1. Ngera el klemerang omsiluub er a omuchel el mesuub er a Biblia?

 KAU, ke dirk medengei aike el tekoi el msiluub er a omomuchel el mesuub er a Biblia? Nglocha kmal mlo mechas a rengum er a omsubii el kmo a Dios a ngar ngii a ngklel. E locha kmal mlo ungil er a rengum er a omsubii el kmo a Dios a diak lomekcharm er a rechad er a beluu er a ngau. E kmal mlo ungil a rengum el suubii el kmo ngsebechem el lmuut el meseterir a rebetik er a rengum el mla mad, e mo kiei lobengterir er a baradis er tia el chutem.

2. Ngera el tekoi a bla molengeriakl er ngii, luldimukl er aike el klemerang er a Biblia el bla msuub? (Efesus 5:1, 2)

² Sera omsuub a lmuut el betok er a Tekingel a Dios e a bltkil a rengum el mora Jehovah mlukeroul. Tia el bltikerreng a uldbechau el mo oltaut aike el mosuub. Ke mirruul a ungil omelilt lotirakl omellach er a Biblia. Ke siluubii el mo omdasu e meruul a melemalt e le ngmle soam el odeuir a rengul a Dios. Ngdi ua ngalek el mesuub er a chad er a blil, kau a uluukerebai er a Demam el ngar er a eanged.​—Monguiu er a Efesus 5:1, 2.

3. Ngera el ker a sebeched el di kid el oker?

³ Ngsebeched el di kid el oker: ‘A bltkil a renguk el mora Jehovah nglmuut el mesisiich er sera kkot el mo Kristiano? Sera kmetecholb el mei, e a rolel a kumdasu e kuruul a tekoi ngngua Jehovah, tokubets a rolel a kulecholt er a bltikerreng el mora rudam me a rudos er ngak?’ A lsekum a “bltkil a rengum . . . a dikea le ua iser a kot el uchul” e lak bo lemechitechut a rengum. A osisiu el tekoi a dilubech el mora rekot el Kristiano. A Jesus a dimlak lotngeklterir, me ngii a diak bo loltngakl er kid. (Och. 2:4, 7) Ngmedengei el kmo ngsebeched el lmuut el  mo oba tia el bltikerreng el blo domelechesiu er ngii er a dekot el suubii a klemerang.

4. Ngera kede mo mesaod er tia el suobel?

⁴ Tia el suobel a mo mesaod a rolel e ngsebeched el melemolem el omekeroul er a bltikerreng er kid el mora Jehovah me a rechad. A uriul e kede mo mesaod a klengeltengat el bo dengai kid me a rechad sel desisichii a bltikerreng er kid.

5-6. Ngera el omelsemai a ble lechebangel a Paulus el ngar er a omesiungel, engdi ngera uldbechii el mo melemolem el mesiou er a Jehovah?

⁵ A apostol Paulus a mle dmeu a rengul el mesiou er a Jehovah alta ngmle kirel outekangel a bebil omelsemai. Ngika mle kirel ngar er a mekemanget el omerael, el ngii a dimlak el beot el tekoi er seikid el taem. Ngar er a bebil el omerollel e ngmla er ngii a “ringel er a imui” me a “ringel er a re merechorech.” Ngdirrek el mla er ngii aike el taem el rumtok er ngii a chillebedii. (2 Ko. 11:23-27) Me a rudam er a Paulus el Kristiano a dimlak leblechoel el oba omereng el saul el kirel aike el lurruul el olengeseu er tir.​—2 Ko. 10:10; Fil. 4:15, BT.

⁶ Ngera ngilsuir a Paulus el melemolem er a omesiungel el mora Jehovah? A Paulus a siluub a betok el blekerdelel a Jehovah er a Biblia me a dirrek el experience er ngii. A Paulus a mlo ulterekokl a rengul el kmo a Jehovah el Dios a betik a rengul er ngii. (Rom 8:38, 39; Efe. 2:4, 5) E ngii a kmal mlo betik a rengul er a Jehovah. Paulus ulechotii a bltikerreng er ngii el mora Jehovah loeak a ‘losiou er a re chedal.’​—Heb. 6:10.

