kmo: “A ungil omengetmeklel a tekoi a kmal klou a lerellii.”

2. Ngera uchul me ngkired el mengetmokl er kid el kirel a kloul ringel? (Mateus 24:44)

² Ngkmal di mo mereched a “kloul ringel.” (Mt. 24:21, BT) Engdi a kloul ringel a diak el ua bek el tellemall, el ngii a di diak dodengei e ngkiul el duubech. Bekord el 2,000 el rak er a mla me mong, e a Jesus a ulemeklatk er a rechedal el kmo leketmeklterir el kirel tia el sils. (Monguiu er a Mateus 24:44.) A lsekum e kede kutmeklid el kirel e ngmo beot er kid outekangel er tia el kmal mo meringel el taem, e ngosuterir a rebebil el meruul el uaisei.​—Lk. 21:36.

3. Ngmekera duch er kid el outekangel, klechubechub, me a bltikerreng e ngosukid el mo kltmokl el kirel a kloul ringel?

³ Molatk edei el blekeradel el sebechel ngosukid el mo kltmokl el kirel a kloul ringel. Kede mo mekerang a lsekum te mo olengit er kid el omerk er a meringel el klumech er a kerrekeriil me a rediak loumerang a mo omtok er kid? (Och. 16:21) Kede mo ousbech er a duch er kid el outekangel el mo olengesenges er a Jehovah, e oumerang el kmo ngmo omekerreu er kid. Kede mo mekerang a lsekum a rudam er kid a mo oriid a kloklir? (Hab. 3:17, 18) Kede mo ousbech er a klechubechub el mo omesterir aike el lousbech. Kede mo mekerang a lsekum odelecheklel a cheldellel aika el renged a uchul me ngkired el mo kiei el kmeed er a rebetok el odam me a odos er kid el telkib el taem? (Ese. 38:10-12) Kede mo ousbech er a mesisiich el bltikerreng el mo er tir el ngosukid el outekangel er tia el kmal mo meringel el taem.

4. Ngmekera Biblia ochotii el kmo ngkired el melemolem lomekeroul er a duch er kid el outekangel, klechubechub, me a bltikerreng?

 ⁴ A Tekingel a Dios a melisiich er kid el mo melemolem lomekeroul er a duch er kid el outekangel, klechubechub, me a bltikerreng. A Lukas 21:19 a kmo: “A le meduch a rengmiu el outekangel, e kom mo osobel a klengar er kemiu.” Kolose 3:12 (BT) a kmo: “Moubail ra reng ra klechubechub.” E a 1 Thesalonika 4:9, 10 a kmo: “Dios a mla osisecheklemiu el mo kaubltikerreng. . . . Ngdi ki lmuut el mengelechel er kemiu e rudam el kmo, mluut el mengal mo ua isei.” Aika el rokui el bades a lulluches el mora redisaiplo el tir a mla outekangel, e mla ochotii a klechubechub me a bltikerreng. Engdi ngmle kirir el melemolem el omekeroul aika el blekeradel. Kid me ngdirrek el kired el meruul el uaisei. Ngmo ngosukid a dosaod er a rolel e a rekot el Kristiano ullecholt aika el blekeradel. A uriul e kede mo mesaod er a rolel e ngsebeched loukerebai er tirka el disaiplo e ochotii el kmo kede kltmokl el kirel a kloul ringel.

5. Te milekera rekot el Kristiano e outekangel a ringel el blo lechebangel?

⁵ A Rekristiano er a taem er a Paulus a mle kirir el outekangel. (Heb. 10:36) Tirka dimlak di lechebangel a mondai el lechelebangel a rechad er a taem er tir, te dirrek el mle chelebangel a lmuut el bebil. A rebetok a mlodechelakl er a remengeteklel a klechelid er a Rechijudea me a remengedereder el chad er a Rom, mo lmuut er a rechedal a telungalek er tir. (Mt. 10:21) A lebebil e ngmle kirir el oldechelakl a klsuul el osisechakl el mle soiseb er a ongdibel. (Rel. 20:29, 30) Me nguaisei engdi tirka el Kristiano uluutekangel. (Och. 2:3, BT) Te milekera e outekangel? Te mle kerekikl el melatk a kerebai er tirke el uluutekangel el ngar er a Biblia, el ua Job. (Jak. 5:10, 11) E milluluuch lolengit a klisiich. (Rel. 4:29-31) E mle ulturk osengir er a klungiaol lebo el ngai a lsekum te outekangel.​—Rel. 5:41.