7. Ngera ta er a rolel e ngsebeched el mukeroul el ngar er a bltikerreng er kid el mora Jehovah?

⁷ Ngsebeched el mukeroul er a bltkil a rengud el mora Dios loeak a deblak a rengud el mesuub er a Tekingel. Sel monguiu er a Biblia e momtab er a rolel e ngosisecheklau el kirel a Jehovah. Di lekau el oker: ‘Ngmekera tia el cheldecheduch e ochotii el kmo a Jehovah betik a rengul er ngak? Ngera ngouchais el rullak el mo betik a renguk er a Jehovah?’

8. Ngmekera nglunguched e ngosukid el mukeroul er a bltikerreng er kid el mora Dios?

⁸ Lmuut el ta er a rolel e ngsebeched el mukeroul er a bltikerreng er kid el mora Jehovah, a sel doluluuch el mo er ngii er a bek el sils louchais er ngii aike el mera el ngar er a rengud. (Psa. 25:4, 5) E a Jehovah mo onger a nglunguched. (1 Jn. 3:21, 22) Khanh el odos er a Asia a kmo: “A uchelel e aike el tekoi el ksiluub el kirel a Jehovah uchul me ngmlo betik a renguk er ngii. Engdi ngliluut el mo dmolech er a kisa longer a nglunguchek. Tia rirellak el mo soak el meruul a tekoi el ngii odeuir a rengul.” b

9. Ngmilekera Timothy e ochotii el kmo ngulengeriakl er a rolel a lolecholt a bltikerreng?

⁹ Sesei el rak er uriul er a lebo el Kristiano a Paulus e ngmlo medengelii a kekerei el chad el ngklel a Timothy. A Timothy mle betik a rengul er a Jehovah me a rechad. A Paulus a dilu er a rechad er a Filipi el kmo: “Ngdiak a tal chad el ua ingii losisiu ngii ma renguk, el oba meral blakerreng el mo omekerreu er kemiu.” (Fil. 2:20, BT) A Paulus a dimlak el losaod er a duch er a Timothy el mengederoder a tekoi me a lechub ngoltobed a cheldecheduch, e ngbai milsa el kmo a Timothy a kmal mle betik a rengul er a rudam me a rudos er ngii. Aike el ongdibel el Timothy uleldingel a locha kmal lulemes el beduluchei el kirel a odngelel.​—1 Ko. 4:17.

10. Ngmilekera Anna me a bechil e ochotii el kmo ngbetik a rengrir er a rudam me a rudos er tir?

 ¹⁰ Kid me kede dirrek losiik a rolel e ngsebeched lolengeseu er a Rekristiano el odam me a odos er kid. (Heb. 13:16) Molatk er a Anna el dulsaod er a uleak uchei el suobel. Uriul er a ses el eolt e ngii me a bechil a mlo oldingel er a ta el telungalek el Sioning, e silubii el kmo a chedoel a blirir a miltemall me ngdiak a selilek el bilir. Anna kmo: “Aki ngilai a bilir e sililek, e tatam e iron. Denguu er kemam e ngkmal di kekerei el tekoi engdi kemam el mirruul er tiang a uchul me tirka kmal ungil sechelimam el me lmuut er chelecha el sils.” Bltkil a rengul a Anna me a bechil el mora rudam me a rudos a uldbecheterir el mo olengeseu.​—1 Jn. 3:17, 18.

11. (a) Ngera ngrullii el mora rechad sel dolecholt a bltikerreng el mo er tir? (b) A doltirakl er a Osisechakl 19:17, e ngngera ngdmu Jehovah sel dolecholt a bltikerreng? 