6. Ngera ke suubii er a tekoi el lurruul er ngii a Merita me lsebechel el outekangel a ultok?

⁶ Kid me ngsebeched el outekangel a lsekum kede mo blechoel el mesuub e melebedebek a kerebai er tirke el uluutekangel el ngar er a Biblia me aika el babilenged. A Merita el odos er a Albania a mirruul er tiang a uchul me ngmlo sebechel el outekangel a meringel ultok er a telungalek er ngii. Ngkmo: “Ngkmal rirtechii a renguk er a kusuub er a cheldecheduch er a Biblia el kirel a Job. Ngika kmal mlo chuarm er a betok. E alta ngdimlak lodengei el kmo ngtecha mle uchul aika el ringel engdi ngdilu el kmo: ‘Ngmo lmuut er a kodellek me ngak a di melemolem er a blakerreng er ngak!’ (Job 27:5, NW) Ak millatk el kmo a ringel el blo lechebangel a mle lmuut el meringel er a ringel el kchelebangel er ngii. Me ngii a dimlak lodengei el kmo aika el ringel ngmla er techang, engdi ngak a medengei.”

7. Alta ngdiak dechelebangel er a meringel el omelsemai er chelechang, engdi ngera kired el mesuub el mo meruul er ngii?

⁷ Ngdirrek el sebeched el smisichii a rengud el mo outekangel loeak a bo deblechoel louchais er a Jehovah aike el tekoi el suebek a rengud el kirel. (Fil. 4:6; 1 Th. 5:17) Nglocha diak mchelebangel a meringel omelsemai er chelechang. Me nguaisei engdi kau, kosiik er a ulekrael er a Jehovah sel bo lak el soam a tekoi, rrau a rengum, me a lechub sel lak modengei el kmo ke mekerang? A lsekum e ngmo blekerdelem er chelechang el mora Jehovah el kirel a mekekerei el tekoi el bo mchebangel er a bek el sils, e ke mo meruul el uaisei sel bo mchebangel a meklou el tekoi er a ngar medad. Ngmo ulterekokl a rengum el kmo ngii a medengelii sel lungil taem me a rolel e ngmo ngngosukau.​—Psa. 27:1, 3.

8. Ngmekera kerebai er a Mira e ochotii el kmo a doutekangel a mondai er chelechang e ngmo ngosukid er aike el mondai el mo duubech er a ngar medad? (Jakobus 1:2-4) (Dirrek el momes er a siasing.)

 ⁸ Kede mo outekangel er a kloul ringel er a ngar medad a lsekum kede outekangel a omelsemai er chelechang. (Rom 5:3) Ngera uchul me kede melekoi el uaisei? Rebetok er a rudam a mla metik el kmo a derta el omelsemai er a klaumerang er tir el luluutekangel er ngii a ngilsuterir el outekangel er a omelsemai el mlo oeak uriul er ngii. Sel ta el outekangel er a omelsemai loeak a ngelsuil a Jehovah, e ngsmisichii a klaumerang er tir el kmo, a Jehovah soal e kltmokl el mo ngosuterir. E tia el klaumerang a ngilsuterir el outekangel er sel next el omelsemai. (Monguiu er a Jakobus 1:2-4.) A Mira el pioneer er a Albania mla metik el kmo a tekoi luluutekangel er a ngar er a mong a mla ngosuir el melemolem el outekangel. Ngdi bleketakl el dmu el kmo, a lebebil e ngmo omdasu el kmo ngdi ngii el tang a betok a mondai er ngii. Engdi ngmlo melatk aike el rokui el bla leruul a Jehovah el kirel er aika el mereko el 20 el rak, e di ngii el melekoi er ngii el kmo: ‘Molemolem loba blakerreng. Lak bechei aika el betok el rak me a betok el mondai el bla bo mchebangel e mo mesisiich er ngii loeak a ngelsuil a Jehovah me bo lak a belkul.’ Kau me ngdirrek el sebechem el melatk er a rolel e a Jehovah mla ngosukau el outekangel. Bo lulterekokl a rengum el kmo ngomtab aike el bek el taem el moutekangel a omelsemai e mo omekngeltengat er kau. (Mt. 5:10-12) Me sel lomuchel a kloul ringel, e ke mla suubii el mo outekangel e mla smisichii a rengum el mo melemolem el outekangel.