¹¹ Sel doruul a ungil e dolecholt a bltikerreng el mora rechad, e te mesa el kmo kede melasem el moba uldesuel a Jehovah me a rolel a loruul a tekoi. Alta ngdiak dodengei engdi te kmal oba omereng el saul kired. Khanh el dulsaod er ngii er a uchei, a kmal melatk er tirke el ngilsuir. Ngkmo: “Ak mera el oba omereng el saul el kirir tirke el odos lulebekak el mo oldingel. Te uleltak er ngak, mle invite er ngak el mo menga kmung ngerang lobengterir, e olekerd er ngak er a blik. Ak mtebengii er chelechang el kmo tia kmal mle meringel el ureor. E tir a mirruul loeak a bltikerreng.” Me nguaisei, engdi ngdiak el rokui el doruul a ungil mo er tir a mo mereng a suled. A Khanh a mesaod el kirir tirke el ullengeseu er ngii el kmo: “Ngkmal soak el mereng a sulir el kirel a ungil omerellir el mei er ngak, engdi ngdiak kudengei el kmo te kiei er ker. Me nguaisei a Jehovah medengei, me ak meluluuch el kmo ngmo mereng a sulir el kirek.” Ngmera el klemerang a tekingel a Khanh. A Jehovah omes  aike el ungil doruul el mora rechad el mo lmuut er aike el kmal mekekerei. Ngomes el kmal mekreos e belsel, me ngmo mtechei a suled.​—Monguiu er a Osisechakl 19:17.

12. Ngmekera rudam e sebechir lolecholt a bltikerreng er tir el mora ongdibel? (Dirrek el momes a siasing.)

¹² A lsekum e ke odam, e ngmekera sebechem lolecholt a bltikerreng el mora rechad e osiik a rolel a olengeseu er tir? A kekerei el odam el Jordan uleker er a ta er a remechuodel er a rolel e ngsebechel meruul a lmuut el betok lolengeseu er a ongdibel. Ngika el mechuodel a chilat er ngii er a rolel e ngmla olengeriakl e milsang a bebil ulekrael er a rolel e ngsebechel el meruul a lmuut el betok. El ua tiang, ngdilu er a Jordan el kmo ngsebechel mereched el mora Blil a Ongdibel e outkeu er a rechad, onger er a miting, mo blechoel loldingel lobengkel a field service group er ngii, e mo osiik a rolel e ngsebechel mesterir a rechad a ngeso lousbech. A Jordan er a loltaut aika el tekingel odam e ngdimlak di lesuub a beches el tekoi ngdirrek el mlukeroul er a bltikerreng er ngii el mora rudam me a rudos er ngii. A Jordan a silubii el kmo a odam a diak lomuchel lolengeseu er a rechad sel lebo el ministerial servant e ngbai melemolem el olengeseu er tir.​—1 Ti. 3:8-10, 13.

13. Ngmilekera bltikerreng e odbechii a odam el Christian el mo sebechel el lmuut el mesiou el ta er a remechuodel?

¹³ Engdi ngmekera lsekum e ngmla mo diak mosiou el ministerial servant me a lechub e ngta er a remechuodel? A Jehovah diak lobes a urerem me a bltikerreng el mulebang el meruul. (1 Ko. 15:58) Ngdirrek el omes er a bltikerreng el molemolem el olecholt er ngii. A odam el Christian a mlo mekngit a rengul er a bo lak el ta er a remechuodel. Engdi ngkmo: “Ak tilbir el mo meruul aike el rokui el sebechek el meruul el mesiou er a Jehovah, a lengar ngii a ileakl el ngerechelek me a lak.”  Cherengel a taem e ngliluut el metutk el mo ta er a remechuodel. Ngdi bleketakl el melekoi el kmo: “Ngkora mle suebek a renguk el lmuut el mo mesiou er tia el rolel. Engdi ak mlo melatk el kmo a lsekum ngoeak a klechubechub er a Jehovah e ngmla kongei er ngak el lmuut el mo ta er a remechuodel, e ak mo meruul er ngii el bltkil a renguk el mo er ngii me a rudam me a rudos er ngak a uchul.”

14. Ngera ke suub er a tekingel a odos er a beluu er a Georgia?

¹⁴ A remesiungel a Jehovah me te dirrek el olecholt er a bltikerreng el mora rengar bita er tir. (Mt. 22:37-39) El ua tiang, a Elena el odos er a beluu er a Georgia kmo: “A uchelel e a kulemerk er a klumech el bltkil a renguk el mora Jehovah uchul. Engdi sera lemukeroul a bltkil a renguk el mora Demak el ngar er a eanged, me ngii a mlukeroul a bltkil a renguk el mora rechad. Ak mlo melasem el melatk el kmo nglocha ngera mondai el lechebangel me a ngera nglocha sorir el mesaod. Cherengel a taem el di kullatk er tir el uaisei, me ngii a rirellak el soak el mo olengeseu er tir.”​—Rom 10:13-15.

15-16. Ngua deues er a siasing, ngera el klengeltengat a mo er tirke el olecholt a bltikerreng el mora rechad?

¹⁵ Ngdiak di bo luchul a klungiolir a rudam sel dolecholt a bltikerreng el mo er tir. Uriul er a ledubech a COVID-19 pandemic, e a odam el Paolo me a bechil a ullengeseu er a remechudelang el odos el mo meduch lousbech a electronic device er tir el omerk er a klumech. A ta el odos el kmal mle meringel er ngii a mo  meduch el ousbech er a device er ngii a mlo sebechel suubii. Me ngmle sebechel invite er a rechedal el mora Chedaol Belsoil. A re okolem er tir a mlo sebechir el mora Chedaol Belsoil loeak a videoconference! Me a odos me a rokui el chedal a ngilai a klungiolir er a ngelsuil a Paolo me a bechil. Uriul e a odos a milluches el mora Paolo el kmo: “Ke mera el mesulang lolisechakl er a remechudelang er a ongdibel. Ngkmal diak kubes er a ulekerreuil a Jehovah el mei er kemam me a meringel el urerem.”

¹⁶ Chouaika el experience ulsisecheklii a Paolo er a klou a ultutelel el tekoi. Ngmluklatk el kmo a bltikerreng a lmuut el klou a ultutelel er a klemedengei me a duch er kid. Ngkmo: “Ngak a milsiou el circuit overseer. Chelecha e ak mtebengii el kmo alta rudam me a rudos a mla obes aike el cheldecheduch el kultobed, engdi ngdiak lobes aike el tekoi el kurruul el kirir.”

17. Ngtecha dirrek el ngmai a klungiaol sel dolecholt a bltikerreng?

¹⁷ Sel dolecholt er a bltikerreng el mora rechad, me kid me kede ngmai a klungiaol er a rolel el dimlak dolatk el kmo ngmo uaisei. A Jonathan el kiei er a New Zealand a kongei er tia el tekoi. A ta el Sebadong er a ieta sils, e ngmilsa pioneer el odam el omerk er a klumech el di ngii el tang. Me ngika tilbir el mo oureor lobengkel sel Sebadong er a ieta sils. Ngdimlak lotebengii er tiakid el taem a klungiaol el lebo el ngai er a ungil omerellel. A Jonathan a kmo: “Ngar tiakid el taem er a klengar er ngak e ngdimlak a deuil a renguk lomerk er a klumech. Engdi sera kurrenges er ngika el odam el olisechakl me a omesiungel a kmal bekerredechel, e ngmlo soak a lomerk er a klumech. Ngdirrek el mlo er ngii a ungil sechelik el ngilsukak el mukeroul er a klereng, e mo soak el omerk er a klumech, e lmuut el mo kmeed er a Jehovah.”

18. Ngera soal a Jehovah a doruul er ngii?

¹⁸ A Jehovah soal kid el rokui a demukeroul er a bltikerreng er kid el mo er ngii me a rechad. Ngua bla desuubii, ngsebeched el smisichii a bltkil a rengud el mora Jehovah loeak a donguiu e dolebedebek a Tekingel, e doluluuch el mo er ngii er a bek el sils. Ngsebeched el mukeroul er a bltikerreng er kid el mora rudam me a rudos er kid loeak a dolengeseu er tir. E sel lemukeroul a bltikerreng er kid e kede lmuut el mo kmeed er a Jehovah me a telungalek er kid er a klereng. Me ngii a mo er ngii a resechelid el diak a ulebengelel!