9. Ngmilekera ongdibel er a Antiok er a Siria e ochotii a klechubechub?

⁹ Molatk a dilubech er sel taem el Rekristiano er a Judea mlo chobengelii a meringel el bosech er a kall. A ongdibel er a Antiok er a Siria er a lerenges el kirel tia el bosech e te locha kmal mlo chubteterir a rudam er tir el ngar er a Judea. Me te mirruul aike el sebechir el mo olengeseu er tir. Me te “tilbir el kmo te mo remuul a uldureklir el oltirakl a ikel sebechel a derta er tir e odurokl el mo olengeseu er tirkel oumerang el kiliei er a Judea.” (Rel. 11:27-30) Alta rudam el mle chelebangel er a bosech er a kall a kiliei el cheroid me nguaisei a Rekristiano ulsiik a rolel e mo olengeseu er tir.​—1 Jn. 3:17, 18.

10. Ngoeak a ngera el rolel e ngsebeched lochotii a klechubechub sel leduubech a telemellel a beluu el mora rekldemed er a klemerang? (Dirrek el momes er a siasing.)

¹⁰ Kid me ngdirrek el sebeched lochotii a klechubechub er chelecha el taem sel bo dodengei el kmo a rekldemed er a klemerang a mla duubech a tellemall er a belurir. Kede locha di mereched el mo osiik a rolel e kede olengeseu, el ua oker er a remechuodel el kmo ngsebeched el olengeseu er a ureor, mo melenget el mora ureor el meketmokl er a beluulechad el rokir, me a lechub e kede meluluuch el kirir tirka el chelebangel a telemellel a beluu. b (Osi. 17:17) El ua tiang, sera 2020 e te kiltmokl a 950 el committee el kirel a tellemall er a beluu, el meliuekl er a beluulechad el rokir el mo olengeseu er tirke el lousbech a ngeso er a temel a COVID-19 pandemic. Kede kmal oba omereng el saul el kirir a rudam me a rudos el mle teloi er tia el ureor el olengeseu. Klechubechub er tir el mora rudam me a rudos er tir a uchul me te mla remous a betok el klalo lousbech, olengeseu er tir el melemolem el mesiou er a Jehovah, e ngar er a bebil el blekeradel e te riruul a telemellel a blai me a blil omengull me a lechub te milekedechor a beches.​—Momekesiu er a 2 Korinth 8:1-4.

11. Ngmekera omeruul lolechotel a klechubechub e mengebkall er a Demad el ngar er a eanged?

 ¹¹ Sel dolecholt er a klechubechub er a uriul er a leduubech a tellemall, e a rechad a mo omtab omerelled. El ua tiang, sera 2019 e a Hurricane Dorian a tilemellii a Blil a Ongdibel er a Bahamas. A rudam er kid er a lomekedechor er a blil ongdibel e te uleker er a contractor el diak el Sioning el kmo ngtela cheral a loruul a bebil ureor. Ngika dilu er tir el kmo: “Ngsoak el donate . . . a mesil, ureor me a klekedall. . . . Ngsoak el meruul er tiang el kirel a cheldebechelliu. Ngkmal rutechii a renguk omerelliu el mora resechelimiu.” A oumesingd er a rechad er tia el beluulechad a diak lodengelii a Jehovah. Engdi rebetok er tir omtab er a Resioning er a Jehovah. Ngmera el ileakl el techall sel dodengei el kmo a omerelled el lolecholt er a klechubechub a sebechel lolechau er a rechad el mei er a Jehovah el “meteet ra klechubechub”!​—Efe. 2:4, BT.

12. Ngmekera debekurulii a klechubechub er chelechang e deketmeklid el kirel a kloul ringel? (Ocholt 13:16, 17)

¹² Ngera uchul me ngkired el mo olecholt er a klechubechub er a temel a kloul ringel? A Biblia melekoi el kmo, tirke el diak lolab el mora ika el kabelment a mo chobangel a omelsemai er chelechang me a temel a kloul ringel. (Monguiu er a Ocholt 13:16, 17.) Rudam me a rudos er kid a locha mo ousbech a ngeso el kirel aike el lousbech er a bek el sils. A King er kid el Jesus Kristus sel lemei el mo oltaut er a kerrekerilel, ngkmal soad a lebetik er kid lolecholt er a klechubechub, e longemedaol er kid el mo ‘nguu [a] renged.’​—Mt. 25:34-40.

13. Ngua losaod a Rom 15:7, te milekera rekot el Kristiano e smisichii a bltikerreng er tir?

¹³ A bltikerreng a mle olengchelir a rekot el Kristiano. Engdi tirka ngmle beot er tir olecholt er a bltikerreng? Molatk er a klekakerous er a rechad er a ongdibel er a Rom. Tirka dimlak di lechad er a Judea el mlukeroul el oltirakl er a Llach er a Moses, ngdirrek el mle uldimukl er tir a rechad er a renged el kmal mle ngodech a ulekurulir. A rebebil er a Rekristiano locha mle sibai me a rebebil a mle mimokl e mla er ngii a sibai er tir. Te mo mesisiich aika el klekakerous er a delongelir e smisichii a bltikerreng er tir? A apostol Paulus a milengelechel er tir el mo ‘kangingai.’ (Monguiu er a Rom 15:7.) Ngera mle belkul a tekingel? A tekoi el moiuid el “kangingai” a belkul a kmo kede nguu me a lechub e kede omtechakl er a chad, el mei er a blid me a lechub e ngme teloi er a delongelir a resechelid. El ua tiang, a apostol Paulus a dilu er a Filemon me loutkeu er a Onesimus el sibai el chiliis el kmo: “[Mnguu] el di ua cho mngikak.” (Flm. 17) Me a Prisila me a Akuila ulemetechakl er a Apolos el dimlak lodengei a betok el kirel a Klekristiano el uai tir, me “te ngiluu” el mo obengterir. (Rel. 18:26) Ngdimlak lebechei aika el klekakerous er tir me bo luchul a klekakeakl er a delongelir, te bai mle kangingai.

14. Ngmilekera Anna me a bechil e olecholt er a bltikerreng?

¹⁴ Kid me ngdirrek el sebeched lochotii a bltikerreng el mora rudam me a rudos er kid loeak sel dengititerir el me sechelid. Tia blechoel rulleterir el mo olecholt a bltikerreng el mei er kid. (2 Ko. 6:11-13) Molatk er a Anna me a bechil. Kedeb el taem er uriul er a lebora beches el assignment er tir el missionari er a beluu er a West Africa, e ngmlo er ngii a COVID-19 pandemic. Me ngdimlak el sebechir el mo obengterir a rechad er a ongdibel. Ngmekera bo lolecholt er a bltikerreng? Te uluusbech a videoconferencing el mo medengelterir a rudam me a rudos er tir e ouchais er tir el kmo ngmle sorir el mo ungil medengelterir. Tia kmal rirutech a rengrir a retelungalek er a ongdibel me te mle blechoel el omekedong e message er tir. Ngera uchul me te mirruul el uaisei? A Anna kmo, “Ngkmal diak kubes aike el lolechotel a bltikerreng el mei er ngak me a telungalek er ngak er a ungil taem me a mekngit el  taem er a klengar er kemam. Ngodbechak el mo olecholt er a bltikerreng.”

15. Ngera kede suubii er a kerebil a Vanessa el kirel a bo lebetik a rengud er a rokui el odam me a odos er kid? (Dirrek el momes er a siasing.)

¹⁵ A rebetok er kid a chedal a ongdibel el rudam me a rudos er ngii a kakerous a siukang er tir e kakerous a blekerdelir. Ngsebeched el melisiich er a bltkil a rengud el mo er tir loeak a domes aike el ungil blekerdelir. Odos el Vanessa el mesiou el ngar er a New Zealand a mle meringel er ngii obengterir a rebebil el chedal a ongdibel er ngii. Engdi ngdimlak longeroid er ngii er tirke el lechecherd a rengul er tir, e ngbai milengoit er a klou el taem el obengterir. Tia ngilsuir el mo mes aike el luchul me a Jehovah betik a rengul er tir. Ngkmo: “A bechik er a lebo el circuit overseer, e aki blechoel lobengterir a rebetok el odam me a odos el kakerous a blekerdelir, e beot er ngak obengterir. Ngkmal soak tia el klekakerous er a delongeled. A Jehovah dirrek el kmal soal le ngmla mengurs er kid el rokui el kmal kakerous el me dmak.” Sel desuubii el mo omes er a rechad el ua lomes er tir a Jehovah, e kede ochotii el kmo ngbetik a rengud er tir.​—2 Ko. 8:24.

16. Ngera uchul me a bltikerreng a kmal mo klou a ultutelel er a temel a kloul ringel? (Dirrek el momes er a siasing.)

¹⁶ A bltikerreng a kmal mo klou a ultutelel er a temel a kloul ringel. Sel leduubech a kloul ringel, e kede mo metik osebechakl er ker? Molatk aike el ledilu Jehovah el mora rechedal er a bo loldechelakl er a beluu er a Babilon: “Bo msiseb er a re keblimiu e mchesimer a chesmeriu, e mtelkib el berrotel el dimerkmo le chib a ngesechel a rengul a RUBAK.” (Isa. 26:20) Kede locha mo oltirakl aika el osisiu el ulekrael er a temel a kloul ringel. “Re keblimiu” a locha mesaod el kirel a ongdibel er kid. Temel a kloul ringel e kede mo nguu osebechakl el bla letibir a Jehovah sel bo dolemolem el tang kid me a rekldemed er a klemerang. Me ngkmal klou a ultutelel a demeringel loureor er chelechang el mo diak di doutekangel a blekerdelir a rudam me a rudos er kid, ngdirrek el kired el mo betik a rengud er tir. A osebeled a locha mo ultuil er ngii!

17. A lsekum kede kutmeklid er chelechang, e ngera sebeched el mo meruul er ngii er a temel a kloul ringel?

¹⁷ “A kloul sils er a RUBAK” a kmal mo uchul a meringel el taem el kirir a rokui el chad. (Sef. 1:14, 15) A rechedal a Dios me te dirrek el mo chuarm. Engdi a dongetmokl er kid er chelechang el kirel, e ngmo sebeched el melemolem loba chelellakl el reng e ngosuterir a rebebil. Kede mo outekangel a ngii di el omelsemai el bo dechebangel. A rekldemed er a klemerang sel bo lechuarm e kede mo ngosuterir loeak a dolecholt er a klechubechub e debesterir aike el lousbech. Me kid a mo melemolem el kmeed er a rudam me a rudos er kid le kede mla suubii el moba bltikerreng el mo er tir. Seikid a Jehovah mo omekngeltengat er kid er a klengar el mo cherechar er a chelsel a beluulechad el tellemall me a ringel a di mo diak a chad el melatk.​—Isa. 65:17.